都幾relax的四日新年假

其實一向我係新年都唔忙, 即使未嫁的時候, 都只係年初一需要出動拜年, 原來嫁咗後都仲可以維持, 都幾好!

先由年三十晚開始講. 是晚同老公各自回家陪自己的媽媽. 原本同媽媽食完飯, 打算滙合老公去大埔行花巿, 因為佢有個朋友(即係伴郎) 响大埔個花巿開檔. 但後來老公又話唔想入, 最後就他跟二家姐陪他們媽媽去葵芳的花巿行, 而我則跟媽媽出了旺角球場的花巿行. 因為早, 所以都唔咪好多人. 我乜都無買, 老公就買咗支桃花仔.

年初一

九點幾起身便拿拿聲裝身出門, 先去奶奶家跟她食個早餐, 唉...以前年年媽媽都會初一晨早煮斎食, 我家的習俗係新年第一口要係斎. 但今年......係美心的羅宋湯通粉 .

同奶奶食完美心早餐, 上去她家, 斟杯茶比佢飲之後, 我哋又拿拿林搭車去我外婆家. 因為習慣上外婆所有兒孫都會係初一上去跟她拜年同食開年飯, 之後就唔駛再逐家逐戶拜年, 所以如果我miss了呢一餐, 我就要走訪多家, 所以點都要趕去! 今年好特別, 外婆三個在外國的仔女都回來, 所以全部七個都齊集晒. 呢一幕, 應該係我有記憶以來, 都未出現過. 我阿哥更形容為"比日蝕更難遇到的事情". 我相信外婆今年一定好開心! 又因為咁齊人, 所以就係咁影相, 尤其是"七星伴月"相!

差啲漏咗! 係外婆家影相影到3點幾, 就返去老公婆婆的安老院睇佢, 再回奶奶家食開年飯. 呢餐真係開年, 因為大家姐同阿仔鬧交, 同係鬧得好恨好認真....仲有, 奶奶又預備勁多餸, 4點幾又買了兩盒斎比我哋食, 6:30就話開飯, 邊有人食得落, 叫了盆菜之餘, 仲要叫埋燒味拼盆, 同埋菜, 之後自己又再煮多幾味菜. 個個飽到食唔落的時候, 枱上面每一碟菜個樣都似未郁過, 真係反眼....最後奶奶咪又比三個仔女話囉! 希望佢下年唔會再係咁, 真係好浪費食物呀!

年初二

瞓到十點幾先起身, 煎咗啲糕點同老公食, 休息咗一陣, 我就出去跑步, 老公就呆在家同朋友商討活動. 跑完步回來, 同老公落街食午餐, 又去行咗陣taste, 跟住便準備出去睇煙花. 我好鍾意睇煙花, 但老公好怕迫, 所以我都唔敢成日嘈要去睇. 難得今年無嘢做, 試下問佢, 佢又話ok喎! 真係開心. 因為佢怕迫, 所以我都唔帶佢去正中間的位置. 六點去到, 係尖沙咀中心對出海旁見有花叢有位坐, 便坐低等了. 呢個位都算睇得清楚架! 跟住仲好快, 唔駛半個鐘就返到將軍澳, 走咗去稻香打邊爐, meet到9:00後的優惠!

年初三

團契團拜, total 四個站, 第一站我家, 跟住出油塘, 然後麗晶, 最後旺角. 好開心好熱鬧!!

然後返教會練詩, 再回家同老公的朋友食飯, 又係稻香打邊爐!!

年初四

早上返崇拜, 跟住午餐, 然後行街巿, 再去跑步. 今日老公都有跟我出去, 不過佢踩單車, 我跑步. 都好!

跟住就去奶奶度同"舅父仔"一家食飯. 食6:30, 食飽又無再上奶奶度, 所以9:00就返到屋企. 超爽!

咁就過咗個新年假期!!

祝大家開工大吉! 兔年夫妻恩恩愛愛! 搞緊結婚的就一團和氣, 順順利利!

或者我都係時候要走

今朝返到公司, 睇到一個email, 係由那個潛水HR DIRECTOR出的, 睇完我超慶, 即刻打了個email比我出差了的老闆, 話佢知我好失望, 我覺得不被尊重.

呢個HR出的email, 係"I am happy to announce that members from AAA & BBB have formed the Recreation Team for our HK office: Chairlaies: XXX & 洛琳......There will be at least four events a year where 2 will be jointly held....."

點解公司突然有個Recreation Team我係唔知? FINE, 我職位低微, 唔話我知唔緊要. BUT點解我做了Chairlady都唔知? 我老闆擒日出發前只係同我講, 我會要幫手搞annual dinner (我年年都要搞), 不過不用做lead, 幫吓手就ok. 但係佢完全無提過會有個recreation team, 仲要係要搞4個活動. 我估我職位唔咪真係低微到連小小尊重都得唔到啩? 我真係超嬲超唔開心. 我唔咪唔肯做, 但絕對唔咪事前無同我講過就出個email, 我係要响個email先知道自己被擺咗上枱囉! 我真係好唔開心囉.

好彩, 我呢個敢言敢爭取又唔怕死的小薯仔, 得到老闆的回覆:

"Agree with your point. This is new to me as well.

XYZ (HR Director), this is not what i agreed with SSS (the other MD). Not sure what happened."

跟住那個XYZ就叫了我入房, 同我傾, 同我道歉. 亦可以比我選擇係咪真係咁唔想做chairlady, 如果係, 我老闆又ok, 可以換第二個人. 咁我條氣都順啲, 不過我真係好唔鍾意呢個潛水HR囉!

不過, 係咪真係可以唔做呢? email佢又出了, 再補個email話換人? 會好肉酸囉! 亦會令人覺得我搞事囉! 唔通逐個同事同佢哋解釋係公司先不仁, 所以我才不義咩! 換邊個呢? 換邊個都會令我同那replace我的同事感到尷尬囉! 我真係唔知點!

其實我份人, 我係鍾意搞活動, 但我唔鍾意做lead果個, 亦唔鍾意要站出來講嘢. 我可以好helpful咁幫你做既啲嘢, 但我唔需要站出來比人知. 其實响呢度做了三年, 第一年搞annual dinner, 搞到要自己做MC, 仲要係講英文, 我已經超唔鍾意同超大壓力. 第二年, 唔駛做MC, 但都要lead成個event, 根本無機會enjoy個event, 都係唔份氣. 第三年, 終於同老闆flight到, 可以唔involve個annual dinner, 但都要做啲back up同logistic既嘢, 都算. 怎料, 今次又被擺上枱做lead, 仲要做一年搞4個events. 真係十萬個唔願意.

擒日先同girl傾計, 話都係唔轉工, 因為呢份工都幾hae, 老闆又睇我, 人工亦ok, 咪留得幾耐得幾耐囉. 怎知現在卻不被尊重之餘, 仲要迫我做我十萬個唔鍾意的工作, 或者我都係時候要走了.

大婚日相簿

話說我那個相當實惠的婚禮攝錄package, 除了包1photographer & 1 videoman之外, 仲有包成長片段, 早拍晚播, 仲有一條website, 可以幫你upload 700張相, 讓你可share條link比人睇你啲相. 另外仲有四份禮物比我揀. 第一份我揀了要番母帶啦! 第二份就係要相簿. 第三同第四份仲未揀, 我可以揀要15R family photo, 又或者其他結婚當日用的service (不過已經用唔到, 所以可能要兩張15R family photos).

 

total 10 pages + 封底同封面. 唔算話好靚, 但quality都唔錯. 而且, 我揀相比佢, 佢排版後, 佢會send比我approve, 這是我完全無預計過, 我以為我揀完相佢就出相簿比我. 第一次layout, 有點亂(我估我要求真係幾高, prewedding的排版同呢個, 我都係覺得差). 跟住我又好有心機用powerpoint逐張逐張話佢知我想點. 第二次layout, 好啲. 只差幾版要再執一執. 最後來來回回, 都執了四次. 其中排版哥哥仲打來問我, 同埋比意見我. 呢個哥哥都幾有禮貌.

不過我今次唔咪想講呢間公司的product, 而係想講service.

其實一開始join呢間公司, 老闆steve的態度同服務已經一流. 而他亦很樂意用唔同的途徑同客接觸, 除了esd life有forum, 後來仲開了facebook, 我有時會响facebook問佢嘢, 佢亦好樂意答. 有時, 我post了啲唔關佢事的status同相, 佢又comment下同like 下, 真係當你係fd咁, 令我覺得好舒服. 直到宜家, 我個婚禮完了, 佢同佢啲同事, 都仲係好helpful, 絕對唔會明知你唔會再幫襯, 就當你係陌生人囉! 好似擒日去攞相簿, 舖入面好多人, 我等了一陣, steve serve梗一個客, 見我等得耐, 都停下來話幫我攞先. 跟住我話我仲有兩份禮物未揀, 佢話keep 單就ok. 跟住我就話我email同佢傾啦! 呢間公司, 由開始到現在(婚禮三個月後), 都給我好helpful, 好nice的感覺.

我唔可以話佢啲相好靚, 但始終我個package真係平. 一分錢一分貨, 所以我都好appericate呢間公司. 如果有人個budget係咁上下, 我都會繼續介紹.

呢間公司叫純美新娘. 係金都二樓.

做人子女甚艱難

睇咗wingcsm的"左右做人難", 都覺得好有同感, 有時候, 都真係唔知點去處理同父母的關係.

我父母在我15歲左右就離咗婚. 佢哋離婚對我影响唔算大, 因為我果時係支持架! 我覺得佢哋係相處唔到的話, 分開總比每天在吵架好! 我哥哥中七的時候便去了美國, 一去就十多年, 回流後不夠一年便結婚, 所以基本上哥哥係無咩同媽媽住埋一齊的日子, 反而我就同媽媽相依為命.

他的父母, 也在他很小的時候離咗婚, 對他來說, 亦不算有大影响, 因為基本上, 他是很憎他老豆的. 他兩個家姐都嫁了十多年, 所以這十多年, 也是他跟媽媽相依為命.

兩位媽媽在同一天要同個仔同個女分開, 我同老公其實都好明白. 所以我哋都盡量每星期都會回家同佢哋食飯一次. 甚至連新婚第一個聖誕節, 我都提議同佢哋兩個上大陸, 等佢哋無咁悶.

咁25-27日都陪咗佢哋啦, 所以1月1日, 我就期望同老公可以去拍吓拖, 或者食餐好的. 果日我哋瞓都10點幾先起身, 最後亦搞到1點先出得門口, 之前都爭論了好耐去邊度做啲咩! 佢又唔講話要返去同佢阿媽飲茶(可能他其實都唔想), 跟住知我阿媽對眼有事, 又話不如返去睇我阿媽(吓...咁咪又無咗個假期...不孝), 最後我有個阿姨去我媽家睇相, 咁有人陪她, 我哋就走咗去西貢行, 食咗個要等好耐的西餐, 去同人哋啲狗玩下, 又去食咗個好好味車仔麵, 便回家行超巿. 見未肚餓, 我就去咗跑步, 跑完步就炒番31日晚剩的炒飯食. 咁就過了我們的1月1 日.

到1月2日, 星期日例牌要到奶奶家食飯. 我去到換好了拖鞋, 便入廚房叫奶奶啦. 佢的反應好冷淡. 當然我唔會理佢啦! 後來聽見老公走入去, 又氹, 又鍚, 先至好似好啲笑容, 但奶奶望我的眼神依然唔咪咁友善. 當然, 我繼續都係唔會理佢. 後來我問番老公, 原來奶奶嬲我哋1號無去同佢飲茶...... 點解1號要同佢飲茶呢? 同得佢飲茶, 我又要同我媽飲茶....上次我煮飯比奶奶食, 原本都唔打算比我媽知, 怎知我奶奶响大陸的時候, 同我媽傾開計, 竟然講咗出來(雖然我無交帶話唔講, 而亦都唔會咁交帶叫佢唔好講囉). 果吓我幾尷尬, 我媽跟住就响度話無食過我煮的一餐飯...唉...真係煩!

兩個阿媽都係要面對得番一個人住的日子, 所以我想公平啲, 如果每星期日都要返奶奶家食飯, 我都會要我老公同我一齊返我媽家食飯. 同埋其實啊, 我哋無真係每星期都返我媽家食飯, 因為星期日呢啲黃金檔期又比佢家霸了, 老公又話唔想星期五六都無埋, 咪唯有weekday返我媽家, 但有時候又真係有嘢做返唔到. 所以其實佢阿媽已經好得多了, 佢仲為咗我哋1號無去同佢飲茶而唔開心, 真係好難做啦! 我哋日日返工, 佢哋兩個都退休了, 我哋都想weekend同假期可以休息下同拍下拖啫, 可以體諒下嗎?

仲有一件事又好笑. 我老公好鍾意食臘腸同潤腸, 咁我媽對食要求係高啲, 所以佢會去啲食蛇的地方買, 所以我老公成日話我媽家煮的臘腸同潤腸好味. 又買比我煮比我老公食. 我奶奶就唔知點解好鍾意買美心臘腸券送比人, 又問我要唔要臘腸同潤腸帶返屋企, 我咪話我家有, 我媽咪買咗比我哋, 所以唔要. 跟住我就見佢面上一黑...唉...又唔開心, 好似覺得我只要我媽啲嘢唔要佢啲嘢. 大老啊...係你個仔唔鍾意食美心, 你都知, 點解仲要我哋攞美心臘腸同潤腸啫. 你明唔明...唔咪我唔想要, 係你個仔唔鍾意. 亦都係佢個仔同我講話唔想次次去親兩位母親大人家, 都要攞住一袋二袋回家, 好辛苦(因為我哋住得遠). 咁所以我咪一律咩都話唔要囉! 又面黑, 關我咩事啫! 最後為咗氹佢, 咪要了盒潤腸囉(仲有冬菇, 而我哋又係一袋二袋咁返家囉!

同媽媽&奶奶返大陸

新婚兩個月, 我同老公就向高難度挑戰 ~~ 同媽媽 & 奶奶返大陸!!

我媽同我奶奶係好唔同的人, 一個係超敏感型, 一個係冷淡兼百彈教主, 我同老公一路都好疑惑佢哋放唔放得埋一齊. 如果放得埋一齊就好了, 兩位同仔女相依為命多年的媽媽, 可以有個伴, 真係好幾好架.

趁聖誕, 我就多咀向老公提議跟奶奶返雅居樂, 亦叫埋我阿媽, 咁兩個阿媽都唔駛話要過一個lonly christmas啦!

25號一朝早出發! 可憐我係疴住咁上去. 但係去大陸, 除了瞓, 就梗係食啦! 所以都唔理得咁多, 照食, 所以亦係照疴! 好彩我都唔算疴得嚴重, 要攬住個廁所去.

聖誕夜精句: 話說臨瞓前又去疴多次, 疴完無晒廁紙. 我同老公講啦! 佢就响房度搵廁紙, 怎知無喎! 因為我哋瞓三樓間房, 佢唔想落去, 佢同我講:"你可唔可以唔疴呀?" (灰爆)

26號早上感覺ok, 早餐去了一間茶餐廳食了個粥同炒麵, 但食完行了一陣, 又疴. 不過疴了都好, 因為跟住要去搭一個鐘車去石岐. 去到石岐行了條步行街就去一間石岐老食乳鴿. 係奶奶強力推介, 基本上佢哋上親去都會去呢間嘢度食. 但我覺得一般. 食到碟炒飯就出事, 好油, 最後兩口, 我含了响個口好耐都唔想吞, 好似啲BB咁.

跟住就開始唔舒服. 回程果程chok車就攞了我命, 一落車, 我就變了chok樣, 但又未嘔得出. 我奶奶竟然即刻又捉我上另一架車, 又繼續chok, 結果跟住我一落車就嘔番隻乳鴿出來. 我廿幾年無嘔過. 真係多謝佢!! 我由細到大都好怕嘔, 亦好少嘔. 所以可以搞到我嘔, 都真係幾堅! 最慘...因為我落車後, 架車就開走, 車我老公去書店, 所以我嘔的時候, 我老公係唔响我旁邊, 唔開心. 呢一嘔亦搞到我眼肚, 眼邊爆了微絲血管, 現在好多紅點, 呢個係我好怕嘔的原因.

呢晚, 我無食dinner, 因為個胃好頂, 無胃口, 就係見到嘢食就想嘔. 怎知, 奶奶成餐飯就係咁用個慘樣望住我, 係咁問我 "你食唔食少少呀?", "你真係唔食呀?" "不如食啲啦?" "買啲麵包比你今晚食好無呀?" 救命...佢明唔明啫?

哼...跟住食飽飯返去, 輪到奶奶自己有事, 到佢疴嘔一齊嚟! 都唔知發生咩事! 我唔舒服, 無理佢, 沖完涼就去瞓.

27號, 我一起身, 精神爽利! 個肚無再攪, 就走落去同媽媽睇碟. 奶奶就死吓死吓咁行來行去, 話執嘢. 叫佢瞓下, 又話瞓唔到, 攤下都好嘛, 比佢激死. 跟住佢疴下嘔下又去瞓下.

跟住就去食個午餐, 我個胃口番, 咩都覺得好食. 奶奶就食了兩啖白粥, 就食唔落. 然後老公陪奶奶返去, 我同媽媽去行超級巿場. 跟住返去執好嘢便離開雅居樂. 因為怕回程大塞車, 所以上車前去食碗麵, 5:30開車. 9:30回到太子. 都無想像中咁塞車啫. 回到香港, 奶奶又無事了!

就咁樣, 三日假期便過去了. 媽媽同奶奶...看似都相處到. 都叫坐得埋一齊, 無試過有啲咩意見不合. 我估, 大家第一次咁相處, 點都會客氣一點既! 但我老公在返屋企的地鐵上就全程係到勞勞嘈嘈, 話好辛苦, 要照顧兩個病人(其實佢邊有照顧過我), 跟住又話我媽煩, 百彈教主, 咩都要彈, 咩都講一餐. 哈哈...女婿仔...比心機學吓點同我媽相處啦!!

低能父母 > 白痴兒女

今日在facebook看睇朋友轉載了以下的一片"心聲", 亦是我的心聲.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
by Alan Li
很少這麼動氣，動氣得要寫點東西來「小」人。
那麼，我只好先君子，後小人了：
如以下言論得罪了閣下、閣下的子女親朋或遠親近鄰，小弟在此先行致歉；但實在，有些事情不吐不快。

相信大家這幾天已經看了很多關於歐洲大風雪令港人滯留當地機場的新聞，現在聽說會勞師動眾什麼包機去「湊」他們回港過聖誕。我明白那些滯留港人，當然各有各自的重要原因，非要回來香港不可，但，天意如此，全個歐洲風雪漫天，任憑你的原因再大，也大不過客觀環境所帶來的限制，這一點，相信 (也希望) 大家明白及同意。

然而，最讓我看不過眼的，是那些在新聞報導中表現得「理直氣壯」的留學生 (及其家長)。

1. 如上面所說，當閣下看到天氣惡劣風大雪大，請問作為年齡近乎於成年人的留學生們，是否應該用用腦筋，啟動你的 common sense 去思考一下：「天氣這麼壞，應該回不了香港了。」並一早打定輸數：「全歐洲的乘客都逃不過這個滯留的宿命，我也應該一樣要在這邊等了。」

這個 common sense，簡直 common 得像大家小時候沒讀書就進場考試，自知定必大敗而回；也 common 像你年三十晚去行花市，未進去你也會知道裡面是人山人海。作為「留學生」的各位，這點腦筋也沒有嗎？為什麼有人天真得覺得自己會一定是得到優待的幸運兒？

2. 我看到有留學生直斥航空公司安排不當、毫無兩手準備云云，讓他們在彼岸徬徨無助，只得到職員一句「對不起我們沒法幫忙」的回應。我想問：為什麼你覺得航空公司在那個情況下，必先第一個幫你；更基本的問題是：又為什麼你會覺得，航空公司在那個情況下，真的可以有點什麼作為。難道國泰是故意叫風雪別停，有心讓你多滯幾小時？同時，難得航空公司職員出名友善溫和，於是大家就本著欺善怕惡的精神來找他們出氣吧？為什麼沒有走去投訴英女皇她不擺駕到跑道上幫你剷雪讓你回家？

3. 留學生你們也太沒有應變的能力吧？以後別跟人說香港人出名「適應力強、反應快、flexible」。連這丁點的應變能力都欠奉的話，以後回來香港打工，各位一定「死得好快」。(幸而我職位低微，否則最好以後別給我機會去 interview 他們，我定必會歧視這群留學生)。雖然事出突然，但，大家能否就好好接受這個事實然後想想辦法？情況擾攘了兩三天，留學生們就給他待個兩三天，希望可以得到自己想要的結果。好了，如果這風雪一下就是三年，敢問大家是否三年內就寸步不離機場，三年內就讓自己的生活完全暫停？別跟我說你沒錢，我相信學生們的家長身在香港，定必會以光速匯款給愛兒愛女。ok，也別跟我說你沒有富爸爸富媽媽，難道你自己就沒有在城市讓自己繼續生存的能力嗎？各位是大學生了吧？各位並不是還在坐校車的小學生，不是「下下都要人湊」的。

當你「長大後」望回頭，看到這段滯留異地的往事，你又會如何向人提起呢？你的版本會是「那次我在機場睡了兩晚，原來真的很難捱，後來我還是面對現實，找了個地方落腳，再遊歷幾天讓天氣好一點，最後安然回港了。」還是：「那次在希斯羅機場，那個國泰空姐編號 12345 的，給我投訴得體無原膚流淚披面，他們才以八人大轎送我上頭等機位讓我優先返港。」同學們，這樣很威嗎？

4. 有人說包機。好，現在什麼差事了？動輒就說包機？留學生們在那邊變難民了嗎？再說，香港特區政府的包機，是否有特別通道，不需要經過任何一片歐洲的天空、它飛的航道是特別好天的？還是包機的機身採用小叮噹的隨意門，讓你安穩地避開風雪直接抵港？大吉利是地說，萬一，真的大吉利是，包機遇上什麼風雪氣流天災人禍，有什麼冬瓜豆腐三長兩短，相信各位就會立即變臉改口：「香港政府評估風險能力不足！」Right? 唉。
老實說，我置身事外，沒切膚之痛，當然說得「口響」。但，我更加希望沒有在鏡頭前大吵大鬧的其他留學生們，會以一個成熟、正面的態度去處理事情、面對突變。要長大的，除了我們的下一代，還有他們的上一代。

各位覺得中聽的，歡迎讚好或分享。覺得不中聽的，歡迎留言回應。
真理愈辯愈明，不過，朋友們，correct me if i'm wrong。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

呢件事其實亦令我諗起早幾個月前, 冰島火山爆發令到歐洲多個機場關閉. 剛巧我老闆定了在那期間要到法國作一點私人事. 以我所知, 當地有一個賽車比賽, 另外他好像要出席一個不知是婚禮定喪禮之類的事情. 那次, 歐洲各機場就好似今次咁, 好多航班取消, 即使機場有開的國家, 所有機位亦都被人book了, 人家一早已經响機場等位, 幾時輪到你响家中等位的人. 但係我老闆同佢老婆, 係咁叫我幫佢搵方法, 令到佢可以去到法國, 即使要轉火車, 轉巴士, 都一定要去到. 我心諗, 佢明唔明點解啲機場要關閉, 點解啲飛機飛唔到? 係因為安全理由囉! 就算佢有錢, 有架私人飛機, 都唔會去到. 但佢就好似唔明咁, 係都要叫我幫佢想辦法. 我果次真係比佢激到我想死. 佢老婆仲係咁打來問我情況, 救命, 其實佢哋個trip係私人, 我係無責任幫佢做, 佢仲要咁煩我, 真係好討厭囉!

有時候啲人太自我中心, 每一件事都只係想自己, 只係站在自己那點去看, 卻沒有去從別人的角度去看. 佢哋唔怕危險, 唔怕死啫, 做咩要啲機組人員陪你哋去死啫? 天空上的意外不多, 但有起事來, 十居其九都會全機覆沒. 有什麼比自己的生命緊要? 過少一次節, 返少一次香港會死嗎? 學校咁多同學, 總無理由全部都要飛返屋企, 總會有些local同學仔吧! 去同學仔家借宿一星期或一個假期, 以我認識的外國人, 通常都會好願意welcome啲同學仔. 以前的年代, 留學生並不是每年也可以返香港與家人團聚, 多數的留學生都會利用假期去賺學費. 現在的學生實在太太太幸福了. 返少一年香港好似個天會掉下來咁. 比著我, 我就乘機唔返香港, 留响果邊狂滑雪了. hahaha.

希望香港的下一代, 真係會醒醒, 知道點樣去做人. 更希望啲父母亦都醒醒, 知道點樣去教兒女.

潛水的人事部

今次應該係第一次寫公司的事, 因為實在太激氣.

今日冬至, 現在1:00pm, 放飯時間, 到現在HR都仲係唔announce今日幾點放.

今朝已經有兩個同事問我究竟今日幾點放, 我話唔知, 問HR.

之後就懶好心咁打去問個HR Director啦! 問佢係咪一陣會send 個announcement出來, 等啲同事知道幾時放.

佢竟然話唔會! 咁我話啲同事點知幾時放. 佢又竟然叫我通知 (因為我兩年前有做少少HR的工作, 所以果時係我send).

我: 你哋無正式通知過我幾點放喎!

HR: 擒日响你個位隔離同你老闆講嘢時, 咪講了比你知囉.

我: 咁都算係通知咗我.

HR: 係架! (頂佢個肺)

我: 咁你即係唔會send announcement?

HR: 你唔覺我哋公司啲商層唔鍾意HR send official announcement咩?

我: 唔覺, 我只係覺得依家個HR 潛咗水.

我: 咁我私底下同同事講幾點走囉.

HR: 唔好, 我哋都要通知番其他regional office的同事, HK office幾點收架嘛, 咁佢哋就知要响幾點前要搵我哋.

我: 咁邊個通知?

HR: 你囉! 因為佢哋話以前係你sent開.

我: 我以前send係因為我仲係掂到HR, 同埋我只係sent比我自己個group (公司七月, 兩個HK office 合併了), 況且現在merged了, 我又唔咪好再掂admin的工作, 都無理由係我send架嘛!

我 (心諗): 我頂你, 咁即係要我出啦!

HR: 咁你send開嘛. 你出又得, joey (另一邊的admin, 現在主要係佢做admin)出又得.

我: 咁你想點出呀? announcement又唔得, 咁係咪好似啲holiday announcement咁, 當係通知其他region我哋放早, 從而等HK office的同事知道早放.

HR: 大概係咁

我: 但係無人正式通知我幾點放喎. 我唔會出.

(心諗: 一陣啲老闆話我做咩release啲同事, 我咪死)

HR: 咁你係咪要我send個email比你, 通知你幾點放, 你先安心.

我: 係.

HR: 咁我一陣比你啦, 做嘢最緊要係安心啫! (超 ~~ 呢啲咩說話嚟架)

我: 好, 唔該.

有咩理由呢啲嘢唔咪HR send架. 就算你要admin出, 你都要比admin知道你哋啲老闆的決定啫. 況且, 我哋公司其實係無admin department, 只不過係兩個秘書仔 + receptionist 做埋, 我哋呢啲做細既, 點知你哋老闆開會決定啲咩? 企响我個位隔離同我老闆講嘢就當通知我, 痴線架!

總之, 我死都唔出. 大家一齊無早放算了. 橫樹我又唔駛做節. 真係...妖.....