愛屋及烏

愛屋及烏呢個字我都識咗好耐, 不過最近就真係深深感受到!

 

男朋友一家(一個媽, 兩個家姐)都好好關係, 媽媽同兩個家姐都好錫好錫呢個細佬仔, 為佢籌謀各樣事情, 連結婚新屋都在所不辭的幫忙. 咁佢哋錫細老仔都係應該, 因為真係一家人, 同一條根嘛. 至於我嘛, 在佢哋來說, 點樣都係外人一個. 但是這兩年拍拖的生活, 加上搞結婚同新居的事, 看到她們對我的關懷和慷慨, 我真係深深感受到"愛屋及烏"呢四個字!

 

就好似二家姐因為愛細佬仔, 佢會買好多mask比我用, 仲會買衫比我添!

 

又好似未來奶奶, 佢好鍾意玉, 前星期見到隻好幼的玉鈪, 勁鍾意, 覺得我帶會好靚, 又買了比我.(雖然我帶唔落)

 

再好似大家姐, 見我仲有兩個月就結婚, 竟然送了10張H2O的 Collagen 8000 coupons比我. 頭先去攞, 原來一張都要$350, 十張即係$3500呀!!!! 佢都係想我做個靚靚新娘.

仲有好多其他事情都不能盡錄.

 

其實佢哋都無呢個需要對我咁好, 但佢哋因為愛細佬仔, 所以都愛埋我呢個"外人". 實在我自己的媽媽同哥哥, 都未有咁對我, 他們連問下我結婚新居有咩要幫手, 都無問過一句.

可以嫁到比佢, 真係我的福氣, 亦係神的恩典.

可以嫁到比佢, 我好似多了一個阿媽, 同兩個家姐

我真係好感動呀!

床頭方位

上星期五, 跟男朋友發生了點磨擦, 其實應該係我令到他跟他媽媽發生磨擦. 原因是一個床頭位.

比幾張圖大家看:

一般來說, 以風水的角度來看, 床頭係唔應該沖住個頭, 即係一開門, 係唔應該就見到你個頭橫放响度, 如下圖:

 

 

 

某程度上, 呢個擺位一定唔會出現, 一來開唔到門, 二來應該唔會有人咁將張床放房中間, 無靠山之餘, 亦極到奇怪. 但呢個位就正正是風水學上的大忌, 因為門沖正個頭, 對人的身體唔好.
而auntie就不知道從那裡聽來的學說, 話頭唔可以對住個門, 而腳亦唔可以咁young住個門, 佢話只有死人先會對腳young住個問, 即係下圖, 佢係覺得唔啱的:

如果只有死人先會腳young門, sorry, 我媽, 我, 我朋友, 都應該係死人囉.

佢話下圖先啱喎:

我真係從來無見過任何一個人會將個床頭同個門放埋一邊. 都唔好講話個頭只一牆之隔會好嘈了, 亦都唔講床頭同衣櫃奇怪地方對角了, 問題是每每個廳有咩事, 你瞓係上邊, 你係唔會可以一坐起來便看到個廳發生咩事, 有咩人响出面囉, 仲要扭住條頸先可以望出去. 最慘係扭住條頸都望唔到, 因為個門擋住.

後來我深深不忿, 做了一樣基督徒唔咪好應該做的事, 就係上網睇啲風水網頁, 睇了六至七個, 無一個網係話佢的擺位係啱囉! 只有話應該個人瞓醒坐起身, 係可以不用扭頭便望到廳的擺位先係最好, 最舒服.

最後我sent了啲link比佢, 叫佢print比佢媽媽睇. 我亦不知佢最後有無加幾句, 現在維持我喜歡的死人擺位! HAHAHAHA. 其實瞓呢張樣既人係我同佢個仔, 點解都要搞到咁複雜呢?

 

再進入地獄

下星期四去再揀衫, 揀得啱可以全部都轉款, 所以又要進入地獄了. 自從1月影完相, 都放鬆了大半年, 好彩都無咩肥番, keep埋呢兩個月便革命完成!! 加油啊!

上次地獄, 我買orbis的代餐做午餐. 我叫佢做"自己扼自己餐" 而我的同事就叫佢做"太空餐", 都幾見效. 每個午餐cut走2/3的卡路里, 晚餐正常, 就可以減到肥, 有番條腰,都唔咪辛苦.

今次, 我試下fancl, 睇落比orbis的好味好多, 又睇下成效如何~~

 

 

今日試番茄味. OK喎! 但個SALES話三文魚味好食啲. 明天試!!

 

 

起碼, 我覺得比ORBIS那三款 ~ 奶昔, 湯, 同米粉, 都好味! 唔知可以頂住個飽肚感幾耐呢!

觀禮咭 ~~ 完成

經過上次錯字的教訓, 今次真係好小心好小心睇完又睇再睇, 也叫男朋友用伴娘都睇一片, 先至攞去印, 即使印完拎的時候, 都仲係好擔心又再鬼x眼有錯字. 最後...似乎應該都係ok了!

 

雖然不是十分精美和特別, 但總算是我自己一手一腳設計和弄出來的. 我對photoshop一竅不通, illustrator也只上了個初級班, 但我都堅持自己去設計, 只是有需要時就問一問design的同事, 又或者上網search下有無啲online tutorial, 最後終於都完成了!

中式帖, 觀禮帖都已大功告成! 即代表炸彈已經預備好了!

小紅鞋

今日食飯前經過another (好似又即係k2), 見到一對閃靚靚的紅鞋仔, 立即雙眼發光! 這一對絕對可以用來襯我的褂, 然後大日子後亦可以繼續著! 食完飯再回去睇, 睇埋個價錢, 二話不說便買了! 特價了$202.3咋! 真係非買不可啦!!

 

中式囍帖

昨天去攞回我的中式囍式. 好靚好開心好特別, 絕對係只有我呢日結婚的人才可以用的一張帖! 多謝老闆娘好介紹!

 

 

心驚胆戰地遞交擬結婚通知書

今朝去交擬結婚通知書. 一路搭巴士的時候都很擔心, 怕自己又大意帶漏嘢, 睇來睇去, 都只係話帶同兩人的身份証明文件, 但無講正本定副本喎! 我只係有我的正本同他的副本, 萬一原來係兩個都要正本, 咁點呀! 好擔心, 擔心要再去過.

book了8:45am, 8:40am便去到, 前面有一班內地人在排隊, 又唔咪好多, 5-6堆人咁啦!

等到開門, 靚仔哥哥便叫網上book了的可以去一號窗, 咁我就直接去一號窗. 個姐姐第一個問題就問我兩個係咪第一次結婚啊? 然後又問幾時結啊? 跟住再問係咪行教堂啊? 最後就比了張紙我填, 填好等叫名. 跟住三號窗的姐姐叫了男朋友的名, 我便行埋我. 感覺好好笑, 叫個男仔名, 但一個女仔走去, 可唔可以醒啲知道得個女仔去, 便叫個女仔名呢?

 

anyways, 呢個三號窗的姐姐, 全個過程都係口黑面黑的, 好似我殺咗佢全家咁. 可以寬容啲嗎? 我係來做喜事啊! 三號窗姐姐第一個問題又係問我, 我哋係咪第一次結婚! 跟著同我入完資料, 便收$305, 然後印了一張紙叫我check資料同簽名. 簽好比佢, 佢好快咁同我講:"咁你結婚果日簽番呢個名喎!" 我話:"吓?" 佢話:"你唔想用呢個啊? 咁义咗佢再簽囉!" 好衰架, 唔早出聲, 我未練好我個簽名....其實我啲字一向都幾肉酸, 自從三年班後都無再進步過, 所以個簽名其實都唔咪幾見得人. 原本打算練一練, 到結婚果個簽個好啲, 怎知現在卻要我簽. 最後...枝筆又重, 又手震震(心驚胆戰嘛!), 所以簽了一個勁肉酸的名出來. 唉....灰爆!! 同三號窗姐姐玩完, 佢比了將紙我, 要男朋友7月30日後攞住呢張紙去拿教堂紙. (究竟係因為佢無來, 所以要遲啲攞? 定係個個都要咁樣遲啲再去攞呢?) 之後佢又叫我等! 又唔講比人知等咩喎! 都唔知等咩, 我以為淨係等攞番我張身份証, 怎知....

跟住六號窗哥哥叫我, 第一個問題又係問我, 我哋係咪第一次結婚! 然後又問我同男朋友有無血緣關係. 呢度感覺又係好奇怪. 其實我又點會知呢? 大概一個姓陳, 一個姓黃, 又唔同郷下, 應該都無血緣關係啩! 跟住六號窗哥哥竟然叫我宣誓喎! 我生平第一次宣誓就咁就獻上了比呢個哥哥. 點解要宣誓既? 好唔明. 誓詞只係確定我交的資料無誤. 唉...最肉酸的是, 我唔識讀最後一個字 ~~ 訛 呢個字! hahaha 早知睇一次, 睇清楚有無唔識讀的字先宣誓啦! 宣完誓就走得lu!! 我就咁就完成了"心驚胆戰地遞交擬結婚通知書". 又完成一個項目!

點解婚姻登記處的哥哥同姐姐無恭喜我既! 我見有個jm的blog, 佢話佢去交的時候, 個姐姐會恭喜人的. 成個登記處, 一啲歡樂的氣氛都無既! 仲衰過我去做身份証果個office.