又冬至

大家仲記得我上年的"冬至謎思"嗎?

奶奶話嫁咗既女唔可以响冬至回娘家食飯哩....上年就比面佢, 無响果日做節.

但今年, 响我都仲未記得這冬至謎思的時候, 外婆已經定了正日做節. 我媽問起我得唔得的時候, 我都未醒悟到, 直至佢話"正日喎, 你得咩?" 我先...呵呵呵....

最後同老公一致, 如果奶奶唔問起, 就唔講. 佢問起, 就話未定. 如果今日佢問我哋今晚去邊, 就話去我外婆家食, 唔算係娘家, 呵呵呵.....

頭先睇到三眼話佢媽媽今天出院, 真係替他開心. 跟住就想起, 我爸都响醫院. 佢上星期因為呼吸有啲問題, 走咗去睇急症, 醫生叫佢留院觀察, 一觀就觀到依家都未出得院, 仲話要排到今日或明天先有得照乜鬼嘢, 睇下今次係邊條血管塞咗 (佢幾年前通過一次波仔). 今日早放, 會去醫院睇一睇佢.

我父母响我十幾歲時離婚, 我同哥哥都跟媽媽, 之後就好少同阿爸聯絡. 佢無做咩令佢黑我憎, 但就係無咩兩句, 現在每年, 都係做節先會見下. 今次佢入院, 無啦啦打比我同我講, 以前佢唔會話我知. 上星期聽到佢電話, 覺得乜咁煩架, 佢仲要我去幫佢買個電話义電火牛, 去邊鬼度幫佢搵啫, 我阿哥又阿之阿佐話唔知咩火牛, 又搵著我嚟搞, 開初真係唔想去...唉....但心又不安, 始終都係自己阿爸, 唔睇, 萬一有咩事, 就真係想睇都無得睇. 所以最後都咗睇. 咁佢都無咩, 精神ok. 希望佢快啲無事出院.

每到冬至, 我都會想起我公公, 尤其是, 臨近年尾, 總係聽到身邊的朋友, 家有長者離開的消息, 我就更想起我公公. 十幾年前, 公公就响冬至前入院, 原本係可以出院做冬, 怎知就响之前果晚走咗. 大家都唔明點解, 因為明明係話可以出院. 果年的冬至...超凍.

所以, 今年冬至, 都決定去睇一睇阿爸, 買啲好味嘢比佢食啦, 等佢都有做冬的感覺!

澳洲之旅 ~ Day 5 (Brisbane)

呢幾日响公司超hea, 超無嘢做. 最好繼續打blog, 咪個澳洲之旅爛尾先.

第五天, 非常忙碌同充車的一天.

早上去Paradise Country, 牧羊場參觀, 第一個節目就係衝去抱樹熊. 我哋係第一group入到去, 導遊好緊張叫我哋快啲, 因為啲內地團嚟到, 我哋就會好慘.

 

樹熊真係好鬼得意. 佢一日要瞓19個鐘, 基本上見親佢都係瞓. 而佢哋多樹都係每熊一棵樹, 仲要係爬到最高個义先, 好似話係佔據佢既山頭果類原因. 同埋樹熊係唔太like男人, 好多時由男人抱, 佢都會爭扎, 唔開心. 我影完相企响度睇, 都真係見到佢响男人身上就會爭扎, 要由照顧員安撫番佢先得.

跟住就去餵下羊, 袋鼠, 豬. 我就興趣一般, 覺得好污糟.

餵完動物, 就去睇billy tea表演. 因為走咗去厠所, 所以都唔知呢個billy tea係乜, 只係有個牛仔响度煲茶囉.

 

 

 

之後都有得試既. 就係呢杯, 其實係紅茶.

 

 

然後就睇馬術表演, 都有啲無聊, 只係個牛仔騎住隻馬走來走去.

 

睇完馬, 就睇牧羊狗趕羊, 隻狗仔又真係幾叻, 啲羊又真係一見到佢就調頭走.

 

 

最後一個節目就係睇剪羊毛, 我仲同個團友舉手上台玩. 都幾搞笑. 呢一part, 相機無電, 又無帶電落車, 影唔到相

跟住就好趕去下一個節目, 翠兒汀遊船之旅. 一上船就有午餐食, 每人一碗無咩味既蟹粥 (後來我哋加了蟹蓋啲羔落去, 先似番一碗蟹粥), 半隻鞋到界喉的烤雞, 同兩小隻生蠔. 一食完, 就去捉蝦.

幾個人一組帶住呢支嘢, 同一個"里" 落水pump蝦.

 

 真係pump到架, 仲有感覺一"練"就扁既蟹仔

 

 

pump完蝦就到捉蟹. 其實都唔親手捉, 佢哋早一天放了啲籠落水, 我哋只係拉番個籠上嚟. 我果籠有兩隻, 都好大隻下架!

 

然後就釣魚, 仲係用魚杆釣, 第一次咋! 開初都唔識, 條線唔落去, 後來團友教我, 先放到條線. 呢條河都幾多魚, 基本上每人都起碼釣到一條. 但因為size太細, 要放番落去. 如果唔放, 係要罰錢的.

 

最後就大家去晒船頭睇餵塘鵝. 第一次見塘鵝, 覺得佢哋個樣好得意, 尤其係個咀, 好似貼上去咁.

 

 

呢個晚上, 响酒店食自助餐, 因為有部份團友夜晚去睇螢火蟲, 但啲生蠔又開唔切比我哋, 最後我同媽, 各吞一打多的生蠔. 果邊的生蠔, 又真係好鮮甜. 細細隻, 打幾, 都唔咪咁難頂!

 

我哋無去睇螢火蟲, 就落去游了半個鐘水, 跟住行賭場. 中途見到有廚師响度切梗薑餅屋. 好香, 好靚.

咁就完成第五天了.

我家的蠢人

真在太好笑, 想同大家分享下.

話說星期六晚同老公行taste買了三支大青島, 咁我同老公講, 一晚一支好了.

星期日我要早起返教會, 行出廳, 看見一支吉樽. 洗完面, 入廚房飲水, 看到個廚枱上有兩個樽蓋喎! 一支啤酒兩個樽蓋 玩咩. 咪開雪櫃睇囉! 個蠢人放了另一支吉樽入雪櫃, 以為我唔知. 如果唔咪有兩個樽蓋, 天寒地凍, 其實我唔會一朝早開雪櫃囉! 又唔掉個樽蓋, 比我發現. 正蠢人.

應該比我自己生BB更開心

真係好開心, 我的舊同事CAROL姐姐的BB, 今天出世了! 真係恭喜晒佢, 亦很替她開心!

其實同期, 我另外一個好姊妹都生咗個女, 不過, 都沒有CAROL姐姐生咗咁開心. 她這個BB仔真的得來不易.

 

當我還是她同事的時候, 有一年, 她有咗. 好開心同大家講. 但有一天, 她走過來話有血呀. 我咪叫佢快啲去醫院囉! 最後BB無咗. 果時大約三, 四個月.

 

第二年, 佢又有咗, 好替佢開心. 睇住佢個肚一天一天咁大, 亦聽見佢為BB預備的基金和一切, 真的很期待BB的出世. 怎知, 有一天下午, 她病假走了, 跟著幾天都沒有回來. 心知不妙, 打聽知下, 原來那天, 她曾經問過一個媽咪級的同事, 話已有幾日沒有感覺到BB郁, 同事叫她快去睇醫生. 最後BB無咗. 果時係六個月. 超傷心. 我都不禁哭了出來. 跟住佢放了兩個月假, 回來後, 都幾精神, 但大家都唔咪好敢題. 後來, 佢辭了職, 但我哋都KEEP住有聯絡. 知道佢一直好想生, 一直好努力. 很多時候, 我會無端端想起她, 便為她祈禱. 我好少會無端端想起一個人, 而又立即為果個人祈禱, 但我真很希望天父可以賜CAROL姐姐一個BB. 終於, 在我差不多離開上一間公司的時候, 知道佢又有咗, 真係好開心呀! 好希望她今次會順順利利. 唔知點解, 另外個FD同期有BB, 兩星期前生了, 我的感覺係"呀...咁快就生了出來!" 但CAROL姐姐呢, 到佢生了的時候, 我的感覺得"呀....終於生了, 真係好!" 好似佢就係陀得很漫長, 很怕中途又有意外. 感謝主! 今天終於出世了! 在FB見到張, 個BB好白淨, 好得意, 係真係好得意好得意果隻呀! 今日真係好日, 除了是我好朋友伴娘仔的生日外, 更是這天父賜的BB生日啊! 他的出生, 我相信會比我自己生BB更開心 (哈...因為我係唔想生的嘛)!!!!!

 

求天父保守BB健康快樂的成長! 亦求天父保守CAROL姐姐身體健康!

 

2014/07/17後記: CAROL姐姐的第二個BB都在四月出世了.

澳洲之旅 ~ Day 4

 嚟到第四天, 呢日癩咗, 3:30am morning call, 因為我哋去坐熱氣球. 是自費活動. 235蚊澳元, 即係成17xx蚊港紙. 咁貴都玩, 因為真係值得, 唔咪好多地方有得坐熱氣球.

天都未光就坐車出發, 响車度瞓多一個鐘就去到, 一去到就見到幾個熱氣球响地, 間中有火吹入去, 佢又脹啲, 睇住佢慢慢脹起同升起, 好有趣.

 

 佢係我哋的"機師" steve. 我係咁問佢問題, 佢又好好, 好耐心答我.

跟住有四個波跟住我哋

一望無際...

响天空睇埋日出



我哋就係搭呢個balloon了!

8:00am返到酒店, 食番個早餐, 再上房瞓咗一個鐘, 先再集合去下一個行程.

下午就去個熱帶雨林區的澳洲土著民族村, 睇啲澳洲土著跳舞, 放回力標, 吹條好長的管等等

 

 

就係吹呢支嘢.

p.s. emilyss...唔該你一月去的時候幫我買呢隻綠色嘢...我老公話我唔買公仔比佢

 

 

然後再坐水陸兩用的戰車去遊覽熱帶雨林一圈 ~ 成團日本妹妹...wowowww

睇完呢個民族村, 就去坐五點幾的飛機去布里斯本, 即係黃金海岸.

到咗黃金海岸就去咗一間叫麗晶的中餐廳食中菜, 係成個行程五餐中菜最好食的一間. 跟住就返酒店. 今次住木星賭場酒店. 又比前兩間更大更靚! 間間酒店的雙人房的床都係4 呎以上...點碌都得.

 

好...開估果個開瓶器係用咩做先. 就係男袋鼠的袋袋囉! hahaha. 話說以前更用嚟裝錢的, 叫做幸運袋架! 有段時期, 好多日本妹好鍾意, 買好多回去做手信添. 笑死我.

澳洲之旅 ~ Day 3

前一晚搭夜機來到開恩茲 (Cairns), 即係大堡礁.

先在酒店食了個豐富早餐, 呢間酒店有一特色食品, 係蜂巢. 切一片落嚟, 夾在麵包一齊食, 好味! 日日食, 仲好有益添喎!

 

跟住就坐船出海, 去到海中心的一個平台, 就開始我哋三小時各項水上活動. 我同媽參加了直升機, 由高空看一看大堡礁的景色.

個機師話見到海龜喎! 我就睇唔到. 你哋睇下見唔見?

跟住我就帶阿媽去浮潛. 因為阿媽唔識游水, 所以都教咗佢一陣, 然後我自己又浮潛一陣, 就去玩水肺潛水, 是自費的, 第一次, 好緊張!

原來都比我想像中易. 同隊的共有四個人一齊落去, 有兩個隊員中途唔得, 要搵人接佢哋上水. 阻鬼住我啲時間. 最後前後玩了一個鐘, 就要上去, 準備走了. 三個鐘真係唔夠, 想玩多下浮潛, 都吹雞叫走. 不過大堡礁又無我想像中咁靚, 始終都係覺得馬爾代夫啲珊瑚同魚魚靚啲同多啲. 不過呢度, 有條明星大蘇眉, 佢受過長期訓練, 唔驚人, 見人潛水, 會游過嚟身邊, 仲可以比你由頭摸到尾, 超可愛. 我同組另一個無上水的大陸女士, 痴線, 啲人真係無教養就係無教養, 人家蘇眉係比你摸, 但個大陸女人一手攬住佢唔放, 嚇親了魚. 教練便立即用手交义佢, 話唔可以. 啲人真係... 後來回程在船上, 同教練傾開計, 佢話我做得好好, 最叻係我. hahaha..我話, 梗係啦, 我游水好叻...佢話咁早知放手比我自己去玩啦! 嘻...但係我又有點驚. 不過, 我已經決定, 下年夏天要去考潛水牌.

跟住4, 5 點便回酒店, 未夠喉, 我仲走咗落去泳池游咗半個鐘水.

晚上就去海邊一間餐廳食澳洲特色西餐.第一碟係...白色的是"惡"魚肉, 黑色那條是袋鼠肉. 袋鼠肉好"鞋", 唔好食, "惡"魚肉好啲. 跟住牛扒. 話說澳洲牛扒好得. 我哋全程都食了幾餐牛扒, SORRY, 無一餐係真係得囉. 好多即使煮到半熟, 都係好鞋.

 

食完就去行夜巿. 果度附近有一個NIGHT MARKET, 啲嘢都幾平. 個導遊仲老點我哋, 成日叫住我哋唔好買手信住, 要去黃金海岸先買. 後來...咪知比佢老點囉. 所以大家要去澳洲, 記得在CAIRNS的呢個夜巿買呀!

大家估下呢個開瓶器係用咩嚟做? 下回分解!

 

澳洲之旅 ~ Day 1 & 2

終於回來了, 亦有點時間寫下我的遊記.

上月尾同媽媽去了澳洲9天, 其實係7天, 因為第一天坐早機去悉尼, 到酒店都晚上11點幾了, 咁就無咗一天. 雖然整天都在飛機, 但都有啲嘢講.

1. 多謝老公晨老起身送我去機場先返工. 超抵錫! 我係6:50在機場集合, 所以我哋係4:45起身.

2. 機上, 我一共睇了五套電影, 全部都係老公唔會陪我去睇的. 哈哈...

3. 同團一位阿毛, 一個人已經霸了兩個位, 仲要响呢兩個位裡打橫瞓, 兼搵我的肩膊睚住, 我當然唔會理佢, 週身郁等佢瞓唔到. 佢坐下又瞓下又睚下, 仲有意無意話我知佢70歲, 我心諗, 關我咩事, 你70歲我便要做你的枕頭嗎? 條毛最後仲要調轉, 搵對腳伸我, 我搵個枕頭隔住, 咪比佢伸到, 兼繼續週身郁, 最後, 佢走咗去第二度. 之後日子, 佢行左我行右, 但繼續經常比佢哋打尖同推撞. 然後從阿媽口中得知, 佢哋一行九人移民香港多年, 在大陸是讀過大學, 有受過教育的. sorry, 那我更"彼"視他們, 受過教育的但品格低劣.

 

就咁...就到了悉尼.

第二天, 一早在酒店食完豐富自助早餐後, 便去fish market. 個guide又唔早講, 等我留肚食生蠔嘛. 最後同阿媽各食了三隻!

 

同埋買了個又大又紅的芒果. 第二日在酒店食, 超甜超好味. 其實香港都有得買, 大約30-50蚊個

 

 

跟住就搭船去悉尼南部的動物園. 呢日天氣唔好, 落雨, 好彩啲動物都無話全部躲起來, 都睇到大部份動物. 印象比較深刻是一隻叫tussie devil的動物, 只係澳洲先有, 破壞力好強, 跟住有鴨咀獸, 同埋下邊呢隻大過火雞的鴿子.

 

跟住就去返悉尼巿的悉尼塔上面食璇轉自助餐同欣賞美景, 然後就行街街.

跟住就到歌劇院, 入裡面遊了一圈, 有guide介紹佢既建築, 都幾震撼.

上面張相係用我那個有電話功能的相機, 用全景功能影的. 好正!

跟住就去唐人街, 食個早晚餐, 便去機場搭飛機往開恩茲 (Cairns)了.

 

呢間酒店好大好靚, 大堂有株很高很大的聖誕樹....行程往後的另外兩間酒店, 仲越來越大, 越來越靚.

第一次皮膚敏感

我從來只有鼻敏感, 皮膚一向都好頑強, 未試過因為食物或污糟東西, 搞到敏感. 可能真係年紀大了, 抵抗力弱了, 我竟然出現了一次超嚴重的皮膚敏感.

 

上星期六, 2晚上沖涼的時候, 擦梘液的時候, 摸到我右邊的背脊有啲粒粒, 就 R 下佢, 點知越 R 越痕, 出去叫老公睇, 佢話紅晒, 仲有好多粒粒. 唔咪水泡, 只係好多紅色粒粒, 佢即刻搵了粒敏感藥比我食, 但第二朝已經漫延到右手的腋下, 同右邊胸. 好痕, 但我知要忍住, 所以都幾辛苦. 一路KEEP住食果隻藥, 但都無好轉. 星期一早上去了樓下的醫生度睇, 佢話係皮膚敏感, 可能天氣轉, 又掂到啲污糟嘢. 我不斷諗我星期六食過咩出事啦, 但果日全日食過既嘢, 都係我以前食過無事, 唯一新接觸的就係我個fd間屋囉, 第一次上去囉. 原來我對有啲人既屋係會敏感. 可能唔抵得人哋間屋靚.

 

咁醫生比咗啲藥我食, 又有藥膏. 食咗兩日, 都係無好轉, 老公仲話差咗添. 所以就去番油麻地我睇開的醫生度再睇 (好彩公司有得claim). 醫生都係話皮膚敏感, 可能因為天氣轉, 皮膚弱了又咁啱掂到啲污糟嘢, 所以出事. 佢話上一個醫生比啲藥比較輕量 (因為我要唔眼瞓果啲), 咁今次我就叫佢比啲勁啲既我, 仲打針添, 佢仲好好寫埋假紙我, 預防我真係眼瞓得滯返唔到工. 第二朝我真係超眼瞓, 真係唔想返, 但記起有啲嘢要做, 又約了間酒店sale上來, 又無電話通知佢, 所以都照返. 但返到去, 但頭好痛, 又真係超眼瞓, 所以就call個酒店sales今日先上嚟, 咁我擒日下午就放了半日sick leave. 一返到屋企, 就即企走去瞓, 一瞓就瞓咗三個幾鐘. 擒晚又係好早就去瞓, 今天啲紅粒粒真係少了一半.

 

希望以後都唔好再有皮膚敏感, 係好辛苦架!

真係欠扁的123

太過份了, 繼上次123推鎖我的搵笨plan後, 佢又再撩起我把火!

話說我現在的plan只得100mb data上網, 轉了新電話, 兩個星期即爆.

咁我擒日打去123, 想話upgrade個plan, 撳咗好耐, 又入電話, 又入ID號碼, 終於都有人聽.

條友, 問我姓咩, 我咪話姓黃, 跟住講佢知我想點. 佢問我係咪機主. 我話係.

條友, 竟然話, 根據佢哋個RECORD, 個機主係男人 (MR) 喎!

我話: 我用咗你哋五年, 續PLAN都續了兩次, 又出過電話, 影印過幾次ID比你哋, 你現在話我係男人, 唔該你比個解釋我.

條友答唔到. 我話咁現在點. 佢叫我要去門巿, 比番個ID COPY佢哋改資料.

我話, 依家係你哋既問題. 我打過咁多次嚟問嘢, 改PLAN, 都無人話我個RECORD係男人, 唔比我改, 我叫你CHECK你RECORD入面係咩名, 你又話CHECK唔到. 你比你MANAGER冋我講.

佢無出聲

我問佢叫咩名, 我要投訴你. 佢比咗個名我, 我就收線.

跟住過了大約15mins, 我再打. 第二個男仔聽. 我又話我要upgrade plan. 好容易咁, 佢就幫我搞掂. 仲問我要唔要簽約, 會平啲. 我話唔洗. 心諗, 你哋咁既service, 我仲簽唔簽呀? 低能.

跟住佢問我仲有無問題, 我話有. 我叫佢幫我check 個system裡佢見到我係mr. or ms. 佢話係mr. 我話, 咁點解你可以幫我改plan? 佢話, 因為check過 ID號碼, 又問了名, 又見個名係女仔名, 性別咁小事, 一般唔會留難啲客.

哈哈...佢真係自投羅網. 我話, 我剛剛就係比你啲同事留難. 佢話可能果個同事嚴謹啲. 我話我依家唔咪提供唔到資料比你哋, 同埋你哋無理由咁樣double standard囉. 我話我要投訴. 叫佢比個投訴電話我. 佢話會幫我轉介supervisor, 會覆我. 好...我等你. 我唔會比佢哋不了了之的.

跟住, 我見路過得閒, 便入走123去update番我係女人. 入到去, 等咗都成10mins先有人理我. 我同佢講了件事, 佢竟然答我, 係呀...要機主本人先可以更改資料. 我瞪大對眼同佢講, "我咪機主囉!" 妖...佢哋有無帶耳仔同個腦返工架, 定係我表達能力有問題呢? 跟住佢搞掂後, 我仲要問多次佢係咪真係ok, 條友仲要好寸咁答係. 我真係想扁佢.

6月到期, 真係要轉過第二間. 有無好介紹?

我第一次去西灣河 ~~~ 係游水過去的!!

update番渡海泳當天的事情先!

果朝6:45起身, 成晚瞓得唔好, 怕唔知醒. 怎知, 6:44醒了, 望住個鬧鐘等佢响, 佢到6:45都無响喎, 咁我以為佢會等6:45完成了就响, 到6:46都無响...咁即係點呢? 好彩我自己醒了!

7:30出門口, 8:00去到油塘, 有個好好朋友住响起點附近, 走落嚟話送我去, 仲帶了支檸茶比我, 真係好. 最後, 我叫佢帶我上會所去厠所, 同幫我塗太陽油. 其實塗太陽油, 唔咪想防晒, 係自我感覺有層厚厚太陽油, 可以等啲大腸杆菌入唔到皮膚. 話晒隻屎上最強的太陽油, 要用專用的落妝水去抹先甩.

跟住就入去放行李, 同登記, 再入去熱身, 好不容易等到可以準備落水.

 

一落水都幾凍, 但游多兩下就ok. 因為女子組無咁多人, 所以都唔駛响水等好耐, 就可以出發.

成個游水的過程, 都好迷惘. 其實未落水的時候, 已經同旁邊啲女子組爬欄杆, 睇下個turning point响邊, 知道下向咩方向游, 但都唔咪好清楚, 問啲工作人員, 又唔知喎. 咁就唯有向住男子組的方向去啦. 但游游下, 啲男子組都唔知去晒邊, 啲快既女子組又好快唔見晒...haha...其實我游得幾慢. 最後仲比船上啲人話我游離了方向, 叫我向前面游. 嘩...大佬, 前面即係邊度既, 你比個目標我得唔得? 問佢係咪即係藍色船, 佢就只係叫我向前游. 其實佢知唔知, 比浪衝兩下, 個人的方向係會轉了架? 個前面可能已經唔咪之前果個前面. 果一刻係我覺得最灰最辛苦的時候, 响茫茫維港中間, 感覺好無助. 後來又有一架船叫我向一架"等"船船尾去, 咁咪繼續游. 終於都見到turning point架船, 過了turning point, 就轉彎向鰂魚涌終點.

原本我係諗住可以主要游自由式, 但因為太大浪的關係, 同埋迷失方向, 最後全程主要游蛙式. 游到差不多終點, 好奇怪明明佢响我十二點方向, 已經keep住游蛙式, 可以keep住向前望, 游游下, 個finish位會走咗去我10點方向, 又要打斜游番過去, 我覺得我游咗好多冤枉水.

最後, 我估計我用了45mins游畢全程. 其實我係有帶計時錶, 不過好低能出發時唔記得按start, 我估大約游了5mins先按, 到終點係38分幾, , 所以我預係45mins.

上了水先激氣, 佢哋啲安排真係唔好. 一上水會比條大毛巾你 which is ok, 唔好凍親. 但跟住就一堆人塞住咗唔知做咩. 原來係要登記. 但佢得一個booth, 咁就幾百人响度等佢一個一個登記. 呢個時候, 水都無支, 大家游完咸水, 最想食啖水, 沖下個口. 我最佢哋有啲人應該都等成十五二十分鐘先登記完. 我因為問救護人員嘢, 所以打咗好多人尖...hahaha...咁我就好快登記了, 攞埋tee同拖鞋, 就去攞水飲. 跟住再去救護站沖眼, 因為隻右眼好"那".

然後去搵路走, 呢個時候就見到老公, 同埋响油塘送我一程既fd帶埋老公同我最鍾意的bb 都來為我打氣同接我. 好開心. 跟住攞番啲行李, 去沖身, 著好衫就走lu, 一齊去西灣河食個麥當當早餐. 然後回家大清洗.

對今個好有歷屎性的event, 有以下的感想同意見:

1. 最重要 ~ 呢個世界有好多顏色, 請大會唔好揀綠色做泳帽. 雖然唔咪比男子組帶, 但女子組都唔鍾意囉!

2. 路線指示唔清楚, 果架tuning point同finish的船, 可唔可以插多啲唔同color的旗, 同高啲, 等選手們可以睇得清楚啲呢? 成海都係插紅旗既船, 鬼知邊架係咩?

3. 上水後的安排. 可以的話先毛巾, 然後水. 登記的booth唔該整多兩三個, 大家都攰了, 仲要等咁耐, 係一件好辛苦既事.

4. 起點放行李都係一個問題, 一條超長的隊去放行李, 點解佢唔學渣馬咁分車分號碼呢?一條隊收晒又要再分, 點解唔分幾架車, 唔同號碼的人就唔同的車放, 咪仲好.

5. 放了行李, 即係無拖鞋著啦, keep住啲好吉的車路去起點. 原來係可以, 佢响臨落水位係有幾個箱可以比人放拖鞋. 又無人講.

6. 水質係ok既. 全程我只係遇到兩條繩, 同一個膠袋. 游完都無身痕. 不過上水後, 見到有個女子成個下巴都係一點點的污糟嘢, 唔知係乜. 咁我又抹下面, 又見毛巾上面真係有啲黑色污糟嘢. 唔...不過我到現在都唔知係咩嚟

最後, 如果以後每年都有, 我 ~~ 應該都唔會再游了. 因為 ~~ 其實都幾辛苦! 一次, 仲要係33年後復辦的第一屆我都參加了, 無憾啦!

P.S. 最後大會時間是40分23秒完成千八米的渡海泳，仲有名次添! 女子組第38名。女子組共136人參加。嘻…我覺得自己好勁！

星期日最開心莫過於...

當然係唔駛去奶奶度啦!!

擒日奶奶有嘢做, 所以唔駛去佢度食飯, 所以就好開心咁同老公返完崇拜, 就去行街街, 仲可以去花墟. 如果要去奶奶度, 去花墟就唔可以買花, 因為拎住啲花咁耐等夜晚先番屋企插, 會死晒囉! 唔駛去奶奶度, 就可以買花嘞! 所以擒日就响花墟買咗好多嘢!

 

有一盆捕蠅草啦! 咁見繽紛啲捕蠅草用玻璃盆整得好靚, 所以我哋又去買了一個玻璃盆, 啡色小石同水苔.

跟住又買了一盆地球芒, 會將佢移植去replace老公比人騙買的枯樹.

 

跟住仲買了扎"金魚花"? 20蚊, 好抵, 好靚!

 

仲有就係水種的白掌! 最後屋企的花coner就係咁嘞!

 



嗚嗚嗚....我究竟做咩呀?

好唔開心, 唔知自己發生咩事, 我已經keep住係早睡早起, 生活好有規律, 亦好注意飲食, 都算食得健康, 又keep住做運動, 但點解近日咁多怪嘢响我身上發生?

 

繼前星期無啦啦皮膚敏感後, 今朝發覺上唇有啲小水泡, 有啲痛, 我老公話我係生泡疹(註, 我老公係泡疹專家). 我從來都好少生菲滋, 泡疹更加一次都未試過, 點解會咁架? 我老公便立即比了佢用開好好的泡疹藥我搽. 早上都好好地. 怎知, lunch食嘢的時候, 抹咀可能大力咗啲, 有兩粒爆了. 超痛呀! 返到公司再搽返啲藥膏, 好"那"囉!

 

究竟我發生咩事, 皮膚敏感同呢啲水泡, 我真係由細到大都無試過, 點解結咗婚就咁多事幹架?

吊詭

最後, 擒日拎咗部電話去SE check, 佢話唔咪舊電死, 所以要拎單去check. 見樓下有個鋪仔話專checkSE手機, 仲要免費, 就比佢望望, 佢亦同我部機宣佈正式死亡 ~~ 底版死了!

 

好啦, 財散人安樂!! 年尾, 報了名去澳洲, 交了保險, 响我最破的時候, 相機壞了, 電話又壞, 迫你一次過傾盡辛苦儲埋既血汗錢, 啲嘢總唔會响你手鬆的時候壞, 總係响你最手緊, 又最需要的時候壞, 真係好吊詭!

 

最後, 我當然堅持無買iphone, 傻既, 現在放4都仲可以放到4300, 4S據說係5千幾. 實在係咪真係有需要用半萬來買部電話呢? 而當初睇中的ARC, 我亦放棄了, 我始終覺得佢太大, 要睇大screen, 我不如開電腦. 所以我就出了SE的RAY, 平過ARC都成千三, 佢已經比我原本那部快好多, SIZE又啱我手水, 好好拿, 影相同ARC一樣都有810萬象數, 啱晒我呢啲以"買部有電話功能的相機"為目標的人. 我好心滿意足了!!

 

就係咁, 2680大元又送咗出去. 不過, 哈, 我做了24個月免息分期, 每個月只係供$112, 唔覺自己用咗錢買電話, 十分好!

 

今次我對呢部機既目標係, 要用到三年. RAY仔, 你要聽教聽話. 我會好小心用你, 唔會跌親你架! 乖!!

新玩具

仲有一個無錢買電話的原因, 係因為我要買相機. 正當我準備月尾的旅行時竟發現部LX2有啲問題, 感光越來越差時, 那當然要買番部相機啦! 怎知呢個時候仲要電話都壞埋, 二選一, 我只能用錢去買相機, 而放棄電話.

今日會同朋友去行山, 老公就話咁要嗱嗱林去買相機, 今日可以試, 所以擒晚就去買. 我無買現在好興的換鏡相機, 只係買番部好高性能的傻瓜機. 因為我其實對影相的知識, 暫時來說其實幾低, 亦對相機function毫無理解, 一部換鏡相機最平都接近五千, 跟住仲要不斷買鏡, 所以現階段都係買番部傻瓜仔, 所以就買咗呢部!

 

 

手提電話死咗

擒日臨放工, 發現個手機死咗, 我係插住電腦叉緊電, 想忟佢出嚟既時候, 發現佢無反應, 只係旁邊的紅燈著了. 又熄唔到機. 最後要忟電熄機, 但之後就再開唔番. 好唔開心, 呢部機只係用咗年半. 依家啲電話係咪真係只有年幾兩年命仔呢?

 

夜晚响facebook留了句電話死了, 有一半人都話叫我轉iphone 4S, 其實我睇到係一啲反感. 我覺得現在有好多人係過份崇拜蘋果的product. 其實天下間有咁多牌子, 我真係唔一定要用佢囉, 點解人有,我就一定要跟呢? 如果我真係要出, 我會揀SE的ARC囉!

 

跟住夜啲, 見到FB有friends話擒晚12點set好了鬧鐘起身買4S...今朝見到佢話今日會放咗部4, 新機都未到手就要放了現在的電話, 仲要佢現在果部其實好新淨, 其實係咪真係有需要咁追呢? 我覺得呢啲人已經被蘋果控制了思想了. 好可悲!

 

其實仲有一個原因我唔想用蘋果, 係因為呢個產品好像會令人不由自主咁將啲時間奉獻晒. 我意思係, 當我係地鐵, 巴士上, 見到個個人也拿著手機在玩game, chat, 睇戲等...好似一個人連靜下來的時候都沒有了. 我在諗, 返工有好多工事要煩, 回家也有很多家事要理, 坐車其實真係一個不錯的安靜時間, 但一個高性能手機, 就令人連僅餘的安靜時間都沒有了. 當然, 人係有自主權, 所以, 我頭先就話係"不由自主"囉! 所以, 我知SE既機係無蘋果咁快, 但係, 就係因為佢慢, 所以我會無咁有動力去用佢囉! 我就可以安靜下! 我甚至有諗過不如用番只有電話功能既手機好了! 不過, 有上網功能既手機的確係好方便, 尤其是搵路同搵食既時候.

 

講了咁大堆廢話添! 希望今晚老公幫我拎去整, 只係壞舊電就好了, 我真係未有打算換電話囉! 亦無錢出新電話.

美酒佳餚

比老公發現有個美酒佳餚巡禮, 星期六便同埋佢, 仲有佢個fd一齊去. 約7:30响尖東站有shuttle去西九文化草皮, 兩條佬遲到半個鐘, 竟然要我一個去排shuttle, 好過份!

去到, 嘩, 癲多人. 真係估唔到會有咁多人去, 搭shuttle同的士的人入去多, 行去的人更多!

 

因為我皮膚敏感未好, 所以我都唔咪咁敢飲咁多, 只是老公攞的每小杯我都痴一啖來, 不知不覺, 可能都有飲了大半杯或者一杯
不過最開心的是, 我見有啲特色小食, 咸肉腸$30, 便買了一份來食, 又幾好味噃! 跟住老公見人攞住碟芝士, 又話要食, 佢話芝士配酒, 好啱喎! 我警告了他, 如果佢唔咪真係食, 唔好買, 我唔想最後要幫佢吞晒啲芝士. 一份$50蚊, 有四舊不同款的芝士. 老公個朋友又買了份ham, 又放响我碟嘢度, 咁佢哋週圍試酒的時候, 我就慢慢咁嘆芝士咸肉.

好彩我自美國回來後愛上了芝士, 最後差不多成碟芝士同咸肉都係我食晒 肥死! 最衰無影低呢四款芝士係咩名, 四款都唔同, 一款淡啲, 一款好濃, 一款好咸, 一款好"穌". 最後好"穌"果款, 我都只係食了三小口, 老公試都唔感試.

可能因為我碟"拼盤"太吸引, 好多人都看著我碟"拼盤", 起碼有五六組人走過來問我响邊度買. 有時候, 我企响路中間, 或者响啲舖旁邊等佢哋試酒時, 我覺得我似派梗試食囉. 好搞笑!

不過, 下年老公再叫我去, 我唔去了. 人太多, 又咁多間, 都唔知應該試咩. $10一張券. 可以換一杯(應該係三啖咁上下), 好似都幾貴. 有啲仲要兩張, 三張, 或四張先換到果三啖, 仲貴! 同埋, 其實我對酒無咩研究, 真係無謂晒時間, 晒體力了. 等佢自己同朋友去好了!

其實我真係幾小器

同一個題目再次出現, 或者我真係幾小器.

上個月我幫朋友搞生日飯局, 有啲誤會, 有啲唔咪好開心的事發生, 不過最後飯局都完成了, 無嘢事發生.

跟住又到10月的飯局, 經過上一次, 無人覆, 提議餐廳又比人暗話之後, 今次我就梗係唔多事啦. 終於擒日都有人出email約食飯. 十月壽星係今日生日, 昨天先有人搞, 哈~~

 

而今次搞呢個飯局的人就正正係上一個月暗話我 "i perfer to let the birthday star to choose what to do" 果個朋友. 昨天佢一出個email, 响最後一句, 佢就寫"至於地點和菜式, 就再定, 應該都是油尖旺, 我個人認為最好坐圓枱, 方便傾偈, 如有建議, 請提出." 咦~~~~ 乜唔咪由生日果個去決定咩? 今個月得一個壽星, 仲好, 只係一個諗就ok, 大家就晒佢咪得囉! 但點解今次佢會提出話, 如有建議, 請提出呢??? sorry, 我真係唔明, 點解上個月我提出咁多建議, 最後比人話我, 應該要留番比生日人去建議, 但今次就咁既? 我真係唔開心. 所以我亦無覆個email話我去唔去, 亦更加無出建議.

跟住, 今日見到兩個人回覆, 其中一個回了話: "等我努力找找又圓枱又方便聊天又方便大家出入的食店先~" 睇完呢個回覆, 我就更唔開心, 大叫偏心偏心~~~ 點解上次啲人連覆到唔覆, 今次就有人咁積極去幫手諗. 可能真係親疏有別, 或者更有可能係, 佢哋已經唔咪好鍾意我了. 咁不如算啦, 以後呢啲生日飯局唔駛預我了, 橫樹你哋都唔鍾意我咯. 我自問自己盡心盡力去對你們呢一group人, 如果人哋因為生咗仔, 可以有啲事情改變了, 而你哋又覺得無問題, 而又因為我嫁了, 有啲同樣事情改變了, 所以你哋唔鍾意我, 我真係無話可說, 你哋要疏離我, 我都無法.

今個月的飯局, 我真係唔想去. 對唔住, 我真係好小器的.

渡海泳

停辦三十幾年的渡海泳, 明天再舉行了! 咁有意思的活動, 點可以錯過呢?! 我唔咪去睇呀! 我係去游!!!!

經過9月中的水試, 我成績都唔錯, 用了32mins 游了1500米, 即係30個塘, 其實都幾慢, 差不多一分鐘一個塘...想當年只係30幾秒就游到50米啦! 真係老咗! 就咁我就好順利入圍. 我見其他人啲record, 癲架! 男子組, 我見最快果個係19mins游完1500米, 而女子組最快都只係21mins游1500米, 真係癲架!

好彩, 我一心只係諗住入到圍, 攞到個資格參加便算, 從來無諗過要游到幾多名之內, 更當然無諗過攞獎啦! 所以明天...其實我係打算hea住游的

呢兩個星期, 都好落力練水, 每次都游足1800米. 希望明天順順利利, 唔駛比人救上水.

 

因為在鰂魚涌返工, 所以星期四lunch, 捉埋個同事, 同我去渡海泳的終點上岸位視察. 明天我就由對面游過來. 好似都幾遠. 間中諗諗吓都擔心游唔到. 不過如賽事所說真的是1800米的話, 就應該無問題.

 

呢啲就係以100蚊報名費換來的"禮物". 據說明天上水仲有毛布, 拖鞋同tee, 都幾抵!

最感恩, 也驚訝老公比我游. 開初問佢我可唔可以參加, 佢口裡就話, 你想游咪游囉! 但係個樣係無咩表情, 點點無奈, 但又唔敢話唔比果隻. 但係我真係好想參加, 停辦30幾年復辦第一屆, 真係好想成為當中一份子架. 我知佢係好擔心我. 呢幾天不斷叫我小心啲, 唔好整親有傷口 (因為啲水污糟), 又唔比我打邊爐同食魚生, 佢怕我搞差個腸胃, 容易出事. 今晚, 每一個鐘行過又講, 明天小心啲啊! 又叫我不如帶條小白布, 有咩事就fing布求救. 傻傻地, 我唔想上電視囉!! 仲有, 明天佢仲會去終點等我添! 今次比起馬拉松更有危險性, 反而更見他的支持! 我真係好感動呀! 老公, 我唔會有事架!