我的低能入院記 (二)

換好衫, 就瞓落病床等嬸嬸推我落去.

平時睇電視睇得多, 今次終於知道呢個感覺, 望住天花, 望住一個一個燈往後去, 其實都真係令人心情有點緊張.

不過我仲有一個感覺, 就係暈車浪的感覺

well...我平時係容易暈車, 但真係估唔到咁都會暈囉.

下次比我坐輪椅得唔得呢? 或者我自己行去都得架喎!

去到內窺鏡中心, 嬸嬸泊好張床, 就有護士姐姐走來問我嘢, 同講解個程序.

唔.....可能我眼神真係出賣咗我, 佢問我係咪好緊張

跟住就等......同埋偷聽姑娘同第二個病人講飲酒

呢個姑娘真搞笑, 問人哋係咪嗜酒, 人家話係, 佢就以一個好羨慕的口吻問人哋係咪好飲得? 係咪唔會醉? 點樣可以學到飲得啲? 小妹妹....飲酒無益架! 人哋入去照胃照腸, 可能都係因為飲得多咗, 作為醫護人員, 你唔勸人飲少啲, 都咪咁傾慕人先得架

大約等了15-20mins, 到我啦! 醫生同我講解咗啲程序, 話會落安眠藥(唔咪麻醉藥), 問我怕唔怕中途醒? 話通常落少好過落多, 我醒的時候大約係照緊腸, 唔痛的, 仲可以睇下自己條腸 ....

well....臨照前都仲要我呢個有選擇恐懼既人去決定事情, 玩咩?

我咪唯有同佢講, 你決定啦! 你話邊樣最好就邊樣啦!

跟住又話會噴啲喉部痳痺的噴霧去我個口, 係香蕉味的

然後, 我講了一句: 真係香舊味喎.....

我就無了之後的記憶了. 係完全點都記唔番的斷片

再有記憶的部份就係醒了, pat pat有啲凍, 照梗條腸, 望住個電視, 覺得好搞笑

醫生話條腸都幾好, 無息肉, 無咩事....

跟住....又斷咗, 無咗講唔該醫生同拜拜醫生, 同無咗出去既記憶, 回程望天花燈呢一斷既記憶

再有記憶呢, 就係回到房, 護士叫我碌番過我張床, 叫我休息下...

跟住....又斷咗

再有...就係瞓醒, 姑娘叫醒我...其實依家想起, 時間上有點混亂. 唔記得佢係叫醒我量血壓定去照超聲波.

以我記得, 應該係叫我去照超聲波. 可惜, 只可以照到肝同膽, 仲有膀胱, egg 巢同子宮照唔到 <----唔好問我點解要照.

照唔到係因為膀胱無水

唉...玩嘢咩, 由擒晚12點開始, 又係佢哋叫我唔好飲水, 朝早又唔準飲, 跟住就去照鏡, 然後就瞓, 起身又叫人去照, 我何來水? 何來水? 有無常識架? 激死我呀!

跟住又推番我上房囉!

輪椅...well...各位觀眾....我都係暈車浪架! 下次我會自己行架嘞!

上到去, 先灌兩杯水 <==== 又飲? well...我真係唔想. 昨晚陰影未除, 但.....

然後我走出去問佢攞番key攞電話打比老公(時間係1:00pm)

同埋問我食得嘢未 <----- 這是最重要的.

 

 

 

叫了個大大份的是日套餐, 擒晚已經睇定, 好期待的!!

可惜, 一路食, 個肚一路痛 最後食剩3/4碗飯 <--- 都可以食晒碟餸, 湯同橙, 應該都係一個好忍得痛而又變態為食人

個餐嚟之前, 醫生上過嚟, 講解過我照咗啲咩, 有咩事, 話會簽定紙比我今日出院

跟住大約3點 <----- 擒日醫生話我中午走得, 點解我仲响度架????????

我走出去話, 我可以再落去照未?

佢問我有無急尿? 我話有 <------ 其實我個肚好痛, 都唔知係急尿定痛, 心諗兩個鐘幾杯水, 點都應該係急啩?!

入次我係行落去的!

可惜, 都係唔夠囉! <----- 媽咪 ~~~~~ 我飲咗啲水去晒邊? 我要出院呀!!!!!

最後咪响超聲波中心, 一邊睇貪曾點比人插, 一邊飲水, 一邊等, 等, 等, 等, 等......

最後人家4:30收工, 我就4:15終於夠水可以照到了, 照完既時候, 我係急到爆炸的!

以我估計, 因為我前一晚飲瀉水清腸, 加上成晚成朝無飲過水, 所以腸胃缺水, 所以我一飲水, 佢就吸呀吸, 吸呀吸...無多餘的水去膀胱等出海. 嗚嗚嗚...我乾到臉到乾埋, 出了好多油脂粒呀

好, 終於搞掂! 可以沖個涼等出單, 出院!

低能事件開始! 小妹唔夠錢出院! 要搵救兵! < ----- 呢啲人無錢學人住二等房, 不知所謂, 嘿!

原本媽媽話嚟接, 後來佢打嚟問我點, 我話...你應該都要嚟....我無錢.

因為我原本只預住普通房, 聽人講都係五, 六千蚊啫, 一張credit card夠啦!

怎知醫生咁開心叫我住二等房, 我又咁開心真係住二等房, 仲要做埋咁多九唔搭十既檢查, 最後埋單.....

我都係唔講個總數了, 總之我張爛鬼咭唔夠囉! 仲要, 我張爛鬼咭, 上個月買了舊金仔未找數, 入院時簽了萬二, 打去check, 得番2500可以碌 <---- 呢位白痴低能的小朋友, 淨係兩日的房錢都唔夠啦! 報警拉你住霸王院

媽媽嚟到, 佢又咁啱只係帶了張廢柴enjoy咭, 得8000蚊! 都仲差好多.

嘿, 呢位白痴低能既小朋友, 有天父的保守, 執嘢入院果日又手多多帶埋個無謂coupons紅簿仔袋喎. 入面竟然有張銀聯咭.

但係, 銀聯唔係度度收喎! 哼.....我打死都唔信浸會唔收銀聯 <---- well, 人家內地產婦係比現金, 吹咩?!

好彩, 真係收

不過我呢張"白金"咭, 都係得萬五蚊credit 額 <--- 人工低, 咪比咁少你囉!

最後, 我哋用了三張信用咭加現金去埋單出院, 真係超級無敵霹靂閃電勁白痴兼肉酸

不過, 原來二等房客, 係有專人上來同你收錢, 唔需要去排隊比錢. 呵....肉酸...都唔駛响咁多人面前, 留番少少面子

應該有wow同學會問, 我老公去咗邊呀?!

放唔到工嚟唔到救我囉! 唉.....點解响緊要既時候, 佢會出現唔到既?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

入院後感:

• 照過腸後, 之後五年都唔洗再照 < ---- 我希望我呢一生都唔洗再照 <---咁你响4年零11個月死咗去, 咪唔洗照囉, 嘿!
• 或者希望五年內有人發明一種好味啲既瀉水
• 或者唔該啲醫生同護士試下飲一啖. 當你哋知道啲味既時候, 或者你哋會諗辦法等病人飲得舒服啲.
• 如果真係要照(提示大家), 請照前三天不要食生果, 菜等高纖維食物, 入院當天只食流質食物. 咁就唔駛瀉得咁慘烈, 但都係要飲瀉水, 只係唔駛痾咁多就就可以合格
• 記得帶夠錢
• 私院啲護士, 嬸嬸, 醫生同其他工作人員, 真係超超超好人, 友善, 好笑容, 有禮貌, 細心. 有個護士發現我枕頭唔夠高, 我照完鏡回來, 佢加了個枕頭比我, 所以果嘢我瞓得超好, 當然因為安眠藥作用, 但我真係好多謝佢的細心, 佢話見我對摺了個枕頭. 所以我真係好感激同多謝一班醫護人員!
• 如果真係保險夠cover, 或你好有錢, 真係去私院同住二等房. 經歷咁辛苦的一晚, 我感恩可以住一個舒服啲環境, 等我的辛苦可以減輕
• 我會好好注意飲食, 保護我既胃仔, 腸仔, 我唔想再入院. 我真係會乖架啦! 大家都要呀!

我的低能入院記 (一)

因為個胃成日痛, 所以最後都叫醫生寫紙比我入院照照~~

呢次係我成日以嚟, 第一次入醫院, 細個入過一次, 覺得好開心架, 唔駛返學, 又有好好味的葡萄糖水飲. 有個小朋友唔鍾意飲, 我仲幫佢飲埋, 所以我好快就出得院

星期三請半日假回家執嘢同沖涼, 5:30pm 去到浸會, 要先去門診見一見醫生

先講環境, 浸會真係一流, 除了佢係基督教醫院週圍都有聖經金句讓我更加舒服外, 工作人員既口面, 環境既舒適度, 都可以講係一流! (公院既護士們, 你哋既口面雖然的確係無私院的好, 但我絕對明白你哋既苦況, 所以先有咁既口面)

見醫生, 佢都好仔細, 亦好仔細研究我份保單(公司...hehehe), 話我知我其實可以住二等雙人房. 呵呵...第一次入醫院就入私院, 仲要住雙人房, 我如果無咗呢份工, 就千萬唔好病, 已經竉壞了!

唔知係咪因為會住二等房, 所以睇完醫生, 就只需要响出面等, 唔駛自己去搵入院部, 就有人姐姐過來帶我去入院部, 仲唔駛排隊, 就可以輕輕鬆鬆搞入院.

跟住又有個姐姐帶我上去, 去到姑娘幫我量血壓, 做問卷, 跟住就帶我入房. 嘩...真係有私人電視架(之前KB同我講, 我唔咪好信...嘻嘻...)

 

 

 

仲有呢兩個包包, 一個係有晒洗頭水....牙刷...毛巾....連眼罩都有的日用品包包, 可以帶走據為己有, 呵呵...是二等房先有, 普通大房無的. 佢哋只有隔離的綠色包包, 係比你袋住啲銀包電話走圍行時用的.

搞一搞, 其實都差不多七點.

因為我順便照埋腸, 所以晚餐只可以食粥水.

 

 

粥就粥, 水就水, 我終於明白咩叫粥水了....係唔會見到米粒的

好可惜, 上次來探媽媽(都係照腸同胃), 見佢個menu有好多正嘢食, 仲諗住同老公開餐.....嗚嗚嗚

 

 

中途仲比人拮了呢粒嘢, 好痛, 仲要一路痴住响到, 郁小小都會抽一抽咁痛

食完個粥水, 惡夢就開始了........

因為要照腸, 所以要清腸, 要飲瀉水, 瀉清你腸入面所有嘢...係...所 有 所 有 嘢....

達標的要求係, 大便痾到好似小便一樣咁清徹

而啲瀉水, 老實講, 我真係唔知點形容, 但我可講係我呢世人飲過最難飲既水

如果你覺得中藥苦茶好難飲咩? 我話你知, 你飲過瀉水後, 你會覺得苦茶其實都好好味, 起碼你可以食糖送.

如果真係要形容味道, 我會話佢有一陣膠味, 即係膠開水, 再加啲鹽, 有啲咸味.

唔咪只飲一杯, sorry, 係飲一公升, 仲要我一個鐘之內飲晒.

因為跟住仲有另外兩支小藥要飲.

呢兩支小藥, 感覺上會好過之前那一公升, 但都係難飲, 只因為大約係普通藥水樽的份量, 仲可以溝水, 飲完之後就飲5杯普通清水就ok, 所以才說感覺好啲. 呢支小藥的味道係極咸(極, 真係極, 可能大約係一杯加了十匙鹽的水)同酸.

由8點開始那一公升後, 一路飲, 就一路痾, 成晚, 十幾次. 到一點, 比姑娘睇都係未合格, 但佢叫我去瞓, 明天痾多次比佢睇.

題外話, 當知道護士要睇我哋屎既時候, 我深深覺得護士既偉大. 自問, 我連自己睇自己既屎都想嘔, 更何況佢哋睇人哋果啲? 仲要唔咪睇一個或一次喎! 私院環境好, 無咁多病人, 人工又高啲, 護士們工作的確係舒服啲, 心理質素亦會好啲, 所以呢度啲護士同嬸嬸都笑容滿面, 和藹可親. 但亦令我深深體會公院的護士們, 明白佢哋點解成日黑口黑面, 因為佢哋人手不足, 一個護士可能對十幾個病人, 睇屎可能都睇多十倍. 試想像要我每日睇幾十次屎, 我都變屎樣啦! 所以真係希望政府可以加多啲錢比公立醫院, 比佢哋請多啲人手, 改善佢哋既工作環境同人工.

瞓, 當然瞓得唔好啦! 始終都係醫院, 你估酒店咩?! 張床..."林"到成個人係凹咗入去. 個枕頭又偏喎! 當然最仲要係個肚好攪啦! 仲有, 姑娘每四個鐘就入嚟量血壓.

第二朝七點幾就醒了, 痾咗一次, 都係未合格, 超灰 最後要用另一種方法等我再痾勁, 不過我呢度唔講了, 總之就可憐啦!

原本約了9:30am去照超聲波, 係成個內臟照晒, 點解? 關胃咩事?

其實無關架! 大約應該係醫生見我份保險咁正, 咪等我照多啲嘢囉! 肺都照埋添, 差在未做磁力共振咋! 咁既然保險可以cover (希望真係可以claim足), 咁咪照囉!

啊...原本11:30就照胃鏡, 怎知8:30am嬸嬸就走入嚟話我做咩唔換衫, 話依家落去照胃

都無人通知....唉...於是就立即send了個msg "我現在去照" 比老公, 嗱嗱聲換衫.

可憐既老公, 一等, 就等到1:00pm先再有我既消息, 嚇死佢!

好似長咗啲, 分兩集先 ~~~~~

 

 

返學返到有啲驚

不知不覺已經返咗5堂, 今日第6堂

上一堂, 教咗12種細菌, 係會由食物帶比我哋既細菌, 當然繼續係外星字, 讀到頭都大

不過已經開始認得佢哋

但係一路讀, 就一路驚, 因為呢啲細菌真係無處不在.

好似金黃葡萄球菌 (注意....以下....我唔知我有無理解錯誤)

係好易痴响啲煮好又放咗好耐既食物, 例如燒味

的確佢係以高溫煮過, 但你係唔會知佢掛咗响果度幾耐, 亦唔知有無金黃葡萄球菌人行過打個黑次, 痴咗啲菌

所以原來買燒味老味果啲嘢, 返到係去最好係要煮番.

但係, 從來我媽買啲燒味老味, 都係唔會煮熱, 通常係就咁食

就連我的衛生幫老公, 買燒味都係就咁食

所以我決定, 以後燒肉叉燒自己整...hahaha....橫掂我有光波爐, 嘩哈哈哈哈!

又好似肉毒桿菌

罐頭係最適合佢哋生長

如果食物工廠無好好處理, 以高溫高壓處理啲食物, 咁就會有問題

問題係....我唔會知啲食物工廠點制作食物喎!

不過....除了沙甸魚, 大部份罐頭我都會煮過先食

同埋我好少食罐頭嘢!

再睇一啲資料

話出面buffet其實都係危險架!

有好多菌都要120度以上先可以殺死

放得响室溫太耐就好助長啲細菌滋生

咁我哋見啲buffet盆下面有放啲火仔

但我唔覺得啲火仔可以煮到120度囉!

之但係, 我成日食buffet, 又真係未試過有試喎! 感謝主保守!

其實我自家一路以嚟對食物衛生都真係有點求其. 我係可以就咁食隔夜放咗入雪櫃的凍雞, 仲覺得幾好味添喎!

比我老公知道一定鬧死!

miss話, 其實唔駛驚, 食物只要處理得好, 啲接觸既人衛生做得足, 係無嘢既.

問題係, 我點可以sure佢哋做得好呢?

所以真係越讀越驚 >.<

夢

早幾日發咗個夢, 一起身, 我便不斷在說"我要去做農夫!"

個夢係咁既:

同老公去咗唔知邊個商場, 但成個商場都係塑膠產品

五顏六色, 小膠椅, 小膠枱, 膠盒子....... 全部到叠到上天花

成個商場都係, 人行既路都窄到只夠一個人穿過

我問點解有咁多膠產品?

有人話因為所有人都去晒工廠生產呢啲膠嘢

果度有既產品, 係預每個人民都會每款買一件

之後唔咪好記得, 便醒了!

我醒來時個意識係, 無農夫了, 所有人都去晒工廠去生產膠嘢

我哋就快無嘢食, 要食膠

所以我要去做農夫

其實都係架, 大城巿真係生產好多垃圾, 亦浪費很多東西

有一次行超巿, 每一個架上面都係滿滿的食物

基本上, 我係幾可以肯定, 所有嘢都係無可能响限期前賣清

加埋最近綠色和平派果個無間道入超巿做part time

佢圖文並茂咁指出超巿係極度浪費食物

好多未爛既菜, 賣唔去的, 係會成包掉咗去

甚至係會倒一啲嘢落去, 等啲員工同街外既人唔可以執

問佢哋會唔會可以將呢啲食物捐去食物銀行, 佢哋只係話會考慮, 咁即係唔會啦!

真係好浪費呀!

每年一到夏天, 我就有個問題

究竟是因為多人開冷氣, 所以搞到出面好熱, 定係因為出面真係好熱, 所以先要開冷氣呢?

呢排唔咪咁好

呢排都唔知做咩

先來個皮膚敏感, 搞到隻手花綠綠, 到依家都未退晒

星期一晚去食飯, 冷氣凍過雪房, 結果返到屋企, 勁頭痛

星期二起身, 仲有啲wing wing地, 結果無返工

今朝起身, 又胃痛. 開初都只係少少痛, 白痴既我仲走去食yoghurt, 結果係喪痛

個肚仲脹到連褲扭都扣唔埋

一邊坐地鐵返工, 一邊痛到標冷汗, 仲要今日架地鐵超大風同凍

真係胃痛好返都變做感冒

返到公司, 痛到坐唔直, 行到行唔到

最後頂唔順, 同老闆講聲, 早走去睇醫生

近呢半年痛密咗, 一個月總有一次.

唔咪M痛, M痛都無依家咁痛呀!

所以最後都係叫醫生寫紙比入院照胃鏡

約了下星期三入院, 星期四照

希望入面無咩事啦!

除了身體唔多好, 運氣都超差

話說七仔最近咪換麥o麥足總盃公仔.

我一直只心儀那隻小龜龜輝輝

咁我都唔咪強求既, 儲得齊貼紙咪去換囉!

星期六有人比咗廿幾個我, 加埋我之前之後的6,7, 8個

就可以換到兩個

第一個抽到的是...講波佬校長

我相信沒有任何人係想換到佢囉! 唉....但我抽到.

頭先再抽到二個, 是.....扭身扭勢miss chan

應該亦都沒有人想佢囉!!

我相信如果我點都要抽到輝輝, 我應該都要抽齊成套兼有重複, 都未必抽到了!

所以....最後老公幫我以40蚊買了輝輝回來

米晒時間晒錢買埋啲無謂嘢去儲貼紙了

討厭星期日

我真的越來越討厭星期日.

自從結婚後, 我的星期日就是早上返教會, 有時候11時完成, 有時候1點完成, 之後便開始漫遊時間, 直到五點便開始响葵興方向去, 去我奶奶家食飯. 因為我們住將軍澳, 教會在旺角, 車程都差不多一小時, 總不能崇拜後回家, 又再多花個多小時由將軍澳去葵興. 結果, 每星期日便在旺角漫遊.

香港有多大?

旺角又有多大?

個個星期如是, 真的浪費時間又浪費青春

早一點上奶奶度, 要不就望住兩個細路玩打了十年都唔厭的孖寶賽車兼忍受高分貝燥音, 要不我就躲在老公以前的房間睇電視 <==但星期日有什麼好節目?

有時候, 真的很想崇拜後可以回家, 做下自己想做的事. 油下我第二幅的油畫, 又或者抄作一個絲帶花球 <== 這東西, 借了人家的花球快兩年, 還沒有時間動手, 可能要等人家生埋小朋友滿月時都唔知還唔還到.

有時候, 亦好想星期日可以去效遊一下.

好像今個星期, 星期六有個小喪禮要去, 都已經見到奶奶成個朝早, 之後亦一起飲茶. 其實奶奶都有提出話星期日可以不回去食飯, 大家姐一家都不回去, 但我那醒目的老公, 竟然答"點解唔食呀?" 結果, 昨天2點鐘睇完戲(昨天無返崇拜 ), 便開始漫遊, 直到6:30奶奶和二家姐二姐夫出來旺角食飯. 即是我又浪費了4.5小時生命.

雖然, 奶奶現在都進步咗, 肯退一步出來旺角食, 不用我們山長水遠去葵興, 然後叫外賣响屋企食.

但如果可以, 比番個星期日我可以嗎?

第二堂後感 ~ 外星文

星期二上了第二堂, 是另一個老師教. 後來聽見原來她正職是中學老師, 教新高中課程的bio, 副業就是HKU SPACE的instructor. 她的來頭都不算小, BS in Nutrition, 仲好似有PHD的Science of Food.

不過她的英文就麻麻地. 十分港式, 很多是會在句子尾加"啦", "囉". 有一些口音港式, 聽到我耳頭都側了!

今堂主要講她將會教的Microorganisms, 不斷說這些 little living things 是她的朋友, 也將會是我的朋友.

她所講的 little living things, 其實係 bacteria, virus (呢兩個字我都仲識, 外星文準備出現), Microalga, Protozoan < == 這兩個讀都有問題, 仲有Fungus <==都聽過!

然後她就繼續講更加多的外星文:

Vibrio cholera <== 霍亂孤菌

Lactobacillus <== 你今日飲咗未呀?

Saccharomyces cerevisiae <== 酵菌的一種, 要來整麵包, 酒...那些好菌

Rhizopus nigricans <== 黑色的霉菌

Prokaryotie microorganism <== 原核細胞

Clostridium <== 女人最愛....肉毒桿菌

Stehylococcus aurus <== 金黃葡萄球菌

.

.

.

.

如果有護士們在看, 你們以前係咪有讀過這些外星文? 可以給小妹一點提示怎樣去和它們做朋友嗎?

全部都是外星文,看見...想死. 要記得它們....好想死, 要記得它們怎串.....非常想死...

估不到一開始便教些高難度topics. 老師話一開始學總好過最後先學. 課程剛開始, 學生們都雄心壯志, 所以要先教最難的.

但我個人認為, 這些外星文減滅了我對營養學的火. 你放到最後, 我還可以說都差不多完了, 捱下去吧!

現在, 或者我要跟自己說...前面既路還是光明, 先苦後甜吧!!