擒日講完兩單奶奶既小家嘢,
今日講埋事件的始作俑者
--- 伴郎
話說當年做老公伴郎的C君,
職業為律師樓的LE,
而佢律師樓係專做樓宇買賣,
亦即係,
佢係超熟識樓宇買賣既事情.
我哋final再睇樓當日,
叫埋兩個媽媽,
老公亦叫埋呢位C君,
話等佢幫下眼睇層樓,
同埋如果真係簽約,
佢都可以幫下手.
我哋約11:00.
我老公因為要返工,
所以遲少少.
而條死仔C君
(當日是星期六,
他不用返工),
最後我老公到咗,
佢都仲未到,
到咗,
就週圍走,
週圍搵都搵唔到去,
搞到我哋在樓上等既人超尷尬.
人家舊業主早餐都未食,
諗住好快搞掂,
結果我哋一班人响樓上等佢兩條友仔,
阻住人.
明明唔洗返工,
又應該知我哋約了11:00,
做咩唔準時?
佢係咪覺得我哋買樓好巴閉,
人哋係應該等?
因為佢遲到,
我已經好嬲
(我係好憎人遲到的).
上到嚟,
行嚟行去,
講嘢一舊舊(佢一向都係咁),
唔知佢想點,
叫佢睇臨約,
問佢有無問題,
又支吾以對,
無啦啦又問做咩咁遲收樓,
咪一早講咗佢知我哋要週轉下啲錢.
跟手又問,
做咩比大訂又咁遲,
咪又係講咗要集資囉…..佢瞓醒未呀!!!!! 人家賣家都未出聲做咩咁遲佢哋先收錢(好明顯係傾好咗架嘛!)
佢呢個旁人好似乜都唔知上嚟白撞咁.
簽好臨約,
就搵律師啦!
咁既然佢做得賣買樓宇的LE,
應該會有人介紹.
佢無介紹佢做開果間,
但介紹了佢師傅比我哋.
同時間,
我又同個同事閒談講開我買咗樓,
佢就好熱心咁介紹了佢相熟的律師比我,
仲報埋價 <==
呢啲先係朋友
我哋一買一賣兩層樓都打算比一個律師搞掂,
所以講梗都大約一萬的律師費,
唔咪講梗二佰蚊,
格價都好正常啫!
咪都問下C君我同事介紹的律師好唔好. 挑….條死仔玩小器,
話我哋唔信佢,
唔用佢介紹既律師,
同我老公講話有嘢唔好再問佢喎!
頂佢個肺,
男人之家,
有無咁無聊咁小器呀! 仲要講梗佢係做我老公伴郎,
應該係好FD既朋友,
都為咁小既事玩小器?!!
討厭到不得了,
再嬲多佢一錢.
到2月要上律師樓簽約同比大訂,
上篇咪話我哋上到去先知有兩種契既.
大家睇到呢度,
睇唔睇到問題出現响邊呢?
難得我哋有個專做樓宇買賣既LE朋友,
我哋買樓應該係會好順利,
唔會出現上篇既奇怪事.
係咪我對朋友既要求太高? 我將我既standard預先加咗落去其他人度,
所以先會失望同咁嬲呢??! 我作為人哋既朋友,
朋友有事相求,
我係會好盡心盡力,
以我識既,
知道既去幫我既朋友.
將心比己,
如果我係一個LE,
我朋友要買樓,
又知道朋友係第一次買賣,
我會好details講比我朋友知成個買樓既程序,
亦都會話比我朋友知有兩種契.
好明顯,
佢無咁做,
無講過比我哋知有呢樣嘢.
如果佢一早有講,
叫我哋諗定揀邊種契,
當日咁尷尬既場面就唔會出現. 好彩我媽都有啲修養,
無發爛鬧我奶奶睇低我哋屋企,
如果兩個阿媽為呢件事响律師樓嘈,
我真係無眼睇. 或者…撻訂唔買啦!!
呢件事後,
我無再見呢個C君,
亦好明確同我老公講,
我以後唔會再見呢個人,
佢要同佢出去食飯,
佢自己去好了,
我唔會JOIN.
我係堅嬲的.
