今個假期都算充實, 因為破紀錄地一天要走兩個喪禮, 真係乜都無咁夾.
30/4 星期六, 10點鐘要到世界大酒店出席一個教會姊妹的婆婆的喪禮, 其實我應該與呢位婆婆未見過面, 但因為跟這個姊妹也頗相熟, 所以都去一去.
原本有打算join詩班獻詩, 但又係乜都無咁夾, 我果日book了場打壁球, 仲咁啱我book, 一定要我去攞場. 其實時間係夾到, 喪禮大約11:00完,
我book12:00, 都趕得切, 但就比較趕, 為不影响他人, 所以都不join詩班.
這個喪禮, 其實婆婆都已94歲, 實屬笑喪, 而且我們基督徒相信死亡只是一個暫別, 將來我們在天家一定會再見面. 現在婆婆可以離開肉體的痛苦,
其實不是一件太過傷心的事情. 因為婆婆生前是一個很熱心祈禱的人, 她受到教會上上下下的稱讚, 稱她為祈禱人. 在安息禮拜的訊息裡, 牧師也很強調這一點,
亦鼓勵婆婆的子孫不要太傷心, 反而要努力繼承人婆婆熱心祈禱的美德.
同日晚上, 我又再出現在大酒店, 今次到我自己的大舅母. 她都算走得突然, 有天媽媽打給我話我知大舅母在馬來西亞走了, 我仲問走去邊?
因為新年才見過她, 雖然近幾次見她, 只覺得越來越瘦, 但都尚算精神, 亦叫做行得走得, 更沒有聽到任何關於她有病的消息. 無啦啦只不過去了馬來西亞探二女,
便走了.
喪禮前都打聽不到會是用什麼儀式, 去到才發現原來喪禮是可以沒有任何宗教儀式, 她的家人為她做了一個紀念會, 堂裡佈置簡潔, 子孫們做了四個大相架,
將他們跟大舅母多年來所拍的照片貼上, 又放上幾幅子孫們為紀念她所畫的畫, 播點歌. 然後在8:00有個特別儀式, 就是大表哥出來講一講, 大表姐又講一講,
跟著孫女念了首詩, 然後播了20mins 相片slide show, 喪禮便完結了. 整個喪禮, 直屬家人完全沒有哭泣, 全場只有大舅母的大家姐在喊,
反而大舅父, 兩個表姊同表哥, 同來賓有講有笑.
大表哥講的那段說話都令我有幾深感受. 佢講番出佢媽咪走的情況. 最後其實佢哋係無解剖, 所以其實係唔知死因, 不過佢回想番最後幾個月,
其實大舅母真係好弱, 食唔到嘢, 又成日嘔. 佢哋帶過佢去睇好多醫生, 但都搵唔到原因(我表姊夫係醫生, 大表姊又係護士教授, 二表姊就係藥劑師,
所以佢哋已經係帶佢去睇無數最好的醫生), 有時卻反過來忟憎她不吃東西. 又原來大舅母每次出街回來後都會嘔, 他們回想, 她可能是"攰到嘔",
因為每出一次街都會花很大的氣力, 但她又很珍惜跟人相處的機會, 所以自己幾辛苦, 都很想出去與親友相聚. 即使完全有車接送,
但可能其實她的十步已經是我們一整天活動的能量.
珍惜眼前人真係好重要, 仲要係好細心的珍惜他們, 多啲留意他們. 表哥話如果他能夠留意大舅母多一點, 便不會讓她咁辛苦飛去馬拉.
不過人又真係很奇妙, 表哥話大舅母飛前, 係好精神, 仲行得好好(因為新年跌親), 她又嚷著要去探二女, 所以便讓她去. 佢係機上, 嘔了三大袋,
二表姊仲鬧表哥做咩比佢過去. 後來, 表哥話, 應該係大舅母自知差不多了, 而一向跟二表姊的關係感覺是疏離一點, 但心中卻很掛念這個女, 又深知這個女是最能幹,
所以便選擇在二女處離開, 更要二表姊幫她施急救, 讓二女抱抱她, "錫錫"她.
沒有留言:
張貼留言