半夜的火警演習

前晚, 我家大廈舉行了一年一次的凌晨火警演習 OR 警鐘測試, 仲要有兩轉, 一轉3am, 一轉5am.

我...嬲爆!

我唔易入睡, 最後碌咗一個鐘先瞓得番.

擒晚回家, 唔見大廈有通告解釋事件, 頭先我就打去管理處, 佢話今日先會有公司嚟檢查. 佢話有可能係潮濕影响.

如果唔咪女人聽電話, 我真係想小爆佢.

我娘家住沙田, 都係一個出名潮濕地區, 住咗廿年都無試過誤鳴. 我知將軍澳係濕, 但上個月最濕果兩三個星期做咩又唔誤鳴呀? 濕到壞左所以叫都唔識叫?? 咪玩我啦! 成個將軍澳咁多屋苑, 我既屋苑亦有三座, 做咩其餘既大廈又唔會誤鳴, 只係我果幢會呀? 我幢大廈特別潮濕? 咸濕老多都仲有可能啦! 仲要一年一次? 前晚都唔咪咁潮濕啫, 起碼等lift大堂無水珠先啦! 真係咪玩我囉! 佢成日咁半夜响, 真係好危險. 其實前晚, 我哋被警鐘吵醒, 第一時間唔咪諗要走, 而係打電話落去問係咪誤鳴, 有無火燭. 經過上年果次我哋既走火警已經降低咗, 今年又嚟, 將來有事, 真係做硬燒豬囉.

最後, 我擒日全天處於眼瞓狀態, 今日尚未回復.

我想問大家, 知唔知呢, 如果火警鐘响, 係咪會全幢的都會一齊响? 因為我個單位正正响警鐘隔離, 大聲到我哋係咩都聽唔到, 唔知其他樓層有無响. 又如果係誤鳴, 係咪就只會得一層响?

生日週

上星期, 除了個天氣影响了我的心情外, 其實今年的生日週都過得幾開心.

先由星期日開始 (15/4), 奶奶一家齊晒人同我食飯, 雖然只是响奶奶家樓下的酒樓食, 但都開心既, 佢哋係好錫我既. 而當晚亦有件好好笑既事情發生. 9個人的晚餐, 佢比張萬七既單我哋. 利害既係, 間酒樓憑咩覺得自己值收咁貴呢? 我哋無食鮑參翅肚喎! 原來....有萬四蚊出自246碟金銀蛋莧菜. 好嘢, 9個人食246碟, 平均每人要食27.3碟. 比我, 應該要食一個月先食得晒囉.

 

(16/4), 老公的一班朋友仔同我食飯, 其實已經定期會出嚟食飯, 都已經成為common friends了. 開心佢哋都會同我慶生, 即係, 我再唔咪我老公既附屬品了. 呢晚, 去咗時代廣場的鍾菜, 無我想像中和聽聞中的好味, 不過亦都有開心事, 就係老公為我預備了一個好驚喜蛋糕, 係我最鍾意既大口仔.

 

 

 

(17/4) 我自己教會的一班朋友同我食飯, 去咗旺角泉章居. 如常level, 不過不失. 今晚無齊人, 因為有一個溝通出錯, 所以嚟唔到, 一個有事做, 但之後出來同我哋去糖水, 有一個要湊仔. 其實湊仔呢個, 都係因為應我要求. 生日大晒嘛! 我想今次的生日飯, 大家可以輕輕鬆鬆, 唔駛比bb搞住, 可以開開心心咁狂傾狂笑. 結果就要犧牲其中一個, 留佢响家裡湊仔, 阿老婆代表出席. 呢晚都有蛋糕, 係一個雜錦蛋糕. 大家咩味都可以試下咁囉.

 

 

 

(18/4) 正日. 原本係打算去海洋公園的. 可惜, 由上星期開始一路check天氣, 一路都話有雨, 仲要係有雷雨果隻. 到星期一check都仲係話有雨. 三年前的生日, 已經領教過一次雨中海洋公園, 實在唔想再嚟. 結果無請假去, 返工算吧! 豈有此佢...最後一整日都無落雨囉....我唔敢話個天唔鍾意我, 因為天父好錫我的.....

晚上老公帶我去尖咀一間都幾地道的日本料理, 獨吞了一碟魚生(老公唔食生嘢), 同埋叫了好多我未試過又好想試既. 飽到想死. 不過好開心.

 

 

 

(19/4) 今日終於可以休息下. 晚上同老公去旺角出電話, 晚飯食了湯飯, 清清個肚. 不過lunch就有同事請了我去食日本嘢, 又係好好味! 呢個同事真係好, 其實公司無人知我生日, 不過昨天奶奶打電話來, 個同事聽到我既對話, 就估到我生日. 原本佢可以扮聽唔到既, 所以佢真係好好囉.

 

(20/4) 今日又到老公另一班fd同我食飯. 其實呢一餐有少少係忟衫尾, 因為呢group裡有一個係28號生日, 所以咪順便囉! 話晒, 佢哋生日飯, 我都好恒常出席, 道理上, 我生日請反我, 都應該. 不過...响呢班fd裡, 我依然覺得自己係老公既附屬品. 即係, 呢班fd, 唔會同我有聯絡, 佢哋既whatsapp group係唔會加埋我, 有咩都係我老公轉達. 但之前果班, 我就可以直接同佢哋聯絡, 响whatsapp一齊吹水. 轉達好煩的, 好似今日, 原來約了7:00, 我以為係7:30, 結果我選了搭選巴, 一搭兩小時, 8:00先到. 如果我一早知係約7:00, 我會選搭地鐵. 唉.....

今餐去咗美孚baby blue食. 佢啲藍青口係超好味.

 

 

 

 

最後, 係咪奇怪點解我自己家人無同我慶祝, 其實佢哋早於3月22日 (農曆三月初一)已經同我慶咗. 仲有個超好味既蛋糕添. 不過我媽媽真係無乜心肝, 我新曆正日電話都無個....反而奶奶有囉.

 

 

 

生日週後, 都應該要開始節食了.

昨天生日, 今朝一早去警察局

真夠玩嘢囉!

話說我衣家住既地住係奶奶既, 我哋未結婚入嚟住, 佢哋租咗比人. 上手租客, 賤人一名, 又養狗養到比人投訴, 又欠有線定香港寬頻錢, 搞到我哋申請唔到. 2年前裝修時, 仲有人上門追數, 入住後亦試過有個阿差在管理員陪同下上嚟搵人(呢件係一件起低能事喎!). 跟住都靜止咗年幾無事, 只係間中都仲收到啲電話公司, 電視公司的信, 寄比唔咪我兩公婆名既人. 咁我咪寫無此人, 打回頭囉.

上星期六, 收到封無回郵地址既信, 裡面有一張A4的白紙, 大大隻用電腦打Ng Man Yi 速聯莫先生 5xxxxxxx.

咁我老公就加133打去搵呢個莫先生, 話我哋呢度無呢個吳小姐. 佢話呢個吳小姐用呢個地址借了錢, 欠債梗要還錢. 跟住仲叫我老公send啲咩住址證明定咩比佢. 我哋心裡"你都低能. 你借錢比人, 唔咪應該係你check好借錢人既住址先咩? 做咩係我證明?" 咁以為無嘢啦!

擒晚回家, 在鐵閘同大門中間, 又見到呢張"Ng Man Yi 速聯莫先生 5xxxxxxx"的紙喎! 上埋嚟添, 想點呀!

於是今朝咪去備案囉!

不過警察話, 呢個階段佢哋做唔到啲咩喎, 因為得個電話, 無公司名, 好難跟. 佢話如果再收到啲正式啲既追數信, 即係有回郵, 有電話號碼果啲, 就再攞去比佢, 佢哋就可以follow up. 阿madam又好無奈話, 依家警權好細, 好多嘢都做唔到 叫我哋小心出入, 如果有人上門, 唔駛同佢講嘢, 直接call 999搵警察上嚟就得喎!

其實我哋巿民都真係無咩保障. 睇啲廣告, 又話不用入息證明, 又話不用住址證明, 兩分鐘錢就可以到手, 點呀?! 咁我是但報個地址去借錢, 唔還, 你都搵我唔到啦?! 係咪咁話先. 但係我依家就比人用咗我個地址去借錢囉, 又比人騷擾, 咁又點先?!

真係好鬼討厭. 希望唔好有事發生啦.

沖繩大胆自駕遊 ~ DAY 1

April 3, 2012 (Tuesday)

我哋搭11點幾飛機直抵沖繩那霸機場.

飛機餐有豆腐花, 真搞鬼. 櫻花味冷麵亦有點特別.

經一眾好友提醒, 我星期日晚就online check-in, 霸番個前位 ~ 第9行, 免得過關有排等.

的確, 我哋好快就過好關, 攞埋行李.

不過, 因為我哋租車, 仲要係租好多人租的OTS, 同機都有啲人都係租OTS, 所以要等埋一齊先走得, 所以都响機場呆了一會. 沖繩每天得好少國際機抵達, 所以International Terminal果邊, 真係好細, 只有一間小店. 而呢間小店, 亦將會係最後衝刺買手信的小店, 因為走的時候, 入了閘, 就只有兩間賣酒的duty free....晒鬼氣. 同响東京機場果條血路, 係天同地囉.

 

International Terminal, 咪就係咁大囉!

 

已經見到好多shisa了, 連欄路的, 都是shisa, 可愛哩!!

 

 

OTS店, 好快好易就比到錢, 攞車, 裡邊好多工作人員都識國語. 勁!

 

 

呢架就係我哋架車, NISSEN的, 幾寬落. 出發.

 

第一站美國村. 有摩天輪做landmark, 一見到佢就知道到咗. 呢個美國村其實唔咪好似美國. 我估係因為佢好近美軍基地, 有好多美軍聚集, 又有啲有美國色彩的店鋪, 所以先叫美國村.

 

沖繩第一餐的晚餐! 一般啦! 無咩特別comments

 

 

我哋唔知頭唔知路, 泊了架車去一間專買家品園藝的鋪頭的停車場, 限定8pm要走. 怎知, 我唔記得較錶, 成日覺得仲有時間. 到如夢初醒時, 已經7:55pm, 即棄餐攞車. 其實都真係時候要走, 因為我哋10pm要去到北邊名護的resort check in. 車程都要1.5小時, 仲要搵路呢, 所以就即刻飛車北上. 飛車呢家嘢, 當然係由我嚟做啦. 80km的highway, 我長時間開90km....

差不多到的時候, 就被GPS耍了一下, 點了我哋入民居, 拿拿聲掉頭, 再去便利店問人. 好彩, 趕得切, 9:50pm, 佢一見我就去, 就叫得出我個名, 可想而知佢真係等咗我好耐. 跟住佢就收工了.

第一間我哋住一間叫Banian Resort. 佢既特色係, 每一間房, 其實都係一架旅行車. 歐美好流行, 啲人揸住架入面咩都有的旅行車去旅行的.

 

 

Resort的外面, 就要第二天先有.

 

呢一晚, 係最凍既一晚, 我一入去, 見有個heater, 即刻開. 我同老公的房, 但少了張厚毯, 全晚凍到瞓唔到. 好慘.

人生第一幅油畫

我人生第一幅油畫終於完成了!

南乳炸雞雞

去旅行前, 同老公, 同埋媽媽去了花園街街巿裡面的熟食檔, 食了一味南乳炸雞球, 之後老公一直念念不忘, 旅行前中後都不斷話要食, 但又無咩意慾出去旺角.

擒日响度諗"今晚食乜餸"時, 就諗起南乳炸雞, 不如自己整啦! 跟住就上網. 結果又成功喎! 老公比咗95分個. 是我第一次的炸物, 有咁既分數, 開心

我响街巿的凍肉鋪買了三塊起咗骨的雞脾肉 ($29.5) 買了一磚南乳 ($5)

回家先洗淨, 切好一舊舊, 我先落咗啲調味雞汁醃咗一陣, 跟住就成磚南乳放入去狂撈, 再落糖. 醃20-30mins

跟住就 yam 粉, 預備炸. 大約滾油炸5-8mins啦, 視乎你切得幾大舊.

最後我用咗半樽油, 分了兩次炸. 好浪費. 所以我昨天亦買了個油壺 ($20), 將啲炸完雞的熟油裝番起, 留番之後炒菜用. 應該都有排用了! 後來同媽媽講, 佢教我下次用半煎炸方式, 就唔駛用咁多油, 亦有炸脆效果.

同場亦蒸了條倉魚 ($30), 清炒了生菜 ($8). 是日晚餐$92.5, 仲夠我今日帶飯. 啲雞都仲剩幾件. 我亦留咗幾件未 yam 粉, 想今晚試下用光波爐, 睇下好唔好味. 如果都ok, 下次就唔駛炸. 點講, 炸嘢都係唔健康, 太油了.

我平安回來了!

大家好呀! 我無穿無爛地返咗嚟, 架車都無穿無爛無花地還咗! 哈哈!!!

 

估唔到我既技術比我想像中好, 反而老公就提供了幾次驚喜場面!

 

又或者沖繩的交通真的很好, 很少左穿右插的車, 所以一路上, 其實都幾好揸. 幾次的山路, 都係我揸, 轉來轉去, 又上又落, 實在太過癮了! 有點愛上揸車!

 

GPS 我對佢又愛又狠.

愛, 係因為如果無咗佢, 我哋係無可能去到我哋想去既地方, 因為日本提供的地圖....我全部都想撕爛佢!

 

狠, 係因為佢只係識哋大地方, 我住的兩間酒店/民宿, 可能因為細, 兩次都比佢老點. 第一次點咗我哋早兩條街就轉咗入去, 去咗民居. 第二次, 直頭搵唔到. 落車問咗無數咁多人, 搞咗一個鐘先搵到間嘢, 差少少又過時, CHECK唔到IN. 又不過, 因為迷路, 我哋真係發覺日本人係勁HELPFUL! 有一個嬸嬸, 佢幫我哋打電話問. 有一個叔叔, 比埋佢張地圖我哋. 又兩個姐姐, 諗住帶我哋去, 有一個哥哥, 佢又畫又Print 地圖比我哋, 幾驚佢連手上的ipad都比埋我哋!

 

不過最後係想講比就要去沖繩既朋友知, 果邊天氣好凍, 絕對唔咪大家想像的陽光海灘, 起碼4月一定唔咪, 我哋兩男兩女共四人, 全程穿外套, 兩女仲係全程頸巾掛頸. 頭兩晚在北面, 直頭要開暖氣. 我原本以為可以游下水睇魚, 最後我連腳都無掂過咸水囉! 我相信要去沖繩遊水, 6-9月會好一點.

明天出發去沖繩 ~ 沖呀沖!!

明天便出發去呢個plan咗幾個月的沖繩自駕遊.

先講番個故仔, 呢個自駕遊係由我老公既一pair朋友撩起的. 重點是, 佢哋兩個係無車牌, 只得我同老公有車牌. 我個車牌是响美國考回來的, 返來香港6年, 只揸過兩次咁大把. 而我老公, 個牌有咗就十年, 最近揸果次係08年去北海渡, 揸咗5分鐘. 咁既然無牌的都咁夠胆撩我哋自駕遊, 無理由我哋唔去架嘛. 就係咁...呢個行程就定下來了.

擒晚, 有個好好既朋友借咗架車 (仲要係BENZ) 比我哋練習, 因為太耐無揸車, 想攞番個感覺. 而我亦係第一次感受我老公既揸車技術. um...... 我希望擒晚佢只係緊張, 同埋因為車主既路線指示唔清淅, 希望佢去到會好少少. 如果唔, 看來成個trip我都要做柴可夫了!

擒晚揸完, 我都覺得我可以應付既.

預告一下行程先:

一落機, 我哋就會北上, 途經美國村, 逛一逛, 便繼續北上去我哋既旅行車酒店.

第二天將會係重點遊全球數一數二大的沖繩美之海水族館

第三天將會去菠蘿園, 苦瓜園, 一路沿風光秀麗的58號公路南下, 途經萬座毛. 如果天氣許可, 我希望可以落水

第四天會去沖澠世界文化王國, 琉璃主題園, 首里城公園, 順便掃墓 <玉陵>, 之後狂逛國際通

第五天會去一早牧志公設巿場食魚生做早餐, 跟住去舊海軍司令部壕, 日本國定公園, 都係掃墓. 晚上還車, 再逛國際通, 或者商場

第六天依然都係國際通最後沖廁. 15:20就飛回香港LUUUU

剩番一天公眾假期, 好好休息!

好啦! 希望呢一篇唔咪我最後一篇blog, 希望我仲可以回來同大家傾計! XDDDDDD