無心機搞的歐旅

一早已經諗好今年九月尾十月要去歐洲, 點都一定要去, 因為我從來未去過歐洲
低能白痴咁諗, 如果真係12月世界末日, 起碼, 我都去過歐洲

每次去旅行都有一個難題, 叫唔叫媽媽去呢? 一叫, 就係要兩個媽媽都要叫
咁好啦, 東歐, 大家都未去過, 況且都係打算跟團, 萬大事都有個領隊可以幫手, 亦有其他團友可以比佢哋傾計
我哋亦諗最最最完美係, 她們兩都各自搵到一個朋友同行 <== 超, 佢哋有朋友同佢哋去, 就唔駛痴仔女去啦

基本上,團我都睇過下, 應該都係勝景遊
怎知, 我媽媽上星期突然同我講, 佢唔去 真係跌晒眼鏡, 因為佢係好想好想去旅行, 尤其歐洲
表面原因, 她說因為她家的大廈在維修, 搭晒棚, 唔放心兩個星期家裡無人
內裡原因, 她曾經同我講, 擔心如果大家都搵唔到朋友, 同奶奶一齊去, 一間房, 會出事!
我媽又真係好口直心快, 有果句講果句, 百彈教主
而我奶奶則口是心非, 咩都無所謂, 但到頭嚟又嬲人
大家想像得到這兩位女士在一起會有咩事發生啦!
試過奶奶來我家食飯, 我媽亂講嘢, 出事!
無當場吵, 但黑面囉!
之後我話我媽, 叫佢講嘢小心啲, 唔好話人個仔無用, 唔好話我哋間屋細 <== 我媽又真係衰, 有間800呎既屋比佢個女住, 你話佢想點? 只不過間屋唔咪我哋名, 係奶奶同二姑奶比我哋"住住先" 我阿媽個仔, 結婚五年, 都係住間400幾呎的屋仔, 人哋個外家都未嘈啦!

講番旅行, 咁媽媽唔去, 即係得番我奶奶 and / or + 她朋友
可惜, 99%佢係搵唔到朋友 <== 都話, 搵到就唔洗痴仔女啦
咁亦即係好大可能係三人行
奶奶仲好強調佢唔介意同領隊一間房 < === 好感動囉!

問題係:
1. 如果領隊係男的, 佢哋係唔會安排男領隊同女團友同房, 咁係咪會變咗派我老公去同男領隊同房, 而我同奶奶同房.... 諗到呢度, 我已經唔敢諗落去
2. 坐車時的編排呢? 我話算, 老公去同佢媽坐好了, 等我一人坐兩個位, 蹺腳又好蹲响度又好, 舒服啲
3. 我相信我老公會好辛苦....唉....左右不是人....就係咁解

仲有好多其他問題, 我都真係唔敢去諗.
或者可以同佢講定, 唔好蹺住我行街 (好怕, 諗起已經毛管洞), 唔好咩都話買買買, 又或者話送比我哋, 又或者話請我哋, 又或者未經我哋同意買咗, 然後話幫你買來送比人的手信 (布吉之旅試過), 我哋勞動階層, 有能力, 唔駛一個退休人士去送去請; 唔好催我哋上車

或者我諗多咗

但係, 真係自從有呢個安排之後, 我真係失去了睇團同報團既熱心
老公仲晚晚問我點, 佢係明白我既擔心, 但...可以點呢?
原本二家姐同姐夫7月尾去, 係話帶埋奶奶去的, 怎知他們的朋友唔去, 又得凸了奶奶, 他們最後飛起奶奶
如果我哋又飛起佢, 佢一定好唔開心, 我都唔想咁
所以老公就氹我, 叫我將就一次.....

唉..........................................