不知怎樣去等

星期六晚在練詩途中收到老公的sms, 話他的婆婆情況唔咪好好, 佢哋一家已經在醫院.

註一註: 婆婆五六年前中風, 已經開始住護養院, 我第一次見佢的時候, 其實佢已經認唔到人, 亦講唔到嘢了. 上星期日, 護養院話佢鉀低, 要送佢入院.

我一練完詩便飛的去仁濟見佢. 老公話婆婆有肺炎, 好多痰, 呼吸唔到, 所以要比氧氣, 已經比到十度了! 唔樂觀!

但見已經穩定了, 八時過了探病時間, 我們便離開.

第二朝我要獻詩, 又見晚上無收到電話, 都安安心咁返教會. 怎知, 在敬拜途(未獻詩), 老公sms來話婆婆擒晚已經要用到15度氧氣了, 係最高! 醫生話家人可以隨時去睇, 唔駛等探病時間, 好似好嚴重. 於是一獻完詩, 便同老公去醫院! 去到, 只見婆婆轉了另一個氧氣罩, 包到實一實等啲氣唔好漏出來, 又要定時抽痰. 護士入來幾次, 有一個更同奶奶講, 佢好弱, 你哋要有心理準備. 最後, 我哋由12點, 一直坐到6:15先走, 係醫院坐咗六個鐘.

回程時, 同老公都無咩嘢講. 真係唔知點安慰. 婆婆最錫係我老公, 所以我老公亦好錫婆婆, 佢話係有心理準備, 不過始終唔捨得. 我可以講的, 真係只有我哋第日在天家會見. 婆婆都辛苦咗咁耐, 唔郁得, 又講唔到嘢, 又唔認得人, 佢真係走, 都係一個解脫, 佢即時就能在天父的懷抱, 可以行得跳得, 仲可以見番啲老朋友, 一齊唱歌跳舞, 對佢會係一件好事.

擒日同前日, 離開醫院時, 我都在婆婆耳邊講, 叫佢唔駛擔心大家, 見到天父的時候就跟衪走啦!

今日問了我一個係內科做的姐妹, 我問佢通常到了呢啲情況, 老人家仲可以捱幾耐. 佢話好難講, 有啲老人家好頑強的, 可以好番出院添! (即係去番護養院) 有一啲呢, 可能幾日, 或一個月內都應該會走. 佢話聽我講話醫生護士都叫我哋做好晒心理準備, 應該都唔會耐.

但係究竟係幾耐呢? 我同老公今朝都講, 但個心唔知點, 唔知喺度等咩咁, 好奇怪. 大家呢兩晚都瞓得唔好, 瞓係瞓到, 因為真係好攰. 但就發惡夢囉! 每一次有電話響, 都好緊張! 呢啲心情, 我咁大個人都真係第一次有. 我又未至於有話唔捨得婆婆, 始終, 我連同佢講說話的機會都未有過, 我緊張, 應該係擔心自己唔識點handle老公的情緒, 同埋奶奶佢哋的情緒. 唉.... 我本身係想婆婆快啲走, 希望佢唔駛再受苦, 但耐何, 婆婆總像有事放不低, 好頑強, 點都唔肯走. 我有問過老公, 會唔會同家人商量, 選擇叫醫生唔好再做任何嘢, 等佢自然走啦, 唔駛再辛苦咁耐, 佢又話唔合神的心意, 話以人的決定去放棄繼續的護理, 就唔啱. 我唔知, 我個護士姐妹都話唔知.

呢幾日, 真係唔知點去等, 真係好奇怪的心情.

玩嘢咩!

擒日收到個email, 叫我print份嘢出來比老闆簽啦! 咁佢個email打了一句, 搞咗我成個鐘.

佢個句嘢係:

When you print out for XXX please, by hand, strike off "employees" at the end of the first sentence in 2H of the Statement of Work which follows Annex 2

以我的低能英文理解, 佢叫我用手畫咗Annex 2後面, Statement of Work 第一句最後個employees呢個字. 首先Annex 2 只係得一版, 之後就到appendix 1, appendix 1係有10幾版, 我無可能搵比佢. 我試過用search呢個function, 但因為係scan copy, 所以search唔到. 我又諗過, 佢會唔會話係annex 2果版呢, right after annex 2呢個字, 但我睇晒成版, 都無囉. 最後我以為係我啲低能英文真係咁低能, 咁我就sent了句嘢比個fd, 我覺得佢英文應該幾好, 佢叻呀, 估到2H 代表2nd Half的意思. 我只以為係打錯. 最後我搵咗好耐都搵唔到, 放棄, 收工.

今日姐姐返工, 我咪問佢, 但佢都理解唔到, 就叫我直接問果條友. 我問佢响邊頁, 佢就咁答 p.14. 即係appendix 1的中間. 頂佢. 明知我搵唔到, 可唔可以講多少少呢? 都唔明呢人點解會咁唔helpful.

最後我終於係p.14的中間 H 點第一句尾, 搵到呢個字. 我真係想飛去英國打巴佢.

其實好簡單一開初叫人係page 14, appendix 1的H point搵咪得囉. 又要2H of the Statement of Work, 仲要嚟多句 which follows Annex 2.

同番個朋友講, 佢話呢啲人心地唔好, 簡單複雜化, 想人地幫唔到佢, 之後就丙人. 我都覺得係. 専登寫到懶複雜, 等人哋搵唔到, 打擊人. 好嬲.

火燭 @ 奶奶家

唔知係咪天氣太熱的關係, 個個都比較燥, 擒晚一去到奶奶家, 坐低食餐前小食, 大家姐同老公就開火, 我坐在一旁, 完全唔知發生咩事. 我哋倆仲好開心咁係樓下買咗條好似香蕉的雪條上去, 比大家食. 怎知, 大家姐又買了龜靈膏喎! 再怎知原來奶奶又整了芒果西米露, 又買了炸魚蛋 (題外話, 實在我真係諗極都唔明, 做咩一個二個都鍾意買嘢上去飯前食, 尤其是奶奶, 又要買小食比我哋飯前食, 到食正餐時食唔落, 又話我哋之前食咁多嘢. 真係好奇怪).

 

咁大家姐同老公就一路食魚蛋, 就一路唔知講咩, 講吓講吓就開火嘞. 我估大概係言語上出了誤會, 最後老公就躲入房. 跟住奶奶又出來開火, 話我哋做咩仲唔開大張枱. 但實情係, 我哋上到去, 其實成將枱都已經放滿嘢, 佢就不斷催個孫女入去廚房攞啲碗同西米露出去, 咁孫女就梗係傻更更好聽話咁入去攞, 如是者, 成張枱都係碗, 奶奶出來見到, 就開火話做咩叫我哋開大張枱咁耐都唔開....我, 孫仔, 孫女, 同大姐夫, 就好無奈的站在一旁, 睇奶奶同大家姐開火了. 奶奶仲鬧大家姐做咩講咗佢知有西米露, 都仲要買龜靈膏. (其實又係喎, 兩樣嘢其實都幾相沖)

跟住鬧鬧吓, 又燒到我老公話佢唔聽電話, 所以講唔到佢知家裡有炸魚蛋, 西米露, 同龜靈膏. 但實情係, 我老公係無miss call囉. 唔知大家姐打咗去邊個星球.

 

最後, 擒日大家姐全晚黑面, 因為佢買了龜靈膏, 啲細路食唔落西米露, 而大姐夫係唔食芒果), 所以佢就自己哽, 又因為同我老公鬥氣, 原本買比我倆的龜靈膏佢自己哽了. 即係佢飯前係食了一盅龜靈膏, 兩碗西米露, 幾粒炸魚蛋, 先再dinner, 最後, dinner後, 佢胃痛.

近排唔知做咩, 每個月都有一兩次會開火. 其實一個星期先返去一次食飯, 做咩要搞到家嘈屋閉呢? 咪搞到個個都唔想返去. 奇怪.

我奶奶仲奇, 其實佢自己本身係唔鍾意煮嘢食(我覺得), 但硬係要每個星期煮飯, 仲次次都要煮好多樣, 煮到身水身汗出來又話辛苦, 叫佢唔好煮, 佢就發你脾氣話唔鍾意食唔好返嚟食. 真係 O 晒咀. 又次次煲一大煲湯, 可惜又唔好飲囉. 今期...連續三星期煲同一款湯. 我同老公倆, 仲有二家姐, 係~~, 平日無咩湯水, 但唔駛個個星期都係同款湯喎, 我本身都幾鍾意飲湯, 但都無心機飲囉.

其實, 我真係唔想個個星期上奶奶度囉!

團購玩上癮

前排發現連yahxx都有團購, 心想佢做得團購, 都唔咪騙人果啲既, 就入去睇下. 不得了!

先買咗四張日本拉麵店的coupon, 以$22可以去食碗價值$48-52蚊的拉麵喎! 抵啦! 出面連味精拉麵都要$40幾蚊碗啦! 於是就買了四張. total $88!!! 擒日食咗 ~~ 失望的!

跟住又見到旺角一間waffle店又做團購. 同老公去睇槍時, 都望過下, 好多人買, 但見都要$30蚊個waffle, 我又唔咪超級愛甜者, 一直都無試. 見團購$16就可以換一個, 又買了張!! 擒日食咗 ~~ 無咩特別!!

跟住又見潛艇三文治, 都有團購, $25蚊可以當係$50的coupon, 見公司樓下有, 於是又買了兩張. 當無飯帶的時候, 又可以攞去換巨型三文治食. 今日食咗 ~~ 比個餐牌玩死, 最後仲要補多18蚊, 買了個超大餐, 夠兩人份量.

上星期, 原來"熱郵"都有link一個團購, 見到公司附近有間幾好評的墨西哥小食店有團購, $30買價值$60的coupon. 佢一個套餐就係50幾60蚊, 上次食過覺得幾好味, 想試多幾款, 於是又買兩張.

哈哈...團購真係幾好玩幾抵!不過真係小心上癮. 幾十蚊幾十蚊咁買, 好易出事!

又不過, 用團購買啲想試的餐廳coupon都好, 起碼可以平價試下間餐廳的虛實, 如果佢係唔好味(好次那間拉麵店), 都唔會覺得lost咗囉! 如果要我以正價食唔好味的餐廳, 我會好唔開心囉!

端午節的迷思

其實我好想問下點解端午節要做節食飯?

 

中秋節, 我明, 什麼人月兩團圓嘛. 冬至, 我都明, 冬大過年, 同埋慶祝一年的豐收. 新年團年飯, 唔駛講我都明. 咁端午節要做節食飯個意思係咩呢? 端午節係記念屈原的, 難道做節, 一家食飯慶祝大家都無被屈? 我娘家一向都無端午節做節, 所以每一年男家在端午節時份話要做節, 我又好自然問, "做咩節呀?" 然後我又會問我老公做咩端午節要做節? 跟住我又會比我老公話我, 問咁多做咩啫, 都係搵個籍口一家人食飯之嘛! 然後我就會扁著咀話, 你屋企個個星期都一家人食飯架啦! 攞嚟煩!

 

不過我後來又發現, 原來又好多家庭, 又真係有端午節做節喎! 可能只係我娘家的與人不同罷了!

最後, 今年的端午節, 我自己呆在家! 老公, 哼, 早上在床上仲懶SWEET咁同我講, 過時過節, 又想陪阿媽, 又想陪老婆. 咁我好識做既, 咪叫佢返去陪佢媽LUNCH囉. 最後12:00出門口, 卻搞到6:00先返來囉. 原來陪完阿媽仲要陪朋友去行街買嘢. 激死我. 最後, 我SEND了個SMS比佢話: 唉, 原來男人在床上講既嘢, 真的都是大話" 當然佢自己係唔記得咗自己今朝講過咩啦! 係回來後先問番我今朝佢講過咩囉! 但呢個SMS都嚇了他一下, 所以就好傻瓜咁買了把大口仔扇比我來氹我. HAHA

新公司的一點趣事

之前講咗新公司的福利比舊公司好. 但原來新公司都有好多嘢係無舊公司咁正.

 

例如現在個雪櫃唔會見到有汽水同紙包飲品比我任攞了, 連餅餅都無塊. 仲有這裡係無盒裝紙巾提供的, 要自己買返嚟. (其實...我估呢方面大係因為我以前公司過份好, 我知好多公司都無呢兩樣嘢既.)

文具呢, 以前都係自己打開個櫃任攞, 現在勁咗, 係自己入文具房攞文具, 但係最奇係呢間好大的文具房係唔提供剪刀, CUTTER, 同CLEAR FOLDER. 咁前日我去搵CUTTER啦, 發現無, 咪問黑面妹妹可以係邊度攞, 佢話公司係唔會提供剪刀同CUTTER. 我問點解, 係咪因為它們屬於危險攻擊性武器. 卻原來係因為啲前人手勢唔好攞得太多, 所以CUT了, 以後唔提供. 佢話試過係一個離職的員工個位搵到十幾把剪刀. 真係吹脹. 後來因為佢怕我阿姐會煩佢, 佢就去攞咗把CUTTER比我了. 我仲要去尋索下邊到有得攞CLEAR FOLDER.

呢間公司業務同IT都有啲關係, 所以佢哋好多嘢都係要上網用啲SYSTEM做, 例如申請假, 同埋CLAIM錢都係要上網做. 可惜既係佢哋個網係好慢囉. 想方便有效率所以咩都用 E-XXXX, 但最後反而更慢.

最後講多一件趣事, 就係我個位附近...有人係用頭蠟的. 好大陣味, 臭得好嚴重. 過多兩個星期仲有的話, 我諗我要帶盒香薰放係張枱上.

Receptionist

我成日都覺得一間公司的receptionist係好重要, 因為客人一上到間公司, 第一個見到的應該就係receptionist, 所以佢哋應該係有禮貌, 笑容亦應該親切. 但唔知點解, 間公司越大, 個receptionist就會越惡, 面亦越黑.

 

我之前的公司係屬中型啦, 都係美國公司. 剛剛join的時候個receptionist面口係超黑. 我以為只係對我先面黑, 因為果時個阿姐話請咗我, 個妹妹升唔到入去, 所以覺我搶咗佢嘢, 所以對我面黑. 但後來啲同事話我知, 佢其實係對個個都面黑的. 後來唔夠一年, 佢就轉工, 之後我哋有keep住msn 聯絡, 關係就好咗啲, 佢都有飲 (不過主要係想見啲舊同事多啲囉).

 

現在的新公司, 個receptionist, 都係後生女, 唔咪樣衰, 但就係黑面同寸囉! 每次問佢嘢佢都係寸寸貢, 點啫, 人哋新嚟, 唔知你個位啲嘢應該點放, 問多次都得啩! 點都係要寸寸貢咁答人. 今日, 佢要幫我影門口咭的相, 頂佢, 影完一張又唔比人睇ok唔ok, 我諗住, 你唔出聲, 張相應該都ok啩. 怎知出到嚟, 有一邊啲頭髮係拱起咗, 仲要塊面好紅, 仲要拉到個面好寬去就個格. 激死. 我唯有諗啲人唔抵得我係面尖人囉, 轉登整肥我. 算啦. 有機會我就整鬼爛張咭, 再影過. haha...

 

所以我明, 有時候點解啲reception妹妹永遠都係做reception, 因為態度唔好. 入面有位, 公司無理由唔升的, 好明顯就係工作同態度有問題, 所以成日都要坐出面囉. 又或者佢哋真係當正自己係門神, 已經好夠威, 所以唔置在升入去啩. 不過, 大公司的receptionist人工都幾高架, 同埋可以好準時放工, 所以太安於現在, 咪唔想升入去囉.