北海道 – Day 3 – 富良野

北海道 – Day 3 – 富良野 (Feb 6, 2014)

起身…原本係應該去三角巿場食蟹做早餐, 點知前一晚餐老闆娘講三角巿場貴呀, 介紹我哋去另一個LOCAL人啲既巿場, 結果…被騙了, 未開. 結果無早餐食便要開車去威士忌廠, 沿路又搵唔到嘢食, 去到威士忌廠餐廳都未開, 每人啪了罐粟米湯, 便去試酒.  有15年同20年既威士忌試, 我就麻麻, 太苦了, 都係啲水果酒啱我啲.

 

離開威士忌廠前, 見出面啲雪咁靚, 梗係叫第一次見雪既老公玩下, 整天使啦!! XDDD

 

離開返札幌既路上, 靠住海行, 見到既景象, 我覺得自己似去咗北極, 啲上有啲冰川既咁覺, 好靚.

原本book了雪印既tour, 點知遲到咗成30mins, 呵, 佢又比我哋入去喎, 但原來佢係比我哋入去插入原訂時間既tour, 即係我哋入去已經係尾聲了, 睇咗好少嘢, 就帶我哋去間房, 有包乳酪, 一舊芝士, 同一件玩具比我哋. 

 

跟住去大通公園附近的二條巿場訂海鮮, 走之前果日再回來拎. 然後去咗狸小路, 食咗碗拉麵便又起程, 去富良野.

好多人去富良野都係睇佢既花海, 但估唔到, 鋪滿雪既花田 = 雪海(?), 一樣咁靚.

 

 

回酒店放低行李後, 便出去食飯, 是日晚餐sabu sabu, 食飽飽就去森林靈精村, 我最想去既一個地方. 一間間木小屋, 加埋啲燈燈, 同雪地, 好夢幻. 每一間小屋都係賣各有特色既手工藝, 木的精品多啲, 而貓頭鷹既嘢尤其多. 本身我怕怕地貓頭鷹, 但經過日本人童心既外造, 隻隻都變得勁可愛, 唔覺意都買咗幾舊木頭貓頭鷹回來. 嘻…

 

是晚住既酒店, 响滑雪場. 間酒店好得意, 係以貓頭鷹做主題, 毛巾拖鞋鎖匙, 周圍都有貓頭鷹, 仲有溫泉, 咁鬼凍, 浸個溫泉先瞓覺就最好.

 

北海道 – Day 1 & 2 – 支芴湖 + 小樽

二月的時候, 去了一轉旅行, 我的第一次去北海道!

北海道 – Day 1 & 2 – 支芴湖 + 小樽 (4&5 Feb, 2014)

第一天我哋搭下午機, 經東京, 去到北海道都已經十點幾, 住千歲機場附近既酒店, 到酒店都十一點幾, 附近食既店都閂門了, 最後每人一個杯麵, 便是我哋在北海道既第一餐.  北海道真係堅多雪, 堆在路旁既雪已經有人咁高了!

第二天一早去攞車, 然後便直駛支芴湖, 一個好大, 見唔到對岸既湖. 咁啱有雪祭, 有一座座既雪屋, 有面都有啲好得意既嘢睇.



雪住咗啲魚既冰和痴滿錢幣既冰

 

仲玩了冰滑梯, 好好玩!

 冰條樹

好多雪人…基本上七日行程, 去到邊都會見到雪人, 好可愛, 一個令人充滿童心和很開心既地方.

 跟住便開車去小樽. 沿路見到好多有趣既嘢….

好似一層層蛋糕既雪

 

到了小樽, 便到運河行行, 又到果條好多玻璃店同本製品店行, 太多太多精品擺設都好靚好靚, 最後都係要影底當買咗.

  

 

晚餐食我渴求已久既三文魚子飯同海膽飯, 一個set滿足了我既願望.

 

食飽飽行回酒店時, 超大雪, 又凍到癲咗. 大雪到呢, 我哋眼睫毛眉毛都”long”住雪, 成面成身都係雪.

上酒店前見對面有條步行街, 走入去望望, 竟然比我哋見到有果啲日劇成日見, 細細間每間坐五六人既屋台(居酒屋係咪會明白多啲呢?)

 

於是上到酒店解凍, 坐一陣後又再落去. 一條小路有十間左右的屋台, 但只有四五間有開,全部都滿坐. 好彩地有一家剛好有兩個人走出嚟, 我哋便走入去. 老闆娘超熱情, 有兩個女仔是從東京來的, 另有一個不斷揀女仔既伯伯, 同一個唔出聲既宅男. 伯伯走咗後, 我哋開始同東京女仔傾計, 又同老闆娘傾計. 最搞笑係, 走既時候, 老闆娘送了件長袖好厚的米奇老點圍裙比我, 佢話我係wife, 要煮飯, 所以送件圍裙比我. 我哋又同東京女仔影相同交換了facebook. 好開心.

二月

基本上二月一開始就無停過, 到依家先至回魂.

二月頭唔洗講就梗係新年啦! 今年新年都夠悶爆啦! 其實以往都係悶, 因為所有拜年事宜都是在初一全部完成, 早上先去奶奶度斟茶佢飲, 同佢食早餐, 然後去我媽度又食, 再一齊去阿婆度再食和跟各親戚拜年, 跟住便又再返奶奶度繼續食.

 

但今年, 婆婆被阿姨俘虜了去美國不回來過年, 人生第一次新年見不到親戚. 好既係, 唔洗派利是比啲超齡唔結婚既表兄弟姊妹, 唔好既就有啲無奈親戚一場無咗阿婆响度便連過年都不見面.

初二和老公跟奶奶出美孚同一個响澳洲回來既叔婆飲茶, 然後上佢去個女既屋企, 佢哋傾計, 我就發呆.

初三夜晚去東涌, 老公FD的家食盆菜, 我都係發呆, 因為我堅同佢呢班FD唔夾, 無嘢講.

初四執行李第二天出發北海道....

之後的七天到10號才回港. 我都算是一個雪女吧! 有一次同FD去東京呢個一年先落兩三次雪既地方, 因為同我去, 佢便有機會睇到人生第一次落雪. 這次, 我直頭係帶住啲雪過去, 當東京落雪落到痴咗線既時候, 北海道都唔少嘢. 我老公好開心啦! 佢又係第一次睇雪. 我自己都好impressed, 以前在美國都見過好多次雪, 但一望無際既雪田都真係第一次見.

回來後都未回魂便要跑渣打馬拉松, 今年仲要係跑全馬. 去旅行成個星期都無練習, 仲要無啦啦帶雪去北海道後, 啲凍竟然跟住我番嚟, 仲係堅凍成個星期, 仲話星期日有雨, 超擔心.

但超感恩地, 星期日突然回暖, 氣溫去番14-18度, 一個非常十分之適合馬拉松既溫度, 兼有風, 唔濕, 亦無落雨. 好順利亦狀態大勇地以4:16:23完成我人生第二個馬拉松, 第一個渣打全馬, 比上個全馬足足進步咗24mins. 終於攞到呢個渣馬牌.

 

腳仔今日已經完全recovered, 魂魄又歸位, 今早便在公司整理下啲旅行相, 可以準備寫遊記了.