三月

三月都終於就完了! 真係恨不得它快快快快快快....啲過, 因為實在太多事發生了.

爸爸:

2月28日收到爸爸的whatsapp, 話他入了醫院. 放工便去看一看他.

註: 我同爸的關係一般, 自從父母離婚後, 其實一年都只是見兩三次. 我對佢其實無憎恨, 我知他錫我的, 但就係無嘢講, 溝通唔到.

 

他一向心臟有事, 通過兩次波仔. 佢話自過年後個心便好似有啲嘢, 唔舒服, 所以搞掂啲嘢便入院.

這天探佢都無咩嘢, 預計佢應該過兩日可以出院.

點知.......

 

3月3日中午, 哥哥無啦啦send個msg來, 話爸爸入了深切治療部. 跟住打嚟話, 醫院話佢嘔, 突然變得好差, 情況好危殆. 但哥哥又話即刻去都做唔到咩, 於是我就繼續工作, 但個心好亂. 最後同個朋友傾, 佢叫我即刻去, 於是便同老闆講, 走.

 

去到, 護士即開門比我, 見爸爸成身插晒喉, 好恐怖. 護士就同我講爸爸情況好危殆, 急性心衰竭, 肺炎, 腎衰竭, 仲問我家裡有咩人要通知....問到呢個問題, 真係好嚴重咁, 呢個時候, 我既眼淚亦控制唔到咁係咁流....

 

護士叫我可以捉住爸爸既手, 同佢講嘢(不過佢係聽唔到). 無耐, 護士話要幫佢準備抽肺水, 叫我出去, 於是便出去坐, 一個人坐咗成個鐘, 哥哥先出現. 呢個鐘我就係咁whatsapp朋友, 亦whatsapp教會傳道人, 教會弟兄姊妹, 請他們祈禱, 一路係咁喊, 喊咗成個鐘. 痴咗.

哥哥嚟到之後, 就入去一齊見醫生, 又係問仲有咩家人要通知. 呢個時候, 爸爸kind of係醒的, 但係只係無意識地爭扎, 係咁郁, 仲恐怖. 之後醫生又話佢哋要繼續做嘢. 我們又出番去, 一等就等了兩個鐘先可以再入去, 呢段期間阿嫂, 我媽, 同我老公都到了, 我亦唔再喊.

 

之後幾天, 我便幾乎日日去一次醫院. 感恩地, 第二日, 爸爸已有好轉, 由危殆變為嚴重, 第三日已經醒了, 但依然要用呼吸機, 但聽到, 同埋可以寫字, 第四日已經可以講嘢, 第五日便上番普通病房, 再過多三四日便出院了. 依家, 佢又好似以前咁行得走得, 點我們做呢樣做果樣.

 

昨天陪他去覆診, 有一條血管塞了1/3, 又要通波仔.

希望這次在天堂門口打了個轉後, 佢會乖乖地唔好再食高脂,高膽固醇既嘢, 好好注意健康.

註: 深切治療部, 原來唔係好似電視劇咁要換晒衫先入得, 同埋係唔會隔住玻璃. 同普通房一樣的, 只係少啲床, 多啲儀器.

貓貓:

有日發現廁所洗手盆有血漬, 是貓貓血腳印....邊個????

最後發現是大貓卒卒啲趾甲太長, 插了入自己啲肉枕, orzzz... 睇見都覺得痛.

呢隻大貓唔比人抱, 單手摸ok, 一見你伸雙手就走, 所以完全幫唔到佢剪.

加上都插到流晒血, book醫生睇啦.

點知, 又發現小貓比比, 呢兩日狂打黑次, 廢事煩, 一次過去睇醫生.

卒卒既趾甲問題, 醫生兩下就啪啪啪幫佢剪晒, 再幫佢消毒. 搞掂.

比比話係貓瘟, 不過佢有打針, 所以屬傷風感冒, 開了藥給他.

點知, 食咗幾日, 叫做少了黑次, 但每次打黑次係會噴血囉

於是, 又再去睇醫生, 又開了另一種藥.

點知都係唔得, 又再去, 今次要種菌, 睇下係咩菌搞到佢咁..

搞搞下, 唔知係咩原因, 佢開始狂去廁所小便, 但係無便便出....

打比醫生, 話要即刻帶佢去, 怕佢係尿道炎, 會爆肛.... 咩事呀....

搞到依家, 都仲未好.

現在每天早上同晚上都要餵藥, 佢好唔鍾意, 係咁想吐出嚟, 又吐白泡, 餵到唔想再餵.

家居:

又無啦啦, 洗衣機壞了, 响咁忙既日子壞機, 要約人嚟睇, 又要搵時間去睇同買, 仲要等送機. 勁頻樸.

搬家:

不是我, 是我爸. 入院前, 佢剛剛搬了去將軍澳, 屋都未執好便入院. 無啦啦住近咗我, 我便責無旁貸地走唔甩要幫佢處理佢家居既問題. 响佢出院前既星期日, 捉了我老公上去幫佢鑽牆掛櫃, 又幫佢整好個櫃. 出院後, 又一個星期日要幫佢去買床板. 基本上成個三月既星期日都比晒佢, 老公當然炸型啦! 所以就勁鬧交, 唉....

係咁多, 再多啲我真係處理唔到了.

三月最後的三日, 將會响台中台北渡過, 我又去跑馬拉松了. 希望這個旅行, 為我既三月加番一點開心事.