洲際自助餐賀老公生日

老公今日生日, 但因為要返學, 所以提早昨天同佢食.

自從幾年前平安夜同佢响洲際食過燒鵝肝後, 佢念念不忘

所以今年我就話請佢去洲際再食過

鵝肝真係超肥美, 真係入口即溶果隻.
我同佢每人都起碼食咗6-7件, 要做返多啲運動減番啲膽固醇

 

羊架我都食咗兩件, 真係超級好味. 仲有一味係牛柳,
又係超正. 自家整, 真係整唔到咁好味(當然因為我功力未夠)

 

 

擒日有燕窩雞蓉燉湯, 都好好味. 但我都係鍾意飲佢既中湯, 擒晚係葛湯, 好甜好好味, 我飲咗兩碗 (我係湯怪)

當然仲有一系列魚生, 但無影相.

龍蝦仔, 肉好爽口好鮮味

長腳蟹都好新鮮, 但咸咗啲

刺生好新鮮, 肉好爽口, 師傅仲比左勁多甜蝦我

welcome drink我哋叫了奇異果汁, 好大杯, 唔咪得兩啖果啲, 飲到我食飽都未飲晒

熱盤都ok多, 不過塞咗羊架同鵝肝, 都飽咗一大半, 所以唔咪食好多

 

當然唔少得甜品, 超多款, 但太飽, 只食到呢幾款. 不過都ok既, 其實我唔好甜.

講埋個環境...其實我覺得幾逼, 尤其是攞食物既地方. 有一個位冷盤枱, 食物枱同一張餐桌距離大約只有2-3呎, 即係如果有人响度攞緊嘢食, 後面經過既人都要側身行, 同埋果張枱, 感覺好似係架硬加落去. 熱盤枱果邊都唔咪好好多, 我有幾次都比人撞. 感覺上環境唔咪太舒服囉!

我哋好彩, 老公有個朋友買了果張Priority Privilege Card, 去Intercontinental, Crown & Holiday Inn旗下的酒店食都有著數. 我哋既著數係free一個人. 佢原價係$718一位(好很貴囉), 最後我哋埋單係$861, 即係每人$430 (咁就ok嘞!) 慳番啲! 七月好多人生日呀, 又要交保險, 出血到昏迷 不過我見隔離枱用HSBC都有七五折喎! Citibank都有八五折!

今次呢, 我記低咗自己食咗咩同食咗幾多, 明天返學剛好係教我哋用果個計算卡路里的程式, 等我計下一次自助餐有幾高卡 (增加自己既內疚感, 攞嚟衰).

但係, 我仲回味緊那入口即溶的鵝肝囉

小丙的故事

我細個的時候, 聽過呢個故事, 唔知大家有無聽過

話說有一天, 小丙家裡發生失竊, 佢懷疑係隔離新搬來的丁仔偷的

但苦無証據, 無辦法捉他

自此, 小丙每次見到丁仔, 都總覺得佢鼠頭鼠眼, 古古惑惑的

丁仔做任何動力, 小丙都覺得他又在偷東西

連丁仔一句"早晨", 小丙都覺得是有古惑的

總之, 小丙就是見丁仔後面就已經憎埋前面

後來, 有一天, 小丙在家找回了他不見了的東西, 才知道原來不是丁仔偷的

自那天, 小丙忽然覺得丁仔原來是好靚仔的

每一個早晨, 都充滿親切感

亦覺得丁仔是好樂於幫人

甚至覺得丁仔頭上有光環添!

無啦啦講呢個故事, 其實是我一直都會提醒自己, 不要做小丙! 我相信每一個人都會對某一些人有偏見, 從而那人每作一件事或每說一句說話, 都會相當黑人憎. 亦都有可能自己是丁仔, 被一些人誤會, 我每作一件事或說一句話, 都黑人憎

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

當我是小丙, 傳道人是丁仔

我教會有一個傳道人, 初初他來試講的時候, 我是覺得他不錯, 心想教會終於有番個青年一點的傳道人

他入職後, 被派到牧養我的團契

但不知怎地, 他越來越黑我憎

到現在, 基本上他每做一件事, 每說一句說話, 我都不鍾意

最近有一件事, 我入院那兩天, 竟然被我在浸會撞到他, 他帶老婆去覆診

第二天, 我在公司收到他whatsapp, 問我點?

我好快地亦禮貌地說沒事, 多謝關心. 亦順帶問候他太太

然後....他便像失消一樣, 沒有再回覆, 一直都無再回覆

我覺得很奇, 我其實真的一收到便立即回覆, 沒理由他看不到

跟住, 我腦子便不停在想: 扮關心, 然後又可以回教會同人講 "我果日撞到阿x, 佢點點點點..."

做到好像很關心弟兄姊妹咁....

更奇的事, 相隔一個月, 在教會見到他, 他問我有無用whatsapp ???????!!!!!!??????!!!!!

我冷冷地答: "有, 果次覆了你, 不過你無再回覆" 然後便推門去廁所

很奇怪很奇怪的人

但其實轉念一諗, 他可能真係出於關心, 可能睇完我個回覆便被人召了去做其他事, 所以沒留意我已回覆

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

當我是小丙, 奶奶是丁仔

到現在, 我都仲未好理解奶奶, 而我心裡的小丙亦越來越大

奶奶所做的一切, 我都看不順眼

有天她跟我說去東歐要帶好多環保袋, 那邊買東西沒袋供應

我冷冷一句: " 我都無諗住買嘢" <===真係好衰, 一盆冷水

又有天, 我話我家裡仲有湯未飲晒

她說: "隔夜湯唔好, 有害, 好多人都係咁講"

我無反應, 但心裡是 "好討厭好討厭, 十萬個討厭...點呀? 有啲湯水比你個仔飲, 都要阿支阿左, 兩個人煲湯, 實會有多, 飲唔晒倒晒去嗎?"

昨晚, 她跟我老公講她已唱了2000歐羅, 我條神經又立刻有反射:"點呀? 佢一齊去已經搞到我成個旅行mood無晒, 仲連我最愛玩的check 滙率玩唱錢都奪去. 我唔洗佢幫呀? 我有手有腳, 有工作能力, 佢做咩成日要幫我哋? 我哋係無錢去旅行的, 我哋係唔會去, 係儲好錢先會去, 我哋唔咪無能, 唔洗一個退休人事去幫我, 我覺得佢看得我哋好無用, 我好唔鍾意, 好討厭好討厭.....一百萬個討厭!!

仲有好多好多.....

但轉念再想, 其實我奶奶係好錫佢個仔, 好錫佢啲仔女, 所以從來預備好一切比佢啲仔女, 可以講, 佢所做的, 都係出於好心 (只是很多時好心做壞事啫)

我諗我仲需要很多時間去接受呢兩個丁仔!

十號風球的矛盾

呢個慢條斯理的風, 竟然可以打到十號風, 真係估佢唔到!

公司一路都好多人期望快啲掛8號, 又或者暗罵天文台成鬼日考慮考慮又考慮

其實果一刻我諗

無錯, 打風我哋可以早放, 可以多一天半日假

但其實有好多人會受苦

次次打風, 心裡都有呢個矛盾感

最後4:30 離開公司, 地鐵超多人, 不過因為近, 我都好快返到屋企.

出了地鐵, 無咩雨, 細到可以唔開遮

但去到樓下一個位, 果個位一向都好當風, 我企咗一陣, 因為果個位實在太大風

最後見細少少, 即刻遮都唔開衝過去, 爛咗把遮就唔好啦!

好醒咁响lunch time走咗去買餸, 所以唔洗去街巿同人迫同人爭

擒晚食冬瓜粒湯飯

都預計今日起碼都應該有半天假, 瞓到9點幾起身

落咗風, 食個早/午餐便出門

嘩....樓下好多樹都倒了, 大的小的都有, 係連根拔起果隻

好可憐的樹. 唔知道係會成棵移番正, 定係要斬咗佢哋呢?

我希望可以移番正繼續種

再行, 見到更加多樹倒了, 成條單車徑封了

連我返工條路都檔住了

 

越過一棵倒樹, 後面又有另一棵倒了, 大家都要"捐"過去

 

 

所以其實更加唔想再打風, 破壞實在太大了.

我想打爆條友~續集

上回死都唔肯坐Qantas的同事, 終於嚟咗香港, 最後佢係搭cathay囉.

其實佢係咪一心想搭cathay, 又扮到想同公司慳寧願轉機兼econ class, 都話要星航呢? 然後博星航無位就去搭cathay呢? anyways, 最後出了機票, 以為可以鬆一口氣.

sorry囉, 上星期五都仲繼續玩嘢. book了北角一間酒店比佢, 個rate超好, 同埋房都係全新裝修的, 今年我哋都有好多同事住過, 一直都無聽到投訴.

個煩婆, 竟然問我可唔可以轉去怡東, 因為佢會做到好夜, 北角果間離地鐵太遠(其實只係5-10mins).

好 ~ 盡心工作既我, 都會幫佢check. 但怡東無corporate房, 最平比到我的房係$1750果隻, 貴北角果個一倍囉! 跟住煩婆就話可唔可以waitlist. OK, 咪wait比佢囉. 不過我可以好肯定, 到佢走都唔會有房比到佢.

擒日見到佢, 佢投訴間房污糟, 話有啲唔知血漬定朱古力漬 <== 北角果間酒店, 唔咪五星都有四星, 我真係唔信囉!

又話無比twins bedroom佢, 因為佢有個朋友跟佢一齊來, stay一齊 <== well, 大家明唔明點解佢要轉去cwb?

ok, 我咪同sales講, 轉比佢囉! <== 最後sale係轉了twins double比佢, 即係兩張double size的床, 全酒店只得兩間呢隻房.

今日回來就話毛巾有煙味 <== 我去咁多旅行, 好屎的大陸酒店, 都唔會毛巾有煙味囉!

仲有話出面嘈喎! <== 無法喎, 我哋滿佈強國人, 我亦深信怡東有更多強國人囉!

ok...我都再同sales講. 不過係叫sales check下煩婆擒晚係咪真係有投訴, 定係只係扮可憐等我轉酒店比佢.

佢呀, 扮到個樣好似好攰, 仲認錯我係另一個同事添呀...因為擒晚瞓唔到喎! <== 唔知係同個fd玩到無瞓, 定係真係瞓唔到呢?

繼續想打爆佢!

婆婆手術成功

前排婆婆痾血, 去了兩次威院, 一係就話佢胃潰瘍, 一係就話佢痔瘡

最後去了仁安, 就話佢直腸有個3cm (好大 ) 瘤, 惡性的

但因為婆婆一向有高血壓, 响比唔比婆婆做手術呢個題目, 都有好多意見

最後响3號開咗個家庭大會, 响香港的家庭成員都出席

咁當然唔到我做孫呢一輩出聲

但其實果日婆婆既情況, 其實都仲未好清楚

例如有無擴散? 婆婆的心臟適合做手術嗎?

傾...其實都唔會有結果.

好快咁, 安排婆婆照PET scan, 知道無擴散

跟住又搵幾個醫生check了她的心臟ok

跟住好快就安排了上星期五入院, 星期六做手術

話因為個瘤好近缸門位, 所以可以用微創响肚開三個小洞, 只需大約一小時

星期六下午, 同老公, 媽媽一齊去醫院睇婆婆

跟住有兩個表弟, 同舅母都來了

四點鐘, 婆婆瞓醒, 要換衫預備去做手術

婆婆精神幾好, 仲同我哋講佢去掘鑽石, 笑死我!

好快, 啲姑娘, 嬸嬸就來推她落手術室

臨入去, 我走去婆婆身邊叫佢唔駛驚, 祈禱就ok了, 明天再見.

我第一次看著親人被推入手術室

婆婆臨入手術室前, 仲擰轉個頭來望實我哋.

我果一刻突然諗...好怕呢一眼就係最後一眼

我諗婆婆果一刻都係一心想望住我哋, 所以先擰過來.

跟住我哋就走, 回望阿姨(佢專登從美國回來, 陪了婆婆兩個星期, 呢幾日仲會响醫院陪婆婆瞓), 阿姨喊喎! 搞到我都眼濕濕. 只好拍拍佢膊頭, 叫佢唔駛擔心

跟住我同老公有嘢做, 就走咗, 跟住媽媽就嚟等婆婆做完手術

嘩...一搞, 最後成8:30都仲未打比我話手術完成, 幾鬼擔心

後來, 好似8:45, 終於完成.

原來話佢痾唔清腸入面既嘢, 所以响入面進行了清腸工作

擒日, 我再去睇婆婆, 個樣有啲腫, 有啲攰, 但都清醒, 對答如流

感謝神, 婆婆的手術成功了! 希望神比佢再活多幾年(佢今年都88了), 可以睇多幾個孫結婚生仔!

黑仔黑仔

哈哈...好想學大家打幾行黑仔. 但美佛無教我個trick, 所以都係唔打了.

呢排真係黑仔都爆.

第一黑

最黑的莫過於換7仔的麥o麥公仔.

直至目前為止, 我共抽了: 兩個校長, 三個miss chan同三個麥o麥.

十個角色, keep住係咁抽呢三個. 想點??????

我已經在不同的7仔抽, 都係得呢三隻. 係咪玩嘢.

我最想換的輝輝....well...買的. 一早叫老公買. 如果等我抽, 下世都抽唔到.

都好, 呢個世界有tradeduck, 已經將兩個麥o麥換了麥兜同菇時

兩個校長同一個miss chan已經比同事領養

現在仲有兩個miss chan等候發落

第二黑

星期三老闆叫我訂今日枱, 12位, 同個澳洲同事lunch. 我都有份

訂了樓下八月芳

以為好lucky咁易就訂到(平時一向要一星期前book)

今日12:30落到去, 竟然無我既booking

頂, 12人, 12:30, 你叫我去邊

後來等咗15mins, 佢變大張枱比我才有位坐

同老闆一齊, 要佢等, 仲要一班同事一齊等, 壓力好大架嘛!

點會咁都可以無咗架. 激死

第三黑

星期三, 開team meeting. 老闆既老闆都會present, 由美國打入, 仲要有net conference睇slide

9:15開始. 我已經8:30返到公司. 9:45入meeting room set機

怎知點都駁唔到去個電視度...

見receptionist回來了, 便叫她入來幫手. 佢話個個一插就得 點解我唔咪既?

跟住call facilities個女仔, 又係唔知. 唔知邊個channel 咁邊個知?

(唔好叫我問IT, 一年前試過, 佢話呢啲嘢唔關佢事, 係facilities的)

最後要出動portable project, 但project出來好濛, 唔靚囉.

我老闆黑晒面.

唉...都係我唔好, 其實我之前一天應該去試機. 做少咗.

成個星期keep住眼瞓, 我已經每天都11:00左右就走去瞓, 返到屋企基本上咩都唔做, 沖完涼就瞓, 瞓到7:30, 都有8個半鐘啦. 但每日都依然眼瞓, 係眼瞓到狂打喊露, 仲腦癲呆. 發生咩事? 烏雲蓋頂壓到個人又黑又濛?

我要正能量啊!!!!!

我想打爆條友

有個同事要由悉尼來香港. 最簡單方便就係搭直航, 通常佢哋都會搭Qantas, 時間又好, 仲有Premium Economy 比佢哋坐, 仲要check了, 有位嘛!

頂, 條八婆, 係都話要搭星航. 時間唔好, 仲要轉機. 家下仲要economy無位. 都仲要堅持搭星航.

做咩啫, 依家Qantas有蟲嗎?

仲懶好話, 如果要stay overnight, 都ok, 好似話星航stay overnight 等connect flight, 係會提供住宿, 可唔可以幫佢check埋. 頂, 咪即係又要check多樣嘢. 依家連位都未搵到比佢呀, 玩咩!

佢嚟到香港既時候, 我係唔會比佢有好日子的

風和日麗的三(兩)天

正如KB所形容, 呢個8號風真係好似幻覺一樣.

星期五晚返屋企, 响樓下大風到幾乎行唔到, 第二天一覺醒來陽光普照

星期六, 正想落樓食早餐, 哈 ~~ 落雨喎!

走番入屋換到水鞋, 落到樓, 雨又停了. 玩嘢!

食完早餐, 去咗TKO醫院轉科門診登記排期

第一次去TKO醫院, 又正如KB所講, 果然後人少服務好, 乾淨又舒服 <=== 撞鬼, 去醫院去得咁鬼開心

唔駛10mins, 就搞掂!

正呀....排到2013年9月23日....死咗都未排到呀!

跟住番屋企如常的週六節目, 吸塵, 拖地同洗衫!

等老公電話到就出佐敦食飯同去香港體檢做一個check up, 然後再漫遊兩小時, 再去旺角同朋友食韓燒

~~~~~~~~~~~~~~~~~~~~~~~~~~~~~~

星期日, 落樓下教會崇拜, 跟住帶兩隻龜入大圍睇醫生

唉....小龜(新買的, 養了十幾日), 原來過瘦, 又有貧血, 呢個星期唔食嘢, 又無心機, 可能有腸胃炎

醫生同佢打了支維他命針, 同比了罐唔知咩粉, 話每日浸三次, boot up番佢啲energy

浸了一日, 今朝終於食嘢了

至於大龜, 其實無咩, 食得痾得, 不過又係無咩心機, 又成十年無check過, 咪又幫佢check下

哎吔....有肺炎, 同埋佢哋血有啲指數有問題. 又要打針, 仲要打五支, 老公負責.

我唔得...果日見醫生教老公打針, 比龜龜咬咗一下, 嚇鬼死我, 仲大叫嚇親醫生..XDDDD

其間龜龜驗身, 我哋就去咗探我外婆(住大圍).

唉...我婆婆前排入院, 最後發現佢直腸有粒3cm的瘤

唉...惡性的. 婆婆好似有87, 88歲了. 只想老人家唔駛受咁多苦.

接番龜龜們後, 便去奶奶家dinner.....

估唔到, 佢哋家連七一都要慶祝. 今晚齊人之餘, 仲好多餸, 仲要影相

慶祝梁振英就職? 定係回歸十五年? 我又真係唔知佢哋家咁愛國咁親中喎XDDDDDD

~~~~~~~~~~~~~~~~~~~~~~~~~~~~~~~~~~~~~~

星期一, 去行山, 由東涌行到大澳, 全程約10km. 共行了約4小時

腳 跛

不過好開心, 可以响咁好天氣郊遊吓, 係我恨咗好耐既事情!

 

呢段路其實唔錯, 8成時間响樹林裡,
間中見到海, 亦經過幾條村, 可以keep住買可樂飲

好大的蜘蛛, 沿途見到三隻

行咗大半都仲見到機場. 原來我哋個機場咁大大大大....真係失覺晒!