我的奇怪奶奶 ~ 第N回

懶得去搵我講咗幾多次我奶奶, 所以, 以後都會用N回

越來越覺得同奶奶溝通唔到, 用電話講又唔明, 用文字訊息, 佢亦都唔明, 可以點呢?

話說奶奶星期二早上whatsapp我, 問我下午要不要上新屋幫我收電器. 咁我話唔洗, 因為我會放假返去收, 兼等廁櫃師傅來度呎. 跟住佢就問方不方便佢來做屋苑出入証. 咁果日因為我要上堂到八點, 老公又約了pccw師傅上來安寬頻, 怕會搞到佢好夜.

 

於是我就whatsapp回覆她: "咁你五點過來啦! 因為我今晚上堂到八點, 細佬也約了師傅來安寬頻, 怕會搞到你好夜才食飯. 若不用食飯便今日來整, 或星期四來整再一同食飯也可以! 在會所整的, 六點後都有得整, 不用趕辦公時間!" (原文照抄下來).

 

咁佢就揀了星期四.

星期三晚, 佢既乖仔同佢通電話, 約星期四幾點等. 我聽到老公同佢講, 七點先好過到嚟, 唔好心急, 唔好催. 我哋係要七點先返到嚟. 跟住又聽到老公話, 六點? 我哋未放工呀! 總之七點啦! 你自已睇下個msg.

 

點知....擒日5:42pm, 收到奶奶whatsapp, 話到了味珍香 (我家樓下商場的店鋪)....頂!! 點呀????

我咪打比我老公, 話佢老母到咗味珍香. 我老公就話, 咁由佢等啦!

 

我便回她"唔咪約七點咩? 我們六點先放喎"

"不是告訴你不用趕辦公時間嗎? 咭在會所整, 會所十點先關門"

"你搵個地方坐下啦! 我落地鐵打俾你, 你預我6:30先到"

 

當然, 我係唔會專登早走趕返去. 我準六點走, 兼慢行, 仲要不幸地我漏咗嘢, 落到樓都仲要返上公司攞嘢!

一路行, 其實我一路同自己講: 要忍耐, 要微笑, 要笑容. 可惜, 我真係笑唔出囉! 仲可能塊面都幾黑添!

佢亦都唔敢惹我, 最後咪兩個人無嘢講咁前後行囉.

奶奶佢呢, 依家有咩事就搵我約, 因為佢怕咗佢個仔鬧佢, 又知佢個仔唔覆. 我諗我都係將呢啲嘢比番佢個仔同佢約, 我真係唔識同佢溝通.

首爾短遊

呢個TRIP, 可以算是為咗人哋送既一支豉油, 而要買隻雞!! 因為參加HYATT既Appreciate Dinner(即係請佢酒店既公司客戶既一年一度晚餐), 我抽到一晚Grand Club Room at Grand Hyatt Seoul, 呢個就係我得到既豉油. 因為呢一晚, 我要買了個3日2夜既機票+酒店package, 呢個就係雞. 就形成咗呢個trip嘞. 好好彩, 因為四月去釜山, 覺得老公對韓國一般, 加上, 上年無同媽媽去旅行, 於是呢個trip就拋棄老公, 同媽媽走咗轉首爾. 其實我係第一次去, 所以行程除了shopping + 食嘢, 都仲有啲觀光時間的.

Day 1: 香港 à 首爾 à check in Uljiro Residence (不錯的酒店, 過條馬路就係東大門三大商場) à Dinner at 陳玉華一隻雞 (幾好味, 好有雞味, 又唔貴, 維起港紙210蚊, 食蚫兩個人)

 

 

 

Day 2: 景福宮 (十點前去到, 睇著晒古裝韓服的門將交接儀式) à lunch at 大瓦房食醬油蟹 (係生醃的蟹, 但真係堅好味. 兩個人大約500蚊港紙一餐超豐富) à 仁寺洞 shopping à Ssamziegil商場 (一個很有趣的商場, 轉買精品嘢, 一間間少鋪, 即係呢, 香港就無晒既小戶商場) à Ssamziegil頂樓食Waffle (好味) à 昌德宮 (我覺得景福同昌德宮二揀一去一個就OK了) à 南大門Shopping (呢度啲衫最平) à Dinner 蠔餐

 

 

 

Day 3: check out Uljiro à 南山韓屋村 (好值得去既一個地方) à 梨花大學 (到此一遊影張相, 主要目的係Shopping, 這裡比較多後生女啱既衣服) à lunch 八色豚肉燒烤餐 (好味又抵食) à 明洞 shopping (勁多人, 癲咗!! 勁多化妝品店, 梗有一間係左近) à 返uljiro 攞行李搭的事去hyatt à dinner at 酒店(free!!! 因為住club floor, 5:30-7:30pm 有free的drinks + 小吃, 小吃雖然小, 但都可以成為我哋既晚餐果種, 加上好攰, 便無出去食dinner了) à 我包池游水, 我媽房中浸浴

明洞/南大門都有呢啲紅色牛妹, 好好,
識英文/國語比你問路

Day 4: 酒店免費早餐 à 遊覽酒店 à check out à shuttle bus 去梨泰院, 咩都未開, 無嘢行, 閃à 機場返香港!!!

在機場見到

上次遊釜山後到韓國印象麻麻, 覺得是一個看不清, 聽不懂, 講不了的地方, 覺得去埋首爾一次就以後都唔駛去. 但係今次去了首爾, 印象大改. 基本上, 入去每一間鋪, 個個都識講國語同英文, 溝通完全無問題, 餐牌, 價錢買等亦有中有英, 唔問都可以自己睇得明, 真係好到不得了. 仲有一個好就係所有的遊客區, 都會有一些身穿紅衣, 頭戴紅色牛仔帽的牛女, 她們其實是Tourist helper, 見你遊客拿住地圖旅遊書就會好熱情咁走過嚟問你有無需要幫忙, 仲會好好咁比過一份地圖你, 畫好你知點去, 真是一項很好的服務!!! 所以…哈哈…已經同我個FD講, 下年同佢去博殺. 東大門有好多個商場, 係開到凌晨3, 4 點, 真係可以拼過你死我活, 無日無天咁shopping!! 另一個感想係, 最好係三五知已幾個女仔一齊去, 千褀唔好帶男朋友或者老公, 因為佢哋係…完. 全. 無. 嘢 . 啱. 睇/買/行. 或者…呆呆坐响商場出面, 睇一式一樣的韓女都可能會是他們唯一既娛樂. 如果真係帶咗男朋友/ 老公去, 仲有一個問題係, 你會行得唔夠暢快, 佢可能會嚷著/吵著/叫著悶, 而搞到你急急走! 咁事情都有兩面, 有佢哋去, 咪有咕哩幫女朋友/太太拎嘢囉. XDDD

 

 

好火的荔枝

星期四, 趁老闆出差, 就同老公去歎個早餐先返工. 食食下中途, 因為荔枝, 我們吵了鑊勁既! 話說前幾個星期去我媽媽家食飯, 我阿哥帶了幾粒荔枝來. 呵...我雙眼發光, 因為其實我係好鍾意食荔枝, 但因為知道好熱氣(一粒荔枝三把火呀!!), 所以我都好少食 (我是一個很自律和節制的乖孩子)!!! 唔會主動買, 亦唔會叫人買比我食, 只會係見到媽媽家有先會食, 但我媽近年都好少買了, 所以近年我有時一年都食唔到一粒, 但我真係唔會好恨食囉! 無乜益既食物, 其實我幾忍得口. 亦因為咁, 我老公係唔知我鐘意食荔枝的, 果日我見他如發現新大陸時, 我便立刻用超級無敵十分非常肯定的語氣同佢講~~千. 萬. 不. 要. 買. 給. 我. 食!!!!!

因為我知佢唔食, 佢係好唔受得濕熱的食物, 食荔枝芒果等食物係有好大機會(99%)生口瘡/疱疹, 既然佢唔食, 如果佢買, 即係我要一個人食晒, 你去街巿買, 總唔可以叫人比兩粒你啩! 一買就一磅, 一條友食一磅, 我同自焚有咩分別?! 點知...今個星期一, 老公回家時拎住三大袋嘢. 其中一袋就係荔枝......唉..........好啦, 買咗就要食, 唔可以浪費食物的, 但就話佢兩句, 話我明明講嘢唔好買, 佢當然就係話"咁你鍾意食嘛!" 大佬, 唔通我話我鍾意食大麻, 你又買比我食咩? 唉......因為我四天後出發旅行(又!!) 即係要四日內清晒袋荔枝, 一磅...大大話話都有四十幾五十粒囉! 星期一跑完步, 隊咗十幾粒, 星期二忘記了, 無食!! 星期三跑完步又隊十幾粒, 都仲淨十幾粒喎! 星期四...帶咗啲返公司, 四點幾食咗, 今晚再隊埋果十幾粒! 咁樣食, 一啲都唔享受 離題咗啲...

今朝早餐期間, 講起我帶了荔枝返公司, 跟住便由討論變成吵架! 佢話我唔appreciate佢既心意 <=== 如果唔appreciate, 我唔會咁努力去食晒去, 我話佢唔聽我講, 講話好多次, 我話過唔要, 就係唔要, 我唔似得佢既屋企人, 口不對心, 我講過唔要, 就真係唔要, 唔會心裡其實想要, 點知, 條友嘈嘈下, 竟然話我好似擒晚求愛節目果班女仔!!! 頂佢, 我真係超嬲! 佢竟然將我同果班女比, 將我踩到咁低??? 我從來唔咪啲要嫁有錢人, 唔係啲覺得自己係女皇咩都唔洗做, 唔係啲想要乜你就要買乜比我然後買完仲嫌三嫌四. 我自己都煮得下幾味好餸, 做得下全屋家務, 所有日用品响未用晒前亦已早早補貨, 出去見佢既朋友亦唔會多說話失禮佢, 甚至連佢公司既嘢, 我都要幫佢睇, 佢竟然將我同果班女比, 真係傷心到不得了!!! 明天去旅行, 要人帶住個咁既心情去, 豈有此理! 真係好嬲! 不過, 而家ok了. 聖經話不要含怒到日落, 就日落了, 要嬲完!

我阿爸結婚?!?!?!?!?!?!?!?!?!?!?!?!

話說我老豆上星期三打比我, 約我今日食飯. 話約了我啲伯娘呀, 阿叔呀, 堂兄弟姊妹....食飯.

响呢度浦了三年以上的wow友, 唔知仲記唔記得, 我結婚前有煩惱過點同我阿爸講我要結婚

同埋, 我係唔打算請佢果邊的親戚, 因為我唔識佢哋, 咁多年見過的次數, 五隻手指都用唔晒

响街撞到, 都只係一個陌路人, 完全唔認得!!

所以, 我就話唔去. 不過我只係話我要學單簧管, 所以唔得閒

我阿爸, 仲天真到話叫我叫我老公代表出席, 見吓啲親戚

我心諗, 傻傻地, 我叫做見過都唔想去, 我老公一次都未見過, 又點會去

而我, 亦唔會推我老公去一個我自己都唔想去既飯局囉!

事隔一星期....擒晚我哥打比我, 問我阿爸有無搵我, 我話有

亦講咗比佢知我唔去

我哥問我阿爸有無講呢餐飯既目的, 我話無, 唔咪同親戚食飯咩?

佢話唔咪咁簡單, 佢知道咗之後都決定咗唔去, 但唔知我去唔去, 唔想我去到先知(哈...我哥對我真有道義)

跟住佢好快好糢糊咁講咗句嘢, 我剛跑完步聽唔清楚, 只係聽到"結婚"?

我仲問...吓...邊個結婚(心係諗...又邊個堂乜乜結婚, 要咁騙我去飲呀?)

跟住我哥話, 仲有邊個呀! 你阿爸呀!!!!!

我既反應....真係滴汗(因為跑完步), 跟住講, 佢都好跣人喎!

就係咁....我阿爸今日結婚

唉....其實佢要再婚, 又想我哋識佢既新老婆, 咪直接講囉! 做咩要唔講清楚騙我哋出嚟呢?

如果我真係去咗, 去到先知道個真正目的, 咁會點呢? 拍枱走? 我相信我只會一臉尷尬, 全程黑面囉!

除非佢低能到迫我叫果個人做阿媽, 我就真係會拍枱走.

阿媽只有生我果個先係. 將來佢哋有小朋友, 亦唔好旨意我會認係細佬妹! 我呢生人, 只會得一個阿哥!!!

六十幾就七十歲, 我真係諗唔明做咩仲要結婚?

呢個女人, 又係咩人?

我聽講佢以前有個情人知己, 又聽講有埋個仔添架!

今次結婚, 係咪同呢個情人知己結呢? 比番個名份人?

成件事真係 fay e saw c 囉!

收樓ed

剛剛星期六終於收樓了!

由一月confirmed買樓, 到現在差不多五個月, 耐到已經沒有了買樓的興奮, 只剩下裝修同開始供樓的煩惱.

最開初打算大裝個廚房同廁所和整兩個大櫃, 到現在只整兩個大櫃同大裝個廁所, 我足足煩足五個月!

廚房:

我一直好渴望有一個好靚好靚的廚房, well...又不是廚神, 都唔知要咁靚既廚房做乜. 不過總之就好想要, 仲好想要個紅色的. 去德國寶, 見有個package 2萬5, 包16呎櫃, 爐, 盆同抽油煙機, 好似好抵, 咁就比咗$380, 去度呎設計報價, 最後夾夾埋埋, 痴咗線, 整個廚房接近8萬. 真係煮到黃金鑽石出來咩? 又或者要開私房菜, 賺番個本回來先啱數. 諗諗下...第日奶奶住咁近, 都唔會成日煮, 算啦! 又再諗, 個廚房咁細, 間屋又咁細, 不如住三四年換間大啲, 既然住三四年, 無謂晒咁大舊錢去整, 算啦算啦! 就係咁, 決定唔整廚房. 德國寶果$380, 可以用嚟買番佢既產品.

 

其實睇落都唔差, 舊業主話佢好少煮飯, 所以都好乾淨. 而最大原因係, 因為呢個屋苑樓底高, 佢响廚櫃上假天花上有一個好大的秘密空間可以放好多好多好多嘢, 仲有埋燈. 我唔想郁到個假天花, 所以更confirm唔郁個廚房了.

 

 

 

可以放好多好多好多嘢的秘密空間!!!

 

其實唔止呢度, 一入大門的玄關(晒位小走廊)的天花, 廁所和房出面既晒位小走廊的天花, 舊業主都整咗個秘密空間, 又係可以放好多好多好多好多嘢. 再加埋主人房, 舊業主已經整了高地台床, 又係可以放好多好多好多好多嘢!! 我既目標係要將所有無謂嘢都要放晒入櫃和秘密空間, 以至令人覺得我間屋係無乜嘢, 亦係好整齊的(亦可以係無眼屎乾淨盲的視覺效果).

廁所:

其實點解要整廁所呢, 一來個舊有設計好老土, 亦無乜地方擺嘢, 再加上個廁所都幾污糟. 最最主要係, 我們要放乾衣機(廚房好明顥係唔夠位). 一心係打算將洗衣機同乾衣機都塞入廁所, 仲要有個雜物櫃.

最後擒日約師傅上來睇, 哈哈哈...我大想頭咗啲. 塞晒啲嘢入去之後, 我哋沖涼既位置係細到不得了, 大概直站企响度唔郁咁沖都勉強可以. 算啦! 最後只係塞個乾衣响廁所, 洗衣機留番响廚房.

 

 

 

這個凸出來的洗手盆好令我討厭, 同埋根本就沒地方放我好多好多好多的護膚品, 我要的廁所是好象下面這個:

 

 

大櫃:

一早已經confirm好設計, 就係用網友介紹果間傢俬店. 啲服務真係唔錯, 成品就要等下月尾收貨先知道啦!

前星期同老公家人食端午節飯, 食完飯奶奶古古怪怪咁笑住望我, 問我哋係咪星期六收樓. 我話係星期日. 佢一個失望咁話想約埋兩個家姐去睇, 因為佢哋未睇過. 我心諗...點呀? 一間吉屋, 其實有咩好睇啫? 將來都有得睇啦! 再者....就算我係星期六收樓, 都係夜晚先收(因為老公返學, 都要6:30後), 咁佢係咪想一行六七人上去一齊收呢? 咪嚇死人先得架, 成隊一上去收樓, 係咪有咩問題唔比人走呀?

最後舊業主話星期六交樓都得, 唔洗大家星期日走番去交收. 結果兩個家姐星期六唔得, 但奶奶都係要上來, 其實佢只前都睇過, 都唔明有乜好睇. 唉....咁佢要嚟, 我都要比佢嚟架啦! 但好唔鍾意囉! 可能過得太耐, 一點都唔覺得興奮, 佢咁興奮要搶住嚟睇, 我真係覺得好奇怪, 同有啲厭煩囉!

新玩具 ~~ 我的未來啊!!!

唔生仔, 又懶diy, 亦懶入廚, 咁就只好分享下我既新玩具.

單簧管

講咗好耐要買, 要學, 終於的起心肝, 上星期一响屋企樓下間琴行報咗名

星期三食個快lunch後, 行去太古城通利, 好快手咁買咗

多謝朋友借佢個妹張教師咭我, 等我有九折, 慳咗360蚊!

擒日第一日上當, 呼 ~ ~ ~

吹到我頭都痛呀!!

不過好彩都吹得响 (話說...我吹唔响長笛的)

阿老師係一個...伯伯, 我估都60幾啩. 有點點點點怪.

佢話佢以前响大陸吹

嚟到香港, 果時唔咪好興單簧管, 所以就做咗鋼琴調音師傅

跟住近年多人學, 年紀又大了, 便轉回老師

跟住又話佢識好多好出名好勁的鋼琴家, 係咁問我識唔識

剛開始上堂, 便問我識得幾多音樂

我話我彈琴的, 便問我幾級

我話八級, 佢就好開心, 哈哈...話教少好多嘢.

仲話如果我係有打算考試, 2-3年就可以考到八級 (等我仲比自己五年時間添, 多咗)

跟住又問我老師係邊個, 哎吔, 我都無學琴十幾廿年啦! 況且, 邊得個個都係跟名師學琴架!

以前, 有八級就可以教人啦!

即便現在, 都大把演奏級, 都唔會個個出名, 無啦啦問我個老師乜名, 好奇怪.

點都好, 第一堂, 學咗點駁好支管, 亦學了怎樣吹响它.

亦叫做吹到基本的do ri me....

不過呢, 真係吹到頭痛, 唔夠氣啊!

阿老師仲話, 練習得多, 可以去跑馬拉松 我話, 我已經跑緊馬拉松架囉喎?!

個咀都好痛呀! 不過呢, 我見吹的時候, 面的肌肉要用好多力, 唔知吹得多, 可唔可以有瘦面效果呢?

仲有喎, 吹得多, 又唔知會唔會練到個酒粒出來呢?

番到屋企, 又駁來練習吓! 嚇走晒我啲貓! 搞笑.

 

努力努力, 就3年考八級, 跟住轉行 ~~~~ 行乞 (美名街頭賣藝)

嘻 ~ 第一次淘寶, 成功!!

真係好利害呀!!

我擒日早上10:47確認order, 比錢, 今日剛剛12:10便收到件

真係快到無朋友

香港去香港的速遞都無咁快啦! 佢响大陸寄落嚟喎!

件貨物好滿意呀. 顏色好好, 質地亦唔錯.

鋼琴套 + 椅套 + 腳踏套, 仲送埋抺布 + 一個蝴蝶結扣, 都係rmb203

香港買個鋼琴接近一千呀, 抵到無朋友

嘻...不過呢, 始終都係由大陸落嚟, 家有二小貓, 以防有蚤, 都係攞去磅洗完先拎番屋企了.

第一次淘寶, 宣佈 ~~ 成功!!