好難食既奇x蘿蔔糕

本來我都真係好少會出post話啲嘢難食, 但今次真係好難食, 唔想大家中招! hahah

過年前酒店送了張奇x蘿蔔糕券給我

今年無咩人來拜年, 終於擺到擒日一次過煎晒成底

切既時候已經諗, 乜咁硬既?!

煎埋嚟食感覺更差, 我覺得似食粉多啲囉!

悶蛋新年

過年前睇番上年新年, 記得番上年係好凍.

所以都要打一打今年既悶蛋新年, 等年尾睇番, plan好啲, 無咁悶蛋.

 

年廿八放三年, 落維園行花巿, 老公四點幾會合我一齊行. 買了一個patchwork的煲墊, $45又平又靚!

之後去奶奶家做節. 奶奶又嚟9個人12碟餸......唉.....其實都唔明佢做乜要煮咁多, 佢煮飯唔係叻, 煮咁多佢係會要用兩三天去預備.

 

年廿九...唔咪好記得早上去咗邊添. 下午去花墟買花, 奶奶又一齊, 佢買了劍籣同菊花. 我買了富貴子同蝴蝶蘭

 

晚上去婆婆家做節. 都好大枱人喎! 但今次因為有啲人今晚唔得, 果啲人就昨晚做了. 可以分兩日做節, 任君選擇, 又幾好喎!

食完團年飯, 媽媽無啦啦話"婆婆問做咩今年無五代同堂"...於是我就同老公行了今年的第三個花巿 ~ 將軍澳年宵巿場. 估到唔到排隊入囉! 不過個花巿都幾細, 將軍澳又咁多人, 唔迫就奇了.

大年初一, 今日係星期日, 奶奶要返崇拜, 真係好, 可以skip呢一站, 直接去我媽家拜年食素, 再一齊去婆婆家團拜.

人齊了, 廿個人廿碟餸, 勁呀

 

 

 

呵...大年初一開年喎! 大舅父同阿姨講晒粗口對罵. 都唔知發生咩事.....

之後就去奶奶度拜年. 今日佢就變咗order 盆菜, 美心的, 難食到嘔呀!

大年初二, 整天在家發毛!!!!! 都唔咪既, 我出過去跑步囉. 夜晚同老公海港食燒鵝.

大年初三, 早上發毛!!!!!! 四點出門去東涌, 行outlet買了件跑衫渣馬著, 便上個朋友家食盆菜. 富豪酒店, 正到暈.

 

 

 

真係一分錢一分貨. 起碼呢個唔咪用一堆芋頭去墊低囉!!!

初四, 約咗媽媽同兩個美加回來的阿姨去太子飲茶. 等咗.....一個鐘先有位.

之後回家, 有朋友來拜年. 煮了光波大元蹄, 意粉, 同加拿大ham.

 

 

朋友送了呢個做賀禮, 好特別, 又好靚. 可以用來煮煲仔飯, 呵呵呵!!

 

 

就係咁, 四天年假放完, 初五開工大吉!!

過年後感, 悶到我初三就已經大叫"我想返工呀!!" 無啦啦悶到自己咁掛住份工.

老公都話, 年年係咁唔咪好得, 不如下年初二/初三出發旅行.

 

情人節大餐

原來上年係自家煮情人節小餐, 今年就出咗去食情人節大餐.

去咗尖沙咀osaka, 好彩有訂枱!

間嘢有個情人節餐$1288, 我哋當然無食呢個, 我老公都唔

食生嘢既! 所以只係散叫! 但都有最低消費, 每人$300

我就叫了個刺身同茶漬飯

老公就叫了個牛鍋定食同鰻魚

 

好滿足!

 

 

今年突然想到一個好爛既gag, 就係如果老公/男朋友問要唔要花呀? 咁就可以答: 要, 樓花!!

卒卒失蹤記

擒晚發生咗件低能事.

無啦啦我發現卒卒貓唔見咗

周圍搵廁所, 廚房, 琴底, sofa底, 所有地方都唔見喎!

最後....發現原來佢被困在大門同鐵閘條隙中間

話說我回家後, 開咗小小大門等間屋通風啲

卒卒貓係好鍾意坐門口睇走廊

我老公無啦啦無睇清楚就閂咗大門

可能今次卒卒貓無留條尾出嚟, 老公見唔到, 所以就咁閂門

結果佢就被困隙中

好彩條隙都有半呎寬, 佢應該都唔咪被夾住既

不過我哋一開門, 佢就立即衝番入嚟

奇怪係...佢被困時又無叫喎!

完全唔知佢响出面囉.

入廚樂 ~ 廣島蠔煲仔飯

見仲有啲買落好耐既廣島蠔响冰櫃, 就提議試下用嚟煮煲仔飯

但老公一味話會好腥

我話: 可能我可以煮到唔腥呢! 嘻~~

 

 

 

又真係比我成功咗喎!

[材料]

廣島蠔6隻，薑片10片，葱半碗

[調味料]

魚露1茶匙，生抽1茶匙，蠔油1茶匙，酒1茶匙，胡椒粉適量

[做法]

1. 廣島蠔解凍，加入生粉略醃，沖淨，汆水後抹乾水份。

2. 洗米後, 用1:1的熱水浸米30分鐘

3. 再加1份水, 用低架, 260度光波20-25分鐘

4.光波飯的時候, 起鑊爆香薑片，放入廣島蠔兜炒，下調味料炒勻 (不用煮熟)。

5. 呢個時候啲米應該都差不多熟, 或熟晒亦無所謂, 可以有飯焦.

6. 放下爆香之廣島蠔，蓋上蓋繼續煮多5分鐘

最後係一啲都唔腥, 因為我都放了頗多薑蔥.

老公話我係"煲仔飯王" 呵呵呵!

刪除記憶

見一網友講如何處置前度既物品, 咁啱我又正在處理呢樣嘢!

媽媽家要裝修, 迫我要搬走屬於我既嘢

其實都唔咪好多前度既禮物, 反而相, 同日記就有一大堆.

曾經有幾年有寫日記既習慣, 儲儲埋都有5-6本, 但其實又從來無攞出嚟睇過

所以最後我係決定全部掉晒去(攞番公司用碎紙機碎晒去)

相亦都有好多. 於是就抽起晒前度既單人照, 同合照.

又係攞番公司碎晒去.

碎之前揭過少少啲日記嚟睇, 只得一句comment.....白痴!

不過心裡又有少少唔開心, 覺得响度delete緊自己既過去同記憶.

我whatsapp問其中一個前度, 話佢知我响度清理舊物, 話我唔可以keep啲相, 問佢要唔要.

咁啱佢話佢又响度清理舊物, 睇到我哋以前既嘢. 佢叫我寄啲相比佢, 佢話呢啲係佢人生既一部份.

正如網友話, 無以前既經歷就無現在既我

咁點解我唔留?

嗯...一來實在太阻地方了, 既然五六七年來都無睇番, 我知我呢世都唔會再攞來睇

二來, 我怕有一日我死先, 我老公無聊攞嚟睇佢會唔開心. 以前細個, 少女情懷一定有把白痴嘢. 佢識諗都好啲, 諗埋一邊唔開心, 我無得翻生回來解釋/安慰.

三來, 要記得既事, 永世都會記得. 唔需要記既, 留嚟都無用