我要同百合花絕交

估不到婆婆的安息禮拜和出殯禮, 我成為主家當中, 顯得最傷心的一位. 但其實我同婆婆可以算是最無感情! 但全程拿著紙巾在抹眼抹鼻果個...係我囉!

原因...坐在一個百合花的花牌下三四小時後的結果! 而呢個"傷心神態"仲要延續了好幾天.

其實我係講緊我的鼻敏感. 星期日去完(其實係去到)大酒店, 我的鼻就一直流鼻水, 眼亦很痛, 鼻哥塞到呼吸都有困難. 最後, 今天頂唔順, 問同事公司附近有無好的醫生, 就走咗落去睇.

醫生照我個鼻, 話入面超塞, 係出面都見到個鼻脹了. 我自己都感覺到脹啦! 醫生叫我試下用噴鼻的藥, 以前細個試過唔鍾意, 覺得唔舒服, 但今次真係好辛苦, 醫生又話改良了, 所以決定試下! 加埋食藥, 現在好了, 超碼鼻水終於停了!

我要同百合花絕交. 係佢搞成我咁架!

龜龜跟婆婆一起走了

真係唔明, 點解唔開心的事, 總係要接住嚟!

 

星期日, 老公的婆婆的安息禮拜進行了, 很多親友和教會的弟兄姊妹都來到, 多人到幾乎要坐在門外. 證明婆婆生前真是一位受人尊敬的長者.

 

星期一, 出殯禮, 成個過程好快, 按了個制, 看著婆婆的棺本慢慢移入內堂, 跟婆婆說聲"拜拜", 便真的塵歸塵, 土歸土了. 聖經有句說話,"我赤身出於母胎, 必赤身歸回", 就是這樣了!

晚上回家, 我家養的兩隻龜龜的其中一隻, 死左!

 

唉...老公養咗佢十年, 係一隻好產量好少婇珍貴的龜龜, 其實佢無咩心機幾天, keep住疴好多污糟嘢出來, 仲好嗅. 唔知佢咩事, 諗住觀察佢多一陣. 跟住前兩天, 佢疴了兩條紅紅地既嘢出來, 好恐怖. 擒日朝, 老公仲同佢換水, 我仲比咗幾粒龜糧佢, 但佢都無食, 個樣好無心機咁, 挨在缸邊望著我們. 估唔到, 那便是最後一眼了...

 

晚上, 我比老公早回到家, 看見龜龜的頭縮了入去, 兩隻手伸了出來, 一直叫牠都無反應, 甚至搖個缸都無反應, 我估佢應該死了. 我唔敢搞佢, 就等老公返來. 老公返來, 點篤點拉, 佢都唔出來. 龜龜真係死咗. 好唔開心. 我平時餵龜龜, 同換水都會同佢玩下, 當然佢唔會好似貓狗咁友反應, 但我同佢都好有感情. 老公仲要養咗佢10年, 佢真係超唔開心. 送走了婆婆的情緒都還未平伏, 龜龜又走. 係咪婆婆帶埋龜龜一齊走呢, 點解要揀同一日呢? 後日仲要係老公的生日, 點解今年的七月, 老公的生日, 會有咁多唔開心既事發生呢? 我好怕佢頂唔順. 佢個人, 呢排諗嘢越來越負面, 我真係怕佢頂唔順. 可唔可以停一停, 讓他休息一下?

發花癲

養竉物是很開心, 因為牠們會給你很好的反應, 但面對牠們的生病死亡, 又不是一件容易事. 擒晚望住龜龜好無幫的時候, 我便完全打消了養貓的念頭. 我一直好鍾意貓, 好想養貓. 以前同媽媽住, 佢唔比我養. 現在同老公位, 佢唔鼓勵我養, 因為我有鼻敏感. 現在好了, 原來我是一個咁接受唔到竉物離世的人, 那就最好不養了!

所以, 繼續種花吧!

離開舊公司, 當然帶埋我心愛的紫羅蘭走, 一共五盆. 有兩盆是剛浸好入泥. 另外兩棵也是由我一手一腳由葉浸出來的, 所以一定要帶走. 而最後一盆則是朋友比的特別品種.

這棵特別品種一直都生得不太好, 很少開花. 自從我換了大盆後, 仲衰. 越生越斜之餘, 更越來越多枯葉. 三星期前, 在公司食過飯, 便幫它翻一翻泥, 將它種番入些, 又將它移好位. 過了兩個星期, 它便發花癲咁不斷出花. 今天已有五朵正在盛放, 另有五六個花芯正含苞待放!

在傷心的心情下和厭悶的工作中, 看看我悉心栽培的花, 同埋個無敵大海景, 人都開心番!

 

2014/07/17後記: 超...最後咪又係養咗貓, 仲兩隻添囉.

李克勤 x 趙增熹 x 香港小交響樂團

香港小交響樂團由2001年已經開始跟不同的流行樂歌手搞演唱會, 一直都好想去睇, 一直都無機會. 今年佢哋終於同李克勤開演唱會, 仲要加埋我超鍾意的趙增熹, 就一定要去睇. 捉咗老公同我去, 我開頭都擔心會悶死佢, 因為佢零音樂細胞, 同埋成日都覺得演唱會好悶(但佢都陪咗我去睇好多個演唱會了). 今次好明顯主打係唱歌同音樂, 唔會有好花巧同吸引的舞台效果同表演, 我入場前真係問咗佢有無帶PSP, 悶既時候就打機 (喺演唱會打機, 都幾絕).

明天都最後一場嘞, 睇咗既應該唔介意我透露內容吧, 未睇而又會睇既, 就請止步了!

克勤啲演唱會一向都會加入啲特別音樂元素, 好似對上一次演唱會就請了"鎖立"大師, "鎖立"好似殯儀館的"啲打", 但原來都會吹出好好聽的音樂! 今次呢, 同小交表演了幾首歌後, 就突然有五個男人上台, 跟住舉起手就吹起口音來. 平時我見過的口琴都係扁扁長長的, 但其中有一個的口琴就好似將四個口琴叠埋咁, 我估應該係低音口琴. 佢哋五個吹得好和, 好夾, 但原來五個人都係業餘了, 各有自己的正職, 好利害!

跟住就當然唔少得我哋偉大的中樂啦! 我本身好鍾意二胡, 以前都學過吓. 點解我會鍾意二胡, 話說係一套有董驃同黃霑做的戲, 董驃玩二胡, 黃霑拉小提琴. 二胡憑佢兩條弦可以拉到小提琴五(定四呢, 死嘞)條弦的歌出來, 我真係覺得中樂好偉大好利害. 哈...拉遠咗! 今次克勤請了中樂三弦琴大師來表演. 嘩, 佢啲手指同隻手, 快到呢...最利害係, 後來大師同電子結他手的一場對演, 原來三弦琴彈出來的音, 係可以咁似現代的電子結他. 最衰就係啲觀眾, 有一段係電子結他彈一琴音樂出來, 三弦琴就跟著彈同一段出來, 怎知每次三弦琴一出聲, 啲人就拍手掌. 頂, 係咁拍, 佢哋聽到啲咩啫, 拍乜鬼. 可唔可以成段完咗先拍呀! 呢一part另一個估唔到既地方係, 我呢個都叫做學過吓音樂既人, 睇咗好耐個琴都唔知係咩樂器, 我老公竟然講得出個名. 真係唔好睇小佢, 佢都知幾多嘢.

跟住第三part就有三個男人走出來唱了首, 我估係意大利歌劇. 我唔識評係咪好聽, 我成日以為唱歌劇既人係應該唔駛用咪, 都可以全場聽到, 但佢哋用咪囉! 佢哋三個都係香港本土男高音, 可能啲歌唔咪真係好高, 所以真係唔知佢哋有幾勁! 但最搞笑係, 當音樂奏起飛花啲首歌時, 大家都期待克勤平時輕輕聲的唱法時, 佢係用歌劇腔去唱, 笑到我老公傻咗! 真係估佢唔到!

最最最玩嘢的一part, 克勤話, 有啲歌係大家熟到不得了, 而佢亦唱到滾瓜爛熟到調轉都可以唱出來. 我開初以為係紅日, 但唔咪. 佢一路唱, 音樂係好好聽, 唔會好怪, 只係佢唱歌詞時, 你點都聽唔明佢唱咩, 因為啲歌語根本就唔make sense, 估極都估唔到佢唱邊首歌. 跟住銀幕就reverse play back佢頭先唱果段嘢, 原來係舊歡如夢. 我真係想像唔到歌係可以調轉嚟唱.佢播片的時候, 我有懷疑過會唔會只不過係預錄了的一段正常唱的片段, 等佢出碟的時候買來再聽過!

最後亦有一part, 克勤唱了三首別人的歌, 佢請了頭條新聞的監製來配了三段新聞片, 全部都切切合合咁配首歌, 好似郭富城的"我為何讓你走", 佢哋配了包致金"窒"女掌摑警員事件, 笑到死咗.

趙增熹今次無咩個人表演, 不過啲曲都係佢編了, 我已經覺得佢好利害. 超傾慕佢呀!有好多次睇演唱會, 都係由佢做音樂總監, 有時佢都會表演吓佢啲琴技, 果時已知道有呢個人, 好利害. 但一直唔知佢咩樣, 仲以為佢好老添. 直至巨聲, 先知原來佢咁後生, 咁靚仔 (我個人認為佢幾靚仔, 可能欣賞佢的才華關係)

估唔到一個我以為會頗悶的演唱會, 會給我咁多surprise! good show 呀!

讀書好定學琴好?

依家新工作實在太太太無聊, 太太太得閒了. 果日响地鐵見港大派課程書仔, 就攞咗本嚟睇. 見有一個營養課程都幾有趣. 13,000蚊, 之後可以讀多個, 就會有個post-grad.的diploma, 再繼續, 仲可以讀埋master.

自從睇咗am730, 一個營養師的専欄後, 其實對營養好有興趣, 所以真係幾想讀下, 認識下.

但係, 其實我又一直想再學番琴, 自從95定96年考左8級之後, 就無咩點再認真彈琴. 同埋以前學琴, 年年考試, 年年就係咁谷果三首歌, 我覺得其他的歌, 我彈得好少.

咁學琴好定讀書好呢? 讀書呢, 可以係返工的時間做功課同睇書, 因為工作實在太太太得閒. 但係一個星期返兩晚學, 就唔會可以學琴, 因為學琴係要練, 認認真真練都要最少一個鐘啦! 咁仲有要出街, 跑步, 同睇電視, 好似又真係騰唔到時間出來練琴.

咁當然我知有心既話, 就可以拿到時間出來....真係要認真諗下先得.

百無禁忌的低能對話

今朝同老公講, 唔知婆婆應該係今晚頭七, 定明晚先係呢? 因為我哋唔知計唔計走果日.

跟住就有以下低能對話

我: 咁婆婆會唔會嚟呢度?

老公: 婆婆唔識嚟啦.

我: 咁婆婆掛住你嘛!

老公: 咁又係.

我: 咁今晚係咪會有飛蛾飛入嚟架?

老公(一面無助, 佢好似家裡有昆蟲): 咁如果有打唔打?

我: 梗係唔打啦!

老公: 咁如果飛咗甴曱入嚟呢?

我: 你死咗做甴曱,我就一定打死你. (咁衰, 死咗都要變做我最驚既嘢, 拼條命都要打死佢)

後話: 原來頭七係會計埋走果日, 所以婆婆就係今晚頭七. 不過都係叫做得個知, 我哋基督徒都唔會做啲咩. 叫做認識下中國的傳統.

好唔鍾意無plan的生活

因為老公婆婆的事, 呢幾日唔知自己想點.

 

基本上我知道佢每天放工都會去睇婆婆的, 所以我就唯有自己安排活動. 我知我係可以每天跟他到醫院睇, 但係家住將軍澳, 工作在鰂魚涌, 醫院在仁濟, 再加上唔咪自己親的婆婆, 又未同過佢相處過, 心裡確實無太大既熱心跟老公天天去. 現在婆婆的情況就是繼續靠氧氣, 每天情況都一樣, 我去, 其實都真係只是為陪老公.

 

但係之前醫生又講到好嚴重, 所以我就唔敢plan 或應承任何活動, 怕突然接到電話就要失約. 就連月尾老公同我媽生日 (同日), 我都唔知點plan. 跟住下星期三去睇李克勤, 又擔心會突然去唔到. 仲要擔心婆婆揀正老公生日果日走, 咁就真係大件事.

 

無得plan的生活, 我唔知自己想點囉! 之前會諗下今晚煮乜餸, 但現在基本上都預老公唔會返嚟食飯, 我應該呢個星期都係自己搞掂, 呢樣我已經唔咪好開心, 但我又要明白同體諒佢. 唉...

我係咪自私咗啲, 又諗多咗啲呢?

走了

老公的婆婆, 終於在昨天走了!

老公5:00 msg我話婆婆的血壓急降, 趕緊去醫院, 我問佢我要唔要去, 佢話等佢去到睇情況先. 5:5x 佢再msg我, 話婆婆已經走了! 咁我一放工就去啦! 中途老公打比我話直接去奶奶家會合, 不用去醫院.

最後老公同二家姐都係趕唔到去, 只有奶奶陪著婆婆. 不過聽奶奶講番, 婆婆都走得好安祥, 佢話見到佢有一刻好似無呼吸, 於是便摸下佢, 又好似無脈搏, 但跟住又見婆婆好用力咁吸了啖氣, 奶奶仲諗"都好, 仲有呼吸", 但之後就見越來越慢, 睇住佢面色由紅變白, 身體由熱變凍, 脈搏儀由上下跳到一條線, 就知道婆婆走了!

去到奶奶家樓下見到大家姐, 原來佢哋未返到, 所以就同大家姐係樓下等. 大家姐都無去到醫院, 因為奶奶第一次打比佢時佢趕緊啲嘢聽唔到, 再打, 婆婆都已經走了, 所以都不用去了. 後來見佢哋返來, 個樣ok喎, 仲笑住添, 似乎大家都真係有晒心理準備. 又或者, 見婆婆走得安祥, 終於可以息勞, 可以解脫, 都係一件好事. 心裡唔捨得一定有.

跟住等埋大姐夫過來便落樓下食飯, 六個人仲叫咗五個餸, 大家都仲有胃口, 都唔錯!

老公擒晚都無咩嘢, 回到家如常睇電視, 睇卡通片. 我見佢無咩嘢, 我又如常去瞓覺. 不過擒晚我依然瞓得不好, 發惡夢, 有隻小強飛埋我個身, 好驚! 今日我又如常返工, 但老公就請了假去陪奶奶了.

都好, 大家心中有盼望, 將來在天家可以再見. 這是基督徒的福份. 死亡, 有時不一定會太傷心的.

 

不知怎樣去等

星期六晚在練詩途中收到老公的sms, 話他的婆婆情況唔咪好好, 佢哋一家已經在醫院.

註一註: 婆婆五六年前中風, 已經開始住護養院, 我第一次見佢的時候, 其實佢已經認唔到人, 亦講唔到嘢了. 上星期日, 護養院話佢鉀低, 要送佢入院.

我一練完詩便飛的去仁濟見佢. 老公話婆婆有肺炎, 好多痰, 呼吸唔到, 所以要比氧氣, 已經比到十度了! 唔樂觀!

但見已經穩定了, 八時過了探病時間, 我們便離開.

第二朝我要獻詩, 又見晚上無收到電話, 都安安心咁返教會. 怎知, 在敬拜途(未獻詩), 老公sms來話婆婆擒晚已經要用到15度氧氣了, 係最高! 醫生話家人可以隨時去睇, 唔駛等探病時間, 好似好嚴重. 於是一獻完詩, 便同老公去醫院! 去到, 只見婆婆轉了另一個氧氣罩, 包到實一實等啲氣唔好漏出來, 又要定時抽痰. 護士入來幾次, 有一個更同奶奶講, 佢好弱, 你哋要有心理準備. 最後, 我哋由12點, 一直坐到6:15先走, 係醫院坐咗六個鐘.

回程時, 同老公都無咩嘢講. 真係唔知點安慰. 婆婆最錫係我老公, 所以我老公亦好錫婆婆, 佢話係有心理準備, 不過始終唔捨得. 我可以講的, 真係只有我哋第日在天家會見. 婆婆都辛苦咗咁耐, 唔郁得, 又講唔到嘢, 又唔認得人, 佢真係走, 都係一個解脫, 佢即時就能在天父的懷抱, 可以行得跳得, 仲可以見番啲老朋友, 一齊唱歌跳舞, 對佢會係一件好事.

擒日同前日, 離開醫院時, 我都在婆婆耳邊講, 叫佢唔駛擔心大家, 見到天父的時候就跟衪走啦!

今日問了我一個係內科做的姐妹, 我問佢通常到了呢啲情況, 老人家仲可以捱幾耐. 佢話好難講, 有啲老人家好頑強的, 可以好番出院添! (即係去番護養院) 有一啲呢, 可能幾日, 或一個月內都應該會走. 佢話聽我講話醫生護士都叫我哋做好晒心理準備, 應該都唔會耐.

但係究竟係幾耐呢? 我同老公今朝都講, 但個心唔知點, 唔知喺度等咩咁, 好奇怪. 大家呢兩晚都瞓得唔好, 瞓係瞓到, 因為真係好攰. 但就發惡夢囉! 每一次有電話響, 都好緊張! 呢啲心情, 我咁大個人都真係第一次有. 我又未至於有話唔捨得婆婆, 始終, 我連同佢講說話的機會都未有過, 我緊張, 應該係擔心自己唔識點handle老公的情緒, 同埋奶奶佢哋的情緒. 唉.... 我本身係想婆婆快啲走, 希望佢唔駛再受苦, 但耐何, 婆婆總像有事放不低, 好頑強, 點都唔肯走. 我有問過老公, 會唔會同家人商量, 選擇叫醫生唔好再做任何嘢, 等佢自然走啦, 唔駛再辛苦咁耐, 佢又話唔合神的心意, 話以人的決定去放棄繼續的護理, 就唔啱. 我唔知, 我個護士姐妹都話唔知.

呢幾日, 真係唔知點去等, 真係好奇怪的心情.

玩嘢咩!

擒日收到個email, 叫我print份嘢出來比老闆簽啦! 咁佢個email打了一句, 搞咗我成個鐘.

佢個句嘢係:

When you print out for XXX please, by hand, strike off "employees" at the end of the first sentence in 2H of the Statement of Work which follows Annex 2

以我的低能英文理解, 佢叫我用手畫咗Annex 2後面, Statement of Work 第一句最後個employees呢個字. 首先Annex 2 只係得一版, 之後就到appendix 1, appendix 1係有10幾版, 我無可能搵比佢. 我試過用search呢個function, 但因為係scan copy, 所以search唔到. 我又諗過, 佢會唔會話係annex 2果版呢, right after annex 2呢個字, 但我睇晒成版, 都無囉. 最後我以為係我啲低能英文真係咁低能, 咁我就sent了句嘢比個fd, 我覺得佢英文應該幾好, 佢叻呀, 估到2H 代表2nd Half的意思. 我只以為係打錯. 最後我搵咗好耐都搵唔到, 放棄, 收工.

今日姐姐返工, 我咪問佢, 但佢都理解唔到, 就叫我直接問果條友. 我問佢响邊頁, 佢就咁答 p.14. 即係appendix 1的中間. 頂佢. 明知我搵唔到, 可唔可以講多少少呢? 都唔明呢人點解會咁唔helpful.

最後我終於係p.14的中間 H 點第一句尾, 搵到呢個字. 我真係想飛去英國打巴佢.

其實好簡單一開初叫人係page 14, appendix 1的H point搵咪得囉. 又要2H of the Statement of Work, 仲要嚟多句 which follows Annex 2.

同番個朋友講, 佢話呢啲人心地唔好, 簡單複雜化, 想人地幫唔到佢, 之後就丙人. 我都覺得係. 専登寫到懶複雜, 等人哋搵唔到, 打擊人. 好嬲.

火燭 @ 奶奶家

唔知係咪天氣太熱的關係, 個個都比較燥, 擒晚一去到奶奶家, 坐低食餐前小食, 大家姐同老公就開火, 我坐在一旁, 完全唔知發生咩事. 我哋倆仲好開心咁係樓下買咗條好似香蕉的雪條上去, 比大家食. 怎知, 大家姐又買了龜靈膏喎! 再怎知原來奶奶又整了芒果西米露, 又買了炸魚蛋 (題外話, 實在我真係諗極都唔明, 做咩一個二個都鍾意買嘢上去飯前食, 尤其是奶奶, 又要買小食比我哋飯前食, 到食正餐時食唔落, 又話我哋之前食咁多嘢. 真係好奇怪).

 

咁大家姐同老公就一路食魚蛋, 就一路唔知講咩, 講吓講吓就開火嘞. 我估大概係言語上出了誤會, 最後老公就躲入房. 跟住奶奶又出來開火, 話我哋做咩仲唔開大張枱. 但實情係, 我哋上到去, 其實成將枱都已經放滿嘢, 佢就不斷催個孫女入去廚房攞啲碗同西米露出去, 咁孫女就梗係傻更更好聽話咁入去攞, 如是者, 成張枱都係碗, 奶奶出來見到, 就開火話做咩叫我哋開大張枱咁耐都唔開....我, 孫仔, 孫女, 同大姐夫, 就好無奈的站在一旁, 睇奶奶同大家姐開火了. 奶奶仲鬧大家姐做咩講咗佢知有西米露, 都仲要買龜靈膏. (其實又係喎, 兩樣嘢其實都幾相沖)

跟住鬧鬧吓, 又燒到我老公話佢唔聽電話, 所以講唔到佢知家裡有炸魚蛋, 西米露, 同龜靈膏. 但實情係, 我老公係無miss call囉. 唔知大家姐打咗去邊個星球.

 

最後, 擒日大家姐全晚黑面, 因為佢買了龜靈膏, 啲細路食唔落西米露, 而大姐夫係唔食芒果), 所以佢就自己哽, 又因為同我老公鬥氣, 原本買比我倆的龜靈膏佢自己哽了. 即係佢飯前係食了一盅龜靈膏, 兩碗西米露, 幾粒炸魚蛋, 先再dinner, 最後, dinner後, 佢胃痛.

近排唔知做咩, 每個月都有一兩次會開火. 其實一個星期先返去一次食飯, 做咩要搞到家嘈屋閉呢? 咪搞到個個都唔想返去. 奇怪.

我奶奶仲奇, 其實佢自己本身係唔鍾意煮嘢食(我覺得), 但硬係要每個星期煮飯, 仲次次都要煮好多樣, 煮到身水身汗出來又話辛苦, 叫佢唔好煮, 佢就發你脾氣話唔鍾意食唔好返嚟食. 真係 O 晒咀. 又次次煲一大煲湯, 可惜又唔好飲囉. 今期...連續三星期煲同一款湯. 我同老公倆, 仲有二家姐, 係~~, 平日無咩湯水, 但唔駛個個星期都係同款湯喎, 我本身都幾鍾意飲湯, 但都無心機飲囉.

其實, 我真係唔想個個星期上奶奶度囉!

團購玩上癮

前排發現連yahxx都有團購, 心想佢做得團購, 都唔咪騙人果啲既, 就入去睇下. 不得了!

先買咗四張日本拉麵店的coupon, 以$22可以去食碗價值$48-52蚊的拉麵喎! 抵啦! 出面連味精拉麵都要$40幾蚊碗啦! 於是就買了四張. total $88!!! 擒日食咗 ~~ 失望的!

跟住又見到旺角一間waffle店又做團購. 同老公去睇槍時, 都望過下, 好多人買, 但見都要$30蚊個waffle, 我又唔咪超級愛甜者, 一直都無試. 見團購$16就可以換一個, 又買了張!! 擒日食咗 ~~ 無咩特別!!

跟住又見潛艇三文治, 都有團購, $25蚊可以當係$50的coupon, 見公司樓下有, 於是又買了兩張. 當無飯帶的時候, 又可以攞去換巨型三文治食. 今日食咗 ~~ 比個餐牌玩死, 最後仲要補多18蚊, 買了個超大餐, 夠兩人份量.

上星期, 原來"熱郵"都有link一個團購, 見到公司附近有間幾好評的墨西哥小食店有團購, $30買價值$60的coupon. 佢一個套餐就係50幾60蚊, 上次食過覺得幾好味, 想試多幾款, 於是又買兩張.

哈哈...團購真係幾好玩幾抵!不過真係小心上癮. 幾十蚊幾十蚊咁買, 好易出事!

又不過, 用團購買啲想試的餐廳coupon都好, 起碼可以平價試下間餐廳的虛實, 如果佢係唔好味(好次那間拉麵店), 都唔會覺得lost咗囉! 如果要我以正價食唔好味的餐廳, 我會好唔開心囉!