厭惡感

我今晚出發去旅行, 第一次去歐洲, 但到一點興奮感都無, 只有強烈厭惡感.

我以後都唔會再咁樣三人行同奶奶去旅行, 用任何方法威迫利誘我, 我絕對不會!!!!!!!

我的營養課

由五月開學到依家, 不知不覺都到了尾聲, 明天便考試了!

除了一開始記到我狂叫救命的外星文細菌病毒名之外, 之後果啲topics都唔咪咁外星, 亦都幾有趣.

例如講下各種維他命, 礦物質既用處, 咩食物會有, 缺少咗會點, 食多咗又會點.

跟住又講下老人家既營養, 原來好多老人家會因為牙齒唔好, 搞到好多嘢食唔到, 搞到營養唔好, 就會有好多病痛.

果一堂, 其實都幾深體會. 我哋既身體, 其實30歲開始, 機能每一年都會都會跌.

有好多年老既疾病都係可以預防, 由後生既時候開始注重, 老咗就唔會有咁多問題.

當然有好多病毒, 好似癌病呢啲, 有時都真係防不勝防.

但係我會覺得, 為咗身邊既人, 注重自己身體, 其實都係一個愛既表現.

照顧長期病患者既家人真係好辛苦, 我哋真係無理由去傷害自己身體之餘, 仲要搞到身邊愛你既人好辛苦咁顥顧你.

跟住, 仲有講下孕婦既營養, 雖然我唔打算生, 但都可以講比身邊大肚既朋友, 有啲咩注意既.

然後又有嬰兒同小孩既營養, 竟然仲教埋bb由奶轉固體食物要注意既事情. 好多小朋友有偏食/唔食既習慣, 其實好大原因, 都係因為父母. 小朋友唔食嘢, 父母鬧, 最後小朋友只會更怕食嘢, 小朋友唔鍾意食嘢, 咪搞到營養有問題囉! 又或者小朋友唔愛正餐, 父母用零食去引誘佢, 都會搞到小朋友成長發育有問題架! 咪以為真係好似廣告咁飲下營養奶粉就補充到. 難道到過左發育期都仲飲奶咩? 唔食嘢, 對牙既生長都唔好架!

再跟住, 仲有講下素食者既營養, 運動員既營養, 少數族裔既營養, 牙齒同營養既關係, 呢個課程實在實係幾豐富.

又因為佢咁豐富, 溫書考試就真係溫到我仆街 (sorry, 粗咗少少)!

剛剛星期六日, 我就閉關溫書 (雖然都睇咗幾個鐘電視, 大結局嘛!)

讀到我頸梗膊痛, 真係痛架, 條頸條根真係抽住

淨係串果啲外星文, 都串咗我幾個星期, 都仲係有時會調亂. 舉個例如:

李斯特菌: Listeria monocytogenes

副溶血性弧菌: Vibrio parahaemolyticus

我係會張後面果個字變成 monocyticus 或者 parahaemotogenes. 即係第一個字既前part, 夾埋第二個字既後part, 變成一個新字 yeah!!!!

串字係一個問題, 記食咗呢啲菌會點都係一個問題! 大致上, 14隻菌, 有12隻都係痾嘔肚痛, 隻隻都寫呢三寶都應該無死, 但都要記得某一兩隻係唔會有呢啲症狀, 可能只係會有感冒既症狀, 又有兩隻會出現腦膜炎.

維他命同礦物質果邊, 又係咁喎!

最難都係記咩食物有咩維他命, 轉過另一邊說, 就是果隻維他命, 可以從咩食物食到. 但佢哋都係好近似, 所以無從入腦. 呢方面, 都有點半放棄, 到時, 是旦撞啲寫落去算了!

感恩上星期老闆出差, 今日佢又出咗去conference, 所以都响公司狂睇notes.

明天考試, 祝我好運吧!

選舉廢物

選舉完了, 我投咗一個獨立候選人. 佢都幾特別, 成個選舉期, 我無收過佢既宣傳單張, 亦只在西貢見過他兩三張banners, 在大圍見過一張, 在我住的將軍澳....一張都無. 但我投佢, 因為佢真係身體力行. 呢位人兄, 佢話爭取環保, 佢真係以單車上班. 佢話反地產霸權, 佢真係身體力行唔幫襯連鎖商戶. 最後佢都落選, 我果區, 好似所有獨立候選人都輸了. 不過我都好想呢位人兄 ~ 龐一嗚知道, 係有人支持佢既理念, 佢既行動!

其他人呢? 個個啲政綱都話支持環保,佢哋啲宣傳單張, banners, 同旗仔, 我好想問一句, 佢哋會點處理呢? 我亦真係好想知, 成個選舉, 會產生幾多廢物呢? 唔知綠色和平有無做統計呢?

「發現昆蟲」案

蟑螂鳴叫誤作蛇聲妙齡女報警

打鼓嶺坪洋村發生一宗極度罕見的「杯弓蛇影」，報警求助事件。警方於昨日凌晨約零時51分，接獲一名20歲姓譚女子報警，聲稱聽到房間衣櫃內傳出「嘶嘶」聲音，懷疑衣櫃內有蛇蹤。
警方接報，迅速派警員登門處理，當打開衣櫃查看時，發現內裡並無蛇蹤，只有一隻蟑螂。警員將蟑螂「妥善處理」後離去，將案列作「發現昆蟲」案，女事主可安心就寢。

我諗起我與小強的幾個戰役

最激烈果次, 我坐在地下同個fd傾電話, 無啦啦有隻小強飛入嚟. 無錯, 係最恐怖的飛小強, 我揸住個電話狂叫, 我個fd應該比我把聲震聾了. 後來我就週圍跳, 跳上枱, 跳上sofa, 最後打比一個男性朋友, 都係住同一區, 叫佢嚟救我, 亦响佢來到前, 我跳到去攞殺虫水, 狂噴. 到我個fd來到.....其實小強已被浸死, 我一開門, 我個fd問我係自殺定係咩? 因為出面都聞到殺虫水味, 而隔離屋亦開門問做咩 <=== 點解佢响我狂叫既時候唔來問, 而係有人回來佢先問? 如果我係遇到賊, 咁點呢?

呢場戰役後, 都仲有好多大大少少既小強大戰.

後來有朋友話我知, 小強係對聲, 特別係高音既聲音有反應, 你越叫, 牠就越向你方向走;

而牠亦對光有反應, 所以點解有時一開燈, 便會見到郁動中的小強.

自此之後, 每逢到小強旺季, 我開門入屋都會以好慢的動作, 盡量唔好牽起空氣流動

亦會週圍望有無疑似小強的黑影 <===我既黑影論, 一早就出現啦!!

有幾次, 真係見到有小強在等我架!

呢啲情況, 我先會搵一叠好厚的報紙, 從高空掉下, 掉得中, 就再响上面狂踩.

掉唔中 (well....我真係可以掉唔中架喎), 咁就第二步, 浸小強!

咁條屍點呀?

呵...當然係等我偉大的媽媽回來收拾啦!

唔知點解小強呢樣怪物, 係好識揀人來蝦, 每每我媽不在家時, 牠就會出來搞我.

而我係, 唔見到佢條屍, 我係唔會瞓覺既人

咁好好彩, 我真係有個好偉大既媽媽, 佢每次都會出來勇救我.

我記得有一次, 大家都瞓晒覺

我突然聽到有啲 "嘶 ~ 嘶 ~" 聲, 一打開眼就見到有隻超大的小強在我床邊的那堆花紙爬行中

當時其實我只係 "嗯 ~ "了一聲, 都頗細聲

但我偉大的媽媽已經以兩秒時間, 衝入來睇我咩事, 跟住就幫我追殺小強

偉大既媽媽真係好勁, 佢係可以徒手打小強的

 

我又試過沖涼時有小強, 果次用梘液浸佢, 不過唔咪好記得成唔成功.

我真係見過話梘液可以殺佢哋架!

所以有一次响廳見到, 我真係走入去攞梘液, 但係唧中既機會好細

仲比偉大既媽媽鬧我唧到週圍都係梘液

依家嫁咗, 無偉大的媽媽保護我, 但都有老公保護

不過, 由於佢習慣出外會閂晒全屋窗門, 又封了廚房地下的渠, 晚上又必定會閂廚房的窗

所以

上年, 只有見過一隻, 應該是我拖地時, 開了大門, 牠偷偷走入來的

今年, 我哋買了那個bug scare既機, so far....touch wood....一隻都未有

得享太平!!!!

什麼心態

今朝一早便向個fd發火, 在whatsapp裡啫....

話說我預科的一班舊同學, 在whatsapp有一個group,

自上年12月約過出來一次, 便一直都說再約,

但, 一直無人搞亦搞唔成

搞...其實係有人搞, 我都算會幫手搞, 試過有一次都落力地幫手book枱

到最後因為太少人, 流會.

個group有11個人, 但最後得四個, 出乜鬼.

前日K先生, 又發出msg話是時候又約下出來

呢個K先生, 永遠只是提出話要出來, 但最後就將個負任瀉比第二個

好似上年12月BBQ, 搞好晒, 無男丁, 問佢可唔可以早啲嚟幫手買嘢, 唔得囉!

果日仲要講到自己病喎! 又遲到, 差啲嚟唔到咁滯.

咁K先生出了個msg, C先生又通常會覆. 佢哋兩個比較熟.

今早, C先生就出了個msg, 問7/9 得唔得啦!

咁我就答, 唔得, 要返學

C: Next next Friday 14/9?

我: 都唔得, 但睇埋其他人先, 如果其化人7/9都得, 咁你哋咪照去囉!

C: 你有無其他時間提議, 想全部人都可以出席

呢個時候我都開始火. 呢個年代, 呢個年紀, 邊有可能就到晒全部人都得? 咁易約, 唔駛約咁多次都搞唔成啦.

K: Usually no people reply ga! <== 呢個正正是問題所在

我: 根本無可能全部人都得, 只可以揀最多人得果日, 你咪睇下有無人先囉!

K: yes, you right

我: 咪搞到我第一個覆唔得就係麻煩人先得架!

根本長期以來, 呢班group就只有三至四個人在對話, 每次即使定好晒日子, 呢三至四個人都得嘞, 其他人都係唔覆.

上次, 比了個deadline話如果邊日唔覆, 就當唔去. 果個白痴C先生, 走去逐個打比人, 問人, 叫人覆

ok, 我欣賞佢既熱心, 但最後啲人覆, 都係覆唔去得之嘛!

我好唔明呢班隱形人咩心態. 覆一句去/不去, 係咪真係咁難呢? 答咗, 大家都好辦事啫! 其實如果都無咩興趣keep住呢班舊同學, 咪算囉, 咪退出個group囉, 咁我哋咪唔駛再轉時間就呢啲根本無心出既人囉!

我相信 今次都會再一次搞唔成. 我都應該會退出呢個group了, 無意思.

我係咪太好蝦呢?

其實做得秘書仔, 同埋要assist埋同team的同事, 除了老闆係我最大既客人之外, 其他同team的同事, 都係我既顧客仔, 我都想大家work得開心. 有時候, 你對人好, nice啲, helpful啲幫佢哋做嘢, 都希望有一日你要搵佢幫手既時候, 佢都會好nice同helpful咁幫番我.

 

入到呢間公司一年多, 因為係大公司, 知道會好多是非, 所以一早打算要低調啲, 唔埋堆, 食飯都多數叮完返埋位食, 呢排開始有時都會坐去pantry同啲c9仔同事講下家事, 旅行, 小朋友, 甚少講公事.

 

但係呢排我有少少感覺啲人蝦我, 見我唔出聲, 咩都比晒我做.

事件一

有條team有個女仔, 成日都會有嘢send過嚟比我老闆簽, 但佢好多時都唔會印出嚟, mark好簽邊個位, 就只係email嚟叫我print. 問題係, 我個位無私伙printer (反而佢個位前面有兩個), 我每次印嘢, 都要行去佢個位那printer度攞, 或者出走廊的color printer. 咁行下都無所謂, 坐得多, 個腦會痳痺. 最大問題係, 佢個email唔講清楚. 有一次, 佢叫我印一個excel file, 咁我開, 見果版, 咪print果版. 簽好, 佢先話仲有第二個tag都有. 佢果份嘢唔咪英文囉! 我係唔知道係未完囉. 點解唔响email講清楚有兩個tags? 無啦啦, 我唔會走去睇晒佢每一個tag有無要簽既地方囉.

 

仲有一次, 佢又send個excel來叫我print, 但print唔到, 原因佢係用比A4 長少少那隻紙print, 但printer啲隔係無果隻紙. 我話佢知我print唔到, 因為紙唔啱. 佢叫我問admin. 好, 我又問, 但admin話, 呢隻紙, 只係果個女仔條team先有, 只有佢哋order要用果隻紙. 喂, 大佬, 玩嘢咩! 只係得佢有果隻紙, 佢好應該print埋比我啦! 成日只係彈個email嚟! 懶到死, 哼, 怪不得佢咁肥妹, 因為唔肯行.

事件二

今日要同老細入房開高層大會, take minutes, 咁over run咗. 跟住有另一條team的人都book咗果間房. 咁後來, 5mins後, 我哋都開完出嚟! 但果個女仔就好快咁cancel, 跟住又見我哋出嚟, 佢又book番, 但臨入去時, 佢走過來話我兩句.

 

其實我又無咩, 我工作EQ都算高, 又的確我哋係over run咗. 不過我都好難control, 因為成班都係大粒, 我無得叫佢哋收聲囉. 我亦唔可以走來走去, 出去同佢講仲有幾耐, 就算出到去, 我又可以講實到仲要開幾耐咩? 成班口水大王, 話講多30sec, 最後都講咗2mins啦! 等一陣都唔得! 駛唔駛專登走過嚟話我啫.

 

不過都好彩, 我老闆實在太錫我, 太會保護下屬了! 佢見個女仔惡惡咁走來同我講嘢, 佢聽到啲聽唔到啲, 咁佢就行出嚟, 剛好個女仔又走了, 我老闆好大聲問:" 佢鬧你呀?" 剛好個女仔同team另一個女的又行過來聽到我答: "又唔咪既" 咁我個情況就變成, 我無煮我個同事, 但我同事又會知佢惡咗 我老闆唔高興. 後來個女仔開完會, 都打電話來say sorry.

 

我在諗...如果我老闆無出聲, 佢應該未必知佢惡咗, 而見我唔出聲, 可能下次就會更惡對我. 呢啲情況, 有時候真係會唔知點做. 我惡啲話"我都控制唔到架," 佢下次未必會咁惡同我講嘢, 但可能之後就連招呼都唔洗打. 以第一個case來講, 如果我去同果女仔講, 叫佢自己印番, 又會點呢? 所以有好多時, 我都會...算啦! 咪做埋去囉, 又唔洗死. 就係咁嘞. 回家同老公講, 佢又會話我成日比人蝦, 唔可以咁, 我又會覺得佢唔明白我既situation囉.

釣魚

老公有個同事撩我老公去釣魚, 佢話果度可以釣到條2-3呎長的烏頭, 所以就跟佢去.

變態, 8:00am要响大埔集合, 我哋倆6am要起身, 想死.

好彩車程比我想像中快, 我哋可以响大埔火車站食個早餐先會合佢個同事

食完早餐就坐巴士入三門仔

呢度有一樣嘢要投訴: 佢個同事msg我老公, 8am 响往三門仔的小巴站等, 我哋去到火車站對住那隧道, 左邊上小巴站, 但個牌無寫邊架車去三門仔, 右邊則上巴士站, 有個牌寫74K係往三門仔, 我哋咪向74K方向去, 但上到去, 無小巴啦當然, 因為係巴士站. 响呢個時候, 我老公竟然繼續用whatsapp msg佢個同事.

頂....依家啲人係咪真係唔識/唔會打電話呢? 打得個msg, 用口問都已經問到應該點行啦!

仲有, 依家啲人真係唔細心, 我覺得佢個同事覺得我哋係好熟大埔囉! 係熟到講"往三門仔小巴站等", 我哋係會知三門仔巴士站响邊囉! 可唔可以諗下, 其實我哋係第一次去, 真係唔會知個小巴站响邊囉...唉.....

最後其實係佢同事跟佢老公就搭小巴.....我同老公係搭巴士入三門仔, 我哋遲咗好多.

 

well....好彩, 昨天早上無啦啦落咗陣大雨, 我哋就剛好呢個時間响巴士上, 因為太大雨, 船家出唔到嚟接, 去到都要繼續等.

 

落車就會見到呢個牌

碼頭影過去的三門仔村

我哋其實係去呢啲魚排釣...咪講笑, 都好多人喎! 仲見到有啲人八點幾坐船走, 原來佢哋玩通宵, 所以咁早走.

 

見到有個叔叔釣到條雞泡魚, 好搞笑

 

老公為咗呢次釣魚, 花了大約四佰蚊買了set 魚杆, 而我就只用佢好耐以前買落的"魚絲排"玩下! 實在我對釣魚興趣一般, 我比較想落水游....不過應該會比啲釣魚人士"小"我落水底; 同埋其實, 啲水好污糟. 所以老公個同事就買咗呢包嘢比我釣泥鯭仔.

嘩, 我覺得呢包嘢好勁, "精進狙擊目標魚".....講到好似魚餌會自己追住條魚比佢食咁. 旁邊果兩粒嘢, 就係我"初"出來的魚餌, 將粒嘢掛响個鈎鈎度, 放落水, 好快就有魚, 真係好勁!

 

講真架! 有好多次都係一放落去就有魚上了!! 最後我應該兩個鐘釣到大約15條...全部都係泥鯭仔. 好好玩, 好有成功感 (即係以第一次咁樣釣魚嚟計).

魚排叔叔見我哋逐條逐條釣, 就索性掉個籠, 一下就廿幾三十條捉上嚟. 不過因為我之後要去探婆婆, 奶奶又唔識煮泥鯭, 所以我哋都無攞走. 呢度釣魚, 每位$80, 我估應該係到時你釣到嘢, 就可以攞走, 賺定蝕就睇你技術同運氣了.