123的騙局

自從06年返香港, 我一直都係123的客戶, 咁啱我老公都係, 大家都好忠心, 一直都無轉, 因為一直都覺得佢價錢好, 亦接收得好, customer service亦不錯.

 

最近, 老公個plan差不多完, 佢見我個機慢, 想問下如果續約加出機, 貴為忠心的客戶, 會有咩著數, 結果出來都真係幾搵笨.

 

佢現在的plan係$23x, 唔咪無限數據上網, 所以佢想upgrade做有得無限上網的plan, 咁新plan會係$267一個月. 如果想以佢哋所謂的"零機價"出部愛瘋4或加力士或新力arc, 就要join佢哋個$419plan了, 要簽24個月. 當中比就咁upgrade個plan的差額係 $419-$267=$152, 而且仲要迫你加$38 x 12個月果啲無謂的增值服務. total兩年後, 我比就咁upgrade個plan要比多的錢係 $152x24 + $38x12 = $4104.

 

奇怪在這裡...咁其實我叫做享用到那所謂的"零機價"嗎? 我其實係要機多付4千幾蚊, 我應該响出面都買到部機有突. 就住呢個問題, 我問sales 話呢個優惠, 其實我係自己供緊機, 何謂"零機價". 佢既答案話:"咁你唔駛預繳嘛!" 跟住佢再話:"如果你出個新號碼, 可以免兩個月台費添!" 我再問:"人哋預繳, 係跟住有回贈, 响月費比番你, 最後出來就balance番所以叫零機價, 我join你$419個plan, 你無回贈比我, 其實我係供緊機喎. 我出面都可以免息分期買機, 唔洗預繳再等你退, 點都唔係零機價囉. 我唔覺我呢個現有客戶有咩優惠喎! 仲有我出多個號碼要來做咩? " 佢笑住繼續話: " 咁你唔洗預繳嘛!"

 

唔該晒! 係佢唔識計數定我計錯數呢?

再講埋, 我上年續約時出了現在部機, 又係要我join一個$38 x 12個月的增值服務. 無可選擇地我揀了movie. 果啲movie舊到呢...係唐伯虎點秋香果啲年代既戲囉. ok, 唔緊要, 都係當娛樂啫. 但其實我都係無咩點睇過, 一來我唔會咁辛苦拿住個電話仔去睇戲, 二來, 佢data接收唔咪真係咁流暢, 係狂窒的. 最後, 我係沒有完成過任何一套完整既戲. 而更好笑係, 中途, 大約半年, 我個電話壞咗去整, 整完番來連入去睇movie個icon都唔見埋, 睇都無得睇. 晒氣. 最後仲要千萬記得在第11個月時打去cancel呢個服務喎, 佢係唔會打比你問你要唔要續. 如果你無cut, 咁就繼續比錢啦! 最後, 我當然係好醒咁係第11個月時打去cut了呢個服務.

最後, 我得到的結論係, 唔好對123咁忠心, 當滿約時就帶號碼轉台, 到再滿約時才睇下佢有咩優惠先再返來, 因為佢哋係唔重視我哋呢啲忠心既客戶的.

誤會真係好容易發生

呢幾日有件事都幾困擾我.

話說我哋有一group九人, 咁通常都會搞生日飯. 上次七月我老點了另一個fd搞, 我感覺上佢唔咪太like我點佢約. 咁今次九月的生日飯, 我搞囉! send email比大家問大家日期, 又問下兩個壽星有咩想食. 當中我亦講話我有鴻x酒樓的coupon可以响它旗下集團的餐廳用, 叫他們可以睇下有無興趣. 我強調, 我無一句說話係叫佢哋只可以响我提議的餐廳揀. 怎知, 有一個fd覆了個email, 好得體咁話 I love most of your suggestion, but i would better let the birthday star to choose their favourite. 我睇完, 感覺唔良好, 覺得佢話我唔比啲birthday star揀. 我再強調, 我真係無講過要佢哋只可以在我提議的餐廳揀. 我有咩理由一定要佢哋用我的coupon先? 係咪我出了coupon, 可以當日當現金洗先? 究竟係邊度出咗誤會令人覺得我迫佢哋揀我提議的地方同用我啲coupon, 唔比啲壽星揀佢哋想食既嘢先?

跟住好啦, 我同我老公講呢件事, 我話, "我仲offer了一pair couple, 我可以幫佢哋去油塘接仔, 因為如果係約係沙田(其中一個壽星在我的list裡話沙田有一間有興趣), 我會路過油塘, 可以幫手". 我同我老公講呢件事, 佢又話我做咩理人, 人哋可能唔想帶仔出來. 大佬, 我又幾時話我要佢哋一定比我接? 我只係話, 我offer了呢個help比佢哋, 如果有需要我可以幫手. remark, 因為我同呢一pair人都幾熟, 佢個仔係幾跟我, 而亦知佢哋通常都一定會帶仔出來, 我先會講呢個offer. 我又講咗咩令我老公誤會我要迫佢哋比我湊佢哋個仔呢?

ok, 好啦, 啲人覆得九九十十, 係差兩公婆未覆. 個老公係壽星之一, 都唔覆, 想點. 咁我星期四搵過個老婆一次, 電話唔通. 星期五又搵一次, 唔覆. sent sms唔覆 (也所以令我出了上一個post), 終於星期六覆咗, 我問佢果餐飯點, 差佢哋未覆咋喎! 佢話"係咩...我以為我老公覆咗!" "咁我同佢傾下先" 到今朝我見佢哋兩個都仲未覆, 我就係msn搵到佢老公, 就問佢哋點. 佢又答"未答咩? 我以為我老婆覆咗!" 妖...點呀, 佢哋兩公婆, 呢啲係咪叫拉貓尾呀?!

呢個咁既生日飯局, 越搞越多誤會, 搞到我好唔開心. 搞到我自己唔想出席. 最後仲係唔提議去邊度食的話, 我就是但揀間酒樓, 幫佢哋book好位, 到果日就搵個藉口唔去. 費事去到我情不自禁面黑就唔好嘛.

唔知你哋有無試過咁

唔知你哋有無試過咁呢? 就係有啲朋友, 明明好好地, 但係有一日, 會突然間消失, 你响msn或fb hi佢, 佢哋係唔會應你.

好似我之前份工, 識了個sales, 好好傾, 咁佢要生仔, 放假, 仲叫我加佢fd, keep contact. 咁有幾次我响fb 見佢online, 咪hi下佢囉. 唔應. 一次係咁, 兩次係咁, 算數! 都係想問候下佢啫, 唔睬咪算啦!

咁我當佢係sales, 無關係就唔睬人. 咪算囉! 但係有一個朋友, 我哋平時係好少聯絡, 以前佢公司仲比msn時, 我哋成日都傾計, 其實係好fd的. 但自從佢無得msn後, 就少傾了. 我知佢平時好忙, 好多時都係好夜先放工. 咁有時我係fb見到佢online, 就會hi下佢. 但又係, 兩三次都唔應. 咁就算了.都唔知咩事.

跟住有一個舊同事, 一路都有聯絡, 我last day, 佢都仲回來同埋其他同事同我farewell架喎! 我好錫呢個同事, 佢小產過兩次, 但又好想有bb, 我成日諗起佢, 就會為佢祈禱, 希望佢可以快啲有. 現在佢有咗, 好替佢開心. 但唔知點解, 無端端佢對我又冷淡下來. 因為佢唔駛做嘢, 所以日子都係得閒, 會週圍出去搵人食飯, 我都有叫佢過來搵我, 同埋以前個茶水阿姐飲茶, 但一直係哦完就算. 有時send msn比佢, 又係唔睬, 叫多幾次都唔睬, 咪又算囉...可以點啫!

最近有個朋友, 以前佢成日搵我, 有時一放工就會打比我, 有咩激氣事都會打比我同呻. 但呢幾個月, 又係消失咗喎! 呢幾日我搵過佢, 一係就直飛留言, 一係就長响無人聽, sms佢又無覆. 真係唔知發生咩事!

通常遇到呢啲情況, 我就會諗, 係咪我做錯咩, 講錯咩, 激嬲咗人呢? 無吖...其實連見都唔多見, 又可以做錯咩講錯咩啫. 但係呢啲情況, 就會令我好不安.
 

原來放假都幾煩

難得一天放假, 本應好想好好休息下, 又或者同老公仔逛下hea下, 怎知中秋節果一日的假期, 真係令我覺得莫名奇妙的煩!

 

前一晚, 已經問我老公放假想點, 佢又係話想去睇一睇佢阿媽, 其實星期日先見完啦, 做咩又要見. 好...我知佢, 放親假都覺得自己阿媽會好悶, 所以想去睇一睇佢 (咁佢老婆呢? 佢又知唔知佢老婆都覺得見到奶奶好悶呢?). 咁我就話, 可唔可以同奶奶講, 一人一步, 唔好次次我哋都要搭個幾鐘車去葵興同佢飲茶, 一人一步, 去旺角或尖沙咀飲呀? 奶奶一句就話唔去旺角唔去尖沙咀, 再者佢約了二姑奶在荔枝角飲茶, 好啦! 咁我哋去荔枝角join埋. 我老公....佢咁想見佢阿媽, 應該都好多傾計啦..妖...無嘢講, 各自各睇住部電視. 問佢食咩又唔望, 唔叫. 食完走, 問去邊, 又一面無奈. 之前又話想去赤柱行下, 咁咪去囉! 但一個面口show出來就係"我覺得阿媽好可憐, 又要回家自己一個"...ok...咁你唔出聲, 我犧牲吓, 同奶奶講了一句好唔願意講的說話, "我哋原本想去赤柱, 你有無興趣一齊去呀?" 奶奶第一句係話唔去, 諗諗吓, 又講"如果要去, 我要返去換鞋換衫." 最後擾擾攘攘, 佢哋兩個吵了兩句, 奶奶就回家, 我哋就去了行單車鋪, 咁住再會合另一pair朋友, 去咗行花虛, 再回我哋家hea下, 跟住就樓街晚餐. 就咁就白白浪費了一天的假期, 一啲有意義既事都無做過.

以後, 再有咁既假期, 就請我老公自己回去慰問他媽好了. 佢覺得佢阿媽可憐一個人, 其實我阿媽都係. 我唔咪介意去同佢飲個茶先出去活動, 但真係希望佢可以讓一步. 每一次我約我阿媽飲茶, 都係叫佢出旺角. 有時候, 我兩去遠啲既地方行吓, 例如有一次去大澳, 我一叫, 我阿媽就爽爽快快咁話去, 唔會扭扭擰擰囉! 我奶奶, 唔行得, 唔晒行, 唔熱得, 但其實佢只係大我阿媽兩年咋喎!

飲茶既時候, 奶奶仲講話退休的生活, 佢係覺得悶到要用辛苦來形容. 老實講, 辛唔辛苦, 真係心態既問題. 我阿媽都退休, 但佢每天都過海同friend飲茶, 去學唱歌, 學跳舞, 成日去啲老人院唱歌跳舞比啲老人家睇, 現在又學二胡, 之前又去學電腦, 佢既schedule比我仲忙. 呢啲叫做心態好, 就唔會覺得悶, 唔會覺得辛苦. 如果個心成日覺得自己唔行得, 唔晒得, 唔熱得, 成日覺得自己好弱, 隨時會暈低, 咁呢啲人一出街應該一見光就暈低.

唉...一諗起奶奶, 已經覺得好煩好悶, 好厭悶!

偏心?

究竟人越來大, 係咪越應該要睇開啲? 定係人越大, 因為積得太多太久, 所以更睇唔開呢?

 

擒日去奶奶家做節, 如我一早預料, 依然係要吵一鑊先開心的, 正如emilyss講, 比中六合彩更易中的一個盤! 慶幸是昨晚只是小吵, 為咩吵, 真係小事到我都唔記得個源頭係咩. 我只係知, 兩個姑奶, 奶奶响廚房幫手的時候, 我站在門口等傳飯, 大姑奶無啦啦講起偏心, 話二姑奶成日話奶奶偏心個家姐, 兩個姑奶就無啦啦吵起來了. 我見勢色唔到, 就梗係出番去, 跟住佢哋三個响裡面嘈了一陣, 兩個姑奶就面黑黑咁出番嚟, 坐係度, 然後大家見到咁既情況, 亦靜靜咁坐晒响度等奶奶出來開飯!

今日, 我家做節, 全世界去外婆家. 外婆無啦啦打比我, 叫我打比我媽, 叫我媽唔好嬲. 我外婆的版本係, 佢約了我媽在火車站攞煲, 結果遲咗好多, 又話個鐘唔啱, 又話個工人唔出門口, 所以遲. 跟住我咪打比我媽, 我媽的版本係, 佢約了阿婆在火車站比煲, 結果等咗好耐都無出現, 打去阿婆家, 原來响屋企, 因為我大表姐上咗去. 我阿媽就起火, 永遠阿婆其他仔女, 其他孫一去搞佢, 佢就唔會記得我阿媽呢個女, 話我阿婆偏心, 話今晚唔會上外婆度食飯, 叫我哋自己去.

其實都各自成家, 咁大個人, 仲係度為老阿媽偏心而唔開心, 仲係度爭竉. 係咪應該睇開啲呢?

現在都唔知點. 無理由讓我阿媽一個自己過節, 所以打算我同老公就回去同阿媽食, 就派我哥同阿嫂做代表去阿婆家食. 唉...點解啲大人嘢, 永遠都係要咁令啲細既難做呢?

澳門兩天遊

老公的一對朋友買了澳門平船飛, 就到期, 就在剛剛的星期六日去了澳門短遊.

因為大家都唔想用太多錢响住方面, 只係一晚, 所以便搵了間意想不到的賓館...(唔好意思, 因為懶, 所以要太家打側個頭睇相)

 

房間...係一間5人房間, 三張單人床, 一張碌架床. 床板超硬, 都唔咪問題, 問題係枕頭太扁, 我同老公都瞓到頭痛.

 

 

走廊...小小屋企feel, 應該叫民宿會好過賓館.

 

樓下入口, 要行樓梯上三樓. 好似幾有格調咁.

今次去澳門, 沒有什麼地方要去, 其實都係打算hea下, 去食下嘢. 原本打算換11am船, 怎知無位, 最後搭9am船, 比返工仲要早起身

一到步先搭新葡京shuttle, 再去我哋的賓館check in. 然後去食瑪x烈葡撻, 賓館在隔兩條街之嘛.

跟住就打算行去新開的科學館. 行到永利覺得唔對路, 便搭永利shuttle去港澳碼頭, 再轉金沙shuttle. 科學館就响金沙出面. 好方法, 又慳番啲錢.

個科學館都幾好玩. 裡面有好多益智又新奇既玩意可以玩. 我哋班大人都玩了個幾鐘. 因為要趕睇3D電影, 所以先早啲出來. 不過早知唔睇好過, 佢哋3個睇到瞓咗...而我就睇到差啲嘔. 個3D眼鏡對焦好差

跟住就搭巴士去新馬路, 去食久仰大名的添x碗仔翅. 超...味道不外如是, 同香港街邊碗仔翅差不多. 都唔咪問題. 以幾廿蚊食幾小梳翅, 算啦! 最大問題係啲姐姐啲態度, 真係想打佢兩巴!

跟住朋友女就帶我哋去了一間叫文化會館的東西, 其實係舊史果啲檔鋪. 我哋都係第一次入檔鋪, 仲要係入到裡面人哋方押檔貨物的地方, 又幾得意.

 

 

 

從掌櫃坐的地方看出去.

跟住去食胡椒餅...同一間, 兩年前食過覺得係極好味, 但今次食...唔得! 失望! 最後無地方好去, 便走去九如x食dinner. 一如以往, 都ok. 好味!

咁啱大三巴呢排有個我名它為"幻彩fing大三巴"的show, 仲要係尾二晚, 八點開始, 就早半個鐘去等. 超多人, 但都好好睇. 其實係放燈投影去大三巴個牌坊上, 做出不同的效果. 不過做得幾好睇, 例如有一幕係講大三巴果時被火燒的情景, 好真實!

九點幾就返到賓館, 我十點幾就瞓...因為星期日...又只換到1:15船走, 所以要七點起身!

星期日check out後坐車去水上街巿食蟹粥. 係新假期之前介紹的隱世好味食巿. 試過, 又真係幾得.

 

 

 

入面起碼有十隻蟹. 呢個水上街巿又幾得意 , 咁早, 有好多人响度食海鮮, 係炒蟹炒蜆炒瀨尿蝦果種海鮮. 好豪的早餐!!

食完就坐巴士去氹仔. 行官也街, 原本想食木槺布丁, 但我食開好好味果間無開, 唯有去好多人排隊那間...唉..唔食好過食, 15蚊得果兩啖, 又唔咪特別好味, 好唔抵.

跟住最後一站係食魚翅麵/飯, 都ok好味. 老公話鯹..我就ok. 落多啲醋咪得囉!

最後我哋又行去威尼斯搭shuttle去氹仔碼頭! 我哋幾盡用澳門的shuttle!