估唔到入門都未夠一年, 就要join佢哋既家庭旅行, 又其實佢哋以前從來無呢樣嘢, 係咪我命苦呢?
奶奶, 大姑奶一家四口, 二姑奶兩公婆, 加我同老公, 一行9日, 進行了7日6夜布吉之旅. 由一開始我同老公已經好唔想join,
一來我們上年先去過陽光海灘的地方, 二來同佢哋去真係會好煩. 結果我哋以無假無錢為理由, 遲他們兩日出發. 他們星期日晚出發,
我哋倆就星期二晚出發.
其實成個trip我都儘量唔出聲, 佢哋想去邊, 我就跟去邊, 佢哋要我同啲小朋友玩水, 我就同啲小朋友玩水, 只要佢哋唔好阻止我狂晒太陽,
成日叫住我塗防曬, 又或者阻止我去學潛水, 佢哋想點, 我絕對可以絕合. 不過成個trip就真係睇到好多嘢.
愛子女過份深的大姑奶~~
話說出發前, 大姑奶話去到布吉會穿長袖潛水衣, 怕曬喎! 我心諗, 大佬...怕曬就唔好去布吉啦! 咁靚既沙灘同海, 著潛水衣會唔會太肉酸呢!?
你咁愛美白, 布吉真係唔適合你囉! 最後去到, 佢都無穿潛水衣, 但就無時無刻補防曬...海水就此被嚴重污染. 都唔止,
係咁迫自己兩個仔女塗,倆個細路開初唔肯, 話好"立", 就係咁哦哦哦...哦到佢哋就範為止. 其實小朋友都十歲同九歲, 佢哋選擇唔塗, 咪由得佢哋囉!
我覺得曬吓又唔會死人"林"樓, 咪由得佢哋試吓曬紅甩皮的感覺. 佢哋試過, 知道, 下次就識保護自己. 咪第日大個, 同朋友仔去玩, 無阿媽迫佢提佢,
曬傷了先知咩叫曬傷囉! 我由細到大, 不知曬到甩皮幾多次, 咪又係大大隻, 健健康. 做咩咁小小嘢都唔可以比啲仔女自己經歷下呢?
跟住, 我相信呢兩個小朋友係好少去沙灘. 要落水, 去深啲游得水的地方, 就梗係會經過淺水, 有沙石貝殼果層沙. 阿女話吉腳,
阿媽就抱住佢落去踏過吉吉石果層. 最後, 一個大浪過來, 兩母女一同企唔穩, 阿媽仲飲咗幾啖咸. 個女都九歲, 仲要係已經好大隻, 仲要阿媽包落水. 又怕吉,
又要游, 就咪落水, 自己係沙灘玩沙算啦. 我唔明我大姑奶做咩. 根本呢個就係一個好好機會教個女. 人生都係咁, 會經歷一層又一層的沙石,
父母總無可能每次都抱佢哋過去, 點解唔教佢自己諗方法過咗呢啲吉吉地方呢? 我細個時, 去沙灘, 都唔鍾意呢層吉吉石, 我咪著埋拖鞋落去,
去到軟的地方再掉番對拖鞋上水囉.
我萬估唔到, 我大姑奶假假地讀名中學, 做head perfer, 資優生上大學, 現在都係一個管理層,
但原來都係一名堂堂正正的怪獸家長囉.
無微不至的奶奶~~
我真係唔咪好再頂得順佢. 同佢一齊耐啲, 我真係會覺得自己好無能. 話晒我都去過無數咁多次旅行, 又叫做出過國留學, 佢好似覺得我係唔識照顧自己.
或者佢覺得我照顧唔到佢個仔啩! 第一晚返到去, 就遞塊mask過來比我. 我話我自己有帶, 佢就好奇怪咁放咗係張枱度, 兩日都唔攞番. 我覺得佢係發我脾氣,
唔領佢情. 大佬, 呢啲嘢, 你駛唔駛理呀? 我敷唔敷mask, 靚唔靚, 其實唔咪太關佢事囉! 況且我都有帶啦! 我唔要,
你咪比你哋愛白女double咁敷囉.
跟住, 我哋有兩日join了啲local tour 去pp島同攀牙, pp島佢哋一早幫我哋報埋, 攀牙就等我哋去睇資料先決定.
我見都幾好玩就join. 咁要比錢啦, 我問我要比番幾錢, 奶奶就話我哋兩個只要比4400泰銖, 但其實每個trip, 每人係要2200, 咁兩人兩trip,
應該係8800. 奶奶就話只要比第二個trip, 第一個trip佢津貼我哋. "津貼", 我對呢個字好反感. 我兩公婆有工作, 係賺得唔多,
但點都叫有份工作. 奶奶已經退休多年, 點樣都唔會係佢津貼我哋啩. 佢做咩要咁做呢? 我唔知點解, 我真係好反感, 我覺得好侮辱.
我哋賺錢唔夠大姑奶同二姑奶多, 但我點都儲到啲錢, 去個旅行我都夠, 儲唔到錢的係佢個仔, 但我幫佢比埋都無所謂,
但真係唔需要一個退休人仕來sponsor我囉! 真係好反感好反感好反感. 後來我安慰自己, 算, 呢4400就當佢sponsor佢個寶貝仔好了,
當佢個寶貝仔兩日的trip都係由佢sponsor. 我自己出的4400就係我自己兩日的trip好了. 我唔要咁受佢恩惠!
再跟住, 因為我哋遲佢哋兩日到, 佢哋第一日有機會去買手信, 又怕之後無機會, 就上倉咁, which is fine! 我無微不至的奶奶又出手,
話幫咗我哋買咗啲. 第一, 佢知我想買咩嗎? 第二, 佢知我要買幾多嗎? 你買啲唔買啲, 如果我哋最後去唔到買, 咁佢幫我買果幾包, 我都唔知點分. 最後,
我哋最後一天去機場前都去到手信店, 又買咗啲. 奶奶佢一路都提住話佢幫我哋買咗啲. 所以我就無咩點買. 最後佢返到家, 拆箱, 發覺自己都唔夠分喎!
好嘢....我最後咪就係比佢搞到分配唔到手信送比人囉! 真係唔該晒佢!
佢哋家人其實都幾成日鬧交, 成日都會為啲好小的事鬧交, 好多啲都係因為某人的態度唔好, 又有人唔抵得頸就去頂咀, 跟住就燒起來. 旅行啲呢嘢,
就必定唔少得會鬧. 所以大多數時間, 我都會配合佢哋, 亦都少出聲, 更加會有咁遠行咁遠. 怎知, 我奶奶回來後, 同佢個寶貝仔傾電話時,
竟然哭訴話個trip去得佢好委屈, 話佢個新抱係窒得佢最多果個. 我就真係好大的怨屈了! fine...原來佢啲女兜口兜面鬧佢, 話佢, 佢就ok,
就可以接受. 我唔出聲, 間中回一兩句笑話, 佢就覺得我窒佢. 好啦! 咁我以後去到佢哋企屋食飯, 我唔會再講任何嘢. 再唔係, 我就以後都唔去了.
橫樹佢個二女婿, 都已經唔再出席佢哋的週日家庭飯, 只出席過節飯, 咁我呢個新抱仔, 都可以一樣咁做, 咁就唔會再令人覺得委屈了.
仲有, 佢哋唔好旨意我會再比面跟佢哋去旅行. 簡企係貼錢買難受.
沒有留言:
張貼留言