奇怪的奶奶

話說上星期日我同老公去了辦年貨, 買糖果. 但買的途中, 老公話前一天回他媽媽家發現她已經買了幾盒朗莎, 樂家, 花街, 餅餅等等的禮盒. 好奇怪! 她要送給何人? 明知她的三個仔女來拜年時都會買呢啲嘢比佢, 佢做咩仲要買呢? 點都無理由奶奶要買禮物比佢哋仔女啫.

一齊謎底於昨天團年飯解開.......

團年飯過後, 佢叫我們每家拿一盒禮盒回家, 然後初一帶來拜年 我真係 O 咗咀....佢話怕我哋買了一大堆佢唔食的糖果禮盒比佢喎. BUT...其實佢打比我哋叫我哋買咩咩咩咪得囉, 爽快又直接, 又唔駛仔女難做, 點都唔駛自己買, 叫仔女拿走再拿回去, 好好玩嗎?

 

再況且, 大家姐同我哋都已經買了, 佢覺得我哋會臨尾呢幾日先去買嗎? 既然買了, 就唔會咁傻拎來拎去. 不要忘記, 我哋初一要拿12 盒出門, 唔會蠢到再加多盒, 搵自己笨囉!

 

最後無一個理佢. 佢今次真係自己玩自己, 呢啲咪就係好心做壞事.

不過, 諗諗下我又發現, 佢哋家人的溝通係有點奇. 例如昨天我哋回去食團年, 早了少少回去放底嘢再去療養院睇老公的婆婆, 怎知無人在家, 我哋又無KEY, 我叫老公打電話問. 佢竟然打比佢大家姐問佢阿媽係邊, 而唔咪直接打比佢阿媽? 其實果日辦年貨的時候, 佢都有打電話比佢二家姐問買咩比阿媽, 點解佢唔直接問佢阿媽呢? 好似我, 我一早就直接問我阿媽要咩啦!

但今期奶奶呢個自購糖果的舉動, 真係令我摸不著頭腦.

老闆走了!

今日開始, 我又開始無老闆, 今次的無老闆, 可能又會長達幾個月至一年, 都真係有點擔心. 上一次無老闆時, 仲未有HR, 又得我同receptionist兩個admin仔, 所以長達十個月無老闆的日子, 我都仲可以平平安安渡過. 今次, 有了HR (我仲要得罪咗佢), 另外果邊有又一個EA, 一個receptionist, 我覺得佢哋大可以話我無嘢做cut咗我. 等新官上任, 視乎佢的需要再請番個EA比佢都得. 雖然身邊的同事總說我唔會有事, 因為我仲有隻腳係packaging, 而我呢邊三個dept head都仲要個妹仔同美國接洽, 但都只不過係啲濕碎的papger work, 叫receptionist頂埋都得.

唔知係自己諗灰咗, 定諗多咗, 呢幾日返工的心情都係一般, 亦瞓得好差.

擒日食完老闆的farewell lunch, 同佢影了個大合照後, 佢就埋位執嘢, 跟住就逐一去同事的位度握手道別. 果一刻, 我都有點眼紅紅, 真係唔捨得佢! 佢唔算係一個好好好好的老闆, 佢係一個工作型的老闆, 心底會錫啲下屬, 但從來唔會係表面露出來, 即係佢唔會係果啲好窩心, 記得你生日, 秘書節又會買下禮物氹你的老闆. 佢只會响你有需要時出聲幫你, 又會聽人意見. 這已經足夠了! 一個月前得罪HR的時候, 都仲諗只要有老闆係度的一日, 我都會留係度, 怎知....

佢走咗, 我無人照嚕 ~~~ 要自己顧自己了!!

 

雖然唔捨得, 但心底都為佢開心. 因為佢搵到一份對佢前途同家庭都更好的新工作, 而且又是他的老本行, 相信他會做得開心啲! 祝福佢!!

我都要努力, 趁老闆走咗, 我都係時候轉工. 知道佢要走的消息這兩星期, 我都間中睇下外面的環境. 唔算好多心儀職位, 最後只sent了四封出去, 其中兩個仲係agency. 啊 ~~ 但竟然有三個回覆. 今天下午會偷雞出去interview, 星期一上午又會in 另一間. 希望我同老闆一樣都搵到份更好的地方落腳!

潛水HR又有新搞作 ~~ 報應篇

呢件事, 真係唔可以唔講下比大家聽.

 

話說擒日下午收到上海同事的holiday announcement, 係出晒比我哋Asia Pacific各 regions的同事的, 通知我哋上海的同事新年會點放假. 咁大家都知, 新年係大陸同胞的黃金週, 佢哋會放差不多一個星期, 由2號到8號, 佢哋可以放埋7號同8號係因為佢哋會响30號, 同12號呢啲weekend返工.

 

剛巧出完呢個email, 唔駛1min, 潛水HR浮上水面, reply to all 了一句: "No, please hold it." 然後直至依家都仲未有further announcement.

 

我睇了呢個email, 噗的一聲笑咗出來! 點呀...發生咩事, 佢哋唔咪應該傾好先比人出email咩?

跟住我就响就快要走的HR 妹妹口中打探, 原來公司唔想佢哋咁快, 想佢哋跟香港一樣放4天, 其餘的就攞自己假! That's Fine, 但係唔咪依家先通知人, 唔咪依家先同人傾囉! 大陸的同胞, 好多都係離鄉別井去第二個省/城巿打工, 係呢啲假期先會可以返鄉下, 同屋企人過年, 好多亦已經買好晒車票.

 

我問HR妹妹點解會比佢哋出了announcement既? 她說...haha...咪就係佢哋無通知HR就出咗囉! 真係超肉酸. 抵死啦! 真係報應. 上次佢無同我傾過recreation team的事就出了個email, 現在佢應該明白我的心情啦!

很忙的星期日

2011年1月23日 - 超忙的星期日

一早7:30起床, 因為要獻詩, 所以要咁早起床. 崇拜完回將軍澳跟老公食lunch, 然後一齊行TASTE辦年貨. 第一年以太太身份去辦年貨, 第一次辦年貨係要從自己跟包比錢, 有點肉痛. 一共買了12盒糖果餅干...點解我老公覺得開心, 但我一點也感覺不到. 我只是覺得, 新年送禮, 只不過是不同形式的交換禮物, 尤其是近年大家"好似"好注重健康, 少吃甜, 所以轉為買麵. 結果是往年多次是跟媽媽買幾盒麵帶去拜年, 又換返幾盒麵返來, 多麼的多餘! 仲要唔知佢哋鍾意食咩喎?! 買得唔啱心水又有說話聽, 又或者話你大細超喎"點解佢果盒咁大, 點解佢果盒咁正, blah blah blah..." 諗起都覺得煩.... 然後再諗起初一那天, 同老公兩個人要拿這12盒糖果餅干出門那"走爛"樣...

辦完年貨, 仲同老公鬧住架咁返屋企, 原因係乜, 唔講了, 過去了, 亦無事了!

跟住就燙衫, 然後再落街跑了一個鐘. 回來沖個靚涼, 便預備出街食飯!

呢晚約了一班美國回歸的朋友. 好搞笑, 原本約了在THE ONE 4樓的一間好似叫Sprout的餐廳食. 怎知我去到見個fd企咗响出面. 我問佢做咩唔入去, 佢話因為入面一個人都無, 好驚!!! 而且價錢都唔咪平喎! 我話我幾次行過都係咁架...無人架!!! 最後我哋就去了隔離的金牌小龍. 好快就有得入, 餸亦上得超快, 見到一枱食物, 勁開心!

 

 

 

最impressive係個水晶蛋, 好好味. 醉雞一般, 因為佢舊舊個樣都唔似雞, 感覺好似食梗假嘢.

小龍包同煎餃子都係一般, 同翡翠差不多, 擔擔麵同炒鱔糊, 亦都係一般. 正如我個fd話, 真係同翡翠差不多, 好似翡翠仲好少少!

佢哋仲限時個半鐘, 但啲菜上得超快, 但唔駛一個鐘, 我哋就食晒8樣食物, 走得. 去搵甜品食!

食甜品去了厚福街的甜蜜蜜. 我都係第一次試. 一直只知道厚福街多嘢食, 估計實有甜品!

 

 

 

我哋叫咗四個甜品:
心太軟 - ok, 不過個人對太甜的興趣一般
疏乎里 - 味道ok, 質感太濕,個樣有啲以馬拉糕.
火焰木槺蛋糕 - 最得係呢個. 好有層次. 上面燒過的cream熱熱地. 下面木槺蛋糕就凍凍地.
xx 栗子餅 - 都得. 好重栗子味!
完成甜品便打道回府!

 

 

壓力! 壓力!!!

自從知道老闆要走之後, 整個星期都瞓得好差, 好多夢, 而啲夢都係好緊張的.

 

昨晚便一連發了兩個夢.

 

夢一: 夢中, 老公的二家姐叫我去一間學校見一個人(註:二家姐係老師), 那間學校個名係xxxx鄧鏡波中學, 但她一直不跟我說個地址. 鄧鏡波中學, 我知道香港有一間, 但九龍有無我就唔知. 她一直叫我去一個九龍的地鐵站出, 跟住就搵到, 但一直都不肯說在那裡, 亦沒有告訴我那個出口, 結果, 我找來找去都找不到, 但她卻在催. 我六點鐘放工, 到八點都仲未去到, 搵到我好攰. 後來便醒了, 去個厠所!

夢二: 夢中我跑馬拉松 (註: 的確我係報了半馬), 但呢個馬拉松係跑樓梯, 跑到我的大腿超攰, 但係我好勁, 暫列第七名喎! 跑完樓梯就去到運動場, 我仲見到入運動場後即代表仲有兩個圈就完成, 亦見到我只係用了一個半鐘(好勁呀!!), 可是一入到運動場, 我對腳就攰到郁都郁唔到, 對大腿痛到完全抬唔起, 咁我就好努力咁一步一步咁行, 但好緊張, 驚完成唔到, 又見啲人不斷咁超越我. 最冏係有一個超越我的參賽者係一頭狗 . 後來因為太辛苦太緊張, 就醒了.

發了這兩個夢, 早上起來, 好似成晚無瞓過咁.... 現在超

Execuse me....這算什麼

前天返工, 在公司樓下看到三棵很嚇人的"桃花樹"....

還有十二天便新年了, 他們係咪打算貼紙花上去呢?

見到個價錢就笑到傻咗

今日又約了幾位靚太網友食飯. 約了7:30在旺角, 6:30我就去到了, 於是又入朗豪坊逛逛, 一逛就出事, 不過呢個出事, 係小事, 因為個價錢真係開心到笑. 間舖買一件三折, 兩件以上二折. 即係一件200蚊的衫, 折了係40蚊.

首先見到一件紫紅色的樽領衫加個小bow tie, 就係折了只賣40蚊, 仲平過我係uniquo買件75蚊的樽領衫. 跟住睇下睇下, 就買了四件. 有一件, 哈哈哈, 原價449, 折了只賣89.x, 真係睇到張單都忍唔住笑了出來. 又會平得咁緊要. 不過我估啲衫應該係上一季. 都唔緊要啦! 我揀的款其實都係啲大路款, 無所謂!

 

 

張單...真係睇得人好開心架!!! 買完打比老公, 一路講, 一路狂笑, 老公話我傻.

新年大把新衫著lu...好開心!

 

晴天霹靂

話說上回先講我老闆好睇我,其實都唔需要為咗呢個潛水的人事部而離開公司.

 

怎知....今早一回來, 出差個半星期回來的老闆, 一見到我便召了我入房, 更同我講佢辭了職.

唉...真係晴天霹靂呀!

 

佢話佢搵到一份歐洲公司,對佢的前途, 同家人都好, 因為佢係比利時人, 佢做歐洲公司, 就會可以多啲機會返鄉下囉!

 

唉...聽到佢咁講, 我都唔知比咩反應佢好! 只係講了句 " I will miss you".

 

但心底, 真係好擔心! 我老闆真係幾睇我, 兩年前, 都係因為佢保我, 所以我先免受殺頭.

我呢份工, 唔多嘢做, 做三年, 除了有半年跟人事部做咗一陣係成日OT同超大壓力, 離開了HR之後, 每日都係準時放工, 好多時又無咩嘢做(所以先可以成日上wow). 咁如果有老闆照, 繼續維持現狀, 都不無好處.

 

只是如果想學嘢, 想有得升, 想人工大跳, 即使老闆唔走, 留係度, 就真係無機會.

現在老闆要走了, 我係咪都應該趁機會另謀高就呢?

都幾relax的四日新年假

其實一向我係新年都唔忙, 即使未嫁的時候, 都只係年初一需要出動拜年, 原來嫁咗後都仲可以維持, 都幾好!

先由年三十晚開始講. 是晚同老公各自回家陪自己的媽媽. 原本同媽媽食完飯, 打算滙合老公去大埔行花巿, 因為佢有個朋友(即係伴郎) 响大埔個花巿開檔. 但後來老公又話唔想入, 最後就他跟二家姐陪他們媽媽去葵芳的花巿行, 而我則跟媽媽出了旺角球場的花巿行. 因為早, 所以都唔咪好多人. 我乜都無買, 老公就買咗支桃花仔.

年初一

九點幾起身便拿拿聲裝身出門, 先去奶奶家跟她食個早餐, 唉...以前年年媽媽都會初一晨早煮斎食, 我家的習俗係新年第一口要係斎. 但今年......係美心的羅宋湯通粉 .

同奶奶食完美心早餐, 上去她家, 斟杯茶比佢飲之後, 我哋又拿拿林搭車去我外婆家. 因為習慣上外婆所有兒孫都會係初一上去跟她拜年同食開年飯, 之後就唔駛再逐家逐戶拜年, 所以如果我miss了呢一餐, 我就要走訪多家, 所以點都要趕去! 今年好特別, 外婆三個在外國的仔女都回來, 所以全部七個都齊集晒. 呢一幕, 應該係我有記憶以來, 都未出現過. 我阿哥更形容為"比日蝕更難遇到的事情". 我相信外婆今年一定好開心! 又因為咁齊人, 所以就係咁影相, 尤其是"七星伴月"相!

差啲漏咗! 係外婆家影相影到3點幾, 就返去老公婆婆的安老院睇佢, 再回奶奶家食開年飯. 呢餐真係開年, 因為大家姐同阿仔鬧交, 同係鬧得好恨好認真....仲有, 奶奶又預備勁多餸, 4點幾又買了兩盒斎比我哋食, 6:30就話開飯, 邊有人食得落, 叫了盆菜之餘, 仲要叫埋燒味拼盆, 同埋菜, 之後自己又再煮多幾味菜. 個個飽到食唔落的時候, 枱上面每一碟菜個樣都似未郁過, 真係反眼....最後奶奶咪又比三個仔女話囉! 希望佢下年唔會再係咁, 真係好浪費食物呀!

年初二

瞓到十點幾先起身, 煎咗啲糕點同老公食, 休息咗一陣, 我就出去跑步, 老公就呆在家同朋友商討活動. 跑完步回來, 同老公落街食午餐, 又去行咗陣taste, 跟住便準備出去睇煙花. 我好鍾意睇煙花, 但老公好怕迫, 所以我都唔敢成日嘈要去睇. 難得今年無嘢做, 試下問佢, 佢又話ok喎! 真係開心. 因為佢怕迫, 所以我都唔帶佢去正中間的位置. 六點去到, 係尖沙咀中心對出海旁見有花叢有位坐, 便坐低等了. 呢個位都算睇得清楚架! 跟住仲好快, 唔駛半個鐘就返到將軍澳, 走咗去稻香打邊爐, meet到9:00後的優惠!

年初三

團契團拜, total 四個站, 第一站我家, 跟住出油塘, 然後麗晶, 最後旺角. 好開心好熱鬧!!

然後返教會練詩, 再回家同老公的朋友食飯, 又係稻香打邊爐!!

年初四

早上返崇拜, 跟住午餐, 然後行街巿, 再去跑步. 今日老公都有跟我出去, 不過佢踩單車, 我跑步. 都好!

跟住就去奶奶度同"舅父仔"一家食飯. 食6:30, 食飽又無再上奶奶度, 所以9:00就返到屋企. 超爽!

咁就過咗個新年假期!!

祝大家開工大吉! 兔年夫妻恩恩愛愛! 搞緊結婚的就一團和氣, 順順利利!

或者我都係時候要走

今朝返到公司, 睇到一個email, 係由那個潛水HR DIRECTOR出的, 睇完我超慶, 即刻打了個email比我出差了的老闆, 話佢知我好失望, 我覺得不被尊重.

呢個HR出的email, 係"I am happy to announce that members from AAA & BBB have formed the Recreation Team for our HK office: Chairlaies: XXX & 洛琳......There will be at least four events a year where 2 will be jointly held....."

點解公司突然有個Recreation Team我係唔知? FINE, 我職位低微, 唔話我知唔緊要. BUT點解我做了Chairlady都唔知? 我老闆擒日出發前只係同我講, 我會要幫手搞annual dinner (我年年都要搞), 不過不用做lead, 幫吓手就ok. 但係佢完全無提過會有個recreation team, 仲要係要搞4個活動. 我估我職位唔咪真係低微到連小小尊重都得唔到啩? 我真係超嬲超唔開心. 我唔咪唔肯做, 但絕對唔咪事前無同我講過就出個email, 我係要响個email先知道自己被擺咗上枱囉! 我真係好唔開心囉.

好彩, 我呢個敢言敢爭取又唔怕死的小薯仔, 得到老闆的回覆:

"Agree with your point. This is new to me as well.

XYZ (HR Director), this is not what i agreed with SSS (the other MD). Not sure what happened."

跟住那個XYZ就叫了我入房, 同我傾, 同我道歉. 亦可以比我選擇係咪真係咁唔想做chairlady, 如果係, 我老闆又ok, 可以換第二個人. 咁我條氣都順啲, 不過我真係好唔鍾意呢個潛水HR囉!

不過, 係咪真係可以唔做呢? email佢又出了, 再補個email話換人? 會好肉酸囉! 亦會令人覺得我搞事囉! 唔通逐個同事同佢哋解釋係公司先不仁, 所以我才不義咩! 換邊個呢? 換邊個都會令我同那replace我的同事感到尷尬囉! 我真係唔知點!

其實我份人, 我係鍾意搞活動, 但我唔鍾意做lead果個, 亦唔鍾意要站出來講嘢. 我可以好helpful咁幫你做既啲嘢, 但我唔需要站出來比人知. 其實响呢度做了三年, 第一年搞annual dinner, 搞到要自己做MC, 仲要係講英文, 我已經超唔鍾意同超大壓力. 第二年, 唔駛做MC, 但都要lead成個event, 根本無機會enjoy個event, 都係唔份氣. 第三年, 終於同老闆flight到, 可以唔involve個annual dinner, 但都要做啲back up同logistic既嘢, 都算. 怎料, 今次又被擺上枱做lead, 仲要做一年搞4個events. 真係十萬個唔願意.

擒日先同girl傾計, 話都係唔轉工, 因為呢份工都幾hae, 老闆又睇我, 人工亦ok, 咪留得幾耐得幾耐囉. 怎知現在卻不被尊重之餘, 仲要迫我做我十萬個唔鍾意的工作, 或者我都係時候要走了.

大婚日相簿

話說我那個相當實惠的婚禮攝錄package, 除了包1photographer & 1 videoman之外, 仲有包成長片段, 早拍晚播, 仲有一條website, 可以幫你upload 700張相, 讓你可share條link比人睇你啲相. 另外仲有四份禮物比我揀. 第一份我揀了要番母帶啦! 第二份就係要相簿. 第三同第四份仲未揀, 我可以揀要15R family photo, 又或者其他結婚當日用的service (不過已經用唔到, 所以可能要兩張15R family photos).

 

total 10 pages + 封底同封面. 唔算話好靚, 但quality都唔錯. 而且, 我揀相比佢, 佢排版後, 佢會send比我approve, 這是我完全無預計過, 我以為我揀完相佢就出相簿比我. 第一次layout, 有點亂(我估我要求真係幾高, prewedding的排版同呢個, 我都係覺得差). 跟住我又好有心機用powerpoint逐張逐張話佢知我想點. 第二次layout, 好啲. 只差幾版要再執一執. 最後來來回回, 都執了四次. 其中排版哥哥仲打來問我, 同埋比意見我. 呢個哥哥都幾有禮貌.

不過我今次唔咪想講呢間公司的product, 而係想講service.

其實一開始join呢間公司, 老闆steve的態度同服務已經一流. 而他亦很樂意用唔同的途徑同客接觸, 除了esd life有forum, 後來仲開了facebook, 我有時會响facebook問佢嘢, 佢亦好樂意答. 有時, 我post了啲唔關佢事的status同相, 佢又comment下同like 下, 真係當你係fd咁, 令我覺得好舒服. 直到宜家, 我個婚禮完了, 佢同佢啲同事, 都仲係好helpful, 絕對唔會明知你唔會再幫襯, 就當你係陌生人囉! 好似擒日去攞相簿, 舖入面好多人, 我等了一陣, steve serve梗一個客, 見我等得耐, 都停下來話幫我攞先. 跟住我話我仲有兩份禮物未揀, 佢話keep 單就ok. 跟住我就話我email同佢傾啦! 呢間公司, 由開始到現在(婚禮三個月後), 都給我好helpful, 好nice的感覺.

我唔可以話佢啲相好靚, 但始終我個package真係平. 一分錢一分貨, 所以我都好appericate呢間公司. 如果有人個budget係咁上下, 我都會繼續介紹.

呢間公司叫純美新娘. 係金都二樓.

做人子女甚艱難

睇咗wingcsm的"左右做人難", 都覺得好有同感, 有時候, 都真係唔知點去處理同父母的關係.

我父母在我15歲左右就離咗婚. 佢哋離婚對我影响唔算大, 因為我果時係支持架! 我覺得佢哋係相處唔到的話, 分開總比每天在吵架好! 我哥哥中七的時候便去了美國, 一去就十多年, 回流後不夠一年便結婚, 所以基本上哥哥係無咩同媽媽住埋一齊的日子, 反而我就同媽媽相依為命.

他的父母, 也在他很小的時候離咗婚, 對他來說, 亦不算有大影响, 因為基本上, 他是很憎他老豆的. 他兩個家姐都嫁了十多年, 所以這十多年, 也是他跟媽媽相依為命.

兩位媽媽在同一天要同個仔同個女分開, 我同老公其實都好明白. 所以我哋都盡量每星期都會回家同佢哋食飯一次. 甚至連新婚第一個聖誕節, 我都提議同佢哋兩個上大陸, 等佢哋無咁悶.

咁25-27日都陪咗佢哋啦, 所以1月1日, 我就期望同老公可以去拍吓拖, 或者食餐好的. 果日我哋瞓都10點幾先起身, 最後亦搞到1點先出得門口, 之前都爭論了好耐去邊度做啲咩! 佢又唔講話要返去同佢阿媽飲茶(可能他其實都唔想), 跟住知我阿媽對眼有事, 又話不如返去睇我阿媽(吓...咁咪又無咗個假期...不孝), 最後我有個阿姨去我媽家睇相, 咁有人陪她, 我哋就走咗去西貢行, 食咗個要等好耐的西餐, 去同人哋啲狗玩下, 又去食咗個好好味車仔麵, 便回家行超巿. 見未肚餓, 我就去咗跑步, 跑完步就炒番31日晚剩的炒飯食. 咁就過了我們的1月1 日.

到1月2日, 星期日例牌要到奶奶家食飯. 我去到換好了拖鞋, 便入廚房叫奶奶啦. 佢的反應好冷淡. 當然我唔會理佢啦! 後來聽見老公走入去, 又氹, 又鍚, 先至好似好啲笑容, 但奶奶望我的眼神依然唔咪咁友善. 當然, 我繼續都係唔會理佢. 後來我問番老公, 原來奶奶嬲我哋1號無去同佢飲茶...... 點解1號要同佢飲茶呢? 同得佢飲茶, 我又要同我媽飲茶....上次我煮飯比奶奶食, 原本都唔打算比我媽知, 怎知我奶奶响大陸的時候, 同我媽傾開計, 竟然講咗出來(雖然我無交帶話唔講, 而亦都唔會咁交帶叫佢唔好講囉). 果吓我幾尷尬, 我媽跟住就响度話無食過我煮的一餐飯...唉...真係煩!

兩個阿媽都係要面對得番一個人住的日子, 所以我想公平啲, 如果每星期日都要返奶奶家食飯, 我都會要我老公同我一齊返我媽家食飯. 同埋其實啊, 我哋無真係每星期都返我媽家食飯, 因為星期日呢啲黃金檔期又比佢家霸了, 老公又話唔想星期五六都無埋, 咪唯有weekday返我媽家, 但有時候又真係有嘢做返唔到. 所以其實佢阿媽已經好得多了, 佢仲為咗我哋1號無去同佢飲茶而唔開心, 真係好難做啦! 我哋日日返工, 佢哋兩個都退休了, 我哋都想weekend同假期可以休息下同拍下拖啫, 可以體諒下嗎?

仲有一件事又好笑. 我老公好鍾意食臘腸同潤腸, 咁我媽對食要求係高啲, 所以佢會去啲食蛇的地方買, 所以我老公成日話我媽家煮的臘腸同潤腸好味. 又買比我煮比我老公食. 我奶奶就唔知點解好鍾意買美心臘腸券送比人, 又問我要唔要臘腸同潤腸帶返屋企, 我咪話我家有, 我媽咪買咗比我哋, 所以唔要. 跟住我就見佢面上一黑...唉...又唔開心, 好似覺得我只要我媽啲嘢唔要佢啲嘢. 大老啊...係你個仔唔鍾意食美心, 你都知, 點解仲要我哋攞美心臘腸同潤腸啫. 你明唔明...唔咪我唔想要, 係你個仔唔鍾意. 亦都係佢個仔同我講話唔想次次去親兩位母親大人家, 都要攞住一袋二袋回家, 好辛苦(因為我哋住得遠). 咁所以我咪一律咩都話唔要囉! 又面黑, 關我咩事啫! 最後為咗氹佢, 咪要了盒潤腸囉(仲有冬菇, 而我哋又係一袋二袋咁返家囉!