食食食食食, 係咁食...

食食食食食, 自從上星期五老闆farewell lunch去了美麗華食buffet後, 跟住一路都係食食食食食.

星期日晚, 奶奶家團年, 9個人12樣餸.

星期一 lunch, 同事相約去hi pot 打邊爐

星期一晚, 外婆家團年, 1x 個人1x 樣餸

 

星期二lunch, 美國大大老闆回美, 在樓下元氣一杯食了餐超正日本餐. 呢間嘢係美麗華四樓, 四樓的餐廳都係非富則貴, 所以一直唔敢試. 今次有公司比錢, 就揀咗呢度. lunch只得set, 但每一個set都好豐富. 我食了三文魚親子魚生飯, 魚生好新鮮好好味! 同事叫的其他嘢, 都覺得很好.

星期二晚, 到遠征屯門同阿爸同阿麻食團年, 茶餐廳, 無咩特別. 特別唔飽囉!!

星期三lunch, 有supplier來請食飯, 去the one的煌府, 飽到癲咗. supplier只係話點了條魚, 一碟菜, 同埋蝦餃. 咁我哋咪點多少少點心. 怎知, 先來了一窩蟹肉湯麵, 然後再來了個xx魚煲, 轉頭再出現兩碟菜 (結果total有三碟菜), 跟手再有青瓜牛展, 醉雞的出現....加埋我哋叫的小小點心, 食到反肚. 最後嚟埋條東星班, 唔止肚突, 眼都突埋.

過想講下, 雖然最近成日睇到有人彈煌府的飲宴差, 但佢哋中午的點心又幾ok, 起碼the one呢間真係幾得. 我食過三次, 三次都覺得不錯. 但service就真係有很大的改善空間. 我哋一枱8人, 坐10人枱, 有兩張吉椅. 好正常, 上菜都應該揀吉椅那個位置上. 但係班姐姐就個個都係要揀兩個人中間上菜. 另外仲有幾次, 有個同事在夾麵, 佢一手就好似玩"俄羅斯輪盤"咁轉個盤, 我自己都試過夾梗嘢比人轉走咗, 然後好無奈咁望住個姐姐仔....

今晚年三十, 同老公各自己媽媽家陪媽媽食飯, 再會合出去行花巿.

明天又繼續食!!

食得是福! 祝大家新年食得飽飽足足, 亦要食得健康, 成個兔仔年都健健康康, 豐衣足食, 笑口常開!!