「發現昆蟲」案

蟑螂鳴叫誤作蛇聲妙齡女報警

打鼓嶺坪洋村發生一宗極度罕見的「杯弓蛇影」，報警求助事件。警方於昨日凌晨約零時51分，接獲一名20歲姓譚女子報警，聲稱聽到房間衣櫃內傳出「嘶嘶」聲音，懷疑衣櫃內有蛇蹤。
警方接報，迅速派警員登門處理，當打開衣櫃查看時，發現內裡並無蛇蹤，只有一隻蟑螂。警員將蟑螂「妥善處理」後離去，將案列作「發現昆蟲」案，女事主可安心就寢。

我諗起我與小強的幾個戰役

最激烈果次, 我坐在地下同個fd傾電話, 無啦啦有隻小強飛入嚟. 無錯, 係最恐怖的飛小強, 我揸住個電話狂叫, 我個fd應該比我把聲震聾了. 後來我就週圍跳, 跳上枱, 跳上sofa, 最後打比一個男性朋友, 都係住同一區, 叫佢嚟救我, 亦响佢來到前, 我跳到去攞殺虫水, 狂噴. 到我個fd來到.....其實小強已被浸死, 我一開門, 我個fd問我係自殺定係咩? 因為出面都聞到殺虫水味, 而隔離屋亦開門問做咩 <=== 點解佢响我狂叫既時候唔來問, 而係有人回來佢先問? 如果我係遇到賊, 咁點呢?

呢場戰役後, 都仲有好多大大少少既小強大戰.

後來有朋友話我知, 小強係對聲, 特別係高音既聲音有反應, 你越叫, 牠就越向你方向走;

而牠亦對光有反應, 所以點解有時一開燈, 便會見到郁動中的小強.

自此之後, 每逢到小強旺季, 我開門入屋都會以好慢的動作, 盡量唔好牽起空氣流動

亦會週圍望有無疑似小強的黑影 <===我既黑影論, 一早就出現啦!!

有幾次, 真係見到有小強在等我架!

呢啲情況, 我先會搵一叠好厚的報紙, 從高空掉下, 掉得中, 就再响上面狂踩.

掉唔中 (well....我真係可以掉唔中架喎), 咁就第二步, 浸小強!

咁條屍點呀?

呵...當然係等我偉大的媽媽回來收拾啦!

唔知點解小強呢樣怪物, 係好識揀人來蝦, 每每我媽不在家時, 牠就會出來搞我.

而我係, 唔見到佢條屍, 我係唔會瞓覺既人

咁好好彩, 我真係有個好偉大既媽媽, 佢每次都會出來勇救我.

我記得有一次, 大家都瞓晒覺

我突然聽到有啲 "嘶 ~ 嘶 ~" 聲, 一打開眼就見到有隻超大的小強在我床邊的那堆花紙爬行中

當時其實我只係 "嗯 ~ "了一聲, 都頗細聲

但我偉大的媽媽已經以兩秒時間, 衝入來睇我咩事, 跟住就幫我追殺小強

偉大既媽媽真係好勁, 佢係可以徒手打小強的

 

我又試過沖涼時有小強, 果次用梘液浸佢, 不過唔咪好記得成唔成功.

我真係見過話梘液可以殺佢哋架!

所以有一次响廳見到, 我真係走入去攞梘液, 但係唧中既機會好細

仲比偉大既媽媽鬧我唧到週圍都係梘液

依家嫁咗, 無偉大的媽媽保護我, 但都有老公保護

不過, 由於佢習慣出外會閂晒全屋窗門, 又封了廚房地下的渠, 晚上又必定會閂廚房的窗

所以

上年, 只有見過一隻, 應該是我拖地時, 開了大門, 牠偷偷走入來的

今年, 我哋買了那個bug scare既機, so far....touch wood....一隻都未有

得享太平!!!!

什麼心態

今朝一早便向個fd發火, 在whatsapp裡啫....

話說我預科的一班舊同學, 在whatsapp有一個group,

自上年12月約過出來一次, 便一直都說再約,

但, 一直無人搞亦搞唔成

搞...其實係有人搞, 我都算會幫手搞, 試過有一次都落力地幫手book枱

到最後因為太少人, 流會.

個group有11個人, 但最後得四個, 出乜鬼.

前日K先生, 又發出msg話是時候又約下出來

呢個K先生, 永遠只是提出話要出來, 但最後就將個負任瀉比第二個

好似上年12月BBQ, 搞好晒, 無男丁, 問佢可唔可以早啲嚟幫手買嘢, 唔得囉!

果日仲要講到自己病喎! 又遲到, 差啲嚟唔到咁滯.

咁K先生出了個msg, C先生又通常會覆. 佢哋兩個比較熟.

今早, C先生就出了個msg, 問7/9 得唔得啦!

咁我就答, 唔得, 要返學

C: Next next Friday 14/9?

我: 都唔得, 但睇埋其他人先, 如果其化人7/9都得, 咁你哋咪照去囉!

C: 你有無其他時間提議, 想全部人都可以出席

呢個時候我都開始火. 呢個年代, 呢個年紀, 邊有可能就到晒全部人都得? 咁易約, 唔駛約咁多次都搞唔成啦.

K: Usually no people reply ga! <== 呢個正正是問題所在

我: 根本無可能全部人都得, 只可以揀最多人得果日, 你咪睇下有無人先囉!

K: yes, you right

我: 咪搞到我第一個覆唔得就係麻煩人先得架!

根本長期以來, 呢班group就只有三至四個人在對話, 每次即使定好晒日子, 呢三至四個人都得嘞, 其他人都係唔覆.

上次, 比了個deadline話如果邊日唔覆, 就當唔去. 果個白痴C先生, 走去逐個打比人, 問人, 叫人覆

ok, 我欣賞佢既熱心, 但最後啲人覆, 都係覆唔去得之嘛!

我好唔明呢班隱形人咩心態. 覆一句去/不去, 係咪真係咁難呢? 答咗, 大家都好辦事啫! 其實如果都無咩興趣keep住呢班舊同學, 咪算囉, 咪退出個group囉, 咁我哋咪唔駛再轉時間就呢啲根本無心出既人囉!

我相信 今次都會再一次搞唔成. 我都應該會退出呢個group了, 無意思.

我係咪太好蝦呢?

其實做得秘書仔, 同埋要assist埋同team的同事, 除了老闆係我最大既客人之外, 其他同team的同事, 都係我既顧客仔, 我都想大家work得開心. 有時候, 你對人好, nice啲, helpful啲幫佢哋做嘢, 都希望有一日你要搵佢幫手既時候, 佢都會好nice同helpful咁幫番我.

 

入到呢間公司一年多, 因為係大公司, 知道會好多是非, 所以一早打算要低調啲, 唔埋堆, 食飯都多數叮完返埋位食, 呢排開始有時都會坐去pantry同啲c9仔同事講下家事, 旅行, 小朋友, 甚少講公事.

 

但係呢排我有少少感覺啲人蝦我, 見我唔出聲, 咩都比晒我做.

事件一

有條team有個女仔, 成日都會有嘢send過嚟比我老闆簽, 但佢好多時都唔會印出嚟, mark好簽邊個位, 就只係email嚟叫我print. 問題係, 我個位無私伙printer (反而佢個位前面有兩個), 我每次印嘢, 都要行去佢個位那printer度攞, 或者出走廊的color printer. 咁行下都無所謂, 坐得多, 個腦會痳痺. 最大問題係, 佢個email唔講清楚. 有一次, 佢叫我印一個excel file, 咁我開, 見果版, 咪print果版. 簽好, 佢先話仲有第二個tag都有. 佢果份嘢唔咪英文囉! 我係唔知道係未完囉. 點解唔响email講清楚有兩個tags? 無啦啦, 我唔會走去睇晒佢每一個tag有無要簽既地方囉.

 

仲有一次, 佢又send個excel來叫我print, 但print唔到, 原因佢係用比A4 長少少那隻紙print, 但printer啲隔係無果隻紙. 我話佢知我print唔到, 因為紙唔啱. 佢叫我問admin. 好, 我又問, 但admin話, 呢隻紙, 只係果個女仔條team先有, 只有佢哋order要用果隻紙. 喂, 大佬, 玩嘢咩! 只係得佢有果隻紙, 佢好應該print埋比我啦! 成日只係彈個email嚟! 懶到死, 哼, 怪不得佢咁肥妹, 因為唔肯行.

事件二

今日要同老細入房開高層大會, take minutes, 咁over run咗. 跟住有另一條team的人都book咗果間房. 咁後來, 5mins後, 我哋都開完出嚟! 但果個女仔就好快咁cancel, 跟住又見我哋出嚟, 佢又book番, 但臨入去時, 佢走過來話我兩句.

 

其實我又無咩, 我工作EQ都算高, 又的確我哋係over run咗. 不過我都好難control, 因為成班都係大粒, 我無得叫佢哋收聲囉. 我亦唔可以走來走去, 出去同佢講仲有幾耐, 就算出到去, 我又可以講實到仲要開幾耐咩? 成班口水大王, 話講多30sec, 最後都講咗2mins啦! 等一陣都唔得! 駛唔駛專登走過嚟話我啫.

 

不過都好彩, 我老闆實在太錫我, 太會保護下屬了! 佢見個女仔惡惡咁走來同我講嘢, 佢聽到啲聽唔到啲, 咁佢就行出嚟, 剛好個女仔又走了, 我老闆好大聲問:" 佢鬧你呀?" 剛好個女仔同team另一個女的又行過來聽到我答: "又唔咪既" 咁我個情況就變成, 我無煮我個同事, 但我同事又會知佢惡咗 我老闆唔高興. 後來個女仔開完會, 都打電話來say sorry.

 

我在諗...如果我老闆無出聲, 佢應該未必知佢惡咗, 而見我唔出聲, 可能下次就會更惡對我. 呢啲情況, 有時候真係會唔知點做. 我惡啲話"我都控制唔到架," 佢下次未必會咁惡同我講嘢, 但可能之後就連招呼都唔洗打. 以第一個case來講, 如果我去同果女仔講, 叫佢自己印番, 又會點呢? 所以有好多時, 我都會...算啦! 咪做埋去囉, 又唔洗死. 就係咁嘞. 回家同老公講, 佢又會話我成日比人蝦, 唔可以咁, 我又會覺得佢唔明白我既situation囉.

釣魚

老公有個同事撩我老公去釣魚, 佢話果度可以釣到條2-3呎長的烏頭, 所以就跟佢去.

變態, 8:00am要响大埔集合, 我哋倆6am要起身, 想死.

好彩車程比我想像中快, 我哋可以响大埔火車站食個早餐先會合佢個同事

食完早餐就坐巴士入三門仔

呢度有一樣嘢要投訴: 佢個同事msg我老公, 8am 响往三門仔的小巴站等, 我哋去到火車站對住那隧道, 左邊上小巴站, 但個牌無寫邊架車去三門仔, 右邊則上巴士站, 有個牌寫74K係往三門仔, 我哋咪向74K方向去, 但上到去, 無小巴啦當然, 因為係巴士站. 响呢個時候, 我老公竟然繼續用whatsapp msg佢個同事.

頂....依家啲人係咪真係唔識/唔會打電話呢? 打得個msg, 用口問都已經問到應該點行啦!

仲有, 依家啲人真係唔細心, 我覺得佢個同事覺得我哋係好熟大埔囉! 係熟到講"往三門仔小巴站等", 我哋係會知三門仔巴士站响邊囉! 可唔可以諗下, 其實我哋係第一次去, 真係唔會知個小巴站响邊囉...唉.....

最後其實係佢同事跟佢老公就搭小巴.....我同老公係搭巴士入三門仔, 我哋遲咗好多.

 

well....好彩, 昨天早上無啦啦落咗陣大雨, 我哋就剛好呢個時間响巴士上, 因為太大雨, 船家出唔到嚟接, 去到都要繼續等.

 

落車就會見到呢個牌

碼頭影過去的三門仔村

我哋其實係去呢啲魚排釣...咪講笑, 都好多人喎! 仲見到有啲人八點幾坐船走, 原來佢哋玩通宵, 所以咁早走.

 

見到有個叔叔釣到條雞泡魚, 好搞笑

 

老公為咗呢次釣魚, 花了大約四佰蚊買了set 魚杆, 而我就只用佢好耐以前買落的"魚絲排"玩下! 實在我對釣魚興趣一般, 我比較想落水游....不過應該會比啲釣魚人士"小"我落水底; 同埋其實, 啲水好污糟. 所以老公個同事就買咗呢包嘢比我釣泥鯭仔.

嘩, 我覺得呢包嘢好勁, "精進狙擊目標魚".....講到好似魚餌會自己追住條魚比佢食咁. 旁邊果兩粒嘢, 就係我"初"出來的魚餌, 將粒嘢掛响個鈎鈎度, 放落水, 好快就有魚, 真係好勁!

 

講真架! 有好多次都係一放落去就有魚上了!! 最後我應該兩個鐘釣到大約15條...全部都係泥鯭仔. 好好玩, 好有成功感 (即係以第一次咁樣釣魚嚟計).

魚排叔叔見我哋逐條逐條釣, 就索性掉個籠, 一下就廿幾三十條捉上嚟. 不過因為我之後要去探婆婆, 奶奶又唔識煮泥鯭, 所以我哋都無攞走. 呢度釣魚, 每位$80, 我估應該係到時你釣到嘢, 就可以攞走, 賺定蝕就睇你技術同運氣了.

 

一萬蚊養活一家七口?

擒晚新聞透視, 又講生與不生的問題. 當中有三個例子.

第一個我唔特別講

第二個係一個都幾賺到錢既男人, 個仔讀國際學校, 亦打算要佢升直資中學, 如果考唔到, 就繼續國際學校

為咗要入心儀學校, 當然個仔每日都節目豐富啦! 中文班, 數學班, 朗誦, 跳舞,仲請教練個別教乒乓球

佢話要養大佢個仔, 真係要四五佰萬架!

訪問佢個仔, 問佢鍾唔鍾意學朗誦學跳舞

佢偷偷望去第二度, 細細聲講唔鍾意

第三個係一個阿媽, 已經有四女一子, 現在仲陀緊個

住500幾呎公屋, 靠老公每月萬多元收入養活一家

我見到佢間屋, 密密的塞滿晒嘢, 好恐怖, 我覺得裡面會有好多小強囉.

但我有點欣賞呢個女人, 佢既思想好正面

其實佢一家咁多人, 有可以申請綜緩, 但佢哋無

個女人仲好樂觀咁話多有多養, 少有少養

從佢口中係聽唔到佢有怨言, 沒有怨政府

佢啲仔女, 都有課外活動, 都有學小提琴, 跳舞

不同的只是佢哋响社區中心上幾廿蚊一堂

個阿媽仲會一拖四咁同佢哋去濕地公園

同佢哋玩怕醜草, 佢仲好有自信咁講"出面好多小朋友連怕醜草都未見過"!

佢唔會因為自己比人無錢, 而覺得比唔到最好既嘢自己啲小朋友

我覺得佢應該認為自己已經比了最好既嘢佢啲小朋友, 同埋開心

比著我家庭收入得萬幾蚊, 我真係唔敢生, 莫講話六個, 一個我都覺得多.

但我真係好欣賞佢既態度.

我諗起一個朋友, 佢好想生, 但佢同佢老公都搵得唔得, 未有公屋, 住劏房.

曾經我呢個朋友失業一段日子, 佢哋就响呢段日子入紙申請公屋

仲話到差不多時間就會quit咗分工, 等可以順利上樓

亦話要生, 因為人頭多一個, 上樓又話快啲

甚至兩個都唔做申請綜緩

最近佢老公失業, 我諗都有幾個月了

聽說佢老公就只係怨駡個政府幫唔到佢哋

但我想講, 呢個男人好大隻, 有手有腳, 有普通車牌, 亦有電單車牌

點會搵唔到工呢? 點解一個有手有腳無病無痛有氣有力既人, 只係識得怨政府幫唔到佢

而唔去靠自己去賺取生活呢? 我希望我交既稅唔咪去養活呢啲人, 而係真係比有需要既人用囉.

唔知大家對於, 响生日收到一個祝福口訊, 內容大約係"祝你生日快樂, 身體健康, 不勞而獲" 有咩反應呢?

呢句祝福說話是我老公send給佢外母...我阿媽的!

我媽好大反應, 問我咩意思, 仲講咗一場道理, 什麼做人唔應該不勞而獲, blah blah blah.....

我話, 講笑啫, 中六合彩都係不勞而獲

跟住我又好蠢, 同老公講笑話我媽問我咩叫不勞而獲

跟住我老公又發癲, "哼, 我祝福佢, 佢連多謝都無一句, 無啲禮貌, 我記住佢呀, 我好小氣架!"

唉....我真係唔識分佢係講笑定講真

咁我就唯有同我媽講, 叫佢哋如果見到面, 唔好再提不勞而獲, 因為人哋嬲佢無禮貌

跟住我媽又走去覆個訊息"多謝!'

咁我老公就知道咗我同左我媽講, 跟住我又受罪, 話我多事!

問題係....如果我唔講, 佢哋見面時我媽問佢咩叫不勞而獲, 又挑起我老公條根話佢無禮貌, 咁又點呢?

過咗幾日, 以為事件告一段落啦....

今朝我打比我媽, 同佢講另一件事, 講完, 佢又講番不勞而獲

話我老公講呢句說話好唔尊重, 話如果調轉同番佢阿媽講, 睇下佢阿媽會唔會鬧爆佢

我相信, 我媽認為我老公話我阿媽不勞而獲, 是抹殺咗我媽一直以來既工作

但...我真係知我老公係講笑囉! 再者...不勞而獲有咩唔好? 我都真係想唔洗做有錢洗喎!

我媽仲認真到話以後我去食飯, 唔洗叫埋我老公

呢次我都真係唔知點解決

呢兩個同日生日同星座既人, 諗嘢都係比較偏激. 事情總有兩面, 但他們總喜歡諗埋一面, 我真係點講都無用.

我去媽度食飯, 老公通常都會一齊, 咁我點呀? 同佢講我媽唔想見到佢? 咁一定死. 唔講, 咁我又用咩理由叫佢唔好去? 我現在唯一諗到, 就係我都唔去. 我會同我媽講: "你叫佢唔去, 咁我都唔去, 你叫我點同人講? 人哋同你講笑, 生日比個祝福你, 你要小氣, 咁就唯有個個都唔回來啦!" 心裡仲想加多句:"你成日話我奶奶小氣, 哼...你估我無"得"過奶奶咩? 人哋都未話唔要我上去食飯呀! 原來最小氣係你."

唉 ~~~~~~~~~~~~~~~~~~~~~~~~~~~~~~~~~~~~~~

洲際自助餐賀老公生日

老公今日生日, 但因為要返學, 所以提早昨天同佢食.

自從幾年前平安夜同佢响洲際食過燒鵝肝後, 佢念念不忘

所以今年我就話請佢去洲際再食過

鵝肝真係超肥美, 真係入口即溶果隻.
我同佢每人都起碼食咗6-7件, 要做返多啲運動減番啲膽固醇

 

羊架我都食咗兩件, 真係超級好味. 仲有一味係牛柳,
又係超正. 自家整, 真係整唔到咁好味(當然因為我功力未夠)

 

 

擒日有燕窩雞蓉燉湯, 都好好味. 但我都係鍾意飲佢既中湯, 擒晚係葛湯, 好甜好好味, 我飲咗兩碗 (我係湯怪)

當然仲有一系列魚生, 但無影相.

龍蝦仔, 肉好爽口好鮮味

長腳蟹都好新鮮, 但咸咗啲

刺生好新鮮, 肉好爽口, 師傅仲比左勁多甜蝦我

welcome drink我哋叫了奇異果汁, 好大杯, 唔咪得兩啖果啲, 飲到我食飽都未飲晒

熱盤都ok多, 不過塞咗羊架同鵝肝, 都飽咗一大半, 所以唔咪食好多

 

當然唔少得甜品, 超多款, 但太飽, 只食到呢幾款. 不過都ok既, 其實我唔好甜.

講埋個環境...其實我覺得幾逼, 尤其是攞食物既地方. 有一個位冷盤枱, 食物枱同一張餐桌距離大約只有2-3呎, 即係如果有人响度攞緊嘢食, 後面經過既人都要側身行, 同埋果張枱, 感覺好似係架硬加落去. 熱盤枱果邊都唔咪好好多, 我有幾次都比人撞. 感覺上環境唔咪太舒服囉!

我哋好彩, 老公有個朋友買了果張Priority Privilege Card, 去Intercontinental, Crown & Holiday Inn旗下的酒店食都有著數. 我哋既著數係free一個人. 佢原價係$718一位(好很貴囉), 最後我哋埋單係$861, 即係每人$430 (咁就ok嘞!) 慳番啲! 七月好多人生日呀, 又要交保險, 出血到昏迷 不過我見隔離枱用HSBC都有七五折喎! Citibank都有八五折!

今次呢, 我記低咗自己食咗咩同食咗幾多, 明天返學剛好係教我哋用果個計算卡路里的程式, 等我計下一次自助餐有幾高卡 (增加自己既內疚感, 攞嚟衰).

但係, 我仲回味緊那入口即溶的鵝肝囉