同媽媽&奶奶返大陸

新婚兩個月, 我同老公就向高難度挑戰 ~~ 同媽媽 & 奶奶返大陸!!

我媽同我奶奶係好唔同的人, 一個係超敏感型, 一個係冷淡兼百彈教主, 我同老公一路都好疑惑佢哋放唔放得埋一齊. 如果放得埋一齊就好了, 兩位同仔女相依為命多年的媽媽, 可以有個伴, 真係好幾好架.

趁聖誕, 我就多咀向老公提議跟奶奶返雅居樂, 亦叫埋我阿媽, 咁兩個阿媽都唔駛話要過一個lonly christmas啦!

25號一朝早出發! 可憐我係疴住咁上去. 但係去大陸, 除了瞓, 就梗係食啦! 所以都唔理得咁多, 照食, 所以亦係照疴! 好彩我都唔算疴得嚴重, 要攬住個廁所去.

聖誕夜精句: 話說臨瞓前又去疴多次, 疴完無晒廁紙. 我同老公講啦! 佢就响房度搵廁紙, 怎知無喎! 因為我哋瞓三樓間房, 佢唔想落去, 佢同我講:"你可唔可以唔疴呀?" (灰爆)

26號早上感覺ok, 早餐去了一間茶餐廳食了個粥同炒麵, 但食完行了一陣, 又疴. 不過疴了都好, 因為跟住要去搭一個鐘車去石岐. 去到石岐行了條步行街就去一間石岐老食乳鴿. 係奶奶強力推介, 基本上佢哋上親去都會去呢間嘢度食. 但我覺得一般. 食到碟炒飯就出事, 好油, 最後兩口, 我含了响個口好耐都唔想吞, 好似啲BB咁.

跟住就開始唔舒服. 回程果程chok車就攞了我命, 一落車, 我就變了chok樣, 但又未嘔得出. 我奶奶竟然即刻又捉我上另一架車, 又繼續chok, 結果跟住我一落車就嘔番隻乳鴿出來. 我廿幾年無嘔過. 真係多謝佢!! 我由細到大都好怕嘔, 亦好少嘔. 所以可以搞到我嘔, 都真係幾堅! 最慘...因為我落車後, 架車就開走, 車我老公去書店, 所以我嘔的時候, 我老公係唔响我旁邊, 唔開心. 呢一嘔亦搞到我眼肚, 眼邊爆了微絲血管, 現在好多紅點, 呢個係我好怕嘔的原因.

呢晚, 我無食dinner, 因為個胃好頂, 無胃口, 就係見到嘢食就想嘔. 怎知, 奶奶成餐飯就係咁用個慘樣望住我, 係咁問我 "你食唔食少少呀?", "你真係唔食呀?" "不如食啲啦?" "買啲麵包比你今晚食好無呀?" 救命...佢明唔明啫?

哼...跟住食飽飯返去, 輪到奶奶自己有事, 到佢疴嘔一齊嚟! 都唔知發生咩事! 我唔舒服, 無理佢, 沖完涼就去瞓.

27號, 我一起身, 精神爽利! 個肚無再攪, 就走落去同媽媽睇碟. 奶奶就死吓死吓咁行來行去, 話執嘢. 叫佢瞓下, 又話瞓唔到, 攤下都好嘛, 比佢激死. 跟住佢疴下嘔下又去瞓下.

跟住就去食個午餐, 我個胃口番, 咩都覺得好食. 奶奶就食了兩啖白粥, 就食唔落. 然後老公陪奶奶返去, 我同媽媽去行超級巿場. 跟住返去執好嘢便離開雅居樂. 因為怕回程大塞車, 所以上車前去食碗麵, 5:30開車. 9:30回到太子. 都無想像中咁塞車啫. 回到香港, 奶奶又無事了!

就咁樣, 三日假期便過去了. 媽媽同奶奶...看似都相處到. 都叫坐得埋一齊, 無試過有啲咩意見不合. 我估, 大家第一次咁相處, 點都會客氣一點既! 但我老公在返屋企的地鐵上就全程係到勞勞嘈嘈, 話好辛苦, 要照顧兩個病人(其實佢邊有照顧過我), 跟住又話我媽煩, 百彈教主, 咩都要彈, 咩都講一餐. 哈哈...女婿仔...比心機學吓點同我媽相處啦!!

低能父母 > 白痴兒女

今日在facebook看睇朋友轉載了以下的一片"心聲", 亦是我的心聲.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
by Alan Li
很少這麼動氣，動氣得要寫點東西來「小」人。
那麼，我只好先君子，後小人了：
如以下言論得罪了閣下、閣下的子女親朋或遠親近鄰，小弟在此先行致歉；但實在，有些事情不吐不快。

相信大家這幾天已經看了很多關於歐洲大風雪令港人滯留當地機場的新聞，現在聽說會勞師動眾什麼包機去「湊」他們回港過聖誕。我明白那些滯留港人，當然各有各自的重要原因，非要回來香港不可，但，天意如此，全個歐洲風雪漫天，任憑你的原因再大，也大不過客觀環境所帶來的限制，這一點，相信 (也希望) 大家明白及同意。

然而，最讓我看不過眼的，是那些在新聞報導中表現得「理直氣壯」的留學生 (及其家長)。

1. 如上面所說，當閣下看到天氣惡劣風大雪大，請問作為年齡近乎於成年人的留學生們，是否應該用用腦筋，啟動你的 common sense 去思考一下：「天氣這麼壞，應該回不了香港了。」並一早打定輸數：「全歐洲的乘客都逃不過這個滯留的宿命，我也應該一樣要在這邊等了。」

這個 common sense，簡直 common 得像大家小時候沒讀書就進場考試，自知定必大敗而回；也 common 像你年三十晚去行花市，未進去你也會知道裡面是人山人海。作為「留學生」的各位，這點腦筋也沒有嗎？為什麼有人天真得覺得自己會一定是得到優待的幸運兒？

2. 我看到有留學生直斥航空公司安排不當、毫無兩手準備云云，讓他們在彼岸徬徨無助，只得到職員一句「對不起我們沒法幫忙」的回應。我想問：為什麼你覺得航空公司在那個情況下，必先第一個幫你；更基本的問題是：又為什麼你會覺得，航空公司在那個情況下，真的可以有點什麼作為。難道國泰是故意叫風雪別停，有心讓你多滯幾小時？同時，難得航空公司職員出名友善溫和，於是大家就本著欺善怕惡的精神來找他們出氣吧？為什麼沒有走去投訴英女皇她不擺駕到跑道上幫你剷雪讓你回家？

3. 留學生你們也太沒有應變的能力吧？以後別跟人說香港人出名「適應力強、反應快、flexible」。連這丁點的應變能力都欠奉的話，以後回來香港打工，各位一定「死得好快」。(幸而我職位低微，否則最好以後別給我機會去 interview 他們，我定必會歧視這群留學生)。雖然事出突然，但，大家能否就好好接受這個事實然後想想辦法？情況擾攘了兩三天，留學生們就給他待個兩三天，希望可以得到自己想要的結果。好了，如果這風雪一下就是三年，敢問大家是否三年內就寸步不離機場，三年內就讓自己的生活完全暫停？別跟我說你沒錢，我相信學生們的家長身在香港，定必會以光速匯款給愛兒愛女。ok，也別跟我說你沒有富爸爸富媽媽，難道你自己就沒有在城市讓自己繼續生存的能力嗎？各位是大學生了吧？各位並不是還在坐校車的小學生，不是「下下都要人湊」的。

當你「長大後」望回頭，看到這段滯留異地的往事，你又會如何向人提起呢？你的版本會是「那次我在機場睡了兩晚，原來真的很難捱，後來我還是面對現實，找了個地方落腳，再遊歷幾天讓天氣好一點，最後安然回港了。」還是：「那次在希斯羅機場，那個國泰空姐編號 12345 的，給我投訴得體無原膚流淚披面，他們才以八人大轎送我上頭等機位讓我優先返港。」同學們，這樣很威嗎？

4. 有人說包機。好，現在什麼差事了？動輒就說包機？留學生們在那邊變難民了嗎？再說，香港特區政府的包機，是否有特別通道，不需要經過任何一片歐洲的天空、它飛的航道是特別好天的？還是包機的機身採用小叮噹的隨意門，讓你安穩地避開風雪直接抵港？大吉利是地說，萬一，真的大吉利是，包機遇上什麼風雪氣流天災人禍，有什麼冬瓜豆腐三長兩短，相信各位就會立即變臉改口：「香港政府評估風險能力不足！」Right? 唉。
老實說，我置身事外，沒切膚之痛，當然說得「口響」。但，我更加希望沒有在鏡頭前大吵大鬧的其他留學生們，會以一個成熟、正面的態度去處理事情、面對突變。要長大的，除了我們的下一代，還有他們的上一代。

各位覺得中聽的，歡迎讚好或分享。覺得不中聽的，歡迎留言回應。
真理愈辯愈明，不過，朋友們，correct me if i'm wrong。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

呢件事其實亦令我諗起早幾個月前, 冰島火山爆發令到歐洲多個機場關閉. 剛巧我老闆定了在那期間要到法國作一點私人事. 以我所知, 當地有一個賽車比賽, 另外他好像要出席一個不知是婚禮定喪禮之類的事情. 那次, 歐洲各機場就好似今次咁, 好多航班取消, 即使機場有開的國家, 所有機位亦都被人book了, 人家一早已經响機場等位, 幾時輪到你响家中等位的人. 但係我老闆同佢老婆, 係咁叫我幫佢搵方法, 令到佢可以去到法國, 即使要轉火車, 轉巴士, 都一定要去到. 我心諗, 佢明唔明點解啲機場要關閉, 點解啲飛機飛唔到? 係因為安全理由囉! 就算佢有錢, 有架私人飛機, 都唔會去到. 但佢就好似唔明咁, 係都要叫我幫佢想辦法. 我果次真係比佢激到我想死. 佢老婆仲係咁打來問我情況, 救命, 其實佢哋個trip係私人, 我係無責任幫佢做, 佢仲要咁煩我, 真係好討厭囉!

有時候啲人太自我中心, 每一件事都只係想自己, 只係站在自己那點去看, 卻沒有去從別人的角度去看. 佢哋唔怕危險, 唔怕死啫, 做咩要啲機組人員陪你哋去死啫? 天空上的意外不多, 但有起事來, 十居其九都會全機覆沒. 有什麼比自己的生命緊要? 過少一次節, 返少一次香港會死嗎? 學校咁多同學, 總無理由全部都要飛返屋企, 總會有些local同學仔吧! 去同學仔家借宿一星期或一個假期, 以我認識的外國人, 通常都會好願意welcome啲同學仔. 以前的年代, 留學生並不是每年也可以返香港與家人團聚, 多數的留學生都會利用假期去賺學費. 現在的學生實在太太太幸福了. 返少一年香港好似個天會掉下來咁. 比著我, 我就乘機唔返香港, 留响果邊狂滑雪了. hahaha.

希望香港的下一代, 真係會醒醒, 知道點樣去做人. 更希望啲父母亦都醒醒, 知道點樣去教兒女.

潛水的人事部

今次應該係第一次寫公司的事, 因為實在太激氣.

今日冬至, 現在1:00pm, 放飯時間, 到現在HR都仲係唔announce今日幾點放.

今朝已經有兩個同事問我究竟今日幾點放, 我話唔知, 問HR.

之後就懶好心咁打去問個HR Director啦! 問佢係咪一陣會send 個announcement出來, 等啲同事知道幾時放.

佢竟然話唔會! 咁我話啲同事點知幾時放. 佢又竟然叫我通知 (因為我兩年前有做少少HR的工作, 所以果時係我send).

我: 你哋無正式通知過我幾點放喎!

HR: 擒日响你個位隔離同你老闆講嘢時, 咪講了比你知囉.

我: 咁都算係通知咗我.

HR: 係架! (頂佢個肺)

我: 咁你即係唔會send announcement?

HR: 你唔覺我哋公司啲商層唔鍾意HR send official announcement咩?

我: 唔覺, 我只係覺得依家個HR 潛咗水.

我: 咁我私底下同同事講幾點走囉.

HR: 唔好, 我哋都要通知番其他regional office的同事, HK office幾點收架嘛, 咁佢哋就知要响幾點前要搵我哋.

我: 咁邊個通知?

HR: 你囉! 因為佢哋話以前係你sent開.

我: 我以前send係因為我仲係掂到HR, 同埋我只係sent比我自己個group (公司七月, 兩個HK office 合併了), 況且現在merged了, 我又唔咪好再掂admin的工作, 都無理由係我send架嘛!

我 (心諗): 我頂你, 咁即係要我出啦!

HR: 咁你send開嘛. 你出又得, joey (另一邊的admin, 現在主要係佢做admin)出又得.

我: 咁你想點出呀? announcement又唔得, 咁係咪好似啲holiday announcement咁, 當係通知其他region我哋放早, 從而等HK office的同事知道早放.

HR: 大概係咁

我: 但係無人正式通知我幾點放喎. 我唔會出.

(心諗: 一陣啲老闆話我做咩release啲同事, 我咪死)

HR: 咁你係咪要我send個email比你, 通知你幾點放, 你先安心.

我: 係.

HR: 咁我一陣比你啦, 做嘢最緊要係安心啫! (超 ~~ 呢啲咩說話嚟架)

我: 好, 唔該.

有咩理由呢啲嘢唔咪HR send架. 就算你要admin出, 你都要比admin知道你哋啲老闆的決定啫. 況且, 我哋公司其實係無admin department, 只不過係兩個秘書仔 + receptionist 做埋, 我哋呢啲做細既, 點知你哋老闆開會決定啲咩? 企响我個位隔離同我老闆講嘢就當通知我, 痴線架!

總之, 我死都唔出. 大家一齊無早放算了. 橫樹我又唔駛做節. 真係...妖.....

一個令我又怕, 又厭惡的問題

自從結婚的第一天開始, 便開始聽到呢個問題, 或者呢一句說話:

"幾時生仔呀?"

"下個到你啦!" ~ 見到剛生完 或 陀緊仔的媽媽

"幾時入我哋呢個大家庭啊?" ~ 在教會經過BB房的時候

"唓, 你依家都係講下啫, 第日你咪又生!" ~ 當我話我唔打算生的時候

"係呀, BB好得意架! 你咁鍾意同我個仔玩, 不如自己生個玩啦!" ~~ 當我玩緊人哋個仔的時候

"......." ~ 等等等等好多類似的問題.

今日公司有個同事放完產假回來, 我同佢寒暄了兩句, 怎知旁邊有個路人甲就加把口話"下個到你了."

邊位啊! 我閘住你啊! 唔知頭唔知路就唔好答咀啦! 依家你係先知咩?! 無啦啦做咩咁咒我啫! 我有排真係有諗過為了杜絕呢個問題再响我耳邊出現, 不如响facebook打句"多謝大家關心, 但醫生話我唔生得, 希望大家唔好問我生唔生!" (哈...自己咒自己就得).

其實我明白大家都係出於善意, 之但係呢個問題真係令我莫名的厭惡啊! 大家一班朋友仔傾開生仔, 問我一句生唔生, fine, 我會答你"我唔打算生", 然後亦會講埋個原因你知. 但真係希望啲朋友仔亦識趣啲, 唔好加多句 "唓, 你依家都係講下啫, 第日你咪又生. 阿邊個邊個果時咪又係話唔生, 依家生了兩個添啦!" 又要問, 講了你又唔信, 仲要好似先知咁批死我一定要同人一樣, 做咩啫! 我唔可以有自己意見咩? 尊重下我的思想可以嗎? 呢個世界大把嘢講, 淨係講奶奶都可以講幾餐飯啦, 真係唔需要成日"啫"住要我生仔囉, 亦真係唔需要成鬼日講生仔囉! 哎吔, 真係好煩! 尤其是公司果啲路人甲, 好熟咩! 唔講嘢, 其實都ok架! 我見到你係度, 你唔需要講呢句無謂說話去引我注意的, 我對你其實無興趣.

我甚至同好close的朋友講, 第日我真係無啦啦有咗, 你哋千萬唔好我揶揄或單打我, 講果啲"唓...都話你一定會生架啦! 果時又死口話唔生, 依家咪又係生..."的說話, 我一定會發癲, 仲會搞到一屍兩命, 因為呢個好明顯係一個意外, 我已經會好唔開心同好煩, 仲要係咁聽到呢啲說話, 我真係一定會發癲, 會做啲好痴線既事出嚟.

發洩完畢!

又宴客

哈...我呢個blog, 好快會變了做全關於入廚的事情了!

今天再宴客, 仲要係海鮮餐! 連同我, 共有八隻白老鼠. 因為這真是我第一次煮海鮮餐.

先看看菜單:

1. 白勺蝦

2. 蒜蓉豆豉炒聖子

3. 蒜蓉粉絲蒸帶子

4. 薑蔥炒蟹

5. 清蒸石班

6. 青炒菜心

7. 蒸冬菇

8. 手拍青瓜

9. 炒三絲 ( 木耳,蘿蔔,西芹)

 

 

 

 

老公放工後便入西貢買海鮮, 而基本上所有海鮮都係由他負責清洗. 算佢啦! 不過, 因為呢一班是他的好朋友, 係好好朋友果隻. 根據資料, 佢哋都相識十年以上, 而在他生活最底沉的時候(對上一次失戀), 是這一班朋友陪他渡過. 所以佢係好願意豪給這班朋友!!

至於我自己...只係負責預備那些蒜蓉豆豉蔥段等等的工程, 同埋最後的部份 ~~ 煮!!

一邊看著從網上找來的食譜, 一邊有點求其同是旦地跟著煮, 估不到出來是好評如潮喎! 基本上除了個青炒菜心係失手了(因為放低咗唔記得, 結果太"林")之外, 其餘也極度成功. 超初我還以為會食唔晒, 最後係碟碟清!! 看到每一碟都沒剩, 真係好開心, 這是每一個廚師都想見到的.

 

 

影得唔咪太靚. 因為大家都好肚餓了, 所以是但攝了一張, 條魚同菜都未出場.

最後給自己每味的評語 (10分為滿分):

1. 白勺蝦 ~~ (10分) 因為啲蝦好新鮮, 白勺...都應該好難會煮得唔好味

2. 蒜蓉豆豉炒聖子 ~~ (9分)好得, 只是豆豉少咗啲

3. 蒜蓉粉絲蒸帶子 ~~ (9分)好得, 只是粉絲乾咗少少

4. 薑蔥炒蟹 ~~ (9.5分) 好得, 蟹很新鮮. 下次用番個大少少的鑊炒, 會好啲

5. 清蒸石班 ~~ (10分) 超得, 魚很新鮮, 蒸得剛剛好. 如果有個大啲的鑊, 會蒸得無咁"論盡"

6. 青炒菜心 ~~ (5分) 失手了. 真係完全無咗件事. hahaa

7. 蒸冬菇 ~~ (10分) 好鮮味

8. 手拍青瓜 ~~ (10分) 好夠味

9. 炒三絲 ( 木耳,蘿蔔,西芹) ~~ 這一味由媽媽提供 當然係10分啦!!

 

 

 

 

當然又要睇下個戰場啦!! 呢個戰場, 老公花了一個半小時去處理 (記著, 他是有中度潔癖的), 他的朋友都在問他是不是過年大掃除要洗乾淨整個廚房! anyways, 唔駛我洗就得了!!

 

新婚生活 ~ 街巿交學費

以前好怕好街巿, 一來人多, 二來污糟. 而最怕就是落街巿幫阿媽買餸, 因為次次買完都會比佢鬧, 話我買啲嘢唔靚, 又唔平. 現在真的要買餸, 就乖乖地交學費吧!

有一回, 老公話要食鮫魚. 我就好傻咁站在條鮫魚前問老闆娘有無鮫魚, 咁人哋梗係知我係一條水魚啦! 我仲話要六塊, 佢仲唔有咁厚切咁厚咩, 最後我買了五大塊魚扒, 多謝$75. 回到家, 越諗越笨, 又見咁鬼多, 實食唔晒, 便收起兩片. 好彩真係收起兩片, 我哋煮了三片只食到兩片. 不過老公話, 其實老闆娘都無當我係水魚, 因為果幾片鮫魚真係靚, 同埋只因為佢切得厚, 所以好似貴啫. 呢一回, 上了好好一課, 下次知道點買鮫魚.

今回, 去街巿買紅辣椒, 其實我只係要好少好少, 一兩隻. 行了幾間, 都係見到成盒賣, 心諗係咪真係要成盒, 用唔晒好浪費. 行到最後一間, 佢有一"里", 我便執了四小隻, 阿姐見我好似想比錢, 我就攤開手show果4隻椒佢睇, 問佢係咪可以咁, 佢話梗係唔得啦! 然後放多一隻大落我隻手度, 跟住話, 咁樣一蚊啦! 最低消費. 哈哈...原來辣椒係咁買的. 又學多一樣!!

 

 

 

 

今日食:

蒜蓉炒豆苗 ~ 咸咗少少少少, 原本打算落雞粉代替salt, 但落完salt先記得個plan

沙茶牛肉炒青瓜 ~ 好得, 好香好好味! 係啲牛肉硬了少少. 可以改善

試驗版手拍青瓜 ~ 都ok. 可以再落少啲醋, 應該會更好

 

 

 

 

繼續交學費啦!!!!

朱頂蘭 Amaryllis

大約上年年中, 老公的教會搬了去石硤尾, 而我教會在旺角, 我哋好多時的集合地點會係花墟, 果時開始成日睇花, 又咁啱要結婚睇花球, 就更加留意花. 果時發現了一隻花, 叫朱頂蘭, 好得意. 佢係一條好長好長好粗好粗的花徑(我叫佢做管)生出來, 再在頂部分三至四朵花出來. 我形容它好似電線, 一條有管, 裡面有三條細線咁. 佢個花形都好靚, 好大朵, 好燦爛. 我見過大三種色, 白色, 粉紅同大紅(有少少瘀紅).

原本都揀了一個花球係有朱頂蘭, 但被教會阿姨否決了, 因為唔啱季節, 同埋佢需要keep住有水上. 無辦法!

12月5日, 又去花墟, 因為唔駛返奶奶家食飯, 所以買花後便立即返屋企, 唔駛帶住棵花遊香港, 遊到佢變殘花敗柳. 一心便諗住要買朱頂蘭. 由街尾街上, 都見不到, 直至去到街頭的繽紛先有啊!

最後買了粉紅, 其實想買大紅架! 不過見啲芯好似唔咪咁靚.

 

 

哈哈...影得有少少暗, 懶開燈

不過好開心, 四個芯都開晒, 仲開得勁燦爛. $50一棵, 都可以放到一個半星期. 最後我今朝掉了. 其實都貴架, 因為一扎12朵玫瑰都係30幾40蚊. 不過我真係好想試下朱頂蘭囉.

今日仲查埋佢個英文名, 叫Amaryllis! 其實佢都唔算係好特別的花, 有時候馬路邊, 都見政府有種呢隻花架!

 

 

終於掛起了啲油畫

三催四請下,老公終於肯掛起幅油畫了. 其實呢個動作, 我都可以做, 但我覺得要用hammer的工作, 係應該男人做, 所以點都要等佢做. 阿姨都教我, 即使所有嘢你都識做, 但有啲係男人做的, 都一定要等佢哋做, 等佢哋有個責任, 如果唔, 以後就咩都會係你做. 粒釘其實都拎咗返來好耐(其實叫佢買釘都叫咗好耐), 但佢總係遲遲唔肯做. 前晚, 我又問佢幾時肯掛, 佢竟然話無鎚仔. 我同佢講, 如果我搵到個鎚仔, 我就揼你腳指

 

跟住就死死地去掛畫

失而復得的感覺係最開心!!

2011的渣打馬拉松, 於9月30日開始報名, 當時我正進入大婚倒數10天階段, 聽完就算.

結好了婚, 突然醒起仲未報名, 在10月13日出發往馬爾代夫的早上, 打電話給我的伴娘, 請她幫我報.

當日到達吉隆坡的時候, 收到她的msg, 所有組別滿額...噢...我又miss了. 又要等多一年.

今天放工, 無啦啦聽收音機, 聽新聞. 渣馬大會整理報名資料後, 發現有3000多份重複的報名. 於是即日重開報名, 滿額即止. 跟著便急不及待用電話上網, 在巴士上進行報名.

yeah!!!!!! 半馬...我來啦!!!

現在最重要的是加緊練習. 其實我連十公里都未跑過, 便去跑半馬, 都真是一個極冒險的行動. 不過跑開步的哥哥, 他說因為我平時都有跑, 應該可以跑半碼. 其實婚前我每星期都會跑兩至三次, 每次大約一小時. 婚後少了. 昨天又再開始跑步, 感覺有點力不從心, 好像負重多了, 跑不動. 今天再跑, 依然有這感覺. 看來真的要加緊努力, 希望每星期都可以跑到三次, 而其中一次要跑長些!!

目標: 我要完成半馬!!

煮給奶奶的第一餐飯

我媽媽成日埋怨話咁耐都無食過我阿嫂煮的一餐飯(佢哋結咗婚三年), 又成日話, 我阿婆兩個新抱, 都無煮過飯比我阿婆食, 佢哋兩母女同一命運, 無新抱飯食. 我估, 啲奶奶都係想食新抱煮的飯. 煮飯, 對我來說都唔算係高難度動作, 呢一餐我都知走唔甩, 只係遲早的問題. 今個月係奶奶生日, 佢已經約好了兒女孫兒12號出去食飯, 怎料原來7號正日佢都expect有人要陪佢. 第一年做人新抱, 便扮吓乖offer話煮比佢食啦!

擒日専登放半日假去買餸同預備

 

 

 

是日5餸一湯:

1)紅蘿蔔粟米豬展湯

2)豉汁蒸倉魚

3)炸菜豬柳大豆牙

4)欖菜肉碎炒豆角

5)蒜蓉菜心

6)外賣水晶雞

2:30買好餸回家, 第一回合係將啲肉調好味, 同埋煲落個湯

5:00 第二回合, 洗菜同切好啲豆豆, 再切好啲蒜頭豆豉用來蒸倉魚(呢個回合,請教了高人~阿媽)

6:00 第三回合, 炒定啲肉粒同肉片備用, 煲飯

7:00 第四回合, 開鑊

 

 

 

個湯好甜, 好正!! 其間同個朋友msn研究煲湯,佢話煲老火湯最緊要係個湯面keep住滾起, 咁啲材料啲味先會出, 唔可以細火到只係中間間中有一個泡泡, 係要成個湯面都有泡泡. 仲有, 煲好了的湯係唔可以透明, 透明就無味.

哈哈...我煲湯唔咪透明架!! yay!!

 

 

 

完成!!

最後 菜心:食晒/雞:食剩5小舊/魚: 食晒/芽菜:食剩2啖/豆豆: 食剩2匙/湯: 飲剩1碗
以呢個食剩程度, 餐飯應該幾得

跟住仲有甜品添! 係雪糕

然後就到老公表演的時候 ~~ 洗碗

 

 

 

都唔咪好混亂啫! 我煮飯興一邊煮一邊抹又一邊洗,所以個戰場唔會真係太恐怖架咋!
不過老公都搞咗成個鐘. 因為佢有中度潔癖, 會洗得好仔細. 但半日假同一個鐘, 佢有賺啦!!
老公同奶奶+兩個家姐都食得好開心(表面上), 咁我都安慰啲!
下次要煮番比自己媽媽食.

冬至大疑惑

擒晚去奶奶家食飯, 佢約緊12月19日做節~ 冬至! ok, 無問題, 一向都知道她們家係不會做正日, 因為要就啲孫仔, 所以會响正日前的星期日. 怎知, 佢講完加多句叫我正日唔好返娘家食飯.

我: 吓!

奶奶: 係呀, 我冬至正日都唔會比我啲女返嚟.

我: 只係結婚第一年定係以後(超迷惘中)

奶奶: 以後

我即刻面黑, 望住老公, 便無再回應.

 又係咩鄉下, 咩理由呀? ok, 你話如果兩家都要做正日, 撞期, 我知我嫁咗就一定要回夫家做節, 但怎麼你哋唔咪做正日, 但連正日都唔比我返娘家. 我娘家, 其實好少真係响自己屋企做, 因為得幾條友, 所以呢幾年都會去外婆度做, 同埋啲阿姨舅父一齊, 而外婆就鍾意做正日. 又因為人多, 所以約期都好難, 現在只我一個外嫁女就已經有兩日唔得, 星期日黃金日又霸咗, 連正日都唔比人返, 我條氣真係唔順囉! 係咪嫁咗人就要同娘家的人斷關係呀?

我真係從來未聽過有呢樣嘢.

 我哋走咗後, 我就同我老公講, 依依哦哦, 最後我話我條氣好唔順, 我第一次聽呢啲嘢, 我要時間消化, 我現在唔開心. 怎知, 佢竟然向我發炮, 話我唔順服. 跟住我仲嬲, 我已經唔開心啦, 佢仲要話人, 講到好似依家係我錯咁, 仲玩嘢到話即刻打比奶奶. 我咪鬧佢, 你依家係咪搞事破壞關係呀! 真係好嬲, 咪唔睬佢囉!

 後來我想到一個計劃, 好, 你唔比我返娘家, 我唔返, 但我會叫我媽同阿哥阿嫂嚟我家做節. 做節都係想一家人齊齊整整開開心心食飯啫, 邊度都無所度. 再唔咪, 你唔比我返, 我咪唔返, 但你都唔好旨意我會返你家屋陪你阿媽, 因為你哋屋企已經做了節, 我唔會再去. 我自己响屋企孤單一人都唔會去.

可惜

今日經過油麻地, 那張很大很大的羅浮宮海報依然响度, 內容係話佢哋尖沙咀新店開幕! 但實情是, 還有4天, 他們便會全線結業...

上年9月去他們尖沙咀新鋪, 又大又靚, 怎會想到一年後便要結業. 始終覺得很可惜. 可能因為我在那裡得到一流的服務, 也影得一輯十分滿意的結婚相! 我真的希望他們可以重整好盤數, 再開業!!

公司送結婚禮物

之前公司東莞的同事結婚, 生仔, 佢都會sent個msg來問我公司會唔會有禮物, 咁通常都會由我去預備.

 

到我結婚...我又實在問不出口公司會唔會有禮物比我, 心諗, 個個老闆都知我結婚啦! 係要比, 唔駛問都會比, 而且我實在覺得問公司攞禮物都幾核突, 最後都決定唔問, 都唔想貪呢啲嘢.

今天公司的另一個大內總管(秘書仔)無啦啦send個msn問我, 話公司有250美金比我, 問我想要咩coupon?! 嘩...我問佢係咩嚟, 原來就係公司送比我的結婚禮物. 250金美, 計番都有接近2000港紙喎! 爽呀!!! 婚都結咗成個月, 以為無, 亦都無再諗或expect啲咩, 現在有, 係會更加開心架!

剛剛一年公司業績唔錯, 有人工加之餘, 仲應該會有bonus(12月尾先confirm係咪真係有), 現在又有額外呢個禮物, 真係讓我婚後的短缺日子降下一點點甘露(11月因為要交8千幾蚊保險, 26號前的10天只有200多元用).

感恩感恩! 神真係有不缺的預備.

姊妹們: 伴娘真係好重要架!!!

星期六去了一個婚禮, 又係有教堂儀式, 所以好順理成章, 新娘的婚紗係有大拖尾. 因為我係詩班, 所以坐在台上的詩班席. 由開始到簽婚書的時候, 都無咩特別, 因為新娘好順咁就行入禮堂, 行到台前, 條拖尾都唔會出啲咩問題. 直到簽婚書的時候, 一對新人要行到台的左邊, 咁新娘條尾就當然要擺番上台, 可是我卻只見新郎一直在新娘的後面幫她擺番好條尾, 而沒有機會看著, 見証著新娘簽名的一刻. 我不禁在問隔離的姊妹, 伴娘去咗邊?

 

咁簽完婚書, 新娘要行番去台的正中間, 準備揭頭紗同錫錫, 呢時候, 新娘的拖尾已在台上轉了一大個圈唔知去咗邊, 呢個時候, 我又見到新郎走落台幫新娘舖番好條尾. excuse me....伴娘又去咗邊呀? 我隔離個姊妹話: "咪企响下邊面呆企囉!" 因為我個位剛好比個講台檔住, 我側一側身, 果然見個伴娘响下面發呆喎! 後來仲見到個攝影師指個伴娘去幫手, 佢先如夢初醒走過去. 唔該晒...新郎都幫新娘舖好啦, 佢有無遲啲呀?!

雖然我無跟全程, 只係睇到教堂呢一幕, 但我都估計到佢係一個花"平" 伴娘囉!

再睇埋girl^的blog, 更覺一個好的伴娘真係好重要. 好的定義係知道自己果日係咩位置, 難聽啲可以話係新娘的妹仔, 工作低微到係要幫新娘著鞋, 好聽啲就係婚禮當日的大內總管. 伴娘基本上係要清楚熟讀整天的流程, 亦要貼身跟著新娘, 絕對唔咪比呢一日佢去扮靚同識男仔. 如果你個伴娘未到結婚果日已經同你講果日自己要點靚點靚, 完全無咩問過你有咩要幫手, 又完全好似唔知道自己果日要做咩, 要你brief佢九萬次都仲未好清楚自己的責任, 應該都有80%係花"平"伴娘, 可以轉人, 就轉咗佢吧! 免得自己痛苦.

我認, 我真係小氣架!!

話說我有一個舊同事, 都friend架! 佢走咗, 都一路有keep住contact, 雖然佢成日要飛, 但响msn都有傾計. 而我老公(當時的男友)求婚時, 都有搵佢幫了個小忙, 而佢對我的婚事一直都好雀躍, 仲話一定會到. 講咗咁多, 大家都估到最後佢無到啦! 原因: 因為要做嘢, 唔响香港. well...我當時的反應, 其實除了話唔緊要啦, 都無咩好講. 但個心真係唔高興架! 佢現在唔咪打工, 係做自己生意, 好多schedule都可以自己控制. 況且, 北京飛香港, 即日都得啦! 有心, 又點會嚟唔到呢?!

好嘞, 今個月尾到佢結婚, 我真係唔想去! 我認, 我真係好小氣! 作為朋友, 我結婚, 佢嚟唔到, 連一份小小既禮物都無, 我有個fd, 九月已經寄了份禮物比我; 我又有個fd, 專登由上海飛返來, 仲有份獻詩; 我又有個fd, 專登由美國飛返來; 我又有幾個fd, 咁啱路過香港, 都專登叫我請佢, 話一定要睇我嫁. 點解人哋得, 佢就唔得? 我真係唔開心, 真係唔想去佢個婚禮. 我認, 我真係好小氣架!

婚禮回顧 ~ 花

感恩地, 我的好姊妹的媽媽願意出山幫我整花球, 襟花同枱花. 佢原本已經唔再幫人做花球架嘞! 但原來因為係好多好多年前, 我同佢講過第日我結婚, 我會搵佢幫我做, 而佢為當年的承諾, 出山幫我做.

分數, 絕對係101分!!

冼auntie幫我做了三個花球, 兩個係我的, 一個係伴娘的, 仲有一盆枱花放reception, 兩個新郎襟花和一啲主禮人的襟花, 仲有伴郎的襟花.

 

 

 

呢個係出門著褂時的大紅玫瑰花球, 仲可以見到襯埋新郎的襟花.最特別花的枝部, 佢串了寸珠, 高貴咗!

所有的襟花佢都加了啲水晶, 閃啲靚啲特別啲!

 

 

 

 

粉紅色呢個仲靚, 佢亦向個花球圍了幾寸水晶鏈, 同埋用水晶串了條尾, 好靚, 好特別.

 

 

 

呢盆係放教堂同晚宴作佈置的枱花, 我勁鍾意. 我一向鍾意啲簡單(唔好有十幾種色的花), 但又特別(可能係古怪)的花. 冼auntie一向插教會的花, 都係簡單得來特別, 每次我一眼便會看得出係佢插的. 呢盆花, 下面好簡單一盆矮花, 但加了啲金色枝同吊了花水晶, 便高貴了百倍. 佢仲問得好清楚我係酒樓定酒店, 話酒店的話就要高貴啲, 所以幫我設計了呢盆有水晶的花. 可惜, 我無機會同個花影相. 好彩....攝影師唔覺意都影了兩三張.

 

 

 

主禮人的襟花, 蕙蘭!! 哈...我都係剛剛找相post, 才認真去睇.

伴娘的花...太細, 要再等下我snap shot friend啲相. 有就再post比大家睇.

唔記得講...冼auntie只係收我材料錢. total係$1600, 超值呀!!!!!!!

婚禮回顧 ~~ 即日攝影攝錄

上星期五終於攞到相, total三隻碟, 1500幾張相, 睇到嘔 尤其是係果啲張張一樣大合照.

早在上年10月已經在金都join了純美新娘, 原本想book alex, 不過比人booked了, 最後佢哋派雷強同埋阿光.

我比80分啦!

可能因為我睇過朋友2萬的package, 成隊crew咁去影, 不論即日剪片同之後睇番佢哋當日的相, 都令我念念不忘. 我個package, 只不過係6千蚊, 算吧啦! 蚊同牛比!

兩位攝影師都好準時到達, 其實由頭到尾都好落力係咁影, 不過就略為覺得佢哋唔夠主動. 佢無咩主動叫一對新人影雙人照(係咪其實係咁既呢?), 又唔好影好多場景~我覺得呢一婚禮當日的照片, 係比新人留回憶, 新人當日忙到氣都無得透, 有好多地方佢哋可能睇唔到, 例如我就無望過一眼教堂同酒店的reception, 但响佢的相裡面都無囉....結果...我到現在都未係十分知道呢兩個地方當日係咩樣囉!

其實join package果日, sell我的哥哥仔話教堂同晚宴中間的時間, 可以同我哋去影下相, 結果無囉...係因為我當日無提出? 定係咩呢? 個哥哥又話我知, 攝影師會做埋大x姐的角色, 斟茶的時候會講啲吉利好笑的說話, 講係有講, 但係個聲線係講比自己聽囉, 咁不如唔好講, 都無人聽到.

即日剪片...唔咪差, 但又唔可以話好好, 最奇怪係有一段係影教堂宣誓, 但無聲囉, 如果收音咁差, 揀出來係聽唔到, 就唔好放响即日剪片度播啦, 因為一眾來賓望住條片但無聲(仲要係幾長時間喎), 好無癮囉!

anyways, 比咩錢有咩貨, 我呢個6千蚊package, 包一天服務, 即日剪片, 成長片段, 仲送母帶, 10頁相簿, 2張15R相簿, 仲有一樣唔記得係咩...都算係咁啦! 我唔會話佢哋影得差, 起碼唔會斬頭斬腳+out focus, 只不過係無驚喜, standard的相片囉.

 

 

婚禮回顧 ~~ 婚紗晚裝

係無睇過其他店, 無做過research的情況下, 我都係join了 Zara Bride的婚紗禮服.

忘記pre-wedding的評分, 外租服務, 我會比 90 分.

我個package其實包六套, 1婚紗, 2晚裝, 2男禮, 1伴娘/媽媽. 如果我真係要晒六套, 價錢係中上貴架! 但又未到好貴的情度. 可惜佢啲男禮唔得, 最後我哋臨門只攞走四套, 咁除開, 就好很貴了. anyways.... 所以果10分就扣了响男禮度. 我明白很多婚紗鋪著重做新娘, 但不要忘記新郎都係主角, 男禮都好重要, 怎可給客人一些不合身的禮服呢?

service呢, 第一次揀衫的女仔叫mia, 超好! 但後來佢走了就由cherry跟, 佢的service都好好, 好好笑容, 亦樂意幫我搵好多啱我的衫出來.

zara外租服務, 有兩個好. 第一好, 第一次揀衫佢會送個total look比你, 即係幫你化個淡妝, set個靚頭, 等你唔會被頭散髮, 襯唔埋, 無幻想. 第二個好, 任試, 我兩次去揀衫, 都試超過30件. mia & cherry都無黑面. 試到你滿意為止.

好講番啲裙: 婚紗, 有大拖尾. 現場睇好靚, 我揀了一件比較simple的low cut, 好閃, 有啲蝴蝶仔, 拖尾係由不用質料的布做, 所以現場睇都好有details, 可惜相影出來就出唔到.

晚裝, 好得! 個個都讚靚, 連個攝影都話好靚, 好特別~~

 

男士多數鍾意呢條, 老公勁鍾意我著呢條, 唔知係咪因為腰間係see through呢?

 

 

女士就多數鍾意呢條, 我自己就超鍾意, 我覺得好特別,又有我最鍾意的百摺, 而且無响其他地方見到, 我覺得好公主feel, 又有啲懷舊, 我仲専登叫mua梳了個all back馬尾到, 有點似蕭芳芳年代的look. 我有個姊妹叫呢條裙做水母裙. 攝影師就勁讚呢條裙嘞.

 

 

 

 

新婚生活 ~~ 打鼻鼾

結咗婚3個星期, 新生活仍在適應中. 雖然我倆在習慣上有很多不同, 例如他要求日日洗頭, 同埋好鍾意用消毒藥水週圍噴, 但同一個乾淨的人一齊, 總比同一個污糟的人一齊, 所以呢方面, 暫時都仲適應到.

 

不過, 每晚在雷聲下睡覺, 就真的不知怎樣去適應. 他的鼻鼾聲真係大得誇張. 其實我媽都係好勁鼻鼾, 不過唔同一間房, 跟現在就瞓响隔離, 真係有好大差別. 如果嗰晚我係瞓得好都無問題, 因為通常我瞓先, 我瞓得林, 佢係嘈唔醒我. 但如果嗰晚我係瞓得不好, 成晚聽住雷聲咁發忟憎. 叫醒佢又唔咪, 推佢, 最多咪只係靜一分鐘, 我都唔會响呢一分鐘裡瞓得番, 結果, 咪就係無覺好瞓囉!

 

仲有喎! 新居當然有新床新枕頭. 第一二晚條頸就比個新枕頭整壞了, 跟著換了一個又一個枕頭, 最後回娘家拿回自己的枕頭, 好咗啲. 瞓得好嗰晚咪無咁痛囉. 瞓得唔好嗰晚, 第二日就整天做梗頸四. 我係咪應該要開始用耳塞瞓覺呢?

婚禮回顧 ~~ 褂

我半年前向上海街的永隆繡莊租. 我比101分!

老闆娘係我一年前去睇時已經令我覺得佢好nice, 未租都比影相. 所以半年後再睇, 都只係去永隆.

半年後我再去, 老闆娘依然勁nice, 仲搵到件勁靚的褂比我. 我唔咪租啲咩褂王褂后大五福小五福, 因為試過幾件, 越多金線銀線越著得我唔靚, 反而越多紅色越靚. 最後揀了呢件, 仲好平, 只係$500, 仲屈到佢送件睡衣比我. 租的時候都仲有少少緊, 不過我會瘦架嘛!

到9號去攞衫的時候, 再試, fit到呢, 連老闆娘都話好似度身訂做咁, 隔離的顧客都話勁靚勁啱身. 條腰好修, 總之就靚. 最靚就係個背面的鳳, 一大隻响背面, 好有動感, 好襯我.

原本唔想租褂, 因為阿媽有件大紅小鳳仙, 但奶奶話唔得, 最後去咗租. 好彩出來係激靚. 等我搵到張係全身同有背面的再post比大家睇. MUA那篇有兩張, 都睇到少少.

 

 

婚禮回顧 ~~ 逸東軒

我哋响佐敦的逸東酒店逸東軒擺酒. 我會比90分!!!!

首先要激讚當日負責的部長阿Roy. 醒目, 細心, 靚仔! 老公都對佢讚口不絕, 最後比多封利是佢!

場地係T字型, 所以每個角落都係睇到個台. 我哋要了西式佈置, 以前西式佈置係免費的, 但換了個靚啲之後就要加錢, 不過因為我JOIN的時候佢話咗送, 所以佢都要繼續送番比我. 新呢個佈置係淺銀紫, 幾靚, 我個姊妹幫我用教堂的花球整了個1010字樣出來, 就更perfect.

扣了5分係因為昨天同阿媽講起, 佢問點解晚宴主家父母無襟花? 我話酒店寫了話送架喎! 咁即係佢無攞出來比我. 另外少少尾中不足係音樂...其實都係我衰, 我搞好耐都未揀到歌, 都婚禮前一日先塞了堆碟比兄弟叫佢幫我燒(因為我的電腦燒碟short short地), 但佢最後唔得閒整, 所以只好用酒樓的歌...唉...又怎知酒樓又無問我要用咩歌, 是旦揀了啲入場, 出豬, 敬酒同拜拜歌比我, 超老土. anyways, 呢個唔算係佢錯, 因為我無預備, 所以唔扣佢分. 我哋果日飲宴, 超smooth, 新娘房超大, 可以放兩圍, 不過衰在無厠所, 扣番5分先.

其實以我呢個package, 酒樓價錢, 酒店服務, 米芝蓮級食物(逸東軒的翅係好出名) 仲送蜜月套房, 真係好抵! 同樣係逸東酒店的金鑽廳, 因為多條樓梯就要過萬一圍, 諗落都唔值. 亦因為呢條樓梯, 新娘每次換衫都要走上走落, 有點搵自己笨.

呢個飲宴我好滿意, 而so far亦未有聽到有咩人彈. 讚呀!

 

 

 

婚禮回顧 ~~ MUA

Joanne係我識了十多年的朋友, 佢以前係做地勤. 突然一日下了決心走去學化妝, 學滿後就辭埋份工去做呢行唔咪咁穩定的工, 我都幾欣賞佢!

最開初, 老公都有個朋友係做化妝, 仲比我哋超友情價$3000蚊包全日仲包埋媽咪s, 家姐s, 同伴娘. 試完妝, 唔可以話差, 但無驚艷感. 最後搵埋joanne再試, 似樣嘞! 亦諗住識佢咁耐, 佢一定好知道咩類形會最適合我, 同埋因為fd, 所以成日搵佢問嘢, 都無問題. hahaha....所以都決定比joanne. 不過價錢就唔平, 即使係友情價, 都$7000呀! 但其實另一個角度睇, 就係因為fd, 更加唔可以壓人價, 人哋都要食飯架嘛!

 但只要出來的結果係靚的, 貴啲都值得既!

當日佢5:40am就"叮噹", set up準備化伴娘. 但因為伴娘遲咗少少(又好似係我rundown寫亂咗), 最後係化我媽媽先, 跟住到我, 然後到伴娘! 我個妝就梗係好. 其實當日睇自己都無咩點, 只係啲姊妹係咁讚靚. 不過後來睇番啲朋友的相,就真係覺得好靚, 尤其是褂同婚紗. 因為我自己要求唔要大轉妝, 唔駛誇張, 最緊要sharp, 所以每一次入去換衫, 唔駛15mins我就出番嚟, 只係轉轉個頭, 連酒樓個captain都話我換衫好快, 比我食多碟嘢. hahaha

 

joanne的style係simple elegant, 所以要誇張的新娘就唔啱. 我睇番啲相(除咗最後一條晚裝仲未有相睇到外), 其他都係個頭好簡單, 响前面睇唔會見到任何頭飾. 我開初都覺得..唔...咁既. 但老公就話好, 佢最憎果啲大大朵花响額頭既嘢. 佢鍾意就得啦!

 

 

婚禮回顧 ~~ 教堂

終於可以開始寫婚禮回顧, 但因為啲相都仲未得(要等一個月), 只有啲friends少少相, 所以都唔知由邊度開始好. 今日決定就由教堂開始. 多謝ESD Life網友 emilyss 提供靚相.

我會比教堂80分.

 

 

因為有婚禮, 所以教堂的插花姊妹會插盤靚啲既花. 台正中果盤同講台呢盤我都好滿意, 好係我鍾意的style.

 

個堂絕對係又大又靚, 感恩當日好多人出席, 都可以坐到一半, 真係喜出望外. 雖然呢個教堂係兩條紅地毯, 要左入右出有點怪, 但出來都無咩問題, 兩邊的嘉賓都會有機會睇到.

咁好, 點解會扣了20分咁多呢? 咪就係張結婚証書囉! 有咩理由摺兩摺入信封比我哋, 捲又得, 入公文袋又得, 點都無理由摺囉. 原本都打算DIY做個folder放証書, 現在見到果幾條痕, 完全唔想再見到呢張嘢. 激死.

 

另外仲有扣少少分係個程序. 原本我係打算新郎同主禮人用Canon in D入場, 然後伴娘再用第二首Air on G String, 跟住先到我用Bridal Chord入場. 怎知牧師話唔比, 話伴娘行到台前新娘先入, 太耐喎! 要啲來賓企得太耐, 唔好....well, 無辦法...最後cut了首canon in D, 伴娘同新娘都係用Bridal Chord 囉! 但我同詩班指揮傾過, Air on G String係一首好好的歌比伴娘入場, 同埋伴娘用埋Bridal Chord入場, 好怪囉!

 

anyways, 我都好感恩可以book到呢個堂行禮, 仲要係好早可以confirmed(一般教堂係半年至九個月前先會confirm, 但我年多年已經confirm比埋錢). 同埋我最後影相影到超時, 教會都無罰我錢
多謝晒循道衛理聯合教會九龍堂!!

婚禮大成功

我的拾吓拾吓婚禮終於在無咩甩漏，平平安安咁完成。當日天氣唔咪好好，但我出門時，到上男家，再去教堂，再從教堂過一條馬路去酒店，都無下雨，實在感恩。五百人的禮堂亦坐到一半，實在超乎我所想。兄弟姊妹落力幫忙，又不介意我呼呼喝喝點來點去，真係好感激。等我去埋個蜜月返來再同大家分享點滴，同賽後檢討。最後多謝大家一直以來的支持鼓勵同資料。

倒數一天 ~ 明天我要嫁給你啦!

講下講下, 搞下搞下, 明天就係了!!

經歷了上星期六大喊五場的一天, 今個星期心情出奇地輕鬆, 塊面亦已經好番, 個人亦都幾精神! 明天一定要做靚爆新娘!!

昨天, 男朋友無啦啦唔知係幾時搵咗伴娘, 比了一封信佢. 咁我昨天去攞婚紗晚裝(因為佢哋今日做show, 所以比我早一日攞), 千辛萬苦抬那四套裙回到家, 她趁我走入厠所放了封信入我個袋, 我又咁啱有嘢放有個袋, 好快就發現了有一封信. 開初以為係伴娘寫比我, 去到火車站等車時拿出來睇才知原來係男朋友寫給我. 都好開心. 封信都只係話多謝我呢一年(搞結婚)的容忍..haha...真係忍得幾辛苦, 同埋話我知佢對將來的擔心同壓力, 佢好想我可以唔駛做, 只係扮靚靚同埋煮飯仔, 佢擔心比唔到最好的生活我. 其實都傻傻地, 我都唔咪真係啲想唔做嘢做少奶奶既人, 我又唔咪啲貪戀物質的人, 我個人好簡單, 開開心心, 有人愛護, 有人欣賞就得架啦! anyways, 睇完佢封信, 都開心既. 希望就如佢信入面寫, 我倆要信靠主, 由主做我們的頭, 帶領我哋走前面既路!!

新床

擒晚去等窗簾師傅上來按埋個窗簾, 間屋就真係大功告成, 雖然嘢就未執好, 但好開心見到自己的新居.

舖埋張龍鳳用品上去, 好有結婚feel呀!!!

 

 

新鮮熱辣church program

搞咗好耐, church program終於面世. 好多人都出奇我點解invitation早兩個月搞掂, 但church program卻三天前才完成. 其實內容一早定好, 只是個cover design遲遲未有idea, 一直好想自己design, 但想來想去都想唔到. 最後兩個星期, 都係要搵専業designer出手. 她太明白我想要的concept, 就係想要一張好有婚禮feel的church program.

收到佢send給我file 的時候, 真係鍾意到不得了呀!! 跟住嗱嗱淋攞去e-print 印, 今日攞到, 見到真身, 勁開心, 勁鍾意!!

 

 

男禮篇

原本我的租衫package係包埋兩套男禮, 怎知, 男友卻好像剛剛才如夢初醒, 在星期六final fit的時候話唔鍾意件衫. 大大話話, 我倆在這間公司都玩咗大半年, 影相同租衫同一間, 揀影相衫, 影相, 揀外租衫, 最後轉款, 都叫做著過佢哋啲衫四次啦! 點解會到final fit的時候先話覺得啲衫肉酸呢? 定是開始覺得自己是綠葉, 現在才想當紅花呢? 無錯, 啲男禮真係唔得, 非常衣不稱身, 我都覺得佢著起來肥了又矮了...所以, 我們便嗱嗱淋响星期日(我們大婚一星期前) 衝上MODE, 租過兩套男禮. 原本人哋唔比我哋walk in, 但佢見我哋額頭刻了"一定幫襯"四個字, 都好好咁即刻幫我哋搞. MODE的哥哥同妹妹都好專業(激讚的), 揀到好襯佢的禮服, 而個SIZE & CUTTING亦真係一流, 個人高咗亦SLIM咗. 係就係貴咗, 亦搞到我租衫果到的COST高咗, 不過, 始終佢都係主角, 我都想佢自信番啲. 呢舊錢都洗得值得既. 況且, 佢件衫靚咗, 我哋先可以係俊男美女架嘛!!! HAHA...婚前要自誇一下, 等自己自信啲, 有自信, 人又會靚啲. HAHAHA

兩星期倒數

仲有兩個星期, 真係快到唔敢相信, 亦都唔想相信, 唔想咁快到, 好想繼續留在家中做大小姐.

今日繼續努力在教會派帖, 都九九十十了, 仲差兩張教會人, 同埋七張其他朋友, 希望可以快啲解決埋呢幾張咭!

 

今日响教會派, 都比上星期開心, 上星期真係幾乎派到想喊. 有睇開我blog的朋友都知道因為教會同日有另一對弟兄姊妹結婚, 因為姊妹的媽媽是教會的熱心阿姨, 所以都好多人會去佢果邊, 其實主要係去"阿媽個女既婚禮", 而未必係去呢pair人的婚禮, 所以感覺唔咪好開心, 尤其是當我只不過係禮貌上都要比張帖每一個團契的時候, 佢哋一句就話"唔好意思, 我嚟唔到", 我就好唔開心. 其實我知你哋都唔會嚟架嘞, 但唔駛成日提住我囉! 只一句簡單的"恭喜你啊! 好替你開心呀"...咪得囉! 唉...就係咁, 上星期派到我超灰, 仲要見到人哋個阿媽不斷响度"塞"帖比人(而那pair弟兄姊妹我呢兩星期都無見到喎!), 我更加唔開心.

 

今個星期, 反而有兩個阿姨主動走來話, 我會去你果邊啊!! 其實似乎佢哋每個團契都會派一兩個人去我果邊, 唉...算啦...其實都明既, 不過聽到有人來, 當然開心過啲人同我講話唔嚟啦!

呢兩日, 啲皮膚好番啲. 迫自己瞓覺的成效出來了. 希望可以keep多兩個星期啦!!

中式囍帖 ~ 二號

因為想比海膽一啲idea我的二號中式囍帖係咩樣子, 所以就同佢影張相, post埋上來.又順手講埋個故事.

 

 

 

事原酒店送的帖超唔掂,所以決定出去印, 幸運加感恩地响金都搞到張獨一無二的10101010帖, 滿心歡喜準備過大禮後派帖, 怎知, 男家無啦啦話唔夠帖, 因為未來奶奶一個人要了八圍(原本每家十圍), 男朋友又要六圍, 突然多咁多人, 梗係唔夠帖. 好彩果時都問酒店攞咗50張肉酸帖來整英文版比我幾個鬼老闆, 於是便唯有犧牲我啲親戚同媽媽的朋友, 要佢哋收肉酸帖囉! 便嗱嗱聲DIY裡面張紙. 响公司找到一叠有紋的靚紙, 一印出來, 又OK喎! 跟住便大量製作. 其實張肉酸帖, 攞個實物回來睇到後, 其實都唔咪咁差. 比啲長輩級, 我相信佢哋會更鍾意, 因為紅噹噹嘛!

不過比男家咁搞一搞, 我派帖都派得好煩, 因為同一GROUP人, 無理由有紅有白, 啲人問又要解釋, 真係攞嚟搞, 比佢哋玩死.

好, 比大家睇下我DIY果張紙先...

爛面

唉...大約兩星期前先話我的皮膚從未如此嫩滑過, 真係烏鴉口到不得了.

 

兩個星期前, 無啦啦狂出細細粒果啲油脂粒, 係一唧就無咗但留番個紅印果啲粒粒, 係多到可以係十幾粒喎! 都唔知想點. 咁咪走去做facial度問囉! 佢哋都好緊張, 即刻同我做了個舒緩面模, 咁就好咗少少, 但呢兩個星期, 都仲係keep住每天都有幾粒, 有時又十幾粒咁出囉, 未有一日好過.

 

初部估計, 應該係瞓覺問題, 因為呢兩個星期真係瞓得唔好, 個人亦都好燥. 開始出粒粒果兩日, 的確同老闆開戰了三場, 係每天一場, 然後就過大禮的煩事, 同秋後算賬的氣憤, 結果咪搞成咁囉!! 所以剛剛呢個星期, 我都要出絕招去迫自己瞓. 我知大家睇到, 一定會叫我唔好, 不過真係無辦法. 呢個絕招就係食安眠藥. 食咗果幾晚, 都叫做瞓得到, 個人精神少少, 面色亦都好少少. 但擒晚...又因為公司的事, 搞到我條氣頂住頂住, 食了半粒藥, 都係瞓唔到, 好想出去食埋咗半粒, 不過我叫自己唔好, 我實在唔想再加重份量. 好彩最後都瞓著了, 今朝仲可以瞓到9:30先起身(9:30對我來說係好叻了, 我平時週末不用返工, 都係7點幾8點起身, 係一隻公雞), 個人精神啲. 今晚target十點瞓. 希望皮膚可以快啲好番, 回復嫩滑!!

 

請大家為我祈禱啦!!

成長片段

早兩個星期已經拿到了成長片段隻碟, 一直在想究竟响咩時候播.

 

曾經, 大約半年前, 有個朋友話, 最近已經唔興播成長片段了, 果時已經諗:係啦, 我又無咩會令人嘩然的相片, 例如有超肥變做現在小小大隻, 又或者由勁靚變勁醜, 又或者以前有三隻眼五個鼻八個口變做現在得番兩隻眼一個鼻一個口, 既然無咩特別, 不如就唔好特定一個時間來播, 索性叫個fd响成長片段加多幾廿張結婚相, 係席前loop住咁播啦!

 

但開完兄弟姐妹會之後, 又好似唔打算玩新人, 又唔會玩賓客, 咁咪好悶囉? 所以諗諗下, 不如是是但但都攞個成長片段來kill下時間啦! 另外再叫個fd求其整個淨結婚相的video响席前loop啦!

 

 

結婚最煩的一部份開始了

開始搞結婚, 已經好多人話最難, 最多爭拗的時候, 係編坐位的時候. 而我, 已經進入了呢個時候.

過去兩晚, 阿媽都好努力打電話問啲人嚟唔嚟飲, 我都好appreciate. 咁我亦好努力編下啲坐位. 擒晚編到佢果兩三圍, 就出事. 有一圍砌好了十人, 叫佢比多兩個名, 佢答我"唔知"! 吓...我話你唔可以答唔知, 你點都要比兩個名我, 唔通我呢圍開十人呀? 問有邊個同呢個十人都係熟, 佢就講四五個名出來.... 然後佢又坐埋一面寫名, 其中有一個其實confirm了唔嚟, 佢都寫, 我話, 佢唔嚟就唔駛寫啦! 我差啲想講埋"要唔要放三隻杯三對筷子公奉佢呀?!!"

跟住我問佢女主家席要點, 哥哥同阿嫂係咪可以唔一定坐女主家席, 咁阿嫂可以同佢阿爸阿媽坐(即係我阿媽的姻親老爺奶奶), 佢又話唔咪, 哥哥阿嫂兩要坐主家席, 我咪話, 咁姻親兩老咪悶到發呆. 我又以為都係男主家席重要啲, 女主家席是但咪得囉, 咁咪等阿媽同阿爸(離咗婚)和阿麻唔駛一齊坐囉! 佢又話唔咪....噢...ok, 原來你哋可以一齊坐, 食得落飯. ok, 咁由得你哋.

跟住又編下啲朋友舊同學同事, 全部都絕對唔會fit成圍, 實有多有少, 每圍都差一兩個, 都唔知點好. 好似一班美國識的回歸朋友, 剛好十個, 咁另外果兩個位點好呢?我邊度會無啦啦會識兩個咩group都唔咪既人呢?

都係果句, 有得再揀, 我會揀旅行結婚. 邊個都無面比.

過大禮 ~~ 秋後算賬

擒日都唔知發生咩事, 無啦啦好似做咩都錯, 講咩都錯咁!

先講朝早先. 佢無啦啦星期三先講話星期四請假搬嘢. 咁我就梗係幫唔到啦. 咁佢响msn講"唉, 一個人搬嘢好辛苦"之類, 我答"咁你小心啲啦!" 跟住佢就嬲嘞, 話我冷淡. 其實佢想我答"咁你要唔要我請假幫你呀?" 我只不過答唔啱, 佢就嬲咗我一日. 我lunch打比佢, 放工打比佢, 佢的語氣態度都好差. 究竟"咁你小心啲啦" 係咪真係咁冷淡呢?

咁到咗夜晚, 我都無打比佢, 佢亦無打比我, 我努力地在編坐位, 佢無啦啦就msn, 第一句就話"究竟有無人同你講大舅褲係咩情況比的", 我話唔知, 阿媽話要咪要囉! 然後又講了好多嘢, 我話都過完了, 做啱做錯, 都算啦! 佢都係要繼續講, 話咩我唔應該買白socks, 佢阿媽好唔高興. 我又真係唔明, 白色有咩問題? 第一, 星期日過大禮, 星期五先講要socks (無聽過人講女家要回socks囉, 問人都無人聽過囉), 咪嗱嗱臨去muji買; 第二, 唔送白色, 唔通黑色灰色藍色又好好咩, 白色, 我都仲可以話代表純潔, 黑色唔通講高貴, 藍色唔通講皇族呀? 我真係唔明. 最好送紅色, 到時咪又話紅了過去後無用, 著唔番. 人呢, 要挑剔起來, 係咩都可以挑.

都仲未完, 又話佢阿媽好不滿我哋啲利是只係比單封. 你自己都講你又識, 又知我哋唔識, 但又識得星期五打兩次電話來講過大禮果日要點點點, 又話會分好兩份, 等我哋容易回, 咁你又唔講埋要回兩封. 我哋拍拖咁耐, 都唔咪唔知我阿媽啲脾性啦, 佢一向乜都唔理架啦! 你哋要點, 你哋想點, 我哋咪照跟, 你無講, 我又點知你哋想點啫.

最重要的問題係, 都過完啦! 仲講嚟做咩?! 跟住我同個friend爆晒粗咁呻(我係完全唔講粗口的人), 佢講了一句"乜唔咪好仔兩頭瞞咩, 佢做咩講比你聽?" 我都唔知答咩, 咪就係一句"人蠢囉!" 成日以為自己好有智慧, 呢啲時候咪睇到佢幾有智慧囉! 我阿媽對個過大禮都有啲說話, 話佢哋過少了好重要的龍鳳餅, 又話佢哋唔識做, 只係買得一盒餅, 又無拎啲西餅. 除了龍鳳餅, 其他都可以算係挑剔. 但我阿媽次次提完都話算啦, 仲千叮萬囑我唔好同男朋友講番, 所以我一路都無提.

唉....擒晚成晚都好嬲, 好彩食定安眠藥打底先瞓得到, 今朝起身又再嬲過, 仲越諗越嬲呀!!!

過大禮 ~~ 完成篇

鬧到好不快的過大禮, 最後都平安地响12號完成.

上次因為未來奶奶想改日期, 鬧到不快, 她甚至說以後唔會再打電話比我, 怎知...星期五, 咪又係打嚟! 又係响我返緊工的時候打來, 話我知會過咩, 我哋又要回咩, 又無啦啦要我哋買多兩對socks, 表示甜甜蜜蜜喎! 好彩唔咪買蜜糖啫! 我好努力一邊做嘢, 一邊聽佢講嘢, 收線後, 其實只係記得要買socks, 到時執山啦!

星期日, 佢哋11:30上到來, 門鐘一响, 我就躲入房. 好無聊, 出面嘻嘻哈哈, 但我只係聽到, 又睇唔到, 無癮. 最頂癮係我阿媽交換禮物後, 竟然同男家的人話一齊去飲茶. 阿媽...你記唔記得你個女响房痴呆緊呀? 不過男朋友都醒目, 提醒我阿媽!!

上到來就見到呢堆嘢嘞...

 

 

 

 

左上角是冬菇, 瑤柱, 發菜, 飽魚, 餅咭同帖

右上角是水果藍

左下角是我的手飾, 好多, 有介子有耳鐶,有手鐲

右下角是唐餅

最後miss了的竟是一對"龍鳳餅"不過阿媽話算了, 唔好煩. 不過又真係幾奇, 末來奶奶好似咁緊張, 又點會漏了呢樣必備"龍鳳餅"呢?

anyways, 大約半個鐘, 佢哋走了. 我哋家便變身成工場

 

 

唉...最後陳家無啦啦要加四圍, 好靚的101010帖唔夠, 唯有將紅當當的逸東帖都攞嚟用, 比啲親戚同朋友. 我自己的朋友就用番101010帖, 但應該係唔夠. 有啲都係要搭紅帖.

經過一大個下午, 9成的帖都完成好. 特別嗚謝偉大的伴娘來幫我出手~~寫帖! 也感謝姨姨同佢個女上來湊熱鬧後也成入工場, 幫手入帖.

所有炸彈按裝完成, 隨時準備攻擊

進入倒數一個月~~黑仔

今日進入倒數一個月, 怎知卻極度黑仔, 朝早黑到晚...

早上行到返上公司前到商場的ATM機攞錢, 一入張咭, 佢個畫面跳了去"歡迎"就再沒有郁了,我按吓啲制, 無反應, 等咗好耐都無動靜...妖...食咭! 最黑仔係, 如果我係唔記得password比佢食咭都心甘命抵, 但我咩都無做過, 一入咭就無咗. 跟住咪打去銀行囉, 仲要等到星期四先有得攞返. 妖....好彩我有另一個戶口啫, 如果唔咪, 呢個星期咪食屎. 妖....

一返上公司, 老闆就發癲要我叫啲人執嘢. 話唔可以放咁多紙箱响office, 要放入倉. OK, 我知, 但啲箱唔咪我架喎! 你估我無叫咩, 我成日叫啦, 佢哋唔聽咁我點啫, 我無權無勢, 我可以點??? 叫我好好ASSIGN啲櫃比佢哋, 我話我哋未搬過來的時候已經ASSIGN好晒, 跟住我就開晒啲櫃比佢睇, 有幾個大櫃係空的, 我同佢講, 佢哋唔放嘢, 就同我講唔夠櫃放嘢,你走來話我, 你有無搞錯??? 果班賤仔又衰格, 玩嘢, 死都唔放嘢上櫃, 又話啲櫃個SIZE唔啱, 又話放唔到重嘢, 公司搬咗一個月, 都仲可以唔開箱攞嘢出來做, 咁其實係咪代表其實佢哋呢個幾月係無做過嘢, 白逗人工? 定係其實公司根本唔需要佢哋呢? 我真係見到果三個賤仔, 就好激氣...

一朝早, 咩都無做過, 就係咁走來走去睇個倉啲位, check佢哋啲櫃, 同招呼個裝修. 到食lunch, 竟然白痴到攞了把拉呎當銀包(因為兩件嘢都係黃色)出去lunch. 食完飯無錢比, 仲要驚咗十分鐘, 超低能勁白痴...

到下晝, 又到同translation house個老闆講數, 佢做漏嘢仲要話我簽了quotation, 無得改番, 要我硬食, 慶爆. 然後又比老闆捉入倉話點解咁多吉箱, 我話佢哋要留來寄嘢, 跟住索性廢事煩, 一次過掉咗2/3吉箱, 到時佢哋無箱寄嘢, 我會叫佢哋搵老闆攞囉! 呢個禮拜, 差不多日日都同老闆鬧一次架, 搞到瞓得唔好, 個人又燥, 塊面勁出粒粒, 我結婚果日唔靚, 我一定會.....唉...又可以點丫...

 終於好辛苦捱到夜晚, 約個朋友出去食飯, relax下, 間餐廳都要同我作對, 有一個菜成個鐘都唔上, 然後先話我哋知賣晒. 頂~~ 叫我揀第二樣又唔比餐牌喎! 叫完第二樣都仲要等半個鐘, 催完又催, 無又啦啦上個甜品, 人哋都無叫, 你又上乜鬼甜品呀? 叫埋單, 15秒就已經比到張單我, 頭先啲菜又唔見咁快. 仲好笑, 有個女侍應, 叫佢攞過隻乾淨的碟同叉比我, 轉個頭人哋叫佢, 佢竟然可以放低隻碟同叉响人哋張枱度, 點呀? 醒下啦! 知唔知自己做緊咩呀?

返到屋企, 一路都好大雨, 落車前細雨咗, 怎知我一落車, 佢就大雨番囉, 5分鐘的路程, 濕了半條褲囉!!

今天做咩呢? 唉...仲有廿分鐘...快啲過, 明天要雨過天青.

無奈

今個星期日過大禮, 亦即係下星期一會開始正式派帖了! 但亦即係最煩, 最無奈, 最失落的時候開始.

 

今個星期開始週圍問啲同事和朋友會唔會嚟飲, 有啲朋友, 你係唔需要問都知道佢哋一定會到; 但有啲朋友界乎熟同唔熟中間, 佢結婚佢會請你, 咁係咪代表我結婚我又要請番佢呢? 但其實, 實在又一年只見一次喎! 我唔想比人覺得我係咪都炸, 所以先要想想同果個人係咪真係咁熟, 會唔會令對方覺得我無厘頭都炸人. 但又有啲人(同事), 又係熟同唔熟之間, 工作上有點點接觸(因為我係admin, 所以其實個個都會接觸), 但又未熟到好似同team咁熟, 咁我請得佢同team其他的人, 唔請佢, 佢又會唔會覺得我唔比面佢呢?

無奈同失落是有一些朋友, 半年前知道你結婚的時候係極度開心, 實牙實齒咁話一定到, 依家confirm佢係咪嚟, 佢就同你講唔好意思, 有事做, 嚟唔到. 又有啲係一早講定會儲定錢飲你果餐, 依家就同我講什麼男朋友唔放人.

 

呢個時候, 除了笑笑口話唔緊要工作要緊, 嘻嘻嘻, 唔咪呀嘛唔放人? 之後, 就已經唔知可以再講咩了.

算啦算啦!!! 我真係唔知可以做咩lu, 或者係我諗多咗啫.

兄弟姊妹相睇日

擒晚, 終於都約了5兄弟(有其中兩個缺席),7姊妹出來見面了!

哈..原來佢班兄弟分3個單位(即係大學,團契, 和同事), 係未見過面, 所以好靜. 反觀我果個, 有5個係勁熟, 幾乎個個星期見的團契朋友, 所以我果邊就勁嘈. 好彩, 我果邊啲friends都會搞下氣氛, 玩理佢果邊啲人, 如果唔咪, 個場面應該都會幾奇怪.

其實今次聚會, 主要係讓佢哋彼此見個面, 講一講rundown, 等佢哋自己知道當日要負責啲乜. 亦好感恩, 因為當中有結咗婚的, 也有做過無數咁多次兄弟, 姊妹, 伴娘的人, 所以個rundown上的不足, 佢哋都會提出來, 咁我又會加番落去.

我深信大婚當日, 有呢一班兄弟姊妹幫手, 一定會順順利利的!

嘻嘻!! 最後埋單的時候, 個總數加少少tips, 竟然可以比我寫到$1010喎!!!! 我就咪攞住張單狂傻笑!! 嘻嘻!

護膚篇 ~~ 從未如此嫩滑過

八月頭終於的起心肝去屋企附近的美容店以$98試做facial. 原本想試多間, 但見做完之後無咩紅, 又覺得佢手勢都ok, 便掉下$2800 join了個 十送一的package了! 最初佢叫我兩星期做一次, 但日子近了, 加上第一次後唔知咩事狂出粒粒(一來做了古法線面, 如我所料受刺激後敏感, 二來可能第一次針清後刺激得滯), 之後便keep住一星期一次, 加每天一支H2O Collagen 8000, 加每朝一小杯燕窩, 加週末的一塊保濕mask, 呢幾日摸塊面, 都超級開心, 直頭覺得唔需要每日塗base來遮黑眼圈同印, 都可以出街.

仲有一個月, 可以做多五六次, 如果無意外可以keep住咁, 我應該都可以係一個靚爆新娘既! 哈哈哈哈....(自我陶醉中)

後加: 仲漏了每天一杯Bread Power 的 Kanne汁. 呢個東西改善了我的鼻敏感. 我現在每朝早由冷氣房出來都無打"黑次"了! 精神就好咗啦!

過大禮 ~~ 預備篇之一獲泡

最後過大禮日子維持原判在9月12日進行, 但根據男友傳達, 我已經得罪了未來奶奶, 評語是"無大無細", "唔尊重長輩".

 

"無大無細"是因為我講了一句, "撗掂過大禮, 我同我媽都要迴避, 咁如果真係要5號既話, 我咪搵婆婆同阿姨來搞囉!" 她覺得我連過大禮都可以唔預我阿媽, 所以係無大無細.

 

"唔尊重長輩"是因為我在剛剛的星期六搬了啲冬天衫, 書, 玩具過新屋, 再加一個樟木箱連棉被床單, 所以即係搬了嫁妝過去. 她覺得嫁妝唔應該咁早搬過去, 要邊日邊日之後先得. 我無問佢, 所以係唔尊重長輩.

冤枉呀!!!!

"無大無細" 我講句咁既說話都係因為佢好想5號, 連續打來兩次, 仲話我阿媽煩, 搞到我亂講嘢. 我無大無細都係對我阿媽啫, 關佢咩事? 我又唔咪對佢無大無細. 我自問已經對佢好好禮貌, 你講咩, 我都係哦哦哦, 好好好, 我返去同阿媽傾, 佢怪我哋一早比咗個過大禮list都唔一早預備, 佢話我媽煩, 我都係哦哦哦, 好好好, 咁都算是無大無細?

"唔尊重長輩" 你唔講, 我又點知你要計呢啲日子呀? 我見人家安床都要擇日子, 但你又一句都無講過, 我點知你無啦啦搬屋都要擇日子? 話我唔問, 我唔知你有呢個傳統, 無啦啦又點會問呀? 我哋呢啲後生仔, 點鬼識呢啲中國傳統嘢? 你又跟啲唔跟啲, 過大禮簡單過乜, 日期又可以鍾意改就改(果時都係佢自己揀呢日, 有同佢講過會唔會派唔切帖, 又話唔可以太早, 要一個月), 安床又無擇日子, 樣樣都係做啲唔做啲, 睇心情, 我點跟呀?

冤枉呀!!!!!!! 我做錯咩呀? 最錯, 咪就係聽佢來嚟個電話囉!

過大禮 ~ 預備篇

原本定了9月12日過大禮, 突然男家今日話可唔可以改做9月5日, 咁咪即係今個星期日囉! 完全係殺我們一個措手不及囉! 原因...覺得12日才過大禮, 會唔夠時間派帖喎!

 

咁我就即刻打比阿媽問佢星期日得唔得啦! 但佢話唔咪好得, 被book了可能有工作要做.

轉個頭電話响, 未來奶奶打來問...駛唔駛咁心急啊!!唉

 

咁我就話比佢知, 媽咪話時間未必得, 而且未預備好.

跟住未來奶奶便連珠發炮: 其實你哋無咩要準備喎! 只係將我哋送過去的東西, 全部抽番一半出來回番比我哋咪得囉! 我擒日見差唔多時間, 都即刻好辛苦咁自己走去買晒啦! 再者, 我哋都好早寫好咗張紙比你哋, 話仲有咩其他嘢要回啦(佢係指褲同銀包)! 你哋都唔咪依家都未買, 就算唔改時間, 都得2個星期, 都唔咪衣家都仲話未預備好......"

呢番說話, 如果同媽咪講, 實開戰, 我亦必成為炮灰......

姊妹們, 其實過大禮, 女家仲要預備啲咩?