血光之年

絕對不是迷信, 但又真係奇怪今年有得多意外喎! 重災區是雙腿!!

自小運動, 游水算是最精的, 踩單車亦頗精因為自小在沙田長大, 繼而應該都算是跑步, 這一開始跑步便跑了七年! 各樣運動多年來都一直玩得安全至上, 怎至上年參加三鐵, 在鹿頸大斜路來回數次也未出意外, 但今年意外卻接二連三.

先是年頭相約跑友在第二主場沙田練跑, 無啦啦不知被什麼姅倒, 右膝和手踭也擦損了, 電話也擦花了, 右膝更有一段短日子有點痛, 蹲下時再站起時有刺痛感覺. 幸好後來好返.

剛剛星期六, 因為天氣太熱不宜跑步, 所以便去踩單車. 在環保大道後段正要過馬路前轉彎, 大概是車軚攝了入渠蓋隙, 自炒. 左膝擦得很傷, 左大脾有兩個大瘀痕和右腳踩也有點痛, 四天後瘀痕開始浮現. 以為傷口也可以很快好, 怎知四天後, 仍然在發炎流濃. 很煩...

還有還有就是頗困擾的足底筋膜炎, 雖然現在已不用覆診, 痛亦減退不少, 但間中坐久了起步仍然會隱隱痛.

兩樣頗精的運動也接二連三的出意外, 心突然很怕去游水也會遇溺. 驚!!

六月

六月更加更加無聊.

繼續睇骨醫做物理治療, 六月尾完結. 痛症少了, 只是很間中很間中才出現. 醫生說每次跑步後一定要好好認真拉筋, 不可偷懶. 最好可以用冰敷, 舒緩一下. 所以現在跑步後和行街後回家也會用我支冰水碌腳底. 效果不錯.

跟同事食過一次韓燒, 交換近況, 八卦公司事情. 之後更在涼茶鋪坐了大約一個鐘, 第一次在涼荼鋪當食甜品咁, 又平, 又唔洗擔心好趕要交枱.  開心的一晚.

再與Running Sisters食飯, 去了土瓜灣小店打邊爐. 有特色, 但唔需要再去.

收到通知, 我和哥都抽到了11/8的福岡馬拉松, 將會是第一次和哥哥一起跑, 亦會是一家人的旅行. 比阿哥激到噴色. 無啦啦好有效率的去訂機票, 但他竟然無入我的英文名. 我已經一早給他我的護照, 好明顯他沒有睇囉! 但這真是好低級的錯誤, 去過旅行的人都知, 機票名一定要和護照名一樣, 錯一粒字都唔可以. 明明搵到個PROMOTION CODE可以有八折, 現在這樣一錯, 又要比$350 去改名. 激鬼氣.

五月

過了開心吃喝玩樂月後, 五月便要閉關! 今為月尾考試, 一個19年沒有做過, 沒有踏入的地方, 我要再度挑戰!

5/2 詩班BBQ活動, 去美孚的九華徑. 原來現在那裡的BBQ場規模如此大, 仲每個爐也有噴水風扇, 利害!

5/7 參加酒店活動, 食了好嘢, 仲抽到獎. 開心!!

5/12 經大家姐介紹去試做貴貴FACIAL, 我相信貴是物有所值的, 只是我沒有錢去JOIN咁貴的FACIAL PLAN啫. 但整個過程也是超搞笑. 幫我做FACIAL既姐姐, 由我入去果一刻, 見我著背心, 便一直讚這讚那, 我覺得, 如果她幫我做埋足底按摩, 她應該連我的腳趾尾也會讚. 大虛偽了.

5/21 考試日! 以為人大了, 應該不會再那麼蛇gwa, 那麼緊張. 但原來唔係, 我依然係超級緊張, 對手係咁震, 所以scale幾乎都不能一take中, 第一首歌也少少地, aural也不是太好. 好有感覺會唔合格. 唯有繼續努力啦!

考完試, 見老闆不在香港, 便走去睇骨科. 自從名古屋馬回來後, 右腳腳底弓位行路會痛, 尤其是坐很久, 再起步行就更痛. 醫生說是很常見的足底筋膜炎. 之後的四個星期四早上, 我也去睇醫生, 做物理治療(超聲波). 希望會好啦!

四月

生活無聊到完全覺得沒事可記.

四月生日月, 都係食食食.

4/4 有個夜跑Nike Women 10K, 在郵輪碼頭, Nike搞既活動真係好好, 有規模, 有氣氛. 過千跑女, 很壯觀. 如果我係男生, 即使無朋友參加, 也要來睇女.

這個賽, 路線麻麻, 既然已在夜晚跑, 不明白為何不封路, 在郵輪碼頭那段路, 我們只可以在行人路上跑, 超逼. 這天雖然只是四月, 即使是晚上, 但都很焗很熱.

終點處有靚仔型男歡迎我們, 就好似名古屋女馬一樣. 大家跑完都要去集郵一番.
完跑的都有一條頸鏈, 大愛!!

4/11 第一個生日飯, 是跟好姊妹, 在旺角大瀛喜食日式放題, 這間不錯喎!

她又送我金金的襟針. 很愛! 自從在白川鄉跌了金金後, 在好朋友和老公的努力下, 我現在有很多很多金金. 好朋友更在找不到exactly 相同的情況下, 找到一隻近似的, 再找到小史迪仔, 將他們縫在一起, 好感動!

4/17 第二餐生日飯, 在iSquare的江順河鮮食, 沒我想像中的好食, 是普通的中菜餐廳.

4/18 正日當然節目豐富, 上山頂, 食個LUNCH, 再去3D美術館玩. 生日當日是免費入場的. 普通票價好似是$150, 頗貴! 裡面不是想像中的大, 所以若不是有一人免費, 我應該唔會去. 但有些相片都影得幾搞笑.

之後在灣仔逛逛等六點食自助山, 發現灣仔這天有個"嚐酒尋藝在皇東"的活動, 買一張$199的票, 這天便可以在皇后大道東的20間餐廳酒吧試酒, 合和樓下亦有表演. 希望下次早一些知道, 可以帶老公去參加下.

終於到六點, 可以上去自助山了. 都不是想像中的超級多食物, 絕到不是多到像一座山. 但食物質數我覺得很不錯.  老公勁愛超大厚肥鵝肝多士和即灼海蝦. 生𧐢我沒吃太多, 因為不想排隊, 但其他冷盤海鮮都很新鮮好味. 仲有燒乳豬, 烤羊架, 好多好多款, 即是每款食一件都已經會飽死咗. 老公亦好老土地第一次食馬卡龍, 發現新大陸的覺得超好味.

自助山在合和頂樓, 是旋轉餐廳, 可惜的是這天天氣很差, 很大霧, 看不到什麼. 如果好天的時候, 是可以睇晒香港全景. 轉一圈剛好2小時一餐.  自助山唯一不好的是限時2小時, 食得很急, 不能太ENJOY.

4/19 另一餐生日飯, 在火炭暢和軒私房菜, 如常的好味!

4/22 再一餐生日飯. 這是很驚喜, 很VIP感覺的晚餐. 兩位Running Sisters和我慶祝. 我們去咗食韓國醬油蟹, 好味到不得了! 第一個驚喜是她們為我預備了生日蛋糕, 要知道現在很少生日飯會有蛋糕, 我是完全沒預計今年生日會有蛋糕食, 仲要她們收得也很秘密. 當我們食蛋糕時, 侍應拿了一支香檳給我們, 說是老闆送的, 然當我們好興奮在酒香檳食蛋糕是, 侍應又拿來了一盒Paper Mask, 說是老闆由韓國帶回來, 送給我做生日禮物. 真係超VIP 感覺, 賓至如歸!

4/26 這個月, 睇了韓劇Kill me Heal me, 瘋癲地愛上男主角池城. 咁啱佢月尾來香港, 仲响我屋企樓下商場有簽名會, 這天便是去看我的男神. 好奇怪, 細個的時候都總有些偶像, 好似劉德華, 但我就從來未試過會像這樣去追星. 時代唔同了, 有個電話上網, 好容易追到他的新聞, 找到他的相, 看到他的電視劇電影.

唔知點解真係好鍾意佢, 佢唔係那裡超高大超靚仔(李敏鎬)那種, 但看到他演戲, 看到他的新聞, 看到他的訪問, 再見埋真人, 真係覺得在現實中他是一個極級的好男人. 諗起他, 都會笑起來. 悶悶無無聊開他的相出來, 人都開心啲. 呵呵!