買樓前中後傳

話說一月中, 我都買咗樓

前傳:

話說我同老公現在住的地方是奶奶跟二姑奶買的, 原本她租出去收租, 後來我哋結婚, 就給我哋住, 老公象徵式地交租給奶奶, 幾多錢, 我唔知, 佢自己跟他媽媽deal.

這是一層居屋, 好似是06年跌一跌巿時以好荀的價錢買入, 上年年尾是已升了一倍.

於是二家姐便心痕, 好似想賣!

仲講到好完美的….賣了將軍澳居屋, 奶奶又賣了葵興的居屋, 大家搬到美孚(因為我哋都很喜歡美孚), 買兩個單位, 一個我同老公, 一個奶奶, 住近些好照應.

後來, 美孚放的盤不多, 亦不合心水, 便轉移到西九-四小龍(二姑奶住這裡)

當然, 更加看不中, 又貴又細

傾傾下, 便變成, 奶奶賣葵興, 賣樓的錢比我哋做首期, 在將軍澳買多一個單位我哋住, 奶奶便住我哋現在的居屋

好快….便睇中了, 高層(望到西頁銀線灣), size ok, 裝修亦好ok, 價錢都ok啦!

業主亦好好, 我們1月中睇中, 他們都肯遲比我哋遲到5月先交吉, 等我哋有足夠時間賣葵興, 先會有錢比首期.

好….扑鎚簽約.

中傳:

2 月上律師樓簽約, 兼比大訂. 這裡有一件令我很嬲很嬲的事發生.

原來買樓有兩種約: 一種叫長命契, 另一種叫分權共有, 詳細的分別, 自己睇(http://lifestyle.etnet.com.hk/column/index.php/family/familycourt/11127) . 我只說, 關係密切如夫妻的, 是應該用長命契的.

可是當天上到律師樓, 我哋先知道有這兩個選擇. 當日, 因為奶奶亦要簽她賣樓的約, 而我媽則幫我比開支票比大訂, 所以兩個媽媽都出現.

一講到選擇用那種契的時候, 便出現了超級勁尷尬的事情. 我哋問律師(其實係好無聊多口地問了一句)如我同我老公一齊死, 我哋又無仔女, 又如果我媽已經不在…那…層樓會落入邊個手裡? 答案是我哥哥 (yeah…放煙花).

可能我老公影響了奶奶, 奶奶立即說唔可以, 唔可以用長命契….(well 好似我哥好恨佢層樓咁.)

因為佢哋男家覺得唔多唔少都拿了二百萬給這層樓, 沒理由最後會落入我哥手裡…(well…她應該真係覺得我同佢個仔不能同月同日生, 點都要同月同日死.)

律師話, keep好啲首期証據, 供樓証據, 証明到層樓佢哋男家佔大部份, 都可以打官師拿回來.

Anyway, 最後, 用了分權共有, 更是佢哋六, 我們四.

大佬, 我阿媽在場架! 佢即係咩意思呢? 現在發生什麼事? 我們黃家好恨你們陳家的樓嗎? 我們沒有嗎? 我媽有三層樓, 將來她不在, 我同我哥基本上都有層半, 我好恨嗎? 好討厭好討厭…我會記住的, 我好小器.

後傳:

葵興的樓交吉了, 佢哋收到錢, 要準備好啲錢過入佢個仔的戶口, 預備比錢.

擒日去奶奶度食飯(現在奶奶住在大姑奶屋企附近的另一間屋), 奶奶跟阿仔傾錢的安排, 突然叫了我過去, 問將來供樓是怎樣. 我哋話是由我戶口去供, 佢個仔每月過他那份去我戶口. 她問我哋為何沒有聯名戶口. 因為沒需要.

她: 咁樣唔咪咁好, 你哋唔咪一齊借咩?

仔: 係一齊借, 有個戶口比銀行扣錢就得啦, 有咩關係?

她: 咁樣唔咪咁好

我: 因為我戶口keep住有多啲錢, 萬一他遲咗比錢, 戶口都有錢比銀行扣 (佢應該好清楚佢個仔是月光族). 佢無蝕底.

仔: 即係好似大家姐層樓, 佢比錢落大姐夫戶口, 由大姐夫戶口供一樣

她: 唔係咁, 你哋都唔明, 咁點樣知層樓你(指住佢個仔)有份供? 你大家姐係有簽咗張紙証明每月佢有過錢去供樓…..

我(心諗): 明咗!!

然後我反住眼咁行開咗, 唔想同佢再講落去.

又係咁, 依家做咩呢? 我好恨佢層樓咩? 係咪即係萬一如果佢個仔死先, 我係要比番個首期佢, 比番佢個仔供過既錢佢? 都已經揀咗分權共有啦, 佢六我四, 仲想點? 就算佢個仔死先, 佢哋都係有六啦! (well其實唔係, 如果佢個仔死先, 佢果六成會去埋我度)

我真係唔明佢諗咩? 佢好驚我哋會離婚? 佢驚我會帶走間屋? 佢驚咩呢?

我只係知, 我好嬲, 狗眼看人底. 我都未擔心佢個仔唔比錢供樓要我供晒, 我都未擔心佢搞小三小四小五, 將佢果六成分晒比人, 第日我要同三四五去爭屋 (長命契係唔可以將樓分比小三小四小五, 但分權就可以). 佢一個老人家, 驚咩?

再一次, 我好嬲, 我會記住的. 我好小器.