我的2013

2013又到了最後一日, 今年真係覺超快喎! 其實係咪人越大, 就越覺得日子過得快呢? 我堅覺得係一年比一年快!

見電視又開始做回顧, 我又諗下今年做過咩? 原來都叫做有兩件大事.

第一件: 年初無啦啦買咗樓, 做咗業主, 開始供樓既生活....唉....都感恩既, 同奶奶住近了, 沒有想像中既驚嚇和煩擾.

第二件: 完成了人生第一次馬拉松, 是全馬, 42.195公里呀!!!!! 亦係第一次去外地跑添喎!! 之前跑過三次半馬, 都係死下死下咁完成, 一直覺得自己係無可能完成全馬. 但係, 真係唔好講無可能, 只要去做去試, 就有可能.

其他小事....

今年都去了三次旅行喎! 唔計澳門果啲.

4月去了韓國跑馬拉松, 是第一次去韓國㖿! 感覺麻麻, 可能因為係南部的釜山, 無咁大城巿, 識英文國語的人唔多, 完全雞同鴨講, 好迷失.

7月又去韓國 (我同人講我去覆診呀, XDD) , 同媽媽去, 去首爾. 感覺好得多, 所有店的人都識國語, 溝通完全無問題, 多嘢行多嘢食多嘢買, 完全係一個好啱女士們去瘋癲既一個地方, 要再去!!

8月去墾丁, 掉低老公同三個FD去, 絕對係開心!!

身體OK, 無大病過, 亦無乜小病. 一向身體都唔差, 近年多跑步身體更好, 連傷風感冒都無. 感恩感恩!

感情, 哈....同老公係嘈多咗既. 佢今年壓力大咗, 要供樓之餘, 亦轉了工, 一份唔咪好熟行既工, 所以更大壓力. 然後又任性地養多了一隻過度活躍既貓 (即係我哋有兩只貓), 有中度潔癖既老公對住過度活躍搞亂檔既貓, 大家應該想像到會發生咩事....結果咪搵我嚟鬧囉! 點解? 無得解架! 只係覺得佢開始有情緒病, 有少少燥"屈", 同一向都有既強迫症. 我諗係時間要同佢去睇醫生了. 唉.....香港又多一個因壓力做成的精神病人了.

2013算是平平穩穩的過渡了, 身邊人亦健健康康整整齊齊的. 人要有盼望既, 所以都希望2014 繼續平穩過渡, 身邊人繼續健健康康整整齊齊.

今日放2:00, 祝大家新年快樂, 大家都健健康康整整齊齊, 開開心心.

2013聖誕5天假期做過乜?

今年聖誕只係攞一日假, 就放咗五日, 爽到呢...啲時間亂晒, 星期六果日係咁覺第日要返工, 擒日呢, 就勁低落唔想個假放完.

 

DEC 24

放兩點, 1:15我就走咗lu, 去咗觀塘啲工廈買了兩件護膚品, 跟住會合老公食個late lunch, 便回家換衫休息下, 再出尖沙咀睇下燈飾. 8:30 book了枱, 在新浦崗一間新的酒店, 叫貝爾特酒店食Christmas Buffet. 酒店出奇地靚, 食物也驚喜地多和好味. 一入去見個個枱上都有一盅湯, 原來係燉湯, 好好味. 仲有生蠔長腳蟹魚生鴨肝炒意粉煮湯粉切肉炒蜆辣雞煲羊腩煲...好多酒店buffet有既佢有, 地道大排檔嘢, 佢又有. 仲要聖誕節價, 只係等同人哋平常dinner buffet價, 900幾蚊兩個. 出面啲半島洲際山卡拉係講緊900幾千幾蚊......一位囉.

 

Dec 25

早上返崇拜, 之後老公話好想食PIZZA, 就落咗尖沙咀. 然後終於買到聖誕禮物比佢. 佢成日想話買牛仔褲, 但佢想買的牌子EDWIN, 响香港無晒鋪, 最後終於响bxxhaut買了evis??? 比佢, 跟住再响fingercroxx買埋件恤衫, 咁新年佢就有新衫新褲仔著了.

晚上....無聊到爆...最後我回了娘家同媽媽食, 佢就回家兼邀佢阿媽過來, 煮飯比佢阿媽食. 各自陪自己媽媽. 條友仔買鮑魚煮比佢阿媽食囉. 都話佢對阿媽好過對老婆啦.

Dec 26

一早起身去跑步, 聖誕係咁食, 唔跑番吓會好唔掂.

下午同朋友去龍鼓灘BBQ. 我第一次去龍鼓灘, 要埋海景位, 睇住日落BBQ都幾正. 只係凍咗啲.

 

 

Dec 27

諗住可以同老公食個早餐後去上堂(單簧管), 結果遲咗, 食唔到早餐就要出去.

上完堂, 約了朋友去沙田探另一個朋友, 她生完BB兩個月. 比我個FD激死, 約了人12:30, 佢仲要無交電話費打唔到電話, 會合已經有問題, 見到面又猛叫肚餓話要食啲嘢先上去, 食完又話唔記得响邊度搭shuttle(但佢係去過人哋度幾次了), 最後由我帶她去搭shuttle, 搞到1:30先上到去, 去到人哋又餵奶中, 我哋又趕住2:30要走, 因為book了3:00在尖沙咀high tea...結果都唔咪好同到bb媽媽傾計. bb媽媽已經第二胎, 但第二胎陀得比較辛苦, 一來係意外, 有咗都唔知, 知道時已經係作小產, 陀到後期又話因為某啲原因(我唔記得了), 盆骨位既肌肉拉爆了, 所以承唔住個肚, 爆痛. 生完, 又要照顧個大, 又要坐月, 根本無得休息, 所以身體好差, 唔敢出街, 怕流感, BB病又唔好, 自己病又唔好, 結果兩個月, 除了去健康院同打針, 完全無出街. 聽見都覺得慘.

好忽忙咁又趕住走, 去朗廷酒店食hightea, 出奇地唔多人, 完全覺得係walk in都有位果種, 但食物唔咪差喎, 唔知點解會咁. 環境都唔差.

 

Dec 28 & 29

回復番平時星期六日既活動, 跑步, 返教會, 返崇拜, 週圍行, 食飯. 就咁, 聖誕便完了!!!

 

聖誕禮物, 我都有架~~ 只不過係一早收咗.

 

 

 

手錶...一睇就好鍾意, 原來老公都睇咗好耐覺得好靚. 見我都鍾意就買咗比我. 已經係老公送比我的第....三隻手錶, 但其實另外有三隻亦係佢未識我睇買落, 比埋我戴. 我要生多4隻手先戴得晒.

 

 

跑鞋...想買多對跑鞋放公司, 開始番我既午跑, 所以叫老公今年送跑鞋比我. 左揀右揀, 鍾意既女裝桃紅色無我SIZE, 男裝呢對叫最舒服, on 居居咁好衝動買了, 但唔係最鍾意. 跑過一次, 腳好痛...唉...真係唔知點算, 好激氣. 現在想搵人賣咗去, 買過另一對. 唉~~ 又會比佢哦我十年.

有幾趣, 請比趣 ~~ 陳家奇怪湯圓

湯圓, 是冬至飯, 團年飯, 有中秋飯會食既應節食品, 喻意團圓.

我娘家習慣用薑和冰煻煮成湯來煮湯圓, 每人要食兩粒 (可以多啲, 但一定要雙數), 我好鍾意食, 連湯都會飲埋.

食了陳家湯圓幾年, 一直都唔知點解佢哋既湯圓係咁.

首先, 一去到, 湯㘣已經煮好, 大約十粒放了在碟.

無錯是碟. 因為已經走水.

奶奶會叫我哋快啲, 每人食一粒湯圓先.

但啲湯圓因為走水了, 所以係痴埋晒, 十粒湯圓形成一PAT湯圓, 分唔開.

格硬分開, 有時係會拉爆,拉爛晒啲湯圓, 好核突.

擒晚, 團年飯, 我同老公係最後上到去, 見到枱面剩番三粒湯圓响碟上, 又係碟, 又係走水.

又係叫我哋快啲每人食一粒湯圓. OK, 食, 都慣了, 點難食都係一粒.

點知...出事. 做咩今次係凍既?? 唔係放涼了在室溫既凍, 係由雪櫃攞出嚟既凍.

都係果句, 好彩係一粒, 食多粒都想死.

咁陳家TOTAL人數係九人, 一包湯圓十粒, 即係會剩一粒, 當然就係要搵人哽咗去啦.

無人出聲, 無人肯食囉. 最後由我老公哽咗去.

後來我同個FD講呢件事, 佢問我, 咁不如下次食雪米糍啦! 應該大家都會好鍾意食!!

唔知大家屋企既食湯圓習慣係點架呢?

P.S. 忘了講, 呢粒凍湯圓, 我一食, 就咬親個咀角, 流晒血.....凍湯圓真係幾嚇人

遊咗個小運

擒日地鐵既大龍鳳, 就顥示出住將軍澳既人既一點無奈. 因為除了地鐵, 我哋其實無咩選擇.

無地鐵而又在港島返工, 就更更更無奈!

擒日兩點幾知道將軍澳線定洗, 開初都好老定, 諗住仲有4個鐘, 唔會停咁耐既, 點知到4點幾, 竟然話要到7:30先會恢復.

即刻諗點返屋企呢? 唔同要坐港島線去金鐘轉荃灣線到旺角, 再轉觀塘線去觀塘再搭接駁巴士? 咁既環境仲要落雨, 六點返工既話,應該都要九點先返到去.

咁就一路上地鐵網睇佢有無接駁巴士响北角鰂魚涌行東隧去觀塘啦!

後來見佢話用後備路軌, 有列車由北角鰂魚涌直去藍田, 在藍田觀塘有接駁車返將軍澳.

於是, 同老闆講可唔可幾五點走, 被開人潮.

最後5:10走, 落到地鐵站, 人唔多, 入閘前再睇一睇係咪真係有車先入閘.

唔洗等8分鐘就有車, 好快去到藍田, 出閘見無指示就問啲工作人員邊度有接駁巴士.

頂.....佢話藍田無, 叫我去搭咩694 / 692 (但係今朝睇新聞, 692已經响上個月停駛了, 搭佢個屁).

我同個工作人員講, 我話你網頁話藍田有車, 我出咗閘你先話無, 咁點先?!

我搭10幾蚊過嚟, 你又叫我再搭多10幾蚊返去? (呢句心諗)

個工作人員都好出奇, 佢話唔止我一個話藍田有接駁車, 咁即係地鐵資料有問題啦!

後來我去票務處問, 佢就FREE了我剛剛果程, 我就再入去搭車去觀塘.

去到觀塘, 落地大堂搵閘出既時候, 就聽到廣播話維修了, 列車服務會逐漸回恢正常.

於是我又走番上月台等. 月台上面既廣播都幾好笑, 同時有兩段廣播出來, 一段話將軍澳線暫停, 一段話已經恢復, 有個女仔就走埋去問, 即係點呀? 個職員只可以答係恢復了, 但唔會知第一班車幾時到, 你哋可以照落去搵shuttle, 或响度等.

又見到啲職員比人鬧話指示唔好, 話被點到走來走去. 其實啲職員都好慘.

其實跟住都好快, 大約隔兩班車, 就已經有開去調景嶺站既車嚟. 所以我最後6:05便返到坑口, 比平時其實只係慢咗15-20mins. 遊咗個小圈.

諗落都有啲傻, 如果唔早走, 照6:00放工, 其實人家都restored了, 我啲同事話其實同平時一樣.

但係, 都有啲感恩. 雖然白白痴咁早走, 但都要因為有個好老闆, 比我早走先得架! 萬一佢真係7:30或之後先開番, 我老闆就救了我一個晚上了.

第二樣感恩係, 响觀塘未出閘就已經知道有車了. 如果出咗閘, 都唔知應該落去搭shuttle定返轉頭. 夜晚睇新聞見啲人响風雨下等車, 好慘呀!

第三樣感恩, 當然也要感謝地鐵混亂既指示, 所以晚了我藍田果程, 最後我擒日只係用$4.4就返咗屋企, 慳咗一半車錢, 哇咔咔!!

仲有一件奇事想紀錄低. 咁睇新聞啦, 例牌會訪問吓啲亂混情況, 訪問下啲好迷失慌張既巿民. 其中有一個媽媽, 抱住個bb, 話bb發燒, 趕住要帶佢去睇醫生, 好慘, 等好耐都無車. 個媽媽仲喊晒添.

我心諗...其實香港應該唔會得一個醫生, 入唔到將軍澳睇醫生, 擒日天氣又咁差, 做咩要咁傻(蠢)仲要入將軍澳睇醫生. 拿拿聲响觀塘睇咗個醫生, 搵個餐廳比個b食藥, 坐一陣等有番車先慢慢返去啦!

我生仔----在夢裡

仔我就真係唔打算生, 但唔知點解間中都會發生仔夢, 仲幾搞笑.

之前都發過一兩個, 擒晚又嚟.

夢入面,我係仲有十幾日就生得, 個肚好大, 覺得就生得咗種(其實因為急尿)
但係呢, 夢入面我係, 咩都未買, 未有BB衫, 奶粉, 尿片, 連走佬袋都未執
因為我係好唔想生, 所以有咗都死唔肯去啲講座, 所以連贈品, 咩都無
咁就周圍問人走佬袋要點執. 印象中夢裡我係有問HEIHEI走佬袋要執咩, 佢比咗一個FILE既資料我.

跟住仲有我阿哥話贊助我奶粉, 然後又有一個WOW友話叫我買牛欄牌, 話無臭味.

仲有, 夢入面呢我係有去照係仔定女, 唔同現在呢咩3D定4D只係睇到一PAT樣, 果個科技係利害到好似拍片, 係好清楚睇到BB個樣, 所以一定睇到係仔定女, 過程中個BB仲轉身比我睇, 佢係有JJ的.

就係記得咁多, 然後仔都未生完就醒了, 去廁所.

我今朝好似講錯嘢

今朝好似講錯嘢, 但其實又係真說話

今日奶奶新曆生日, 我老公同佢大家姐都請了假陪佢. 我只是跟埋一齊同佢哋食早餐

咁大家姐著到好似返工咁, 原因...佢奶奶昨天生日, 佢無放假陪佢奶奶, 今天佢阿媽生日, 佢請假陪阿媽, 佢怕佢奶奶唔高興, 所以要扮返工. (其實我覺得多餘囉!)

 

跟住我就講, 咁奶奶點同阿媽呢? (不要忘記, 佢阿媽, 即係我奶奶)

咁我奶奶當然無出聲啦! 不過大家個樣有少少尷尬, 我諗呢句說話, 由我老公講會好啲, 唔應該由我講出口, 雖然呢句說話係好真實既事實. 一眾奶奶, 無理由會天真地覺得自己既份量會等同人哋親生阿媽啩?!

跟住我老公kind of 打圓場話:"係架, 即係我外母生日, 我都唔會放假啦!" (我心諗...excuse me....我都無要求你放, 再者, 你同我媽係同一日生日, 你放假, 都係因為自己生日啫, 咪扮乖女婿)

其實上星期六已經一家人同佢出去食咗飯慶祝架啦! 佢月頭農曆生日果朝, 亦比佢叫了落去, 請佢食咗個早餐, 即係其實我同佢慶祝咗三次了, 我都算係咁啦! 仲兩次為咗同佢食早餐, 搞到我遲到45mins返工添呀! 佢個仔, 我媽既女婿, 都只會同我媽食一次生日飯啫! 仲要依依哦哦懶乖仔咁.

與奶奶住很近的日子

還好, 沒有我想像中的煩!

奶奶搬過來坑口都大約有一個月了.

現在大約每星期有兩晚會上她那邊吃飯.

初初也在煩惱應該是吃飯後才去跑步, 還是先去跑步再上去食飯.

既然老公間中放工時間都頗飄忽, 還是先跑步好了.

於是一放工便仆回家, 以極速換衫再衝下去跑步.

其實跑完上到去都只不過是8:15, 所以她都沒有什麼說話.

只是過了兩次她便問他們可不可以先吃...當然可以啦!

便是這樣, 時間反而好用了.

跑了步, 吃了飯, 9點幾回到家, 都仲可以練習一下單簧管, 看看電視.

又, 一直她都不太喜歡我食隔夜餸

竟然一星期後, 老公開始跟她說我們要帶飯, 著她煮多一點, 她又沒什麼說話喎!

更主動問我們第二天要否帶餸, 仲幫我們裝起喎!

再又, 一向星期六, 我都會同老公落街食一齊早餐.

奶奶搬過來前, 我常擔心她要加入我倆的早餐時間,

最後只是第一個星期有一齊食後,

便再沒有約她一齊食.

或許因為我們每次都很忙的起床出門落樓食早餐(老公趕返工),

也或許因為她星期六其實都有事做會早出門.

所以, 現在的生活便安穩下來! 幾好. 感恩! 希望安穩的日子繼續....直到永遠.

婚禮之交通安排

諗起今個月尾號會去元朗錦繡花園入面既教會(?)觀禮, 突然有感而發...

半年前知道呢個FD會响咁遠遠遠既地方行禮, 我已經打趣問了一句, 會唔會有旅遊巴响某個地方接送呀?

答案當然係無啦! 佢仲話番, 你唔介意, 可以來JOIN姐妹車. WELL....唔係介唔介意既問題, 我都唔會想搞到佢唔夠位. 不過, 佢都無醒水, 到我收到帖, 都依然只係比咗個路線圖同地圖我, 搞到我一百萬個不願意去.

元朗, 對我呢個住將軍澳既人嚟講, 真係遠過去台北, 即使未嫁前我住大圍, 在新城巿廣場有一程車去, 我都係覺得遠. 我一年都最多只係會去三五次, 有時甚至一次都去唔到, 就算去, 都只係去大馬路方圓三公里地方.

我想講既係, 其實我明白新人好想搵一間自己好鍾意既地方行禮, 同時, 又好想好多人可以出席自己既婚禮. 如果真係揀正個偏遠既地方, 其實會唔會都可以安排架旅遊巴接送下啲來賓呢? 唔好講話要安排到循環線啦! 一架起兩架止, 最大的那款, 兩架都載到120個來賓去觀你個禮吧!

好似前年, 就有個FD去西貢三育行禮, 無錯, 個教堂係好靚, 出面有個大草地, 又有紅磚屋. 但係, 只有將軍澳地鐵站有小巴上去, 或者搭的士. 咁都叫西貢, 可以講話都近將軍澳, 又咁, 咁啱我有FD好豪, 話搭地士, 咁我先有的士上喎! 點知, 果日落雨喎, 走既時候仲要係勁大, 果個教堂位仲要係三育書院最最最入既位置, 要行5分鐘先出到大路有小巴. 一下子一班人散場, 仲要1月都落個大雨, 巿區都勁多人CALL的士啦! 勁CALL的士都無的士肯入嚟, 又好多人無帶遮, 結果我哋有十幾廿人滯留了在教堂無得走. 當時我諗, 其實只要新人, 有啲心, 一班巴士接人來, 一班接人走, 已經散了大半人. 當然佢可以話佢無於果日落雨. 但呢啲山卡啦教堂, 落唔落雨都真係應該安排接送, 方便來賓, 又可以讓來賓來觀禮觀得開開心心, 仲可以等啲來賓觀禮後剩下的記憶, 唔會記十年都只記得被滯留在山卡啦囉!

放棄了

這個BLOGGER東西, 真的搞不懂怎麼難用, 是我電腦的問題嗎? 我可是用IE8哩! 在撰寫裡寫不到東西, html裡寫是寫到, 分了行, 最後出來也是一整段密密的. 貼相呢, 貼了九萬幾次也貼不到. 好吧, 我放棄了. bye!

又一個新BLOG

開過無數Blog, 由沒太多人看的msn, 跟朋友轉到Xanga, 然後朋友又慢慢一個一個消失, 我又跟著消失. 結婚了, 在生活易看見有一個頗好的wow, 找到很多結婚資訊, 認識了一班朋友, 突然發現婚後再在那邊打滾格格不入；開了個YAHOO, 但又沒朋友交流, 又回到wow, 終於有人出聲話我們這班結了婚的不分享結婚資料, 令WOW變質了, 好…都是走吧! 不回去了. YAHOO BLOG執粒, 又開個BLOGGER….又看可以留多久.

近況

原來都有近一個月無打嘢, 打番小小嘢當日記KEEP住.

十一國慶

 

 

之前一天買了呢個玩意, 於是十一早上就花了一個早上砌好了.

 

不過都叫完成了. 只是有一個地方我拗斷了. 下次要再小心啲. 我仲想砌摩天輪, 同一個日本屋.

夜晚, 同兩個朋友入西貢BBQ, 雖然叫做任飲任食, 食物亦唔算差, 但$228一位, 都幾貴. 假期...無法啦, 係要比人劏架啦.

******************************************************************

搬入新屋都有2個月, 一切都大致正常下來. 貓貓們都好適應新地方.

******************************************************************

繼續學梗單簧管, 其實係慢慢地進步, 都吹到好幾首歌. 不過始終覺得個老師唔識教, 每次學完都唔咪好開心, 唔係因為佢鬧我吹得唔好所以唔開心, 我每一堂都吹得不錯, 即使無乜練都好彩地過到關. 但佢教既方法真係好XX, 我真係只可以講, 佢係為餐飯, 而唔會去諗下用咩方法教唔同既學生. 無錯, 我係有音樂底, 但鋼琴同支管真係兩樣嘢, 佢唔明白我學琴係睇notes, 記CDEFGAB, 而唔係do ri me fa so, 佢就成日用do ri me同我講, 係咁叫我:"吹個ci 啦, 吹, 吹, 吹".... ci??? 咩係ci???? 噢...原來係ti....佢係內地人, ti 讀了ci. 都唔緊要, 慢慢我會記得ci 係ti, 但係, 我真係唔咪可以咁快諗到ti係邊囉. 我係要CDE呀. 亦因為佢覺得我有鋼琴底, 所以好多嘢亦係理所當然知道, 所以佢完全唔提. 一開始學C大調, 無flat 無sharp, OK. 跟住開始去G大調, F大調, 佢係提到無提過要F#, 要Bb...亦無話我知呢兩個音係邊個位, 只係到我吹到, 停咗自己响度諗F#應該係咩, 佢先好忟憎咁話"你睇我, 你睇住我吹". 可惜是, 呢支係單簧管, 我BB級, 吹既時候唔洗襟既手指係會樹起晒, 你係大師級, 吹既時候啲手指係可以好細動作咁郁, 我係唔會睇到你邊個手指襟住, 邊個手指係放開囉. 都係時候週圍再睇下邊度有得學, 轉去第二個地方學好了.

*******************************************************************

9月開始番我既跑步生活, 希望可以KEEP到每星期有兩晚跑步, 每次10K, 星期六跑15K或以上. 亦都PLAN咗一系列既賽事:

Dec 1 Macau Marathon (half)

Dec 22 Chiangmai Marathon (full), 呢個仲諗緊, 無錢去呀!

Jan 5 Mizuno HK Half Marathon

Feb 16 SC HK Marathon (full)

March 2 New Taipei City (full)

April 13 Paris Marathon (full)如果有錢既去既話, 無就搵下近啲既地方有無

*********************************************************************

八月尾, 又掉底老公, 同三個FD去了墾丁玩咗四日. 勁好玩, 好開心.

**********************************************************************

奶奶 VS 媽媽....最近有啲事發生, 好激氣, 會另開一篇寫.

我的奇怪奶奶 ~ N回

可能越近奶奶搬過坑口既日子, 心情同脾氣就會越差. 真係想像唔到到時會點.

話說我哋搬走後, 佢會住我們之前住果間屋. 因為果時我哋成日彈個廚房做得唔好, 所以她決定再做過個廚房. 仲JOIN咗德X寶. 有錢人係唔同啲既, 成個廚櫃, 好似七皮幾嘢.

咁其實我本身既廚房啲嘢, 都只係用咗三年, 抽油煙機, 煮食爐, 雪櫃...各樣都只係三年. 抽油煙機, 我唔記得當年邊個買, 係好差的大陸牌子. 可能係租客用壞了, 所以租部CHEAP嘢, 到我哋住又無話特別換左去.

但係煮食爐就堅係新嘢, 兼係櫻花牌. 我唔敢講櫻花牌好好, 但佢都係同PANASONIC同生產線, 都唔會差得去邊. 加上, 我都唔咪日日煮飯既人, 所以都好新淨. 即或我係日日煮, 煮食爐, 其實閒閒地都可以用上十年八載.

好啦! 之前都同佢講, 抽油煙機可以唔留, 買過新的. 但水龍頭呀, 煮食爐呀都好新, 留番用啦, 唔好晒錢換.

咁其實間屋唔係我哋既, 係二家姐, 而跟著住的又唔係我哋, 佢想點整個廚房, 當然由得佢哋, 我哋無理由加把咀. 唔通為一個廚房, 走去整四把咀四個意見咩, 未鬧過架咩?

就係咁, 成個設計報價各樣嘢, 我哋都無參與.

最後....安好晒啲廚櫃了..超...同以前果個無咩分別囉, 只係顏色唔同咗. 啲手抽都係用同樣的介手款.

都算, 佢哋鍾意啦.

最激氣係, 佢掉咗個煮食爐, 而又無問過我. 頂...嬲到我發癲.

喂, 你唔要, 出聲, 我賣咗去又好, 留比我媽整廚房時用又好, 出聲問句啦!

問佢點解要換, 好好地, 咁新. 頂...佢話德X寶話唔啱. 我心諗...有咩唔啱? 我果隻都係STANDARD爐咋, 又唔係特大又唔係特細. 好, 我返去睇說明書, 超, 仲要比德X寶果個細, 咩唔啱呀?

跟住佢話, 德X寶話喎....就係因為細, 怕將來壞了好難配番啱SIZE, 德X寶果啲大路啲, 容易配番.

你德X寶有幾大間公司呀? PANASONIC 櫻花唔比你大? 你唔好玩我啦? 再呢兩間無, 都仲有煤氣公司啩! 佢咁講, 即係迫住人一世都用佢既爐啫? 好識做生意, 好識扼啲 無~知~婦~儒~ 囉!

就係咁, 我既櫻花牌煮食爐就咁壯~烈~犧~牲~咗! 我希望有人執到佢可以用到佢, 而唔洗送到堆田區啦!

咁果日知道呢件事既時間, 係同奶奶食飯, 我問起先知道. 我老公勁鬧佢. 餐飯就真係辛苦.

一開始, 我知佢哋一定無意見話食乜, 我就話, 一係去茶餐廳, 一係去打邊爐. 咁最後佢哋又真係選打邊爐喎, 咁我以為佢哋傾好啦! (因為果日我係出咗去, 回來再JOIN佢哋的.) 跟住佢就只係夾菜淥囉, 無食其他嘢, 又一路食一路黑面. 咁黑面亦都有因為比個仔小, 同比個新抱黑面(SORRY, 我真係唔知比咩反應...我最憎人浪費, 有錢人就最浪費, 佢掉咗我揀咗好耐既煮食爐我真係好嬲). 跟住食食吓仲喊. 我無理, 我可以點啫, 氹番佢呀? 我唔會囉!

跟住佢食飽佢既菜就走先.

後來我老公同我講, 佢趁我去攞醬既時候, 怨佢個仔唔同佢住, 話佢細個既時候應承過會同佢住.

噗...我真係笑咗. 有邊個細個既時候無咁同阿媽講過? 尤其是係女, 我就唔信佢兩個女無咁講過, 佢唔叫佢啲女去同佢住? 再者, 近年佢同佢個仔鬧架勁咗, 一齊住, 真係唔敢想像.

另一件事係, 咁我老公有好多玩具, 大大盒既LEGO, 大大盒既高達. 搬屋既時候一來執唔切, 二來無咁大個盒可以放得落. 所以事前老公已經向奶奶請示, 話啲玩具會放多一陣, 跟住慢慢每次過來食飯就逐啲逐啲攞. 點知, 唔夠搬走兩個星期, 奶奶就話要我哋儘快搬走啲嘢, 佢執唔到佢啲嘢喎! 又話, 佢個仔仲有8箱嘢响倉度搬梗回來, 要快啲拎走喎. 我老公最憎人催佢, 越催就越唔搬, 哈哈...咪成日鬧囉!

好啦, 煩到我都覺得煩, 就去搬啦! 有一日我哋過去搬既時候, 奶奶响度等廚櫃師傅唔知按乜鬼嘢. 好恐怖架, 我哋去到, 响個鐵閘外望入去, 有個黑晒面既怨婦坐响窗邊. 唔開冷氣(果日都有30度), 唔開電視, 就咁坐响窗邊. 問佢做咩唔開電視, 話嘈喎, 又話唔想電視鋪塵. 唉...咩都好, 真係唔想深究佢既原因.

咁我同老公, 一人一個大袋, 每人兩三大盒LEGO準備走既時候, 奶奶問咗一句....

"要唔要放啲响我度? 我床下底好多位!"

WHAT? 你唔係催我哋要搬走啲嘢咩? 做咩現在又叫我哋留底啲嘢, 好似好好心咁幫我哋放咁呀?

係咪LEGO呢啲值錢既(好多都係限量版)就可以放? 其他果八箱唔知乜東東既就唔可以放就話無位放?

依家你係由一間500呎既屋搬去一間800呎既屋, 仲要一個人住. 以前放得落, 依家同我講放唔落?

我們兩公婆, 係由一間800呎既屋搬去一間600呎既屋. 有次走過嚟既時候, 又一副可憐既樣話, 哎吔...阿仔, 你哋啲嘢放唔放得落呀? 洗唔洗放啲响我度. 依家又令一副面目. 仲話一齊住? 咪玩啦! 唔一齊住都容忍唔到佢既餘物, 一齊住, 即係再多兩個人既嘢, 佢知佢個仔多嘢, 佢自己亦唔少, 我都唔係少嘢, 一個琴都用你10呎啦. 三個人, 無番1000呎既屋, 咪盞日日嘈. 同埋...我練琴, 吹單簧管既時候, 佢會唔會話我嘈呢? 電視佢都話嘈喎! 又我兩隻貓呢? 佢接唔接受到呢? 到咗呢個地步, 仲怨個仔, 為乜? 咪盞大家唔開心.

夠啦! 夠啦! 我真係好攰, 我真係唔識點去應付啲咁反覆既人.

我要暫時一段時間唔去見佢. 清靜下.

有新玩具玩

幾個月前已經睇中, 但買東西最好都係要停一停諗一諗

前兩日去永安, 哈...做特價平咗一佰蚊, 仲有本書送, 所以就買咗.

濃湯機!!!

又唔咪好大部咋喎, 大過水壺小小, 應該都搵到地方放佢.

 

 

入面好簡單, 一支葉, 應該都好易洗.

以前一路都想買窄汁機/豆漿機, 但太多人話我知因為好難洗好煩, 最後都係荒廢了. 呢部應該唔會有呢個問題. (嗚..諗起我的光波爐, 搬了屋後, 無得放出來, 每次用都要搬佢出來, 好怕會荒廢了佢)

特價兼送呢本書, 最吸引當然係縮腰圍啦! 各位待產媽媽, 比幾個月我, 當你哋坐完月後, 如果我縮到腰圍, 你哋都可以試. WAKAKAKA...

先試粟米汁啦! 最簡單, 切晒啲粟米粒出來, 加水, 襟制, 等廿幾分鐘, 飲得!!

成品. 無加糖, 所以只有粟米的甜味, 我覺得好OK, 想要甜啲既, 咪自己加糖囉.

架機共有六大功能, 除了Fruit/Veggie Drink係凍飲之外, 其他都係會煮熱的.

跟住仲有簡單清洗, 佢洗一轉, 我跟住就好易洗了

跟機仲有一個隔渣的筲箕, 裝完成了的汁/漿的容器, 量杯, 同埋清潔百潔布

每次最多可以整1.3L. 今朝整, 帶咗樽回來請姐姐飲, 佢都話正!

好少煲湯的我, 有呢部機, 應該都可以令我滋潤番啲!

(又...其實營養學角度, 老火湯既營養其實係無乜, 因為經過長時間煲, 好多營養都會流失了. 再加上好多時老火湯都會用豬骨等東西來煲, 係會超肥架構)

下次計劃整南瓜汁.

掉低老公遊墾丁 (四)

第四日亦即係最後一日, 都無乜特別PLAN, 原本以為可以行下牧場, 餵下小羊小牛小馬, 完來係無呢件事, 最後只在牧場既小賣店買了差羊奶牛奶和奶凍試.

跟著, 請司機車我們到恒春鎮食那個綠豆蒜(?) 已經唔咪好記得個名, 叫了一凍一熱…無咩特別

老闆又介紹我們食個鹹粿(蘿蔔糕類)的東西, 飽到傻咗.

之後司機車我們到水族館, 但其實我們無人有興趣入去, 最後在門口影了張到此一遊照便離開.

跟著又係食, 司機介紹我們去食台灣牛肉麵, 堅好味喎!

食飽飽, 在旁邊個卡舊火車, 於是响上面又玩咗一陣. 然後便開車回高雄, 去了一個叫咩二既藝術區, 又唔錯喎!

慢慢行慢慢睇, 都可以消磨兩個鐘, 人既氣質亦都提高咗, 好過去行商場啦! 呵~~

最後一站便是高雄機場了! 有剩錢, 當然又係食啦!

就係咁, 呢個掉低老公遊墾丁就完結了.

掉低老公遊墾丁 (三)

第三日, 果然如我們所預料, 天朗氣清藍天白雲, 是一個出海既好日子!!

去台灣, 咁多又平又好味既嘢食, 當然繼續要晨操啦!

晨操後便請司機車我們去後壁湖, 佢介紹咗一家水上活動店給我們, 租好了浮潛用品, 便有車車我們去石灘, 再行行游游過浮台, 開始浮潛. 可惜無帶水底相機, 同埋太唔知道出浮台既情況係點, 連電話都無帶, 所以無相. 不過我哋只係JOIN了浮潛, 浮咗一陣, 就坐咗响浮台曬太陽, 同玩店叔叔既水泡. 其實水都算清, 亦都算多魚, 我覺得比去布吉仲多魚魚睇. 不過真係浮唔到咁耐. 帶起玩店叔叔個水泡果個其實係我, 企响浮台, 然後跳台個水泡, 仲要係好穩陣咁坐著; 跟住就腳落先, 由浮台跳落, 穿過水泡; 再跟住就頭落先, 跳落去穿過個水泡. 無聊到爆. 我估大概响浮台玩咗個多兩個鐘, 店叔叔覺得我哋好無聊就話夠鐘要我們回去了.

跟住, 就去咗後壁湖既魚巿場食海鮮啦. 真係平到笑呀!

 

 

食完海鮮, 就去白沙灣. 因為同事話墾丁的沙灘好靚, 一定要去. OK, 咁去囉! 早知揀南灣…白沙灣大浪唔想落水. 最後只係同其中一個FD落去跳咗一陣浪就上番去. 影咗啲好低能白痴相, 便回民宿沖涼.

休息咗一陣, 便去關山睇日落……同餵蚊!

關山日落據說係好出名好出名的, 不過這日比較多煙霞, 所以麻麻地.

 

今日又係回大街DINNER!

煎餃, OK啦!

連續兩間都買咗啲"老味"返民宿食,
一邊食一邊傾計. 老公唔响度,
真係乜都可以傾. 呵!

大腸包小腸, 勁好味!

炸菇, 勁好味呀! 估唔到炸完都仲有菇汁.

飲咗支牧場牛奶, 都幾好味! 亦無肚痾.

 

掉低老公遊墾丁 (二)

今次旅行, 只四天, 好少嘢帶, 仲係夏天遊山玩水既地方, 之前仲諗住只係踢對拖鞋, 連波鞋密頭鞋都唔洗帶. 後來, 其中一個FD(同我跑開馬拉松的朋友仔) 話想有兩天早啲起身去跑步, 於是我便帶埋跑衫跑鞋嚟個墾丁晨操! 即係呢, 都幾堅...由大街中段, 跑到去帆船石再過啲啲. 來回都有6公里架!

 

第二天, 原本計劃出海, 但看天氣只是陰天, 一致覺得明天會更好, 便將第二天和第三天的行程掉轉, 先去墾丁森林遊樂區, 行了兩個多三小時, 不錯呀! 陰陰天, 沒下雨, 涼涼的遊山玩水, 路也不難行, 適合任何人仕遊玩, 我們四條友, 是踢拖行囉! 呵

 

 

下山後去食杜子包點. 好多款味道, 每人兩個都包死了!

 

跟著請李司機帶我們去玩越野車…嘩…他竟然帶了我們去一個超遠的地方, 乘了差不多一個小時車, 四條友都差不多嘔著下車. 好彩, 他的介紹很好, 好玩好刺激地在沙灘沙丘玩了大半個鐘. 我是第二次玩這東西, 好玩呵!

 

 

 

這天還去了台灣最南端, 鵝鼻鸞, 帆船石, 都是到此一遊拍張照便走的.

 

民宿介紹我們恒春鎮那邊, 每週日也有一個夜巿, 這晚我們便在這週日夜巿開餐. 喝了個超好飲的湯.

 炸乜鬼呢...唔記得咗

台灣地道嘢啦!

呢個係土"塞"枸杞湯. 超好飲, 啲土"塞"又好滑.

不過這夜巿有點細, 吃不飽, 便回到大街那邊吃聞名的窯烤PIZZA, 我前一晚影咗佢相, 所以我們仲好叻在車上打電話ORDER, 一落車便有有食了. 仲要剛剛有張枱, 熱辣辣的PIZZA, 超正!

 

 

P.S. 大家如果見上面的相有你認識既朋友, 請扮睇唔到, 唔洗同佢哋講番架!

 

掉低老公遊墾丁 (一)

8月最尾一天, 同三個相識十幾年既朋友仔去墾丁旅行, 仲要係掉低老公, 只同朋友一齊去, 真係開心到無朋友!

搭0900航班直飛高雄, 呵…仲响機場餐廳見到佘詩曼和郭秀芸, 差不多要上機就行去閘口啦, 呵…她們倆一直也和我們同路, 心諗, 唔會跟我們同機啩! 怎知真係同機呀! 不過基本上, 上到機就已經無再見到她們了, 到高雄落機都無再見到, 好似响空中落咗機咁.

我們今次租車租埋個司機, 好好笑, 其他司機都只是用一張紙寫客人的名字接機, 我們既司機竟然用一塊很可愛的白板, 大大隻將我的名字在上面, 超可愛!

 

跟著便上樓上買電話咭, 再出發直去墾丁. 到埗這天下雨, 沿路睇見海浪頗大, 水也很混濁, 都頗擔心無得下水.

到達時都兩點多. 跟李司機約好四點再來找我們, 放下行李, 便走到墾丁大街找吃. 墾丁第一餐吃了一品老味, 都OK好味!

 

行一陣, 每人食咗支幾好味既雪條

跟著的行程:

恒春古城….又大風又大落, 地仲跣到我仆街…第一天便出師不利 >.<

 

出火…落雨, 出乜鬼火…只看到細細一堆火, 一點也沒趣.

佳樂水…原本沒打算去, 但去出火時看見路牌, 似乎不太遠便順路去…其實都有點遠. 但估唔到大家也頗喜愛這裡. 其實是墾丁版的地質公園.

 

跟著乘頗久的車到四重溪那邊吃羊肉鍋. 旅遊書有介紹, 不過…OK啦!

 

 

 

吃飽回程, 請李司機在大街街頭放低我們, 著他收工, 我們便逛逛夜巿.

再出師不利地, 比個賤格老闆娘騙了, 吃了一粒紅色的東西, 原來是勁辣的辣椒, 辣到我不斷流眼水, 最後更胃痛. 好嬲. 就是這個! 認住佢, 唔好幫襯佢.

 

之後繼續行, 再食咗啲小食

烤OYSTER, 麻麻地

炸豬手, 好似好好味, 這天食得太飽食唔到,
但之後就無見佢開, 無得食.

炸蕉, OK

炸OREO, 麻麻地.

跟住, 介紹一下民宿. 墾丁的民宿真的多如天上的星海裡的沙, 不知如何選擇. 我都專登搵番HEI HEI之前介紹果幾間, 可惜, 這裡的民宿最大問題是很多民宿也像是專為情侣夫妻而設, 只有雙人床. 很少有兩張單人床的房. 兩張雙人床的房, 其實是四人房, 我們兩男兩女, 女女孖鋪沒問題, 原來男男是很介意孖鋪的. 那租間六人房, 兩男生每人一張雙人床吧, 我跟女生孖鋪, 可是女生又不想跟男生同房, 那便要租兩間四人房吧, 但感覺唔抵. 最後找了這間叫橘月, 他們有一間兩張單人床的房, 再租一間三人房(一單人床一雙人床), 算是最花算了. 不找了!

好彩, 這間也不錯, 是在大街的內街, 所以比較靜. 行出大街也只是3分鐘. 朋友千叮不要找在正正大街上的民宿, 晚上會無得瞓.