惹蚊人

星期六, 下大雨, 去威院探婆婆, 在巴士站等了媽媽十五分鐘.

最後只看到她一眼.

十二時到達, 護士話婆婆11:30推了落去檢查, 不知何年何月才回來

一時再問, 另一名護士話應該都要二點才回來. 去食飯.

二時, 又另一名護士說已接到電話, 正推回婆婆

可是, 正值交班時間, 要三時才可給我們去看....天啊!

最後不等, 走了, 媽媽五時半再來. (婆婆昨天已出院)

又在巴士站等巴士, 等了十五二十分鐘.

突然看到左手有粒黑色的東西 超驚! 立即撥走牠們

晚上手開始痕, 及出現很多一點點的紅粒

最後發展成全隻左手約有十五粒

第二天右手亦出現五六粒, 也痕

白花油...沒用, 只可以止痕, 但沒有散去.

究竟是不是出疹呢? 還是敏感?

昨天lunch time跟同事到圖書館, 邊行邊 R, R 到發瘋了!

晚上, 發現從澳洲買回來的Thursday Planation Tea Tree Oil Antiseptic. Good for minors cuts, burns, abrasions, pimples, boils, bites and stings! Yeah...Stings!! 拿來搽, 又香又舒服!

今天好一點了, 沒有昨天那樣痕. 我亦相信同事應該能夠接受茶樹油多過白花油.

老公下令, 如果星期三還沒好, 要去睇醫生. 希望快啲好啦! 不太想走去跟醫生講, 我被蚊咬, 救我!!

其實以前都試過在無風無雨但焗到死的三號風球下去公園, 當日是穿牛仔褲, 但最後兩雙腿共得廿多三十粒蚊 "冷".

我是超惹蚊的!

第一堂後感 ~ 夢

上星期五上了第一堂, 哇....在星期六晚已經發了一個考試的夢, 已經有壓力嗎?

個夢都好笑

夢見自己記錯考試時間和地點, 去搭電車, 明明方响正確, 但最後架電車會轉彎去番另一個方向

入到二樓的課室, 坐了一陣, 才發現應該在五樓, 狂奔

考中文, 但發現有幾篇課文我沒有讀過, 出貓望人

最後又發現可以打開書考, 仲要每一題都是照課文直搬出來

跟住便醒了!

其實第一堂都沒什麼, 只是介紹下整個課程, 同派筆記給我們

 

都只是三大叠吧! <== 不斷安慰自己"好少啫!"

全個課程有兩份功課, 9月18日便是考試!

都有差不多40個同學仔, 有啲年紀都大大地, 地中海的叔叔都有 <===當然....地中海都可以年紀小.

發現原來每課真的是三小時, 而不是兩小時, 6:45-9:45... 再次叫救命!!

發現原來課程全以英文教授, 想起便頭痛, 希望都是好聽的口音!

發現附近有間麵檔的潮州魚蛋好好味, 好爽口! 它將會是我經常幫襯的地方

好! 努力!

開學了!

很久沒上學, 我是指認真的科目, 不是那些10堂什麼的AI, 翻譯跟攝影, 而是認認真真的讀一個Advanced Certificate. 仲要係香港大學!! 哈!!!

三月頭去報名, 終於等到開學的日子, 等了兩個多月.

今日開始的四個月, 逢二, 五放工都要跑去上兩小時的課. 開初低能地以為每課三小時, 喊著要死!

讀什麼?

營養!

這兩三四五年讀am730一個營養師的column, 對營養產生興趣.

又其實, 去美國讀大學時, 是打算選營養, 覺得是一門專業. 怎料第一年的什麼chem 101課程, 把我嚇跑了.

今次不用預讀那些理科, 便可直鏟入營養科, 真好!

希望真的可以讀出個大興趣出來, 一路讀上去.

未必做得成營養師, 都可以認識我每天吃的是什麼, 或令身邊的人吃得更健康!

小露寶

最近迷上了一個叫火星空姐ah-yo的blog, 每天沒事做就逐篇逐篇掃落去, 佢真係超搞笑, 滿腦子都係古怪既思想.

擒日睇到佢寫兩篇名叫"小露寶"既posts, 令我想起很多年前既一件事.

火星空姐話佢有一次飛到法國, 在地鐵裡專心地看她的書, 只覺有一個男人站在她前, 但她都沒理會, 直至她沒意識地枱頭望一望去到那站, 發現那男人原來在她面前把玩他的小寶貝.

然後, 火星空姐輕嘆: " 唉"

個男人便發咗癲咁狂奔要衝出正在關閉的門. 不幸地, 他趕不上, 手被夾, 還引起了其他人的注意, 當然亦注意到他外露的小寶貝. 然後一眾人上前圍摳他. 帶他下車, 報警. 但因為言語不通, 火星空姐當時腦內只有睡覺二字, 所以便沒跟他們到警局.

看罷她的小露寶, 我就想起多年前, 我去樂富學琴, 大約六, 七點時份, 天有點暗. 我在聯合道的巴士站, 行去樂富商場在聯合道的入口, 突然有人拍我的膊頭. 我便回頭望, 是一個男人, 他示意我向下望, 我咪望囉! 便看見他的小寶貝在fling下fling下. 我跟著便無反應無表情, 無聲無色地擰番轉到繼續行, 亦無回頭再望他有否跟著.

後來同朋友講, 佢哋話我好嘢, 可以咁冷靜, 話我呢個反應係最適合. 果啲變態佬其實就係想睇見啲女仔好驚咁尖叫, 咁佢哋就會好興奮.

哈...唔好問我點解唔笑佢細/短. sorry, 我果個年紀, 其實唔知何謂大, 何謂細.

光波爐 vs 光波爐

今朝買咗新假期, 竟然有光波爐測試, 即刻入去睇下.

佢哋搵咗德國寶(hk$1380), 巧康 (rmb 219), 同埋萬廚寶 (hk$399).

結果當然係德國寶大勝.

佢勝出既原因, 唔咪淨係因為佢係大牌子, 或者佢煮既嘢好味啲, 而係....其他的牌子係會...熟唔熟囉.

就以10隻雞翼來做測試, 用同樣的火喉, 時間, 德國寶係超一流, 外皮香脆又唔會燒焦, 而10隻的熟透情度係一致的.

而巧康....都熟但唔夠德國寶香口, 外圍果啲差少少, 要焗多2mins.

萬廚寶最驚...唔熟...要焗多5min

跟住仲有蒸魚測試, 繼續係德國寶大勝, 效果佳, 魚身更比用明火蒸時乾身(這裡我唔明乾身才好嗎?)

巧康...sorry..得五成熟...食魚生咩?!

萬廚寶....都係唔熟, 要補時5mins.

最後仲有曲奇餅測試....哎吔...德國輸咗添. 不過唔咪輸唔熟, 只是唔夠巧康鬆化, 可是它依然有同樣問題就係火力唔均衡, 外圍的無中間的好. 萬廚寶唔駛講, 又要補時囉.

最後, 巧康仲有一個問題, 係佢啲配件係會有機會爛, 佢哋一拆箱, 就發現個蒸架爛的

我一向都唔信奉貴嘢一定好, 平嘢無好嘢.

不過電子用品...都係買番大牌子好.

椒

除了香蕉, 基本上所有有椒字的食物, 我都唔食既. 我知, 此蕉不同彼椒...

但擒晚我煮了青辣椒炒牛肉比我老公食, 我真係對佢幾好.

其實係佢去完開平, 食咗果碟全世界最恐怖的青椒炒辣椒(炒三色椒同樣恐怖)後 , 係咁氹我煮, 我先免為其難, 我唔食, 又點煮, 煮了, 佢又係咪真係會食呢? 星期日經過街巿, 一袋7-8條先之$5, 仲要條條都肥肥潤潤, 就買咗.

擒日打電話問埋媽媽要點處理啲椒, 晚上就開壇!

洗乾淨啲椒, 打直切開, 去囊. 後來煮的時候覺得佢哋長咗啲, 就搵交剪全部剪短一半.

洋蔥, 我唔食椒, 所以加半個洋蔥, 咁我都可以有啲嘢食.

將豆豉同蒜頭切粒

牛肉醃好 (唔講醃料, 個個口味唔同, 我都係隨意的)

起鑊, 落油, 炒好啲牛肉八成熟, 盛起備用

再起鑊, 落油, 落豆豉蒜頭粒炒香, 再落啲椒&洋蔥, 炒一陣, 加水焗.

煮到個人喜好的軟硬度, 再落番啲牛肉, 炒多兩嘢, 起碟食得!

 

 

 

我一路煮, 老公已好興奮走入嚟話好香.

跟住亦都話好好味.

咁我都食洋蔥同牛肉既, 都覺得好好! 實驗成功!!

我的奇怪奶奶

擒日母親節, 下午我請媽媽去了食壽司, 之前去花壚買了兩盆小花, 一盆比媽媽, 一盆比奶奶.

之後無地方好去, 天氣咁熱, 唯有早啲上奶奶度, 已經去買定雜誌, 等自己有啲嘢睇下, 不過好醒既我, 最後更決定問奶奶借條短褲, 攞老公一件舊衫, 走咗落去運動場跑咗一個鐘, 離開下啲燥音!

跑完步回家, 二姑奶已經到咗, 今晚話說係由二姑奶煮. 原因:

1. 奶奶話五月唔老黎, 因為幾次佢啲仔女都响五月失業, 所以唔想慶祝

2. 唔想出街食, 因為人多, well...

我奶奶家的廚房真係唔咪大, 兩個人企响入面做嘢, 其實已經無位, 無可能再容納多一人.

怎知, 二姑奶又要我老公負責焗雞翼. 大姑奶個女又話要入去幫手, 咁就已經三個.

然後奶奶又要走入去幫手, 放心唔落二姑奶煮. 最後, 入面幾乎係鬧交收場.

我真係唔明:

1. 如果係唔放心, 二姑奶提出話要煮, 奶奶做咩唔一口拒絕呢?

2. 我明, 廚房揸fit人一向都唔like比人搞個廚房, 所以奶奶就一路响到依依哦哦話佢哋搞亂個廚房. 都係果句, 咁做咩唔一早拒絕, 唔比二姑奶煮呢?

3. 要比佢煮, 就全部放手比佢搞, 連買餸都由二姑奶買啦. 都算, 奶奶要幫買菜買瓜, 咁做咩唔响人哋嚟煮之前洗好切好, 就硬係要响人哋煮既時候, 話要洗菜同切瓜呢?

最後, 有一碟送係唔熟囉! 啲菜又煮老咗! 可以話係二姑奶煮藝不精嗎? 我覺得係因為奶奶嘈住晒囉!

點解每一次, 佢都要係做引起糾紛果一個呢? 佢成日都唔放心人哋做既嘢, 然後就叉隻手埋嚟, 又嘈嘈閉, 成日好心做壞事, 啲仔女話佢嘞, 佢就黑面, 然後又講到自己好可憐, 話啲仔女鬧佢.

我真係唔知佢諗咩囉!

大家唔好似為我對奶奶有偏見, 其實現在連我老公都有同樣既感受.

我諗我以後, 都係要帶定"架生", 一去到就走落去跑步好了! 可以離開下佢哋之餘, 又唔會浪費我既時間.

開平雕樓兩天遊

上星期六同日, 同媽媽, 姨姨, 哥哥, 嫂嫂, 同埋老公一齊去咗個兩日一夜的小遊. 哈哈...係响團購買的永安團, 每人$399, 另再加40幾蚊保險, 同$100小費, 都好抵.

之但係, 下次都係唔好買團購, 又或者應該要睇清楚住果間酒店係點先好join.

第一天, 8:00在落馬洲的福田口岸集合, 真係倒屎咁早, 佢哋住沙田都好啲, 我同老公係5:30起身囉.

先坐差不多兩個鐘車, 去到開平的雕莊, 食午餐, 然後比左一個小時我哋响呢度參觀.

 

呢啲係未修緝的雕樓, 成個開平現有千幾幢,
 以前高峰期係有三千幾幢. 多數以鐵做窗, 防土匪

 

雕莊係修緝過的, 比遊客可以上去參觀.

裡面仲有一座已經列入了世界遺產的,
可以入去同上樓, 都幾得意

遊完雕莊, 就去了一個花果世界, 食了啲楊桃.

跟住就去一個地方叫騎樓街, 係開平以前人哋住同做生意的地方, 有啲特產買下.

條河臭到想死 >.<

我同老公, 食完飯休息一陣, 就去咗浸溫泉. 果個地區, 黑到呢....怪不得導遊話有人試過踼爆腳趾. 因為真係黑到唔知自己踩緊咩. 有啲藥用溫泉, 好似人蔘, 當歸, 玫瑰果啲, 我幾乎係要模凹字先知道佢係咩泉. 有啲泉連牌都搵唔到, 啲水又似一氹死水, 都真係唔敢走入去.

玩咗一陣, 就回房等宵夜. 我哋額外比左80蚊要了隻咩泥雞. 都幾好味. 兩條友食晒一隻.

 

 

第二天, 基本上係無活動, 所以食完早餐, 老公就繼續瞓, 同睇之前DOWNLOAD定的卡通片, 我就同媽媽唱K, 老餅歌, 聽得佢唱多, 我都唱到幾首架.

跟住食埋午餐就離開, 坐咗差不多三個鐘車, 返到福田, 呢個好HAE的短遊就完結了.

我的低能吃醋事件

睇到KB篇BLOG, 我想起我一件幾低能的吃醋事件.

 

我樓下果層有個小妹妹, 我估佢廿多歲, 好多時朝早返工都會响lift撞到, 佢係同阿媽一齊既. 咁佢好多時入lift見到我哋都會對住我哋笑同講早晨, 咁其實都無咩嘢. 又不過, 其實依家的居住環境, 啲隔離鄰舍會講早晨, 其實都幾奇怪, 同層都會, 又又不過, 我果層有幾家係你對佢講, 佢哋係唔睬你, 所以慢慢都唔講了. 所以更何況係樓上樓下.

講番小妹妹, 咁有時撞唔到, 行到去小巴站, 又會見到佢. 咁正常人等小巴, 應該係向小巴來的方向望, 又或者好似時下的年青人,都係眼睛不離電話架嘛, 但我發覺每次我哋進入望到小巴站的範圍, 我都發現小妹妹係會向我哋個方响望, 好似响度等人, 期待緊一個人咁, 到我哋行近啲, 佢就又好好笑容咁對我哋講早晨. 我心裡總係覺得佢係等我老公出現囉!

自此, 我就再唔行果邊路, 硬要拉我老公行另一邊路, 唔再經過小巴站. 每次我篤佢行第二邊, 佢就會笑我...哈哈...其實我知都幾低能. 我亦當然知道老公唔會睇上呢個女仔, 因為佢真係好小妹妹一名, 而我哋怎至懷疑佢可能智商係有小小問題(聽到佢一次講電話覺得的). 不過就係唔鍾意無啦啦有個女仔同我老公拋眉弄眼囉!

看著一個人離開 (怕唔吉利的, 請勿進入)

2012. 5 . 4

上星期五正去旺角滙合老公時, 佢打比我話他的叔公危殆, 問我去唔去睇. 其實我就真係唔想去, 因為我只見過他幾次, 其實嘢都未講過一句, 都係長期瞓床, 講唔到嘢果種. 後來, 整完電話, 都係覺得要上去 (廣華, 其實只係隔條街). 上到佢, 佢已經帶晒口罩, 比到最強既氧氣, 心跳都係得番40幾, 姑娘都話應該係果晚就走.

 

八點鐘探病時間完結, 我就同老公去附近打冷, 食到七七八八時, 姑娘又打來, 話叔公唔得了, 問有無人要去睇, 於是我哋食埋啲嘢, 又再番上廣華. 呢個時候, 亦係最大雨既時候 (紅雨). 我哋得一把細遮, 老公係咁怨個天, 做咩我哋想盡下好心, 都要我哋咁狼狽. 我都唔知點安慰佢, 根本個天落雨唔咪指著佢, 咪諗得自己咁重要先得架.

 

上到去, 叔公心跳跌到20幾, 差不多十幾秒先見佢吸一口氣, 姑娘話應該差不多了, 叫我哋陪下佢. 慢慢見佢由十幾秒吸一口大氣, 到十幾秒才郁少少好像吸氣, 個機係咁叫, 醫生走來話, 叔公應該走了, 因為佢吸既氣已經支援唔到佢需要既氧份(其實唔咪好白佢咩意思). 醫生叫我哋出去等, 佢做埋啲程序, 比埋啲資料我哋, 就走得.

 

就係咁, 我第一次睇著一個人的生命完結. 再入番去時, 氧氣罩除下了, 見到叔公個面好凹, 同埋好黃. 原來人一死, 就係咁. 老公話上次佢婆婆走都係咁.

呢個叔公, 其實係好疏, 是公公的堂弟, 但就一直有同婆婆聯絡, 佢無結婚, 所以晚年就只有我奶奶呢一家人睇佢, 而最後佢走, 亦只有我老公, 同我呢個有點九唔搭八既人陪佢 (奶奶入咗camp ). 我心諗, 都好, 超碼都有人陪, 有人送. 咁我呢? 我同老公打算唔生, 我阿哥又係唔生, 老公果邊, 只有大姑奶有一對兒女, 但我同佢哋關係一般 (我唔鍾意同小朋友玩, 所以唔咪點理佢哋). 第日我老公走先, 得番我, 我走既時候會點呢? 我無理由因為想有人送終, 所以就生個仔/女出嚟架嘛?! 所以, 都係最好就係我死之, 耶穌已經回來, 我就不用經歷死亡, 直上天家. 哈哈...諗多咗.