不知不覺, 我嫁咗一年了!

啲時間真係過得快到無朋友, 轉吓眼, 有時候都仲諗緊點解我會嫁咗既時候, 我同陳生就已經完成了一年的路程.

擒日又係10月10日, 是我們的紙婚記念. 好多人問我會唔會放假慶祝. 傻既, 其實都只不過係一年之嘛! 一年一啲都唔難過, 嚟梗既五年, 七年, 十年, 廿年......到時先放假慶都唔遲啦! 所以今年大家各自返工. 而晚上就去我們上年擺酒的逸東酒店食自助餐. 免費的, 逸東上年送給我們週年紀念用的.

呢排因為工作關係, 連續幾個星期都有buffet食, 食到已經想死, 所以面對呢餐buffet, 有點....真係無興趣! 加上原來逸東的dinner buffet同lunch buffet食既嘢, 原來差不多, 都係咁少, 就更加提不起勁!

但, 週年紀念, 又點可以咁平淡, 所以天父便給我們呢個1週年紀念日加了一點色彩, 呢啲色彩, 今天仲留响我的面上, 我估都要多幾日先退.

話說, 無咩嘢食, 見到蒸魚(我的最愛), 便夾了舊嚟食. 吞的時候都無嘢, 到食羅絲粉的時候, 突然覺得個喉嚨好痛. 唉...哽骨 跟住咪吞吓其他嘢, 又飲吓水, 又咳吓, 都唔得, 呢個時候我已經成面紅晒, 流晒眼水. 老公就話去攞啲菜比我, 响佢出咗去既時候, 我狂咳, 勁想嘔, 好不容易等到佢返嚟, 即刻衝入厠所, 都未閂得切門, 見到個屎塔, 就已經嘔了一堆嘢出來. 跟住咳下, 又吞下口水睇下條骨出嚟未, 又好似仲响度, 吉吉地, 咪再大力咳多兩下, 再嘔多少少, 終於都無吉住.

但响出廁格後, 見到個樣...唉...係勁恐怖, 對眼腫晒, 係似剛剛勁喊完果種, 然後我一貫的嘔吐後遺症當然唔會執輸出來贈慶一番, 就係眼肚同魚尾紋位出了好多紅點點, 係嘔的時候chok到啲微絲血管爆咗, 塊面依家就好似人哋好多雀班咁, 不過我啲班係紅色. 返到屋企, 原來咀角同下巴都有. 好慘. 我知我一向嘔都會咁 (感恩我其實好少嘔), 但今次都係史上最嚴重的一次了.

不過我都好勁, 嘔完出來, 又繼續食雪糕hahah...但回程返屋企時, 條氣管就好唔舒服囉.

呢個, 就係我們結婚一週年的回憶了!