第一次入馬場

擒晚, 公司用的酒店請我去佢哋的APPREICATION DINNER, 係馬場! 當日收到INVITATION, 雙眼發光, 我咁大個人, 未試過响賽馬日入馬場. 沙田馬場中間的彭福公園, 細過去過好多次, 跑馬地, 前幾年去過一次佈道會, 但係跑馬日入去真係未試過, 好興奮! (傻婆一名)

 

放工, 就同埋個同事搭的士去. 我哋入ENTRANCE B的快活看台. 酒店有同事企响度迎賓, 同派馬牌.

 

唓...我以為會係一個好靚的牌, 原來係紙牌.

上到去, COCKTAIL已經開始, 攞咗杯好酸的橙汁, 就出去平台睇馬場.

影番張全景先.

 

跟住見到有啲著住紅衫, 騎著白馬的白馬王子?
 出現....但唔知佢哋作用係咩.

然後開始見到有啲馬响所謂的"沙圈"行嚟行去,
應該係比人睇下隻馬的狀態.

 

本應想影下佢哋衝出閘既情況, 見佢哋仲响個閘前行來行去,
咪睇下其他嘢囉, 怎知, 好突然又好快就有鐘聲,
佢哋就出閘了, 影唔到. 咁唯有影衝線啦! 不過個衝線位都幾遠.

 

跑完第一場, 就見場裡閘附近的工作人員散晒, 仲見到呢班人
响度檢查個草地....十萬個不明白, 唔知佢哋去晒邊,
又以為好快會有第二場. 喔...原來係半個鐘先一場,
成晚只有8場比賽. 哈哈...等我仲以為係keep住咁跑. 仲有, 原來係跑一個圈咋!

見無嘢睇, 就返入大廳等食飯. 每張枱都有個彩票架, 亦有幾份馬既資料, 同埋一張tips, 我哋個廳亦有個投注counter. 我同事買了第二場. 明明tips係話12號, 佢係都話要買8號. 最後12號win咗, 8號跑第四, 佢買位置, 無得分.

 

 

跟住就開餐, 係自助餐. 每人有半隻龍蝦, 都幾好肉幾多膏(肥死), 跟住攞咗半打生蠔, 幾鮮幾肥幾咸. 此外仲有魚生, 同埋其他熟食. 味道都ok啦! 有一味辣子炒肉片, 認真辣喎! 最正係佢哋既蘋果無花果南北杏煲豬肺. 我飲咗三碗!! 最後飽到胃痛咁走

這就是我第一次入馬場食飯睇馬的經歷了! 今日終於知道, 原來要咁耐先有一場馬跑, 怪不得星期日啲賭馬叔叔响馬會玩咁耐. 又原來, 每隻馬每晚只係跑一場架咋! 8場, 每場12隻, 即係96隻不同既馬....唔...鬼認得邊隻係邊隻呢? 又原來, 馬師响一晚則騎好多唔同馬, 可以連續跑幾場都得. 又原來, 馬師的衫, 幾靚, 同埋佢哋都真係幾細粒. 又原來, 其實都好多人係第一次入馬場, 同埋唔識賽馬的玩(賭)法. 問咗好多同我一樣的問題, 好笑! 聽講佢有個聽有自助餐食, 唔駛member都可以book, 搵機會同老公入去玩下先.

情人節小餐

因為擒晚要上攝影堂, 所以星期一已經食了我哋的大餐.

但諗諗下, 應該都夠時間我煮個小餐, 情人節唔据下扒, 好似差啲嘢咁.

於是一放工便狂奔去taste買了兩塊日本和牛漢堡扒(之前試過好好味的, 大家可以買嚟試). 擒日taste多人到癲, 仲好多人拿著牛扒, 原來大家都喜歡自煮情人餐了. 排咗我起碼十分鐘, 便狂奔回家, 煮意粉, 切雜菇 (前日買的). 剛好老公回來, 便叫他跟我合作, 一齊煮. 好快, 就煮好了!

 

好味和牛漢堡扒配蠔油雜菌意粉

 

 

之於花花呢, 都有架! 我哋星期日去咗行花墟, 見啲花貴到發癲, 扎扎都千幾蚊, 慳番食到幾餐好飯啦! 所以就唔買扎好的花, 自己去揀了一扎我好like的黃色洋牡丹, 同一扎綠色的小菊花. 多謝$75, 老公比錢!

 

 

我要美腿!!

自從三年開始跑步, 我條腿好似越來越粗, 粗到有啲boots係要好辛苦先拉得到拉摙. 超灰

前排見爽健出了纖腿襪, 一直心大心細好想買, 但又覺得好貴, 又怕無用, 仲睇新聞話有啲A貨會著到血管出事, 所以等咗好耐都唔敢買.

新年的時候, 趁特價兼用coupon响屈記買了夜晚著的夢之纖小腿襪, 都著了大半個月, 功效暫時未見, 但都有一定的保暖作用, 啱晒我呢啲夜晚腳凍到瞓唔到覺既人.

前排團購有得買爽健的魔幻纖腿襪, 上網再SEARCH 吓有無人試過有comment, 都見到有幾個幾好的comment, 就照買. 團購都幾抵$229有對纖腿襪, 出面買三佰幾蚊加, 仲加送對高踭鞋軟貼. 擒日去開銅鑼灣, 就上去攞, 今日開始著. 佢話適合長時間坐或企既人. 我呢啲長坐office既, 都啱啦! 按高度, 我買了大碼, 但都緊緊地, 哈...我真係幾肥. 之前有人話佢响萬記買了一款日本出的纖腿襪, 但佢話著到抽筋喎! 或者佢買咗A貨啩! 唔好以為係日本出就一定好先得, 爽健做足部保理咁多年, 我信佢多啲囉.

 

 

 

跑馬拉松前一星期, 响樓下的 SIM 記試了容祖兒代言的穴位按摩機, 同老公一致覺得好掂, 真係好鬼痛又好鬼爽. 但部嘢都4千幾蚊呀, 雖則24個月分期, 每個月都唔洗200蚊, 但都係停一停, 諗一諗.
最後馬拉松前一天, 決定去買, 以為會有貨, 等我第二天跑完馬拉松可以用...哈...無貨, 要等到星期二先有. 算啦, 都照買架啦! 上星期二攞了貨, 果晚就試機, 真係幾舒服, 我哋跑後痛, 星期三都無晒了!
個機有TONING 功能, 話可以去水腫, 令小腿出現番完美線條! YEAH!! 希望得啦! 我要美腿!!!


2014/07/17後記: 兩對襪已經唔知去咗邊. OSIM機仲用梗, 非常好用, 不是美腿, 而是每次跑完步按一按, 第二天是完全感覺不到我曾經跑了步(只限半馬以下, 全馬, 按完都仲係有痛, 但痛少兩日.) 

2012情人節

先祝大家情人節快樂! 同你們的愛人永遠恩恩愛愛!!

今日情人節, 喔...要上攝影堂喎! 無得慶祝! 咁擒日要出銅鑼灣, 就不如搵間好啲既餐廳提早食個情人節晚餐啦!

朋友介紹我去TIME SQUARE食通天的798 UNIT, 真係唔錯! 環境好好, 食物都好好.

我哋叫了佢哋HOUSE SPECIALTY 的FISH & CHIP, 同埋烤雞SIDE DISH 牛油炒雜菇, 再加半打田螺做前菜, 真係好好味! 佢個魚炸到外脆內滑, 烤雞亦沒有烤到雞肉鞋到界口, 有肉汁又滑口. 佢個烤雞仲跟了一條超甜粟, 烤蕃茄同烤原個蒜頭, 好有農村風味! 田螺都好好味, 只是下面托底的薯蓉陣味有啲怪, 可能佢撈咗BLUE CHEESE. 菇菇當然都好味啦, 好重牛油香!

 

 

 

 

食到好飽!
返屋企, 喔...個電視睇睇下自己熄咗, 開唔番! 真係好一個情人節surprise了! 無電視既生活....唔敢想像添!

奶奶的奇怪事

好耐無講過我奶奶了!

逢星期日, 奶奶的仔女, 即係我老公, 大姑奶同二姑奶都會回奶奶家食飯, 是多年的指定動作.

昨天, 大姑奶的小朋友好似話考試, 所以佢哋一家都唔返, 二姑奶又唔知咩事唔返, 所以得番我哋. 老公就同我講, 話奶奶提出可以去我哋果邊食, 出街食又好, 屋企食又好, 總之意思就係, 佢願意由葵興過嚟將軍澳啦! (註: 平時約佢去旺角尖沙咀佢都話遠的). OK, 咁佢既然肯咁遠過嚟, 我都唔會待薄佢既, 咪煮飯囉! 仲之前一晚煲落個湯, 煮了四餸一湯啦!

佢大約5:45到啦! 原本我以為早少少食, 老公又話唔好, 話七點幾食, 食到差不多7:55的時候, 都已經大家在飲湯, 呢個時候, 我奶奶話佢要8:00走. 我已經練習到唔比反應了, 但心諗, 點呀, 食完就走, 禮貌上唔咪好啱囉. 我唔咪EXPECT佢食飽要幫我執嘢, 幫我洗碗, 但既然你遠道而來要見佢個仔, 唔坐多陣? 最後, 我响度洗緊碗的時候, 老公就送佢落去塔車. 臨走仲要走過嚟好熱情咁啜咗我一啖! (註, 我係起晒雞皮, 我最怕我老公&媽媽以外的人對我過份熱情).

啜我一啖都無用啦! 做客人唔咪咁. 我媽媽成日到教, 去同屋企人食飯, 唔好咁遲到, 搞到一去到就開飯, 要早少少去, 同人傾下計先啱. 又唔好一食飽就走, 好似食完拍拍PAT PAT就走, 無禮貌. 但似乎佢哋屋企無呢個教育囉.

遊 ~ 香港動植物公園

上星期睇新聞話動植物公園有一對龍鳳胎的婆羅洲猩猩出咗世
, 星期六開始比公眾睇. 咁啱星期六老公短週, 就建議去睇.

 

原來我老公係未去過動植物公園的, 而我, 應該都有廿幾年無去過, 無晒印象到成日以為個公園响置地後面. 原來佢係好近香港公園, 响禮賓府對面.

 

 

 

由於猩猩bb仲係好細, 所以每天只有兩段時間10-11am同埋2-3pm. 我哋2:30去到, 條龍長到無朋友. 不過secure叔叔話2:45先截龍, 所以都睇得到.

 

 

對猩猩bb好得意, 對眼好大, 男的好百厭, 女的就成日攬住個枕頭同被, 好似人咁. 不過人真係太多, 只係望一望, 影兩張相就要走, 讓比後面既人睇了.

 

 

睇完猩猩bb, 咁都行了呢個動植物公園啦! 原來以動物來說, 呢個公園, 只係得靈長類既動物囉! 唔好以為係動物園, 真係只有不同品動的靈長類動物架咋.

 

這是兩隻猩猩bb的媽媽.

 

兩度係有兩隻猩猩, 不斷响度叫, 好似狗咁叫,
好嘈. 跟住仲見有一隻疴屎同疴尿

有啲白胡鬚的猩猩

 

隻隻都瞓晒的黑白猩猩

連石椅子都係猩猩

 

 

如果鳥類都係動物, 咁呢動都有好多唔同種類既雀仔. 之後仲有幾種龜, 同埋爬蟲類. 就係咁嘞!

 

 

 

差啲忘記小花, 佢係幾歲大就開始响動植物公園住的豹, 一路住到死咗, 現在變了做標本

 

 

 

 

今日去公園前, 我哋先去中環, 去咗蘭芳園食lunch, 因為我從未諗過, 所以好想去諗. 結果都有啲失望! 一個公仔撈麵餐要$42, 仲要, 其實味道一般囉! 另外仲叫咗個豬扒包, 舊豬扒超細, 亦唔咪硬豬仔包. 澳門果啲好味好多倍. 唯一, 奶茶真係幾好飲囉!

 

 

比240萬美金我???

今日收到一個很奇怪的電郵. 係一個叫lusee mark的人sent比我. 佢話佢係bank of Africa做的. 內容係話佢哋有一個720萬美金的存款, 存款人一家响一個空難中死晒, 叫我比我的bank details, 聯絡地址, 電話佢, 佢就會分30% 比我, 仲話當我收到啲錢既時候, 會嚟我既country visit 我.

呢個世界, 應該唔會有咁大隻青蛙隨晒跳囉. 就算佢全家死咗, 都總有啲親屬會承繼到筆錢囉, 就算無, 銀行應該會捐比慈善機構囉, 點會隨便send個email比個响地球另一邊又"無里啦間"的人呢.

睇完真係覺得好好笑, 跟手就delete咗了.

又完成一次馬拉松

昨天完成我第二次的馬拉松. 繼續都是跑半馬. 今年出賽前沒有上年練習那麼多, 仲要一連兩個假期, 鬼咁多節目, 又食鬼咁多嘢, 負重增加, 所以感覺跑得比上年辛苦. 記得上年朋友問我係咪西隧果段時辛苦, 上年都唔覺, 今年一出西隧就想死. 又不過, 上年係第一次, 所以成日行下又影下相, 今年我沿途一張相都無影, 仲要一口氣跑到西隧先第一次慢下來行咗一陣, 所以真係幾攰.

今年過西隧後, 上天橋的次數好像少了, 所以果段路感覺又比上年好.

我記得上年時間係2小時38分. 今年因為練少咗, 都唔敢希望可以快過上年, 但因為上年跑得太唔專業, 今年決定專業番啲, 唔再影相同行, 所以又希望可以比上年快少少.

最後, 根據我手錶的計時, 我係大約2小時28分完成. 如無計錯, 足足快了10分鐘. 都算不錯!

 

跑完後, 面色超紅潤囉! 因為擒日都幾曬. 由尖沙咀往葵涌方面就曬背"隻", 轉了彎後就兜口兜面曬正面, 加埋跑咗兩個半鐘, 紅晒!

老公跟住就去維園等我, 但佢話搵唔到路入去, 所以係皇室堡出面, 都影咗幾張相. 跟住我衝線後就大獲, 我估銅鑼灣擒日除了車路塞, 電話網路都大塞車, 我起碼係要打10次先打得通一次, SMS又唔得, WHATSAPP又唔得, 搞好耐先會合到佢. 當然佢好想發脾氣. 但係發都無用, 唔咪我想. 結果就成晚話以後都唔會再去撞我衝線. 好唔開心. 我個FD 年年都去接佢老公衝線, 今年仲抱埋個兩個月大的囝囝去. 對住我老公, 灰爆.

 

好有趣在人哋的ALBUM找到自己, 佢中8點幾開始企响西隧門口一路影到1點, 仲好細心分類好. 咁啱我入西隧前MSG了我老公話佢知我入西隧, CHECK番個時段, 去番佢個ALBUM睇, 好快就搵到. 佢就正正是我响西隧入口對住佢 V 影相果個.

過兩日再多啲人POST相, 再搵下有無其他先.

下年仲跑唔跑? 唔咪好想再跑了, 真係好辛苦. 擒日下午同今日, 對腳唔知想點囉.

睇下年尾報名時的狀況先啦.