我交了惡運嗎?

我應該在2014年開始便交上了惡運.

繼星期六遺失散子包事件後, 今日個MSN比人HACKED了. 大家要小心啲!

故事是這樣的:

有一個很久沒見online既wow友 (邊個msn名係kuducksan???)

佢無啦啦hi我話好耐無見, 然後就send了條link比我話係佢既新blog叫我多多支持.

咁我咪click入去囉 (惡運開始....以前一路收到啲奇怪有條link既email我從來都唔開, 怎知死在msn手裡)

click入去, 便去到一個microsoft既login版面.

我其實都覺得奇怪, 就問佢係咪要login先睇到架? (死蠢囉!)

跟住login唔到, 我話佢知唔得, 佢話可能我電腦browser唔support.

跟住又無啦啦問我附近有無7-11 / OK. 我話有

佢叫我幫佢買MYCARD

我問咩係MYCARD?

佢話遊戲咭

我呢個菇寒人又點會無啦啦幫一個唔見面既網友買嘢呢!! 點比錢我? 我又點比佢呀?

到呢一刻就覺得有問題, 但我只係諗可能係騙錢啫.

於是我就問佢..."啊...我好混亂呀! 你係邊個? 我調亂了啲人"

佢答我"古德珊"

當我正想問佢網名係咩既時候...我被logout了........

跟住便有朋友whatsapp問我係咪叫佢哋幫我買遊戲咭.......我賴屎了.

跟住咪去facebook留了個言, 叫朋友如果收到我msn/email叫佢哋買遊戲咭的, 就咪理, 我被hacked了. 好快就有朋友答話真係收到. 又陸逐有朋友whatsapp我, 打比我有無on msn......煩.

亦都已經去hotmail account改我既pw..但係朋友依然見到我online, 又繼續有人問我有無send message比佢.

因為我公司係唔可以安skype/live messenger, 我係用im+ (web based既chat room), 再上im+, 一路都唔比我login. 現在可能要回家用番真的skype login先能夠了結...希望係咁.

有無IT人可以教下我?

後記:

後來不斷有FD話收到的既怪MSG, 全部都只係話"我"叫佢哋買遊戲咭. 沒有出現那個LINK.

熟我既朋友當然知道我唔打機, 好醒咁就耍咗佢. 唔熟既就.....GOOD LUCK.

我唔明點解我一開始係收到LINK而唔係幫買遊戲咭? 我係因為條LINK先被HACK喎. 如果只係叫我買遊戲咭, 我唔會中招架喎.

智障外星人

擒日學了個新名 ~~ 智障外星人

以前成日話果啲同人溝通唔到既人, 會叫佢哋做外星人, 會叫佢哋返番佢哋既星球, 因為地球很危險.

但如果遇到智障外星人, 我諗佢哋應該連點返自己個星球都唔識, 唯有等佢既同伴嚟接佢.

故事係咁....

Jan 13呢位小姐email我老闆, 因為我老闆係Leader之一, 要present, 所以要問期.

email subject係 January 24

內容係: Just to confirm you're not on annual leave on January 24. XXXXX is scheduled for January 21 and the Big Meeting is set for January 23 (完)

首先, 就呢個email, 大家有無發現到問題呢?

我老闆回答: I will be in the office on 23 Jan and ready for the Big Meeting on 24 Jan (Fri)

最後擒日放工前, 收到公司News 既email, 即係發比全Asia Pacific所有既同事既email, invite我哋join呢個Big Meeting. 日子.....January 23.

點解會23既? 我老闆明明答你係24架喎! 況且我老闆現正放假, 23號先返, 佢仲要review同事响佢放假期間為佢預備既slides, 點會趕得切23號一返嚟就present呢?

返番去佢最原本問題既email, 首先佢個subject同佢個email都已經有conflict. 然後佢話個會set了响23號, 咁我老闆24號响唔响度, 關佢屁事咩? 到我老闆覆佢咁清楚講明ready for the Big Meeting on 24 Jan (Fri), 佢都仲未醒喎!

最後我on the top of 佢哋既email問番呢位小姐想點, 話比佢聽我老闆唔會可以23號同佢做presentation. 最後佢覆番話請示過Big Meeting 既大老, 今次可以我老闆唔洗present. 佢仲要講 I only found out yesterday after work hours and coult not speak with XXX (my boss). Well...我想問佢found out 咩呢? found out自己搞錯日子? found out 我老闆原來可以唔洗present? 仲有, 我都話我老闆放緊假咯, 你想點speak with 佢呀?!

咁我同啲同事分享下呢件事, 因為如果我老闆真係要present, 佢另一個會要改. 我同同事講呢位小姐係外星人, 同事話, 我哋公司一向都好多外星人, 但呢個好明顯係智障外星人. 笑死我. 諗諗下, 其實我覺得佢係植物人, 長期昏迷果隻, 一直都未醒過.

2014第一件失魂事

唉....星期六, 好趕好趕好趕.......就跌咗個散子包. 內有八達通, 百佳易賞錢咭仔同萬寧咭仔. 激死...煩!!!!

話說原本約了個FD星期日去北潭涌跑步, 係為19號既CCM半馬來個路線預跑. 點知個FD星期六早上打來, 話可以改星期六跑, 但又要十二點鐘先OK, 都算啦! 其實都夠時間. 去到北潭涌1:00開始, 跑2個幾鐘, 4:00返到屋企嗱嗱聲沖涼再出門返教會.

在旺角落車, 一路都拿住個散子包, 仲買麵包. 點知到夜晚要再用搭車返屋企既時候就發現不知所蹤了.

於是問下傳道人有無人响教會執到, 又有無响教會見到. 結果無.

又試過打去食飯既地方問有無, 結果都係無.

最後都係要打去八達通報失, 因為我有自助增值功能. (究竟一日係可以自動增值幾次? 有人話一次, 又有人話兩次)

跟住要買過張新咭, 又要打去轉個自動增值落張新咭, 又要CUT咗張易賞錢同萬寧....好煩!

不過, 都感恩, 唔見既係散子包, 唔係銀包. 唔見銀包仲大鑊. 淨係打去4-5間銀行報失信用咭已經好想死, 仲有補領身份証呢. 以後呢, 都係唔好將自己放响一個咁怱忙咁趕既景況, 真係要學識一個心態係"遲到咪遲到囉!" 唔好一趕就失晒魂.

P.S. 今朝打去銀行, 問最後一次增值係幾時啦. 佢話係31/12. 究竟係星期六既增值仲未reach到銀行, 定係其實張咭無比人用過呢?

不愉快的除夕倒數夜

除夕日放2pm, 原本是有以下的plan:

去旺角好快速地退返個折扣錢

回家樓下剪頭髮

跑0.5-1 小時步

之後便出去老公既大家姐家(觀塘) 食飯

結果, 因為一個錯誤的決定影响了餘下時間的心情, 如果有人在旺角街頭見到我, 應該會以為我xxxx, 塊面應該黑過黑人.

on 99 咁去搭隧道巴士, 以為呢啲時間唔會塞車, 而隧巴一向都是任何時間也多車的.

最後我竟然等咗20mins先有車. 同車坐隔離既男人仲打電話去投訴添.

而去到維園泳池果條路, 無啦啦, 唔知為乜塞咗半個鐘, 的的確確是沒有原因地塞.

最後我用咗接近個半小時才去到旺角. 好好地去搭地鐵, 半個鐘就到, 就咁on 99 咁浪費了1個鐘.

少咗一個鐘, 咪就係無得去跑步囉!

去大家姐度, 經過幾次响佢屋企都係咁比人塞食嘢之後(因為佢哋唔食隔夜餸, 但又煮鬼咁多, 就係咁塞人食, 好味都算, 但係唔好味果下先想死), 其實我係十萬個不願意. 但人哋話"去佢度有工人幫手煮, 唔洗媽咪一個人煮得咁辛苦" 咁我呢啲做細既, 當然唔會出聲.

再加埋, 佢哋家, 好得意, 好興搞碟頭飯party, 據說係由她們的婆婆發起, 在元旦食碟頭飯. 何謂碟頭飯呢?

今次係煮啲豬扒, 腸仔, 菜....既餸, 分到每一個人既碟上, 各自食自己碟既食物. 可是如果只係咁簡單就好了, 佢哋係會煮7-8款不同既食物, 有啲呢就會分到各人既碟, 又啲呢, 又繼續放响枱比大家夾喎!

 

好似今次又咁, 每一都有既係腸仔,魚蛋,1/4乳鴿, 兩隻蝦, 一塊雞, 小小菜, 而枱中間又會有兩碟菜, 一煲鮑魚冬菇, 而飯又另外裝.

四個字....不倫不類.....

既然係咁, 咁點解唔照一碟碟咁放大家夾要食既呢?

都算, 果日我一聽話係食碟頭飯, 那十萬個不願意再加多一百萬個不願意.

因為次次咁食, 啲食物都係凍的. 逐樣逐樣煮7-8樣又再分上碟, 加埋啲人叫極都唔坐埋嚟, 仲要玩親呢個遊戲都係除夕元旦, 冬天嚟架...最後咪凍晒囉.

算算算...呢啲日子, 叫做一家人食飯, 又唔洗我煮, 有乜就食乜.

之後, 我其實係好想出去倒數, 但同老公講咗兩句, 佢就話好攰, 咁即係唔想出囉! 現在奶奶住附近, 又要同車返去, 極無癮呀!

上FB, 又見好多人POST啲PARTY相出嚟, 又或者一家人响屋企好溫暖打邊爐, 或者買壽司PIZZA食, 我就覺得自己好慘(好明顯情緒仲未好過來). 咁就响車度MSG我老公, 話不如去超巿買少少料, 返廚房打邊度.

點解要响廚房打, 又有有趣事講. 有人話响屋企打邊度, 會搞到個天花燶咗喎! 又話會搞到間屋好多蒸汽, 對牆紙油漆唔好喎! 佢哋家族係唔會响屋企打邊爐的 (但係啲牆紙都係甩甩囉, 反而我娘家成日打邊爐, 啲牆紙好貼, 天花亦無黑囉). 所以我現在屋企係禁止打邊爐的.

買得嘢返到去, 洗埋, 其實打一陣都已經就倒數.

咁我哋响廚房打, 各類需要既碗碟調味其實都伸手可取.

唔知係咪比我情緒影响, 我老公都發埋癲, 話我唔攞筷子比佢, 唔攞碗比佢, 唔幫佢調醬, 係咁依依哦哦鬧鬧鬧.

我就話佢, 好呀好呀, 繼續鬧啦. 人哋講緊13去14年, 同愛既人跨越1314 (一生一世), 好呀, 我哋鬧住交跨年, 一生一世都鬧鬧鬧.

就係咁, 我就帶住不愉快進入2014年了.