農曆年 (一)

今年新年同聖誕咁鬼近, 搞到都無時間執屋辦年貨.

新年前又係頭痕的日子, 作為後輩, 其實買啲糖果比啲長輩, 都無可口非, 但係經過上年外婆所有子女都回來, 我同老公在初一要帶十幾盒糖果去拜年的恐怖經歷, 再加埋事後發現啲舅父阿姨最後都沒帶走, 留在外婆家, 所以我今年決定要做cheap精, 不再精心為每人精選糖果. 娘家7個單位, 只係買了三款, 有啲係買兩盒有平果啲, 有4盒仲買四盒一樣,廿幾蚊果啲就算. 夫家那邊, 都問咗佢哋想要咩, 唔洗煩.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
年廿七收三點, 便去了尖沙咀行吓同埋等老公, 本來想買件褸又想買對boots, 不過兩樣都買唔到, 結果走咗入屈記, 買咗幾樣嘢!
其實好無聊, 係因為上次買靈芝比阿爸的時候, 佢送了兩張 $50的coupons比我, 仲要31/1便到期, 仲要只可以買保健產品, 得咗好耐, 先買了呢三樣嘢. 三樣夾買只係比咗$81.7
夢之纖小腿襪, 原價200幾, 果個weekend特價$99, 再減$50. 超抵. 已經了五天, 感覺都ok. 起碼保暖! 當然更希望係可以減到我的粗小腿.
清熱酷 + panadol, 夾埋81個幾, 減$50. 三包嘢夾埋即係只需$30幾蚊. 抵!

是晚奶奶家做節, 之後同啲小朋友玩board game, 搞到成10:30pm走, 攰! 奶奶煮了11餸. 唉....真係唔明佢點諗, 又要話煮得辛苦, 但又煮咁多味送. 九個人, 六味, 八味, 九味都好啦! 煮咁多味, 又食唔晒, 每樣剩啲, 收拾是又怨食剩咁多嘢, 佢有排食隔夜餸. 其實佢一開始唔煮咁多, 我哋咪食得晒囉. 我明白要有餘, 但餘一兩碟咪好囉!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
年廿八, 早上執咗陣屋, 跟住去跑步. 等老公回來, 食嘢, 又再執下嘢, 便返教會練詩. 晚上响佐敦稻香食娘家團年飯. 訂了兩團枱, 供22人!
兩個姨姨在美加回來, 同佢哋咗幾鋪麻將, 我竟然連贏咗三鋪! 行番個尾運啦!

食飽, 便同老公响尖沙咀行下. 又係諗住睇下褸同埋boots, 怎知又買咗其他嘢, 仲係出事果程.

其實一直想買個放得到嘢既斜"咩"袋. 一直心儀我個friend的綠色porter袋, 所以又走入porter睇下. 就見到個限量版紫色袋. 裡面有好多格, 個紫色亦不錯. 價錢仲....ho ho ho.....在啦啦隊老公旁的鼓勵下, 最後都帶了回家. 新年就帶住佢去派利是了!!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

年廿九 (除夕) 同上年一樣, 同老公各自回去陪自己的媽媽. 跟住又各自陪媽媽去行花巿. 今年哥哥同阿嫂都join埋, 感覺得媽媽好開心.
今年家裡都好多花. 有之前買的水仙, 好香! 同埋响年宵買的波波菊, 同埋桃花枝. 奶奶最後話攰, 所以老公無行到年宵, 於是買了兩隻龍公仔窗簾扣比佢. 好彩佢都話得意!
10點幾回到家, 拿拿聲吸塵拖地, 同換床單! 今年開了結婚禮物的鬆池熊床單來用. 好可愛耶!!

農曆年 (二)

大年初一

前一晚都搞到成點半先瞓得,初一早上, plan了7:00am起身, 但鬧鐘响的時候, 實在敵不過睡廆, 而且, 今個年初一, 只得10度, 這樣的天氣, 怎能叫人從被窩裡出來
結果都只能磨到8:00am, 便要拿拿聲換衫, 帶著兩大袋禮物出門拜年.

先到奶奶家, 同佢拜個年, 斟杯靚茶佢飲, 放低啲禮物, 再去美心陪她食個早餐. 因為我要回我媽家食"第一口素", 所以只係飲咗杯檸水.
10:30離開美心, 搭巴士去媽媽家, 比原定遲了15mins才到, 他們已開好枱準備食素了. 食飽, 又拿拿聲一家出發去外婆家. 今次我哋都算係最遲去到. 無法. 要等我呢個一個早上走三家的人. 1:00pm準時婆婆家開年飯, 又食過!

這兩年, 婆婆的兩個女都從美加回來, 所以婆婆特別開心. 係咁影相. 今年欠了細舅父, 二表姐同表哥無回來. 仲有兩個竹昇表弟和一個竹昇表妹都無回來.

今年仲唔知邊鬼個發起話要唱聖詩, 仲要搵著我嚟搞, 要我彈琴. 彈琴都唔咪問題, 但佢本歌書全本都係123, 唔咪豆豉囉! 我見唔到豆豉, 基本就係廢了武功. 好 ~ 既然, 大家其實都唔識唱, 我全部轉做C major, 佢哋應該都無問題.

玩到4:00, 我同老公又起程回奶奶家食開年飯.
今餐都好. 只係叫了個盤菜, 再架四碟仔的隔夜餸. 簡簡單單, 佢又唔駛煮到咁辛苦, 咁咪好囉!
食飯前被小妹妹拉要了玩大格鬧blockus, 玩到我好無心機. 啲小妹妹成日要人讓, 但自己又出到雜亂無章, 玩到我好無癮, 正所謂盲拳打死老師傳, 就係咁了.

食完飯我便唔再同佢哋玩了. 躲在房睇漫畫好過.